អតីតរដ្ឋមន្ត្រីក្រសួងពាណិជ្ជកម្មនិងរដ្ឋមន្ត្រីក្រសួងឧស្សហកម្មនាវនុវត្តន៍អាណត្តិទី៦លេចមុខឡើងវិញក្នុងសមរភូមិសេដ្ធកិច្ច!

ភ្នំពេញ៖ លោកកិត្តិសេដ្ឋាបណ្ឌិត ចម ប្រសិទ្ធ ឧត្តមប្រឹក្សាផ្ទាល់ព្រះមហាក្សត្រ និងជាតំណាងរាស្ត្រមណ្ឌលខេត្តកែប បានបង្ហាញមុខឡើងវិញកនាមបេសកជនពិសេសរដ្ឋាភិបាលក្នុងការកសាងទំនាក់ទំនងសេដ្ឋកិច្ចពាណិជ្ចកម្ម។ 

នៅព្រឹកថ្ងៃទី៦ ខែមេសា ឆ្នាំ២០២៦លោកកិត្តិសេដ្ឋាបណ្ឌិត ចម ប្រសិទ្ធបានទទួលជួប លោកស្សាហារុឌីន​ប៊ិន​អន( Shaharuddin Bin Onn )ឯកអគ្គរាជទូតម៉ាឡេស៊ីប្រចាំព្រះរាជាណាចក្រកម្ពុជា ដើម្បីពិភាក្សាការងារ ដើម្បីលើកកម្ពស់ទំនាក់ទំនងទ្វេភាគីឱ្យកាន់តែរឹងមាំនិងស៊ីជម្រៅឡើងថែមទៀត។

ជាលទ្ធផល ភាគីទាំងពីរបានឯកភាពគ្នាបន្តអនុវត្តយន្តការដែលមានស្រាប់ និងរិះរកយន្តការថ្មីៗបន្ថែមទៀត ក្នុងគោលដៅបង្កើតផលប្រយោជន៍រួមរវាងកម្ពុជា និងម៉ាឡេស៊ី ជាពិសេសក្នុងក្របខណ្ឌស្ថាប័ននីតិប្បញ្ញត្តិ ដើម្បីបម្រើដល់ផលប្រយោជន៍ស្នូលរបស់ប្រជាជននៃប្រទេសទាំងពីរ។

លោកកិត្តិសេដ្ឋាបណ្ឌិត ចម ប្រសិទ្ធ និង ឯកឧត្តម Shaharuddin Bin Onn ក៏បានពិភាក្សាលើការពង្រឹងទំនាក់ទំនងទ្វេភាគី ដោយបន្តជំរុញចំណងមិត្តភាពឱ្យកាន់តែស្អិតរមួត ជាពិសេសកិច្ចសហប្រតិបត្តិការជិតស្និទ្ធរវាងរដ្ឋសភានិងរដ្ឋសភា។ ភាគីទាំងពីរបានសង្កត់ធ្ងន់ថា កិច្ចសហប្រតិបត្តិការដ៏ល្អនេះ មិនត្រឹមតែផ្តល់ផលប្រយោជន៍ដល់ជាតិទាំងពីរប៉ុណ្ណោះទេ ប៉ុន្តែថែមទាំងជាកម្លាំងចលករយ៉ាងសំខាន់ ក្នុងការរួមចំណែកដល់សុខសន្តិភាព ស្ថិរភាព និងការរីកចម្រើននៃសហគមន៍អាស៊ានទាំងមូលផងដែរ។

ឯកឧត្តមកិត្តិសេដ្ឋាបណ្ឌិតដែលមិនបានបញ្ជាក់ពីតួនាទីថ្មីក្នុងរាជរដ្ឋាភិបាល សម្តេចធិបតីហ៊ុនម៉ាណែតទេតែបានសម្តែងនូវការជឿជាក់យ៉ាងមុតមាំថា ក្នុងអាណត្តិបេសកកម្មការទូតម៉ាឡេស៊ីរបស់ លោក Shaharuddin Bin Onn ទំនាក់ទំនងកម្ពុជា-ម៉ាឡេស៊ី នឹងឈានដល់កម្រិតខ្ពស់ថ្មីមួយទៀត តាមរយៈកិច្ចសហប្រតិបត្តិការជាក់ស្តែងលើគ្រប់វិស័យ ដែលនាំមកនូវវិបុលភាពសម្រាប់ប្រជាជាតិទាំងសងខាង។វត្តមានលោកចមប្រសិទ្ធត្រូវបានមើលឃើញថាគឺជាកិច្ចការបន្ថែមក្នុងកិច្ចការឡប៊ីអន្តរជាតិដែលមានវត្តមានលោកស៊ុនចាន់ថុលជាឧបនាយករដ្ឋមន្ត្រី។