បន្ទាប់ពីឃើញមានវិបត្តិអចលនទ្រព្យនៅចិននិងវៀតណាម ធនាគាជាតិព្រមានរឿងកម្ចីលុយទិញផ្ទះ
21-September-2026 / សេដ្ឋកិច្ច
ភ្នំពេញ៖ សេដ្ឋកិច្ចប្រទេសកម្ពុជា នៅឆ្នាំ ២០២៣នេះ ត្រូវបានព្យាករណ៍ថា នឹងមានកំណើនក្នុងរង្វង់ ៥,៥% ជាមួយនឹងកម្រិតអតិផរណាទាបប្រមាណ ២% ។ប៉ុន្តែក៏មានការវាយតម្លៃថាកម្ពុជា ក៏កំពុងប្រឈមនឹងហានិភ័យសក្តានុពលចម្បងៗដែលបណ្តាលមកពីកត្តាធំៗពីរផងដែរ។ របាយការណ៍ស្ថានភាពស្ថិរភាពហិរញ្ញវត្ថុឆ្នាំ ២០២២ របស់ធនាគារជាតិនៃកម្ពុជា ដែលបានធ្វើការផ្សព្វផ្សាយនៅក្នុងសិក្ខាសាលាមួយនៅថ្ងៃទី ៦ខែកក្កដា ឆ្នាំ ២០២៣បានវាយតម្លៃថា៖កត្តាធំៗទាំងពីរនោះរួមមាន ទី១ គឺកត្តាខាងក្រៅ ដោយសារការបើកចំហរសេដ្ឋកិច្ច ក៏ដូចជា ការពឹងផ្អែកខ្លាំងរបស់សេដ្ឋកិច្ចកម្ពុជាលើវិស័យខាងក្រៅ និងទី២ គឺកត្តាខាងក្នុង គឺស្ថានភាពមិនប្រាកដប្រជានៃវិស័យអចលនទ្រព្យ។
ចំពោះហានិភ័យខាងក្រៅមានដូចជា ការអូសបន្លាយនៃភាពតានតឹងរវាងរុស្ស៊ី និងអ៊ុយក្រែន និងការរឹតបន្តឹងនៃស្ថានភាពហិរញ្ញវត្ថុអន្តរជាតិដែលប៉ះពាល់ដល់ការរំពឹងទុកនៃការនាំចេញ និងការវិនិយោគចូលមកកម្ពុជា,។ បញ្ហាដែលអូសបន្លាយក្នុងទីផ្សារអចលនទ្រព្យរបស់ប្រទេសចិនដែលអាចបង្អាក់កំណើនវិនិយោគក្នុងវិស័យអចលនទ្រព្យនៅកម្ពុជា និងការកើនឡើងអត្រាការប្រាក់ឥណទាន ដែលបណ្តាលមកពីការកើនឡើងអត្រាការប្រាក់លើទីផ្សារអន្តរជាតិ ដែលនាំឱ្យកំណើនឥណទានថយចុះ ហើយចំណាយលើការខ្ចីខ្ពស់ជាងមុនក៏អាចកាត់បន្ថយការវិនិយោគក្នុងស្រុកផងដែរ។
ទន្ទឹមនឹងហានិភ័យខាងក្រៅ ហានិភ័យសក្តានុពលខាងក្នុងក៏ត្រូវយកចិត្តទុកដាក់និងតាមដានផងដែរ ដែលក្នុងនោះអាចកើតមានឡើងពីវិស័យអចលនទ្រព្យ។ ក្នុងរយៈពេលប្រមាណ ១ទសវត្សរ៍មុនពេលវិបត្តិកូវីដ-១៩ វិស័យអចលនទ្រព្យនៅកម្ពុជា មានការរីកចម្រើនយ៉ាងឆាប់រហ័ស។ ប៉ុន្តែការធ្លាក់ចុះសេដ្ឋកិច្ចពិភពលោក និងក្នុងស្រុកដោយសារវិបត្តិកូវីដ និងការងើបឡើងក្នុងស្ថានភាពមិនប្រាកដប្រជា បានធ្វើឱ្យតម្រូវការក្នុងវិស័យនេះធ្លាក់ចុះជាលំដាប់។
ប្រឈមនឹងភាពមិនប្រាកដប្រជានេះ ធនាគារជាតិនៃកម្ពុជាបាន និងកំពុងអនុវត្តវិធានការចាកចេញពីវិបត្តិ ដោយការពង្រឹងក្របខណ្ឌបទបញ្ញាតិឡើងវិញ ប្រកបដោយការប្រុងប្រយ័ត្ន ដើម្បីពង្រឹងភាពធនរបស់ប្រព័ន្ធធនាគារ ស្របពេលនឹងការជួយដល់វិស័យអាទិភាព ដូចជា សហគ្រាសធុនតូច និងមធ្យម វិស័យកសិកម្ម អប់រំ ក្នុងដំណាក់កាលនៃងើបឡើងរបស់សេដ្ឋកិច្ច។ទន្ទឹមនេះ ការរក្សាស្ថិរភាពហិរញ្ញវត្ថុ ជាការងារអន្តរវិស័យ ដែលទាមទារឱ្យមានកិច្ចសហការ និងសម្របម្រួលទាំងពីអាជ្ញាធរ និងភាគីពាក់ព័ន្ធនានា ដោយសារប្រព័ន្ធហិរញ្ញវត្ថុមានភាពប្រទាក់ក្រឡាយ៉ាងជិតស្និទ្ធទាំងក្នុងចំណោមវិស័យហិរញ្ញវត្ថុ និងជាមួយវិស័យសេដ្ឋកិច្ចរូបវន្ត ។
ក្នុងស្ថានភាពមិនសូវល្អ អ្នកជំនាញផ្នែកអចលនវត្ថុ លោក ច្រឹក សុខនីម អគ្គនាយកក្រុមហ៊ុន Century 21 Mekong នៅបទសម្ភាសន៍ជាមួយទូរទ្សន៍ បានបង្ហាញយន្តការចំនួនពីរដែលអាចធ្វើឲ្យទីផ្សារទិញលក់លំនៅឋាន ក៏ដូចជាវិស័យអចលនទ្រព្យងើបឡើងវិញ គឺទី១ ការព្យាពេលបង់រំលស់ផ្ទះក្នុងរយៈពេលវែងពី ១៥ទៅ ២០ឆ្នាំ ឬម្ចាស់គម្រោងបុរីអាចជួយសម្របសម្រួលឲ្យអតិថិជនបង់រំលស់ជាមួយធនាគារ ។យន្តការទី២ គឺរាជរដ្ឋាភិបាលអាចពិនិត្យលទ្ធភាពទម្លាក់កញ្ចប់ថវិកាជួយសង្គ្រោះទៅកាន់វិស័យអចលនទ្រព្យ និងសំណង់ តាមរយៈធនាគារដៃគូ ដូចអ្វីដែលរាជរដ្ឋាភិបាលធ្លាប់បានធ្វើក្នុងការអន្តរាគមន៍ជួយសង្គ្រោះដល់វិស័យទេសចរណ៍ក្នុងអំឡុងពេលវិបត្តិជំងឺកូវីដ១៩ ជាមួយលក្ខខណ្ឌអនុគ្រោះនានា។
សូមបញ្ជាក់បន្ទាប់ពីព្រទេសចិនដែលជួបវិបត្តិអចលនៈទ្រព្យប៉ុន្មានឆ្នាំកន្លងមកនោះនៅប្រទេសវៀតណាមវិញក្នុងរយៈពេល៥ខែដើមឆ្នាំ ក្រុមអ្នកសាងសង់វៀតណាម បានផ្អាកគម្រោងអចលនទ្រព្យជាង ១.២០០ ដែលមានតម្លៃ ៨០០ពាន់ពាន់លានដុង (៣៤ពាន់លានដុល្លារ) ខណៈដែលបញ្ហាផ្តល់មូលនិធិនៅតែបន្តរំខានដល់ឧស្សាហកម្មនេះ។ នេះបើយោងតាមការចេញផ្សាយដោយសារព័ត៌មាន Bloomberg។សមាគមអចលនទ្រព្យវៀតណាមបាននិយាយថា៖ «ធនធានដ៏ធំមួយត្រូវបានបង្កក ហើយយើងមិនដឹងថា វានឹងមានរយៈពេលប៉ុន្មាននោះទេ»។ គម្រោងដែលត្រូវបានផ្អាកទាំងនេះមិនបានបង្កើតតម្លៃបន្ថែមសម្រាប់សង្គមទេ ប៉ុន្តែនាំឲ្យមានផលវិបាកជាច្រើន»។
វិបត្តិអចលនទ្រព្យ បង្កឡើងដោយអ្នកសាងសង់ទទួលយកបំណុលច្រើនពេក ខណៈជំងឺរាតត្បាតកូវីដ-១៩ ដែលបង្អាក់តម្រូវការ និងការបង្ក្រាបរបស់រដ្ឋាភិបាលលើអំពើពុករលួយ បានប៉ះពាល់ដល់ក្រុមហ៊ុនសាងសង់ជាង ១.៨០០ និងបង្ខំឱ្យក្រុមហ៊ុនចំនួន ៣៤០ផ្សេងទៀតក្ស័យធននៅក្នុងត្រីមាសទីមួយនៃឆ្នាំនេះ។ នេះបើយោងតាមក្រសួងសំណង់វៀតណាម។សមាគមអចលនៈទ្រព្យវៀតណាម បានឲ្យដឹងថា ទីក្រុងនិមួយៗនៃខេត្តចំនួន ៦៣របស់ប្រទេសវៀតណាមបានផ្អាកគម្រោងចំនួន ២០ ជាមធ្យម។ ខណៈគម្រោងប្រហែល ៤០០ នៅទីក្រុងហាណូយត្រូវបានផ្អាក និងទីក្រុងហូជីមិញមានចំនួនជាង ៣០០។
លោកឧបនាយករដ្ឋមន្ត្រី Le Minh Khai បានប្រាប់រដ្ឋសភាវៀតណាមកាលពីសប្តាហ៍មុននេះថា ការហូរចេញពីវិស័យអចលនទ្រព្យ និងទីផ្សារសញ្ញាប័ណ្ណសាជីវកម្ម បានជះឥទ្ធិពលអវិជ្ជមានដល់ការគ្រប់គ្រងម៉ាក្រូសេដ្ឋកិច្ច និងសកម្មភាពអាជីវកម្មរបស់រដ្ឋាភិបាលក្នុងវិស័យផ្សេងទៀត។ចំនួនក្រុមហ៊ុនអចលនទ្រព្យថ្មីដែលបានបើកក្នុងរយៈពេល ៥ខែដំបូងនៃឆ្នាំនេះ នៅក្នុងប្រទេសវៀតណាមបានធ្លាក់ចុះ ៦១,៤ភាគរយ ធៀបនឹងឆ្នាំមុន ដោយមានក្រុមហ៊ុនជាង ៥៥០ត្រូវបានក្ស័យធន កើនឡើង ៣០,៤ភាគរយ បើធៀបនឹងរយៈពេលដូចគ្នាកាលពីឆ្នាំមុន។ នេះបើតាមកាសែត Vietnam News បានរាយការណ៍កាលពីថ្ងៃសុក្រសប្តាហ៍មុន៕
