ក្រសួងការបរទេសកម្ពុជា ជំរុញឱ្យភាគីថៃរក្សាស្ថានភាពព្រុំដែនដូចដើម និងចូលរួមដោះស្រាយជម្លោះព្រំ ដែនខាងលើ តាមរយៈយន្តការ GBC និង JBC
ភ្នំពេញ៖ ក្រសួងការបរទេស និងសហប្រតិបត្តិការអន្តរជាតិកម្ពុជា នៅថ្ងៃទី០៣ ខែកញ្ញា ឆ្នាំ២០២៥នេះ បានចេញសេចក្តីថ្លែងការណ៍ស្តីពីការតវ៉ាជុំវិញសកម្មភាពពង្រីកតំបន់ជម្លោះដោយយោធាថៃ និងជំរុញឱ្យភាគីថៃរក្សាស្ថានភាពដូចដើម និងចូលរួមដោះស្រាយជម្លោះព្រំ ដែនខាងលើ តាមរយៈយន្តការ GBC និង JBC។
នៅក្នុងសេចក្តីថ្លែងការណ៍នោះដែរ បានឱ្យដឹងថា ការរាយបន្លាលួស សំណាញ់ របាំង និងកង់ឡានដោយយោធាថៃ កាលពីខែសីហា ឆ្នាំ២០២៥ នៅចំណុចភូមិចំនួនពីរ ក្នុងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យបានបង្កនូវទុក្ខលំបាកយ៉ាងធ្ងន់ធ្ងរដល់ប្រជាជនខ្មែរជាច្រើនគ្រួសារដែលត្រូវបានបណ្តេញចេញពីផ្ទះសម្បែងនិងដីស្រែ ចម្ការរបស់ពួកគេ និងកំពុងទន្ទឹងរង់ចាំដំណោះស្រាយស្ថានភាពនេះ។
ក្នុងសេចក្តីថ្លែងការណ៍បញ្ជាក់ ថា រាជរដ្ឋាភិបាលកម្ពុជានៅតែប្តេជ្ញាចិត្តយ៉ាងមុតមាំក្នុងការស្វែងរកដំណោះស្រាយប្រកបដោយស្មារតីមិត្តភាព ចំពោះវិវាទព្រំដែនជាមួយប្រទេសជិតខាងទាំងអស់តាមរយៈមធ្យោបាយសន្តិវិធីស្របតាមច្បាប់អន្តរជាតិនិងបន្តការរក្សាការប្តេជ្ញាចិត្តយ៉ាងម៉ឺងម៉ាត់ប្រកាន់នូវជំហរជាគោលការណ៍របស់ខ្លួនថាព្រំដែនមិនត្រូវបានផ្លាស់ប្តូរដោយការប្រើប្រាស់កម្លាំងបង្ខំនោះទេនិងជំរុញឱ្យភាគីថែរក្សាស្ថានភាពដូចដើម និងចូលរួមដោះស្រាយជម្លោះព្រំដែនខាងលើតាមរយៈយន្តការGBC និង JBC ដូចដែលភាគីទាំងពីរឯកភាពគ្នា៕
ជាមួយគ្នានេះដែរនៅក្នុងលិខិតចុះថ្ងៃទី៣ ខែកញ្ញា ឆ្នាំ២០២៥ លោក អ៊ុំ រាត្រី អភិបាលខេត្តបន្ទាយមានជ័យបានគូសបញ្ជាក់ថា បញ្ហាដែលអភិបាលខេត្តស្រះកែវលើកឡើងនោះ គឺពាក់ព័ន្ធនឹងការគ្រប់គ្រងព្រំដែន និងការងារវាស់វែង ខណ្ឌសីមា បោះបង្កោលព្រំដែនដែលជាសមត្ថកិច្ចរបស់គណៈកម្មាធិការព្រំដែនទូទៅកម្ពុជា-ថៃ (GBC) និងគណៈកម្មការចម្រុះព្រំដែនគោក (JBC) នៃប្រទេសទាំងពីរស្របតាមកិច្ចព្រមព្រៀងស្តីពីកិច្ចសហប្រតិបត្តិការព្រំដែន ដែលចុះថ្ងៃទី២៩ ខែកញ្ញា ឆ្នាំ១៩៩៥ និង MOU ឆ្នាំ២០០០។
អភិបាលខេត្តបន្ទាយមានជ័យចាត់ទុកការធ្វើសកម្មភាពណាមួយដោយឯកតោភាគីជាការបំពាន MOU ២០០០ និងជាការរំលោភកិច្ចព្រមព្រៀងបទឈប់បាញ់ថ្ងៃទី២៨ ខែកក្កដា ឆ្នាំ២០២៥ និងស្មារតីនៃកិច្ចប្រជុំវិសាមញ្ញាគណៈកម្មាធិការព្រំដែនទូទៅ (GBC) នាថ្ងៃទី៧ ខែសីហា ឆ្នាំ២០២៥ ព្រមទាំងស្មារតីនៃកិច្ចប្រជុំគណៈកម្មាធិការព្រំដែនថ្នាក់ភូមិភាគ (RBC) នាថ្ងៃទី២២ ខែសីហា ឆ្នាំ២០២៥។ ការណ៍នេះត្រូវបានអភិបាលខេត្តបន្ទាយមានជ័យបញ្ជាក់ថា គឺបានប៉ះពាល់ដល់ប្រជាពលរដ្ឋដែលរស់នៅ និងអាស្រ័យផលក្នុងតំបន់នោះ។
ក្នុងលិខិតដដែលនេះ លោក អ៊ុំ រាត្រី បានបង្ហាញក្តីសង្ឃឹមថា បញ្ហាចម្រូងចម្រាសនេះនឹងត្រូវមានដំណោះស្រាយល្អប្រកបដោយសន្តិវិធី តាមរយៈគោលការណ៍ច្បាប់អន្តរជាតិនៅក្នុងកិច្ចប្រជុំ GBC និង JBC នាពេលដ៏ខ្លីខាងមុខ។ចំពោះករណីដែលបានកើតឡើងនៅភូមិជោគជ័យ និងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យនេះ អ្នកនាំពាក្យរដ្ឋាភិបាលកម្ពុជាបានចេញសេចក្តីប្រកាសព័ត៌មានមួយក្នុងថ្ងៃទី៤កញ្ញានេះ ដោយបញ្ជាក់ថា ភាគីថៃបានធ្វើសកម្មភាពជាឯកតោភាគី ចាប់តាំងពីថ្ងៃទី១២ ខែសីហា ឆ្នាំ ២០២៥មក។ សកម្មភាពបំពានរបស់ថៃនេះត្រូវបានរដ្ឋាភិបាលកម្ពុជាអះអាងថា កម្ពុជាបានព្យាយាមដោះស្រាយដោយសកម្ម តាមយន្តការគ្រប់លំដាប់ថ្នាក់ និងគ្រប់មធ្យោបាយការទូត ដើម្បីតវ៉ាទៅកាន់ភាគីថៃ។
តាមអ្នកនាំពាក្យរដ្ឋាភិបាល កម្ពុជាបានធ្វើកំណត់ទូត ៣លើកទៅក្រសួងការបរទេសថៃ និងបានប្រាប់អង្គការអន្តរជាតិជាច្រើនលើក រួមទាំងអង្គការសហប្រជាជាតិជាដើម។ នេះមិនទាន់រាប់បញ្ចូលកិច្ចប្រជុំវិសាមញ្ញនៃគណៈកម្មាធិការព្រំដែនទូទៅកម្ពុជា-ថៃ GBC ១លើក កិច្ចប្រជុំគណៈកម្មាធិការព្រំដែនថ្នាក់ភូមិ ភាគកម្ពុជា-ថៃ RBC ៤លើក ការដាក់កំណត់ទូតតវ៉ា ក្នុងនាមគណៈកម្មការចម្រុះខណ្ឌសីមាព្រំដែនគោក JBC ទៅថៃ ៣លើក និងការដាក់លិខិតតវ៉ារបស់អាជ្ញាធរបន្ទាយមានជ័យ ២លើក។
គួរជ្រាបថា នៅថ្ងៃទី៣ ខែកញ្ញា ឆ្នាំ២០២៥ អភិបាលខេត្តស្រះកែវ ប្រទេសថៃចេញលិខិតមួយដោយស្នើសុំកិច្ចសហការពីអភិបាលខេត្តបន្ទាយមានជ័យរបស់កម្ពុជា ដើម្បីផ្លាស់ប្តូរទីតាំងប្រជាពលរដ្ឋខ្មែរចំនួន ១៧០គ្រួសារ ដែលថៃចោទប្រកាន់ថាបានចូលទន្ទ្រានកាន់កាប់ភូមិបានណងយ៉ាកែវរបស់ថៃ។ជាមួយគ្នានោះ អាជ្ញាធរខេត្តស្រះកែវក៏បានលើកស្លាកសញ្ញា ៣ផ្ទាំង ដែលមាន ៣ភាសា គឺភាសាថៃ ភាសាអង់គ្លេស និងភាសាខ្មែរដែលមានខ្លឹមសារព្រមានពលរដ្ឋខ្មែរ ឲ្យចាកចេញពីតំបន់ដែលពលរដ្ឋខ្មែរកំពុងរស់នៅ បើពុំដូច្នោះទេ អាជ្ញាធរថៃនឹងចាប់ពលរដ្ឋខ្មែរទាំងនោះ ដាក់ទោសជាប់គុក ៧ឆ្នាំ និងពិន័យជាប្រាក់ចំនួន ៧ម៉ឺនបាត ឬស្មើប្រមាណ ២ ៣០០ដុល្លារ។សកម្មពាបរបស់អាជ្ញាធរខេត្តស្រះកែវថៃនេះបង្កឲ្យមានកំហឹងពឺប្រជាពលរដ្ឋរហតួតមានការចេញតវ៉ាយ៉ាងសកម្មនួវព្រឹកថ្ងៃទឹ៤កញ្ញា។
