ក្នុងឆ្នាំ ២០២៥ កម្ពុជា នាំចេញអង្ករជាង ៩៤ម៉ឺនតោន កើនឡើងជាង ៤៥%គឺជិតដល់គោលដៅដាក់ចេញពី១០ឆ្នាំមុនចំនួន១លានតោន

ភ្នំពេញ៖ ក្នុងរយៈពេល១២ខែ នៃឆ្នាំ ២០២៥ កម្ពុជា បាននាំចេញអង្ករឈានដល់កំណត់ត្រាខ្ពស់បំផុតមិនធ្លាប់មានចំនួនជាង ៩៤ម៉ឺនតោន គិតជាទឹកប្រាក់ បានចំនួន ៦០២លានដុល្លារអាម៉េរិក ។ តួលេខនេះ គឺកាន់តែខិតទៅសម្រេចមហិច្ឆតា របស់រាជរដ្ឋាភិបាលកម្ពុជា ដែលបានកំណត់គោលដៅនាំចេញអង្ករឲ្យបានចំនួន ១លានតោន តាំងពីឆ្នាំ២០១៥មកម្ល៉េះ។

សហព័ន្ធស្រូវអង្ករកម្ពុជា បានឱ្យដឹងថា ក្នុងរយៈពេល១២ខែ នៃឆ្នាំ២០២៥ កម្ពុជាបាននាំចេញអង្ករបានចំនួនជាង ៩៤ម៉ឺនតោន គិតជាទឹកប្រាក់សរុបចំនួន ៦០២លានដុល្លារអាម៉េរិក តាមរយៈក្រុមហ៊ុននាំចេញអង្ករចំនួន ៦៨ ក្រុមហ៊ុន ទៅកាន់គោលដៅចំនួន ៧៥ ដែលក្នុងនោះទៅកាន់បណ្តាប្រទេសនៅក្នុងតំបន់អឺរ៉ុបចំនួន ២៨ បានបរិមាណអង្ករចំនួន ៣៣ម៉ឺន ៩ពាន់តោន គិតជាទឹកប្រាក់ចំនួន ២៥៨,២៨លានដុល្លារអាម៉េរិក។ ទៅកាន់ប្រទេសចិន និងហុងកុង ចំនួន ២៣ម៉ឺនតោន គិតជាទឹកប្រាក់ចំនួន ១៣៨,៣៦លានដុល្លារអាម៉េរិក ។

ទៅកាន់ប្រទេសក្នុងអាស៊ាន ចំនួន ៨ បានបរិមាណចំនួន ២៧ម៉ឺនតោន គិតជាទឹកប្រាក់ចំនួន ១១៧,៦២លានដុល្លារអាម៉េរិក និងទៅកាន់គោលដៅ ៣៧ ប្រទេសផ្សេងទៀតមាន អាហ្វ្រិក មជ្ឈិម បូព៌ា អាមេរិក កាណាដា អូស្ត្រាលី ញ៉ូហ្សេឡេន។ល។ បានចំនួន ៩ម៉ឺន ៦ពាន់តោន គិតជាទឹកប្រាក់ចំនួន ៨៨,១៥លានដុល្លារអាម៉េរិក។

ចំពោះប្រភេទអង្ករដែលបាននាំចេញមាន អង្ករក្រអូបចំនួន ៦៤,០២% ប្រភេទអង្ករសគ្រាប់វែង ១៣,៧១% អង្ករចំហុយ ២% អង្ករសរីរាង្គចំនួន ១,៣២% អង្ករបាក់គ្រប់ប្រភេទ ១៨,៥៦% និងអង្ករផ្សេងៗចំនួន ០,៣៩%។ទន្ទឹមនឹងនេះ ប្រទេសកម្ពុជា ក៏បាននាំចេញស្រូវចំនួន ៦,៨៥លានតោន (ស្រូវសើម) ដែលគិតជាទឹកប្រាក់ប៉ាន់ប្រមាណបានចំនួន ១៥៧,៨៦លានដុល្លារអាមេរិក។

គូសបញ្ជក់ផងដែរថា ការនាំចេញអង្ករ មានកំណើនសរុបចំនួន ៤៥,៥៩% និងការនាំចេញស្រូវ មានកំណើតសរុបចំនួន ៣២,៤៣% ធៀបទៅរយៈពេលដូចគ្នាក្នុងឆ្នាំ២០២៤៕