ក្រោមលេសទាហ៊ានថៃជាន់មីននាយករដ្ឋមន្ត្រីថៃប្រកាសផ្អាកការអនុវត្តន៍កិច្ចព្រមព្រៀងសន្តិភាព!?
21-September-2026 / ព័ត៌មានអន្តរជាតិ
ប្រទេសថៃ៖សារព័ត៌មានថៃ The Nation បានឲ្យដឹងថា៖នាយករដ្ឋមន្ត្រីថៃ លោក អានុទីន ឆានវីរៈគុល (Anutin Charnvirakul) បានបញ្ជាឱ្យផ្អាកជាបន្ទាន់នូវសេចក្តីប្រកាសសន្តិភាពកម្ពុជា-ថៃ បន្ទាប់ពីមានហេតុការណ៍ជាន់មីនដែលបានធ្វើឱ្យទាហានថៃរងរបួសនៅស៊ីសាកេត ដោយប្រកាសគាំទ្រពេញទំហឹងចំពោះជំហររបស់យោធា។
ថ្លែងនៅទីស្នាក់ការប៉ូលិសភូមិន្ទថៃ លោក អានុទីន បាននិយាយថា លោកបានទទួលដំណឹងអំពីឧបទ្ទវហេតុនៅក្នុងយោធភូមិភាគ២ ហើយបានណែនាំឲ្យក្រសួងការពារជាតិ និងក្រសួងការបរទេស ធ្វើសកម្មភាពយ៉ាងតឹងរ៉ឹងស្របតាមផលប្រយោជន៍ជាតិរបស់ប្រទេសថៃ។លោកបានបន្តថា៖«អ្វីដែលយើងកំពុងតែបន្តធ្វើឥឡូវនេះ ត្រូវតែផ្អាករហូតដល់ភាពច្បាស់លាស់ត្រូវបានស្ដារឡើងវិញ»។
ក្រៅពីនាយករដ្ឋមន្ត្រីទីភ្នាក់ងារសារពត៍មានថៃ( Thai News Agency )បានឲ្យដឹងថា៖រដ្ឋមន្ត្រីការពារជាតិថៃ លោក Natthaphon Narkphanit បានចេញសេចក្តីថ្លែងការណ៍បន្ទាន់មួយក្រោយឧបទ្ទវហេតុជាន់មីននោះ ដោយប្រកាសពីការសម្រេចចិត្តសំខាន់ៗចំនួនពីរ ក្នុងចេតនាពន្យារពេលបញ្ជូនកងទ័ពខ្មែរ១៨រូបត្រឡប់មកវិញ និងត្រៀមដាក់លិខិតតវ៉ាជុំវិញករណីគ្រាប់មីនផ្ទុះនៅស៊ីសាកេត។
ការសម្រេចចិត្តទាំងពីរនោះ រួមមាន ទី១. ពន្យារពេលបញ្ជូនកងទ័ពកម្ពុជា៖ ថៃនឹងពន្យារពេលការបញ្ជូនកងទ័ពកម្ពុជាទាំង១៨រូប ដែលត្រូវបានឃាត់ខ្លួន ត្រឡប់មកកម្ពុជាវិញ និង ទី២. ត្រៀមដាក់លិខិតតវ៉ាជាផ្លូវការចំពោះកម្ពុជា ខណៈកំពុងស៊ើបអង្កេតបន្ទាន់លើករណីផ្ទុះគ្រាប់មីននៅខេត្តស៊ីសាកេត ដែលបណ្តាលឱ្យទាហានថៃ២នាក់រងរបួស។រដ្ឋមន្ត្រីការពារជាតិថៃរូបនេះ បានបញ្ជាទៅអគ្គសេនាធិការនៃកងទ័ពភូមិន្ទថៃឱ្យស៊ើបអង្កេតជាបន្ទាន់ដើម្បីកំណត់ថា គ្រាប់មីនដែលផ្ទុះ នៅស្រុក Kantharalak ខេត្តស៊ីសាកេត នោះគឺជាគ្រាប់មីនចាស់ដែលនៅសល់ពីសម័យសង្គ្រាម ឬជាគ្រាប់មីនដែលត្រូវបានដំឡើងថ្មីៗនេះ
ការប្រកាសរបស់ភាគីថៃស្តីពីការផ្អាកអនុវត្តន៍សេចក្តីប្រកាសសន្តិភាពកម្ពុជា-ថៃជាឯកតោភាគីក្រោមហេតុផលទាហ៊ានថៃជាន់មីន គឺក្នុងពេលដែលលោកជំទាវ ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ នៃព្រះរាជាណាចក្រកម្ពុជាបានប្រាប់ថា ព្រឹកនៅថ្ងៃទី១០ ខែវិច្ឆិកា ឆ្នាំ២០២៥ នៅវេលាម៉ោង ១០:៣០នាទី ក្រុមការងារនៃមជ្ឈមណ្ឌលសកម្មភាពកំចាត់មីនកម្ពុជា (CMAC) និងក្រុម ការងារនៃមជ្ឈមណ្ឌលសកម្មភាពកំចាត់មីនថៃ (TMAC) បានបើកកិច្ចប្រជុំតាមប្រព័ន្ធ VTC ដើម្បីបន្តពិភាក្សាលម្អិតអំពីតំបន់សាកល្បងក្នុងតំបន់អាទិភាពនៅព្រំដែន ដែលស្ថិតនៅឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ទល់មុខ ឃុំណូនម៉ាកម៉ូន ស្រុកគោកស៊ូង ខេត្តស្រះកែវ ព្រះរាជាណាចក្រថៃ ស្របតាមការសម្រេចរបស់ក្រុមការងារសម្របសម្រួលចម្រុះ (JCTF) នៅក្នុងកិច្ចប្រជុំកាលពីថ្ងៃទី៣១ ខែតុលា ឆ្នាំ២០២៥។
កិច្ចប្រជុំពិភាក្សា និងការអនុវត្តការងារត្រូវគោរពតាមគោលការណ៍ និងនិយាមនីតិវិធីប្រតិបត្តិ (SOP) ដែល ក្រុមការងារសម្របសម្រួលចម្រុះ (JCTF) នៃប្រទេសទាំងពីរបានឯកភាពគ្នា។
សូមបញ្ជាក់ថាបើយោងតាមការចុះផ្សាយរបស់ The Nationថ្ងៃទី១០វិច្ឆិកានេះមាន ទាហានថៃម្នាក់បានរងរបួសធ្ងន់ធ្ងរនៅជើងខាងស្ដាំ ក្រោយដើរជាន់មីននៅតំបន់ Huai Ta Maria ទល់មុខប្រាសាទព្រះវិហាររបស់កម្ពុជា។ករណីយ៍ដើជាន់មីននេះដែរកាសែតឌឺណេស្សិនឲ្យដឹងថានៅថ្ងៃទី១៦ខែកក្កដាឆ្នាំ២០២៥ ទាហានបីនាក់បានរងរបួស ម្នាក់បាត់បង់ជើងក្នុងខេត្ត Ubon Ratchathani។ ថ្ងៃទី៩សីហា ទាហានចំនួន៣នាក់ផ្សេងទៀតបានរងរបួសនៅខេត្តស៊ីសាកេត ដោយម្នាក់បានបាត់បង់ជើងឆ្វេង ខណៈកំពុងរាយលួសបន្លានៅតាមព្រំដែន។
លុះដល់ថ្ងៃទី១២សីហា អនុរក្សយោធភូមិភាគម្នាក់បានបាត់បង់ជើងម្ខាង បន្ទាប់ពីជាន់មីននៅជិតប្រាសាទតាមាន់ធំ ហើយនៅថ្ងៃទី២៧សីហា ទាហានម្នាក់ទៀតបានរងរបួសយ៉ាងធ្ងន់ធ្ងរ និងបាត់បង់ជើងខាងស្តាំក្នុងឧបទ្ទវហេតុមួយនៅជិតប្រាសាទតាក្របី។មិនទាន់ឃើញមានប្រតិកម្មពីភាគីកម្ពុជាឬប្រធានអាសានពិសេសអាមេរិកដែលជាសាក្សីនៃសេចក្តីប្រកកាសសន្តិភាពនៅឡូឡាឡាំពួចុះថ្ងៃទី២៦តុលានោះនៅឡើយ។
