អនុប្រធានាធិបតីអាម៉េរិក លោក JD Vance៖ ការចរចាជាមួយអ៊ីរ៉ង់បានបញ្ចប់ទៅវិញ ដោយគ្មានកិច្ចព្រមព្រៀងក្នុងពេលចារកម្មអាមេរិករកឃើញថាចិនកំពុងបញ្ជូនអាវុធឲ្យអ៊ីរ៉ង

ប៉ាគីស្ថាន៖ អនុប្រធានាធិបតីអាម៉េរិក លោកចេឌីវ៉ាន( JD Vance) នៅថ្ងៃអាទិត្យនេះ បានថ្លែងថា ការចរចារវាងអាម៉េរិក និងអ៊ីរ៉ង់ បានបញ្ចប់ទៅវិញដោយគ្មានលទ្ធផលផ្លែផ្កា ឬកិច្ចព្រមព្រៀងអ្វីទាំងអស់។ មូលហេតុដោយសារតែភាគីអ៊ីរ៉ង់ បានបដិសេធមិនព្រមទទួលយកលក្ខខណ្ឌរបស់អាម៉េរិក ដែលតម្រូវឱ្យពួកគេបញ្ឈប់ការផលិតអាវុធនុយក្លេអ៊ែរ ។ 

លោក Vance បញ្ជាក់ថា ការចរចាដ៏តានតឹងនេះ បានអូសបន្លាយពេលរហូតដល់ ២១ ម៉ោង។ ក្នុងអំឡុងនោះ លោកបានទាក់ទងជាប់ជានិច្ចជាមួយលោកប្រធានាធិបតី ដូណាល់ ត្រាំ និងមន្ត្រីជាន់ខ្ពស់ផ្សេងទៀតនៅក្នុងរដ្ឋបាលរបស់លោក ដើម្បីពិភាក្សាលើការសម្រេចចិត្តផ្សេងៗ ។

ក្នុងសន្និសីទសារព័ត៌មាននៅទីក្រុងអ៊ីស្លាម៉ាបាដ លោក Vance បានបញ្ជាក់សារជាថ្មីនូវជំហររបស់សហរដ្ឋអាមេរិកថា៖ «យើងចាំបាច់ត្រូវតែឃើញនូវការប្តេជ្ញាចិត្តដោយបញ្ជាក់ច្បាស់លាស់ថា ពួកគេនឹងមិនស្វែងរកអាវុធនុយក្លេអ៊ែរ ហើយពួកគេនឹងមិនស្វែងរកឧបករណ៍ទាំងឡាយណា ដែលអាចឲ្យពួកគេសម្រេចបាននូវអាវុធនុយក្លេអ៊ែរយ៉ាងឆាប់រហ័សនោះឡើយ»។ លោកបានហៅចំណុចនោះថាជា «គោលដៅស្នូល» របស់ប្រធានាធិបតី ដូណាល់ ត្រាំ នៅក្នុងការចរចានេះ។

សូមបញ្ជាក់ថាបើតាមការផ្សាយរបស់ CBS News, គេដឹងថា ភាគីទាំងពីរចរចាគ្នាលើលក្ខខណ្ឌចំនួន១០ចំណុច ប៉ុន្តែបន្ទាប់ពីកិច្ចប្រជុំនៅទីក្រុងអ៊ីស្លាម៉ាបាដ ក្រសួងការបរទេសអ៊ីរ៉ង់បានចេញសេចក្តីថ្លែងការណ៍ ដោយបញ្ជាក់យ៉ាងច្បាស់ថា លក្ខខណ្ឌចំនួន៣ជាមូលហេតុនាំឲ្យការចរចាបរាជ័យ ព្រោះតែភាគីទាំងសងខាងខ្វែងគំនិតគ្នា។

ក្រសួងបានបញ្ជាក់នៅថ្ងៃអាទិត្យទី១២ខែមេសាឆ្នាំ២០២៦ថា ភាគីទាំងពីរបានពិនិត្យឡើងវិញនូវសំណើ ១០ ចំណុចរបស់អ៊ីរ៉ង់ រួមជាមួយជំហររបស់សហរដ្ឋអាមេរិក ហើយបានឈានដល់ការយល់ឃើញរួមគ្នាលើចំណុចមួយចំនួន ប៉ុន្តែការខ្វែងគំនិតគ្នានៅតែបន្តកើតមានលើបញ្ហាធំៗចំនួន ៣ ដែលជាឧបសគ្គរារាំងមិនឲ្យមានកិច្ចព្រមព្រៀងចុងក្រោយបាន។

នៅចំពោះមុខបទឈប់បាញ់ដ៏ផុយស្រួយ ចារកម្មអាមេរិកបានបង្ហាញថា ប្រទេសចិនកំពុងរៀបចំបញ្ជូនប្រព័ន្ធការពារដែនអាកាសថ្មី ទៅឱ្យអ៊ីរ៉ង់ក្នុងរយៈពេលប៉ុន្មានសប្តាហ៍ខាងមុខ។ នេះបើយោងតាមមនុស្សបីនាក់ ដែលដឹងពីការវាយតម្លៃចារកម្មអាមេរិកថ្មីៗនេះ។ ចារកម្មក៏គូសបញ្ជាក់ពីរបៀបដែលអ៊ីរ៉ង់ អាចប្រើប្រាស់បទឈប់បាញ់រយៈពេល២សប្តាហ៍ ជាឱកាសដើម្បីបំពេញបន្ថែមប្រព័ន្ធអាវុធមួយចំនួន ដោយមានជំនួយពីដៃគូបរទេសសំខាន់ៗ។ ប្រភពពីរបានប្រាប់CNNថា មានការចង្អុលបង្ហាញថាទីក្រុងប៉េកាំងកំពុងធ្វើការងារ ដើម្បីដឹកជញ្ជូនឆ្លងកាត់ប្រទេសទីបី ដើម្បីបិទបាំងប្រភពដើមរបស់អាវុធ។ ប្រភពទាំងនោះបាននិយាយថា ប្រព័ន្ធដែលទីក្រុងប៉េកាំងកំពុងរៀបចំផ្ទេរ គឺប្រព័ន្ធមីស៊ីលប្រឆាំងយន្តហោះបាញ់លើស្មា ដែលគេស្គាល់ថាMANPADs។

លោកដូណាល់ ត្រាំប្រធានាធិបតីអាមេរិក ដែលគ្រោងបំពេញទស្សនកិច្ចទៅកាន់ប្រទេសចិន នៅខែក្រោយនេះបាននិយាយថា ទីក្រុងប៉េកាំងនឹងប្រឈមមុខនឹងផលវិបាក ប្រសិនបើបញ្ជូនអាវុធទៅកាន់ប្រទេសអ៊ីរ៉ង់។យ៉ាងណាមិញ អ្នកនាំពាក្យរបស់ស្ថានទូតចិនប្រចាំទីក្រុងវ៉ាស៊ីនតោន បានប្រកែកថាមិនមែនជាការពិតទេ ដោយបដិសេធថា ប្រទេសចិនមិនដែលផ្តល់អាវុធដល់ភាគីណាមួយនៃជម្លោះនោះឡើយ។ ចិនបានអះអាងដូច្នេះថា ក្នុងនាមជាប្រទេសធំមួយដែលមានទំនួលខុសត្រូវ ប្រទេសចិនតែងតែបំពេញកាតព្វកិច្ចអន្តរជាតិរបស់ខ្លួនជានិច្ច។