សាលាឧទ្ធរណ៍ភ្នំពេញបដិសេធលើសំណើសុំដោះលែងឱ្យមានសេរីភាពជាលើកទីពីររបស់សកម្មជនចលនាមាតាធម្មជាតិ

ភ្នំំពេញ៖នារសៀលនេះ សាលាឧទ្ធរណ៍ភ្នំពេញបានបដិសេធសំណើសុំដោះលែងឱ្យមានសេរីភាពរបស់សកម្មជនចលនាមាតាធម្មជាតិទាំង ៥នាក់ បន្ទាប់ពីបានស្នើសុំជាលើកទីពីរ ។ សកម្មជនទាំង ៥ នាក់ត្រូវបានផ្តន្ទាទោសដាក់ពន្ធនាគារដោយសាលាដំបូងរាជធានីភ្នំពេញកាលពីថ្ងៃទី ២ ខែកក្កដា ឆ្នាំ២០២៤ ។ សំណើសុំដោះលែងឱ្យមានសេរីភាពរបស់សកម្មជនទាំង ៥ នាក់ តែត្រូវបានបដិសេធដោយសាលាឧទ្ធរណ៍ភ្នំពេញ និងតុលាការកំពូល កាលពីខែកុម្ភៈ និងខែមេសា ឆ្នាំ២០២៥ ។ 

សកម្មជនចលនាមាតាធម្មជាតិទាំង ៥ នាក់ ដែលរួមមាន កញ្ញា ឡុង គន្ធា កញ្ញា ភួន កែវរស្មី លោក លីចាន់ ដារ៉ាវុត លោក ថុន រដ្ឋា លោក យីម លាងហ៊ី និងសមាជិកចលនាមាតាធម្មជាតិ ៥រូបផ្សេងទៀត ត្រូវបានសាលាដំបូងរាជធានីភ្នំពេញ សម្រេចផ្តន្ទាទោស ដាក់ពន្ធនាគារចន្លោះពី៦ ទៅ ៨ ឆ្នាំ ក្រោមបទចោទ រួមគំនិតក្បត់ ។ ដោយឡែក លោក លាងហ៊ី រួមជាមួយកញ្ញា ស៊ុន រដ្ឋា និង លោក អាឡិច ត្រូវបានចោទប្រកាន់មួយបទល្មើសទៀត គឺ ប្រមាថចំពោះអង្គព្រះមហាក្សត្រ ។ ការចោទប្រកាន់ ឃុំខ្លួន និងផ្តន្ទាទោសខាងលើនេះ ត្រូវបានធ្វើឡើង ដោយសារភាពសកម្មនិយមផ្នែកកិច្ចការពារបរិស្ថាន និងធនធានធម្មជាតិរបស់អ្នកទាំងនោះ ។ កាលពីឆ្នាំនេះ និងឆ្នាំមុន ក្រុមសង្គមស៊ីវិល ជាង៥០ស្ថាប័ន ចាត់ទុកថាជារឿងដ៏គួរឱ្យអាម៉ាស់មួយសម្រាប់ជាតិ ។ បច្ចុប្បន្នអ្នកទាំង ៥ កំពុងប្តឹងឧទ្ធរណ៍ ជំទាស់នឹងសាលក្រមរបស់សាលាដំបូងរាជធានីភ្នំពេញ ។

គិតត្រឹមថ្ងៃនេះ យុវជននៃចលនាមាតាធម្មជាតិទាំង ៥ រូប បានជាប់ក្នុងពន្ធនាគារអស់រយៈពេល ៥១៧ ថ្ងៃ មកហើយ និងកំពុងជាប់ក្នុងពន្ធនាគារចំនួន ៥កន្លែង ឆ្ងាយពីគ្នា និងដាច់ស្រយាលពីក្រុមគ្រួសាររបស់អ្នកទាំងនោះ ។ រដ្ឋា ត្រូវបានឃុំខ្លួននៅមណ្ឌលអប់រំកែប្រែទី ៣ (ម៣) នៅក្នុងខេត្តត្បូងឃ្មុំ ដារ៉ាវុត ត្រូវបានឃុំខ្លួននៅពន្ធនាគារខេត្តកណ្តាល រស្មី ត្រូវបានឃុំខ្លួននៅពន្ធនាគារខេត្តពោធិ៍សាត់ លាងហ៊ី ត្រូវបានឃុំខ្លួននៅពន្ធនាគារខេត្តកំពង់ស្ពឺ ហើយ គន្ធា ត្រូវបានឃុំខ្លួននៅពន្ធនាគារខេត្តព្រះវិហារ ។ ការឃុំខ្លួនអ្នកទាំង ៥ នៅពន្ធនាគារឆ្ងាយពីគ្នានេះ បង្កជាការលំបាកយ៉ាងខ្លាំងដល់ក្រុមគ្រួសារ និងមិត្តភក្តិរបស់អ្នកទាំង ៥ ក្នុងការធ្វើដំណើរទៅសួរសុខទុក្ខពួកគេ ហើយក៏ធ្វើឱ្យអ្នកទាំង ៥ មានការលំបាកក្នុងការទទួលបាននូវសេវាព្យាបាលសុខភាពដែលមានគុណភាព និងការប្រឹក្សាយោបល់និងការពារផ្លូវច្បាប់ ពីមេធាវី ផងដែរ ។

សកម្មជនមាតាធម្មជាតិទាំង៥រូបនេះ ស្ថិតក្នុងចំណោមមនុស្សចំនួន ៨៩ នាក់ ដែលបច្ចុប្បន្នកំពុងជាប់ឃុំដោយការប្រើប្រាស់សិទិ្ធរបស់ខ្លួន តាមរយៈការបញ្ចេញមតិ ឬសកម្មភាពការពារសិទិ្ធមនុស្ស ៕(ប្រភពលីកាដូ)