កម្មកររោងចក្រតារ៉ាលអ៊ីនធើណេសិនណល ឯ.កចេញតវ៉ាបិទផ្លូវជាតិលេខ៣បង្កការប៉ះទង្គិះគ្នាជាមួយសមត្តកិច្ចទើបដោះស្រាយបាន!

កំពង់ស្ពឺ៖ នាថ្ងៃទី០៣ ខែតុលា ឆ្នាំ២០២៥ កម្មករ កម្មការនីរោងចក្រតារ៉ាល់ អ៊ីនធើណេសិនណល ឯ.ក (TARAL INTERATIONAL CO., LTD) រាប់ពាន់នាក់បានចេញមកធ្វើការតវ៉ាបិទផ្លូវជាតិលេខម្តុំ ឃុំស្នំក្រពើ ស្រុកគងពិសី ខេត្តកំពង់ស្ពឺដើម្បីទាមទារអត្ថប្រយោជន៍រហូតមានការប៉ះទង្កិចគ្នាជាមួយអាជ្ញាធរនៅខាងមុខរោងចក្រទើបបញ្ចប់រឿង ។ 

 ការតវ៉ានេះបានផ្ទុះធ្វើឡើងកាលពីថ្ងៃទី០២ ខែតុលា ឆ្នាំ២០២៥  ក្នុងគោលបំណងទាមទារឱ្យក្រុមហ៊ុនអនុវត្តលក្ខខណ្ឌទូទៅនៃការងារ លក្ខខណ្ឌសុវត្ថិភាព និងសុខភាពការងារ លក្ខខណ្ឌទំនាក់ទំនងវិជ្ជាជីវៈ និងលក្ខខណ្ឌរបបសន្តិសុខសង្គម ឱ្យបានត្រឹមត្រូវតាមច្បាប់ លិខិតបទដ្ឋានគតិយុត្តពាក់ព័ន្ធក្នុងវិស័យការងារ។

លោក ស៊ុន មេសា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានឱ្យកាសែតដឹងថា ក្រោយការប្រមូលផ្ដុំតវ៉ាបិទផ្លូវពីសំណាក់កម្មករនិយោជិតនៃក្រុមហ៊ុនតារាល នៅខេត្តកំពង់ស្ពឺ នៅព្រឹកថ្ងៃទី៣ ខែតុលានេះភ្លាម លោក ទុយ ស៊ីផាន់ រដ្ឋលេខាធិការនៃក្រសួងការងារ និងបណ្ដុះបណ្ដាលវិជ្ជាជីវៈ បានដឹកនាំមន្ត្រីជំនាញសហការជាមួយអាជ្ញាធរមូលដ្ឋាន ចុះសម្របសម្រួល និងស្ដាប់ពីសំណូមពររបស់កម្មករនិយោជិត និងបានសម្របសម្រួលជាមួយនឹងនិយោជកដោយផ្អែកទៅលើកត្តាច្បាប់រហូតឈានដល់ការព្រមព្រៀងសះជាភ្លាមៗ ដែលបានទាមទារចំនួន ១៦ ចំណុច។ ចំណុចទាំងនោះ រួមមាន ការស្នើសុំលុយថ្លៃបាយថ្ងៃត្រង់ ការរក្សាលុយធ្វើការទៀងទាត់(លុយព្រីម) ក្នុងករណីមកយឺតក្រោម១៥ នាទីក្នុងមួយខែ និងការអនុញ្ញាតច្បាប់ដោយមានជំងឺ ដោយមានវេជ្ជបញ្ជាពីគ្រូពេទ្យ ជាដើម។

លោក ស៊ុន មេសា បញ្ជាក់ថា៖ "ក្រោយការសម្របសម្រួល ការយកចិត្តទុកដាក់ និងការដោះស្រាយប្រកបដោយភាពលឿនរហ័ស និងប្រកបដោយទំនុកចិត្តរបស់មន្ត្រីជំនាញនៃក្រសួងការងារបងប្អូនកម្មករកម្មការិនី និងភាគីរោងចក្របានឈានដល់ការព្រមព្រៀងគ្នានៅថ្ងៃដដែល ហើយកម្មករនឹងវិលចូលធ្វើការវិញនៅថ្ងៃស្អែកតាមការព្រមព្រៀងគ្នា"។

ខ្លឹមសារ លទ្ធផលនៃកិច្ចប្រជុំ និងដកស្រង់ប្រភពនានា បន្ទាប់ពីបានពិភាក្សាគ្នារួចមក ភាគីទាំងពីរបានឯកភាពនឹងគ្នា មានដូចខាងក្រោម៖១. កម្មករនិយោជិត ស្នើសុំលុយបាយថ្ងៃត្រង់ចំនួន ២០០០រៀល។ ចំណុចនេះ ក្រុមហ៊ុនបញ្ជាក់ថា អនុវត្តតាមច្បាប់ ដោយសារក្រុមហ៊ុនបានផ្តល់លុយថ្លៃបាយធ្វើការថែមម៉ោងចាប់ពីម៉ោង៤ ដល់ ម៉ោង៦រួចហើយចំនួន ៤០០០រៀល ក្នុងនោះផ្តល់ជូនជាពីរចំណែក ដោយចំណែក ទី១-ផ្តល់ ជូន ១០០០០រៀល ជាប្រចាំសប្តាហ៍ និងទី២-ផ្តល់ជូន ២០០០រៀល ជាប្រចាំខែដែលមាន បញ្ចូលទៅក្នុងបញ្ជីបើកប្រាក់ឈ្នួលប្រចាំខែស្រាប់ រីឯបងប្អូនកម្មករនិយោជិតដែលធ្វើការថែម ម៉ោងត្រឹមម៉ោង៥ ក្រុមហ៊ុនក៏បានបញ្ចូលទៅក្នុងបញ្ជីរបើកប្រាក់ឈ្នួលផងដែរចំនួន ២០០០រៀល ក្នុង១ដង។ ចំណុចនេះ កម្មករនិយោជិតទាំងអស់បានយល់ច្បាស់ និងឯកភាពតាមការបញ្ជាក់ លម្អិតរបស់ភាគីក្រុមហ៊ុន។

២. កម្មករនិយោជិត ស្នើកុំឱ្យកាត់លុយពេលមកស្កែនយឺតលើសម៉ោង។ ចំណុចនេះក្រុមហ៊ុនឯកភាព ផ្តល់ជូនតាមការស្នើសុំរបស់កម្មករនិយោជិត ដូចខាងក្រោមៈ

កម្មករនិយោជិតដែលមកយឺតក្នុង ១៥នាទីចុះក្រោម (បូកចូលគ្នា) ក្នុង១ខែ មិនឱ្យកាត់ លុយត្រឹមចំនួន ៦ដុល្លារ នោះទេ។កម្មករនិយោជិតមកយឺតក្នុងចន្លោះលើសពី ១៥នាទី ដល់ ២៩នាទី (បូកចូលគ្នា) ក្នុង១ខែ ក្រុមហ៊ុនឯកភាពកាត់លុយត្រឹមចំនួន ៦ដុល្លារ។កម្មករនិយោជិតមកយឺតលើសពី ៣០នាទី (បូកចូលគ្នា) ក្នុង១ខែ កម្មករនិយោជិតឯកភាព កាត់លុយត្រឹមទាំងអស់ (ចំនួន ១២ដុល្លារ)។

៣. នៅពេលកម្មករនិយោជិតសុំអនុញ្ញាតច្បាប់ដោយមានជំងឺ ដោយមានវេជ្ជបញ្ជាពីវេជ្ជបណ្ឌិត អនុញ្ញាតឱ្យឈប់សម្រាកព្យាបាលកន្លះថ្ងៃ ស្នើសុំក្រុមហ៊ុនអនុញ្ញាតច្បាប់ ១ថ្ងៃ ដើម្បីមានពេល តាមដានពិនិត្យព្យាបាល។ ចំណុចនេះ ក្រុមហ៊ុននឹងពិនិត្យតាមវេជ្ជបញ្ជាពេទ្យ។

៤. កម្មករនិយោជិត ស្នើសុំឱ្យក្រុមហ៊ុនតម្លើងលុយរង្វាន់។ ចំណុចនេះ ក្រុមហ៊ុននឹងធ្វើនឹងធ្វើតារាង បិតផ្សាយតាមផ្នែកឱ្យកម្មករនិយោជិតមើល។៥. កម្មករនិយោជិត ស្នើសុំឱ្យក្រុមហ៊ុន អនុញ្ញាតឱ្យស្ត្រីមានផ្ទៃពោះ ២ខែ ចេញមុនម៉ោង ១៥នាទី។ ចំណុចនេះ ក្រុមហ៊ុនឯកភាពផ្តល់ជូនដោយផ្អែកសំបុត្រពេទ្យបញ្ជាក់ត្រឹមត្រូវ។

៦. កម្មករនិយោជិត ស្នើសុំធ្វើការថែមម៉ោងទៅតាមគោលការណ៍ស្ម័គ្រចិត្ត។ ចំណុចនេះ ក្រុមហ៊ុន ឯកភាពអនុវត្តទៅតាមច្បាប់ស្តីពីការងារ ដោយមិនមានការបង្ខិតបង្ខំឡើយ។

៧. កម្មករនិយោជិត ស្នើសុំឱ្យជូនដំណឹងជាមុនសម្រាប់ការដោះដូរថ្ងៃធ្វើការចំថ្ងៃបុណ្យ។ ចំណុចនេះ ក្រុមហ៊ុនឯកភាពអនុញ្ញាតឱ្យឈប់សម្រាក ប៉ុន្តែប្រសិនបើបងប្អូនកម្មករនិយោជិតស្ម័គ្រចិត្តធ្វើការ ក្រុមហ៊ុនគុណលុយជូន។

៨. ស្នើសុំកុំឱ្យមានការព្រមានកម្មករដែលយកទឹកថ្នាំបុរាណខ្មែរសម្រាប់ហូបចូលក្នុងរោងចក្រ។ ចំណុចនេះ ក្រុមហ៊ុនឯកភាពអនុញ្ញាតឱ្យយកចូលបាន ប៉ុន្តែមិនត្រូវយកចូលក្នុងខ្សែច្រវ៉ាក់ ផលិតកម្មឡើយ។

៩. ស្នើសុំកែប្រែឥរិយាបទថ្នាក់ដឹកនាំជនជាតិចិន (សាន ឡៅស៊ី)។ ចំណុចនេះ ក្រុមហ៊ុនឯកភាព នឹងធ្វើការណែនាំ។១០. ស្នើសុំទូទឹកក្តៅ-ទឹកត្រជាក់នៅជាន់ខាងលើ។ ចំណុចនេះ ក្រុមហ៊ុនឯកភាពនឹងតម្លើងបន្ថែមជូន កម្មករនិយោជិតឱ្យបានគ្រប់គ្រាន់។

១១. រាល់ការបញ្ឈប់កម្មករ សូមឱ្យក្រុមហ៊ុនបញ្ជាក់ពីហេតុ និងជូនដំណឹងឱ្យកម្មករនិយោជិតបាន ដឹងជាមុន។ ចំណុចនេះ ក្រុមហ៊ុនឯកភាពអនវុត្តតាមសំណូមពររបស់កម្មករនិយោជិត។

១២. កម្មករនិយោជិត ស្នើសុំកាត់លុយប្រចាំថ្ងៃ នៃថ្ងៃធ្វើកូដកម្ម ដោយរក្សាប្រាក់អត្ថប្រយោជន៍ផ្សេងៗ នៅដដែល។ ចំណុចនេះ ភាគីក្រុមហ៊ុនបានឯកភាពផ្តល់ជូន រីឯកម្មករនិយោជិតទាំងអស់បាន ឯកភាពគ្នាចូលធ្វើការងារវិញនៅថ្ងៃទី៤ ខែតុលា ឆ្នាំ២០២៥ ទៅតាមក្រុម តាមវេនរៀងៗខ្លួន។