សមាជិកឧត្តមក្រុមប្រឹក្សាពីគ្រោះយោបល់ប្រកាសស៊ើបអង្កេតករណីឧត្តមសេនីយ៍ទោ ទុន ដៀត បូមខ្សាច់លុបឆ្នេរយកដីធ្វើកម្មសិទ្ធនៅកោះកុង
05-September-2026 / ព័ត៌មានជាតិ
កោះកុង ៖ មន្ត្រីយោធាពាក់ផ្កាយ២ម្នាក់រងការចោទថា បាននិងកំពុងឃុបឃិតជាមួយអាជ្ញាធរលួចបោះបង្គោល និងបូមខ្សាច់លុបឆ្នេរសមុទ្រយកដីធ្វើកម្មសិទ្ធ ស្ថិតនៅភូមិស្មាច់ងាម សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង។ឈ្មួញដីដែលរងនូវការចោទប្រកាន់ពីបទឃុបឃិតបូមខ្សាច់លុបឆ្នេរសមុទ្រខេត្តកោះ កុងនោះឈ្មោះ ទុន ដៀត ជាមន្ត្រីយោធាពាក់ផ្កាយ២ ជាមនុស្សមានឥទ្ធិពលលើផ្ទៃសមុទ្ទ។
លោក ពេជ្រ ស្រស់ ប្រធានគណបក្សយុវជនកម្ពុជា បានអះអាងថា គណបក្សលោកទទួល បានពាក្យបណ្តឹងពីប្រជាពលរដ្ឋ ពាក់ព័ន្ធករណីខាងលើនេះ ហើយលោកបានចាត់មន្ត្រីចុះទៅ ស្វែងរកការពិត ដើម្បីដឹងថា តើពិតជាមានការរំលោភយកដីសាធារណមែនឬយ៉ាងណា? បើពិតយើងនឹងស្នើឲ្យអាជ្ញាធរចាត់វិធានការ ។
លោក ពេជ្រ ស្រស់ វាយតម្លៃថា អាចនឹងមានការបើកដៃពីចៅសង្កាត់ និងអាជ្ញាធរជំនាញនៅក្នុងខេត្ត ទើបបានជាមានការចាក់ដីលុបឆ្នេរសមុទ្រយ៉ាងដូច្នេះ។ ប៉ុន្តែលោកថា ខ្លាចតែអាជ្ញាធរពាក់ព័ន្ធមានការចូលរួមបើកដៃឲ្យមានការចាក់នេះតែម្តង។លោក នាម យ៉ុង ចៅសង្កាត់ស្មាច់មានជ័យបានបដិសេធចំពោះការចោទប្រកាន់ថា អាជ្ញាធរដែនដីបានឃុបឃិតជាមួយលោក ទុន ដៀត ឲ្យមានការបោះបង្គោល និងបូមខ្សាច់លុបឆ្នេរក្នុងតំបន់នេះ។
លោកចៅសង្កាត់រូបនោះបានអះអាងថា ដីនេះគឺជាកម្មសិទ្ធិរបស់ឈ្មោះ ទុន ដៀត ដែលជាប្រធានច្រកទំនាក់ទំនងព្រំដែនកម្ពុជា-ថៃ ជាយូរឆ្នាំមកហើយ ហើយសកម្មភាពចាក់ខ្សាច់នេះទើបតែត្រូវបានធ្វើក្នុងអំឡុង ១ សប្តាហ៍នេះប៉ុណ្ណោះ ព្រោះទីតាំងនេះគឺជាកន្លែងស្តុកខ្សាច់ ដែលដឹកចេញពីកប៉ាលសម្រាប់លក់នៅលើទីផ្សារ។លោកបញ្ជាក់បន្ថែមថា ចំពោះបង្គោលដែលបោះចូលសមុទ្រនោះគឺបានបោះចូលឡើងជាង ១ ឆ្នាំមកហើយ ដើម្បីបំពាក់សំណាញ់ការពារសំរាម។នេះបើយោងតាមការចុះផ្សាយរបស់កាសែតភ្នំពេញប៉ុស្តិ៍ដែលបានដកស្រង់សំដីអះអាងរបស់ លោកចៅសង្កាត់ស្មាច់មានជ័យ ។
ប្រជាពលរដ្ឋបានមើលឃើញផ្ទុយពីការអះអាងរបស់លោកចៅសង្កាត់ ដោយសារថា ដីតំបន់ដែលគេកំពុងបូមខ្សាច់លុប ហើយធ្វើអាជីវកម្មនោះជាដីឆ្នេរត្រូវការពារដោយច្បាប់យ៉ាងពិតប្រាកដ ពុំអាចមានបុគ្គលណាម្នាក់មានសិទ្ធិទៅគ្រប់គ្រងជាកម្មសិទ្ធិនោះឡើយ ។
ពលរដ្ឋយល់ថា ទង្វើលុបឆ្នេររបស់ឈ្មួញដីពាក់ផ្កាយ២នោះជាការឃុបឃិតគ្នាជាប្រព័ន្ធ ដើម្បីរំលោភយកដីសាធារណៈ ខណដែលដីនៅតំបន់ខេត្តកោះកុងឡើងថ្លៃដូចពេជ្រ ។តាមផ្លូវច្បាប់ បើជនណាប្រព្រឹត្តបទល្មើសដដែលៗនឹងត្រូវទទួលទោសទ្វេរដង បើសិនជាមិនរាងចាល តើលោកផ្កាយ ២ ទុន ដៀត អាចនឹងជាប់ទោសទ្វេរគុណឬទេ? ពីព្រោះបុគ្គលនេះ បានប្រព្រឹត្តបទល្មើស ដដែលតាំងពីឆ្នាំ២០០៩មកដល់ឆ្នាំ២០១៩ ថ្មីៗនេះ។
លោកពេជ្រ ស្រស់ សូមស្នើដល់សម្តេច ទៀ បាញ់ សុំពិនិត្យមើលករណីលោកផ្កាយ ២ ទុន ដៀតនេះផង ដើម្បីពង្រឹងច្បាប់កម្ពុជានិងអនុវត្តអភិក្រមទី៥គឺវះកាត់។ ដើម្បីកម្ចាត់ពួកប្រើអំណាចហួសដែនកំណត់ ដែលជាហេតុធ្វើឲ្យអន្តរាយ ដល់ ទ្រព្យសម្បត្តិជាតិនិងសហគមន៍។ លោកពេជ្រស្រស់បញ្ចាក់ថា
រូបភាព និងឯកសារភ្ជាប់មកនេះគឺលោកផ្កាយ ២ ទុន ដៀត បានប្រព្រឹត្តតាំងពីឆ្នាំ២០០៩រហូតមកដល់បច្ចុប្បន្ននេះ។ លើសពីនេះគឺខ្ញុំស្នើដល់ព្រះរាជអាជ្ញាកុំប៉ះលុយលោកផ្កាយ២ ទុន ដៀត ឲ្យសោះពីព្រោះអ្វីៗដែលពួកអស់លោកកំពុងធ្វើគឺខ្ញុំក៏កំពុងតែដឹងដែរ ហើយកុំយកលេសថាឲ្យរឿងស្ងប់សិនចាំយកគឺមិនអាចទេ ពីព្រោះរឿងនេះមិនស្ងប់ងាយៗឡើយ។
លោក ទុន ដៀតជា មន្ត្រីយោធាពាក់ផ្កាយ២ធ្លាប់ មានតួនាទីជាប្រធានច្រកទំនាក់ទំនងព្រំដែនកម្ពុជា- ថៃដែលរងការចោទប្រកាន់មិនអាចរកប្រភពដើម្បីសុំការបញ្ជាក់បានទេ ពាក់ព័ន្ធករណីនេះ។
