កម្លាំងសមត្តកិច្ចជាង៦០០នាក់ដាក់ការពារក្នុងទិវាបុណ្យអុំទូកនៅខេត្តសៀមរាប

ខេត្តសៀមរាប៖សមត្ថកិច្ចសរុបជាង៦០០នាក់ បានដាក់ត្រៀមសម្រាប់ការពារក្នុងទិវាបុណ្យអុំទូក បណ្តែតប្រទីប សំពះព្រះខែ និងអកអំបុក ចាប់ពីថ្ងៃទី៤ ដល់ថ្ងៃទី៦ ខែវិច្ឆិកា ឆ្នាំ២០២៥នៅក្នុងក្រុងសៀមរាប។ 

នេះបើតាមការឲ្យដឹងដោយលោកឧត្ដមសេនីយ៍ត្រី ណុប សារ៉ាក់ ស្នងការរងនគរបាលខេត្តសៀមរាប។ស្នងការដ្ឋាននគរបាលខេត្តសៀមរាបបាន ដាក់ចេញនូវផែនការឧបសម្ព័ន្ធការពារ ដូចខាងក្រោម ប្រើប្រាស់កម្លាំងសរុប ចំនួន ៦១៤នាក់ ដោយក្នុងនោះមានការកំណត់គោលដៅសំខាន់ៗ និងមមាញឹក ដូចជាតំបន់មាត់ស្ទឹងសៀមរាប ផាប់ស្រ្ទីត និងតំបន់ប្រាសាទជាដើម។ល។

តាមការបញ្ជាក់ពីលោក ណុប សារ៉ាក់ កម្លាំងទាំងអស់ ទទួលខុសត្រូវធានាការពារសន្តិសុខ សុវត្ថិភាព រៀបចំសណ្ដាប់ធ្នាប់ បិទ បើកផ្លូវ សម្រួលចរាចរណ៍លើដងផ្លូវ និងត្រួតពិនិត្យ គុម្ពព្រៃ គុម្ពផ្កា ធុងសំរាម ការដាក់តាំងរបស់របរផ្សេងៗក្បែរផ្លូវ ដែលអាចបង្កការផ្ទុះ ឆេះ។

ធ្វើការតាមដានឃ្លាំមើលគ្រប់សកម្មភាព សមាសភាពដែលចេញ-ចូល ក្នុងភូមិសាស្ត្រទទួលខុសត្រូវ។ ទទួលខុសត្រូវធានាសន្តិសុខ សុវត្ថិភាព និងរៀបចំសណ្ដាប់ធ្នាប់ជូនភ្ញៀវជាតិ អន្តរជាតិ។ ទទួលខុសត្រូវធានាការពារសុវត្ថិភាព រៀបចំសណ្ដាប់ធ្នាប់ របៀបរៀបរយចំណតយានយន្ត។ ទទួលខុសត្រូវត្រួតពិនិត្យអាវុធជាតិផ្ទុះ កន្លែងប្រារព្ធពិធី។ ប្រចាំការត្រៀមអន្តរាគមន៍ ដោះស្រាយហេតុការណ៍ជាយថាហេតុ។

ទទួលខុសត្រូវ​ប្រចាំការ ត្រៀមអន្តរាគមន៍ សង្គ្រោះពេលមានអគ្គិភ័យកើតឡើង សហការត្រួតពិនិត្យ បច្ចេកទេស និងធានាគ្រប់គ្រងបណ្ដាញផ្គត់ផ្គង់អគ្គិសនី។ ទទួលខុសត្រូវក្នុងការបង្ការ ទប់ស្កាត់ និងបង្ក្រាបរាល់បទល្មើសគ្រប់ប្រភេទមិនឱ្យកើតមានឡើង និងទទួលខុសត្រូវ ក្ដាប់សភាពការណ៍ទូទៅ ស្រាវជ្រាវប្រមូលផ្ដុំព័ត៌មាន បង្ការ ទប់ស្កាត់ និងបង្ក្រាបសកម្មភាពបង្កចលាចលសង្គម និងសកម្មភាពល្មើសផ្សេងៗ។

 ទោះបីមិនបានរៀបចំពិធីប្រណាំងទូកងជាផ្លូវ ប៉ុន្តែរដ្ឋបាលខេត្ត សហការជាមួយសហភាព សហព័ន្ធយុវជនកម្ពុជា ខេត្តសៀមរាប បានរៀបចំកម្មវិធីកម្សាន្តនានា និងការអុំទូកមិត្តភាព នៅតាមដងស្ទឹងសៀមរាបផងដែរ។ គោលបំណងសំខាន់នៃការរៀបចំនេះ ដើម្បីបង្កភាពរីករាយ និងទាក់ទាញភ្ញៀវទេសចរចូលមកកម្សាន្តនៅក្នុងខេត្តសៀមរាបឱ្យបានកាន់តែច្រើន.

សូមបញ្ជាក់ថាតាមសេចក្តីប្រកាសព័ត៌មាន របស់គ្រឹះស្ថានអង្គរដែលបណ្តាញព័ត៌មានទួលបាននៅថ្ងៃទី៣ ខែវិច្ឆិកា ឆ្នាំ២០២៥ឲ្យដឹងថាក្នុងរយៈពេល១០ខែឆ្នាំ២០២៥នេះ កម្ពុជារកចំណូលបានជាង៣៥លានដុល្លារ ដោយទទួលបានពីភ្ញៀវទេសចរបរទេសជាង៧៦ម៉ឺននាក់ដែលចូលទស្សនារមណីដ្ឋានអង្ករ។

តាមរយៈសេចក្តីប្រកាសព័ត៌មាន បញ្ជាក់ថា «ពីខែមករា ដល់ខែតុលា ឆ្នាំ២០២៥ ចំនួនភ្ញៀវទេសចរបរទេស បានចូលទស្សនារមណីយដ្ឋានអង្គរ មានចំនួន ៧៦៥ ៥១៨ ថយចុះ១.១២% ដោយផ្តល់ចំណូលបាន ៣៥ ៥៧៥ ៧៨១ដុល្លារ ថយចុះ ១.១៥% បើធៀបនឹងរយៈពេលដូចគ្នាកាលពីឆ្នាំមុន»។ដោយឡែកតែខែតុលា ទទួលបានទេសចរចូលទស្សនារមណីយដ្ឋានអង្គរចំនួន ៦០ ២៤៩នាក់ ថយចុះ១៨.៩៧% និងទទួលបានចំណូល ២ ៨៦៦ ៨៧៣ដុល្លារ ថយចុះ១៧.២៧%។