វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 7573 នាក់
ម្សិលមិញ 8227 នាក់
សរុប 14134454 នាក់
ភ្នំពេញ៖ ប្រមុខនៃរាជរដ្ឋាភិបាលកម្ពុជាអាណត្តិទី៦ សម្ដេចតេជោ ហ៊ុន សែននៅព្រឹកថ្ងៃទី០៧ ខែវិច្ឆិកា ឆ្នាំ២០១៨ បានទាត់ចោលការលើកឡើងរបស់ទណ្ឌិត សម រង្ស៊ី ដែលថានឹងមានការដោះលែងលោក កឹម សុខា ប្រធានអតីតគណបក្សសង្គ្រោះជាតិ នៅថ្ងៃទី២៩ ខែធ្នូ ឆ្នាំ២០១៨ខាងមុខ ។
ក្នុងពិធីជួបសំណេះសំណាលជាមួយកម្មករ និយោជិតប្រមាណ២៣,៤៦៦នាក់មកពីរោងចក្រ សហគ្រាសចំនួន២០ មកតាមស្រុកនានាក្នុងខេត្តតាកែវ សម្ដេចតេជោ ហ៊ុន សែន បានមានប្រសាសន៍យ៉ាងដូច្នេះថា «គេថាថ្ងៃទី២៩ ខែធ្នូនេះ នឹងមានការដោះលែងអ្នកទោស អានេះពិតជាចេះបោកគេហៅថា បោកចិញ្ចឹមឆ្នាំង ចាំមើលទៅអ្នកជឿ ចាំមើលទៅ។
សម រង្ស៊ី គាត់បង្ហោះក្នុង Facebook គាត់ថាថ្ងៃ២៩នេះ លោក ហ៊ុន សែន នឹងដោះលែង កឹម សុខា ដែលគាត់ហៅថា ធ្វើខួបលើកទី២០ នៃនយោបាយឈ្នះឈ្នះ ហើយនេះក្រោមសម្ពាធអន្ដរជាតិ។ ហ្អែងចាំមើលៗ ហើយអ្នកគាំទ្រអ្នកឯងចាំមើលទៅ ខ្ញុំគ្រាន់តែបញ្ជាក់ប៉ុណ្ណឹងទេ ចាំមើលទៅ អាមេខ្លួនឯង បោកកូនខ្លួនឯងប៉ុណ្ណា»។
សម្ដេច បានពន្យល់ត្រឡប់ទៅទណ្ឌិត ដែលមិនយល់ពីច្បាប់ថា លោក កឹម សុខា មិនទាន់ត្រូវបានតុលាការកាត់ទោស ហើយសាលក្រមមិនទាន់ចូលស្ថាពរនៅឡើយនោះទេ ដូច្នេះលោក កឹម សុខា គ្មានទោសឯណាត្រូវស្នើព្រះមហាក្សត្រព្រះរាជទានលើកលែងទោសនោះទេ ។សម្ដេចក៏គ្មានសិទ្ធិស្នើថ្វាយព្រះមហាក្សត្រលើកលែងទោសឲ្យអ្នកណាទាំងអស់ ចំពោះអ្នកដែលស្ថិតក្នុងក្របខណ្ឌជាពិរុទ្ធជន។
ក្រៅពីប្រកាសច្រានចោលចំពោះការលើកឡើងដោយខុសពីច្បាប់របស់ទណ្ឌិត សម រង្ស៊ី ខាងលើនេះ សម្ដេចតេជោ ហ៊ុន សែន ក៏ឆ្លៀតដាក់ផ្លែផ្កាទៅវិញទៀតថា កាលណាដែលសេះ ដុះស្នែង ទើបសម្ដេចស្នើថ្វាយព្រះមហាក្សត្រ ដើម្បីដោះលែងលោក កឹម សុខា។
សម្ដេចតេជោ ហ៊ុន សែន បានហៅទណ្ឌិត សម រង្ស៊ី ដែលកំពុងរត់ចោលគុកនៅកម្ពុជាថា មួយថ្ងៃៗមិនដែលចេះធ្វើការអ្វីនោះទេ ពោលអង្គុយរកនឹកតែល្បិចដើម្បីបោកប្រាស់ ភូតកុហកកូនចៅខ្លួនឯងប៉ុណ្ណោះ ហើយមួយករណីទៀត រកនឹកដើម្បីបង្ហោះសារលើ Facebook ដើម្បីបោកអ្នកប្រើប្រាស់ Facebook និងគ្រាន់តែចង់បានការចុច Like។មានការកតើសម្គាល់ថាការលើកឡើងរបស់លោកសមរង្ស៊ីគឺចំពេលដែលលោកស្រីរ៉ូណាល់ស្មីតអ្នករាយការណ៍ពិសេសរបស់អង្គការសហប្រជាជាតិមកបំពេញការងារនៅស្រុកខ្មែរពីថ្ងៃទី១ដល់១១វិច្ឆិកា។
សូមបញ្ជាក់ថាលោកលោកកឹមសុខាត្រូវបានផ្ទេរពី ឃុំខ្លួន នៅក្នុងពន្ធនាគារត្រពាំងផ្លុង (ម៣) មកឃុំនៅផ្ទះបណ្តោះអាសន្ន ក្រោមការត្រួតពិនិត្យតាម ផ្លូវតុលាការដែលរួមមានដូចជា មិនអនុញ្ញាតឲ្យចេញក្រៅពីព្រំប្រទល់នៃដែនដី ដែលខណ្ឌដោយ ផ្លូវលេខ៣១៣ ផ្លូវលេខ៣១១ និងផ្លូវលេខ៦០៨, ត្រូវឆ្លើយតបនឹងការកោះហៅពីគ្រប់បុគ្គល ដែលចាត់តាំងដោយចៅក្រមស៊ើបសួរ, មិនត្រូវជួបអតីតថ្នាក់ដឹកនាំគណបក្សសង្គ្រោះជាតិ និងបុគ្គលឬជនបរទេសដែលពាក់ព័ន្ធនឹងសំណុំរឿង និងមិនត្រូវជួបជុំធ្វើសកម្មភាពនយោបាយជាដើម៕