នៅច្រកម៉ឺនជ័យសម្តេចតេជោ ហ៊ុន សែន ណែនាំឲ្យ សិក្សា កសាងស្តូបគោរពវិញ្ញាណក្ខន្ធអ្នកស្លាប់ ក្នុងចលនាតស៊ូរំដោះជាតិ
21-September-2026 / ផ្សេងៗ
ព្រៃវែង៖ សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានណែនាំឱ្យសម្តេចពិជ័យសេនា ទៀ បាញ់ សិក្សាពីប្រវត្តិសាស្ត្រតំបន់ម៉ឺនជ័យ ដើម្បីកសាងស្តូបគោរពវិញ្ញាណក្ខន្ធអ្នកស្លាប់ ក្នុងចលនាតស៊ូរំដោះជាតិ។ក្នុងឱកាស អញ្ជើញចុះជួបសំណេះសំណាល ជាមួយមន្ត្រីក្រុមការងារច្រកព្រំដែនអន្តរជាតិម៉ឺនជ័យ ស្ថិតក្នុងភូមិម៉ឺនជ័យ ឃុំក្របៅ ស្រុកកំចាយមារ ខេត្តព្រៃវែង នៅថ្ងៃទី០២ ខែកក្កដា ឆ្នាំ២០២៥នសម្ដេចតេជោ ហ៊ុន សែន បានបញ្ជាក់យ៉ាងដូច្នេះថា «សូមសម្ដេចពិជ័យ សិក្សាអំពីប្រវិត្ដសាស្ដ្រ ហើយកន្លែងនេះ (ម៉ឺនជ័យ) [...] គួរតែកសាងស្តូបមួយ ដើម្បីសម្រាប់គោរពវិញ្ញាណក្ខន្ធ ចំពោះអ្នកដែលបានឆ្លងកាត់នូវតំបន់នេះ សម្រាប់ការដែលក្លាយជាចលនាតស៊ូ»។ 
សម្ដេចតេជោ ហ៊ុន សែន បានឲ្យដឹងថា ច្រកទ្វារព្រំដែនអន្តរជាតិម៉ឺនជ័យ គឺជាតំបន់ដែលប្រជាជនឆ្លងកាត់ច្រើនជាងគេ ឆ្លងកាត់ទីមួយ គឺនៅក្នុងពេលដែលវៀតណាម វាយបកនៅក្នុងខែវិច្ឆិកា និងខែធ្នូ ក្នុងឆ្នាំ១៩៧៧ និងឆ្នាំ១៩៧៨ ដែលប្រជាជនមួយចំនួនធំ នៅក្នុងស្រុកមេមត់ និងស្រុកពញាក្រែក បានចាកចេញទៅប្រទេសវៀតណាម។សម្ដេចតេជោ ហ៊ុន សែន បានថ្លែងថា យើងត្រូវទុកស្លាកស្នាមប្រវិត្ដសាស្ដ្ររបស់យើង ហើយវៀតណាម គេអាចកត់ត្រាទុកស្នាមប្រវិត្ដសាស្ដ្ររបស់ពួកគាត់ ទៅលើបញ្ហាការតស៊ូប្រឆាំងអាមេរិក នៅតាមព្រំដែនកម្ពុជា-វៀតណាម។
សម្តេចអគ្គមហាសេនាបតីតេជោ ហ៊ុន សែន ក៏បានមានប្រសាសន៍ឲ្យដឹងថា បង្គោលព្រំដែនកម្ពុជា-វៀតណាម គឺជាសមិទ្ធិផល ដែលភាគីកម្ពុជានិងវៀតណាម ឯកភាពគ្នាដោយយកទឹកជ្រៅ ដើម្បីបែកចែកព្រំដែន ដែលនេះជាគោលការណ៍អន្តរជាតិ នៃការដោះស្រាយបញ្ហាដោយសន្តិវិធី តាមច្បាប់អន្តរជាតិ។សម្តេចតេជោ បន្ថែមថា ការខិតខំរបស់រាជរដ្ឋាភិបាលកម្ពុជា តាំងពីពេលមុន រហូតដល់ពេលនេះ គឺការកសាងខ្សែព្រំដែនសន្តិភាព មិត្តភាព សហប្រតិបត្តិការ និងការអភិវឌ្ឍ។
សម្តេចតេជោ ហ៊ុន សែន ក៏បានណែនាំឱ្យអាជ្ញាធរតាមព្រំដែននីមួយៗ ធ្វើយ៉ាងណាខិតខំឱ្យមានកិច្ចសហការគ្នាឱ្យបានល្អ។ សម្តេចតេជោ បញ្ជាក់ថា "មានអ្នកជិតខាងល្អ ដូចមានមាស មានអ្នកជិតខាងអាក្រក់ ដូចមានមីន"។សម្តេចបានមានប្រសាសន៍ដែរថា ទំនាក់ទំនងកម្ពុជា-វៀតណាម គិតចាប់តាំងពីឆ្នាំ១៩៦៨ រហូតមកដល់ឆ្នាំ២០២៥នេះ គឺគណបក្សប្រជាជនកម្ពុជា បានគ្របដណ្តប់ទំនាក់ទំនងនេះជាង២ភាគ៣ ហើយទំនាក់ទំនងជាមួយឡាវ ក៏គណបក្សប្រជាជនកម្ពុជា បានគ្របដណ្តប់ជាងពាក់កណ្តាលដែរ ព្រោះកម្ពុជានិងឡាវ មានទំនាក់ទំនងជាមួយគ្នាយូរហើយ។ ដោយឡែក វៀតណាម ទើបបង្កើតទំនាក់ទំនងការទូត នៅឆ្នាំ១៩៦៨ ដូចនេះយើងធ្វើបានល្អប្រសើរ។
យោងតាមរបាយការណ៍ បានឲ្យដឹងថា ទីស្នាក់ការច្រកទ្វារព្រំដែនអន្តរជាតិ ម៉ឺនជ័យ-តីនណាម (កម្ពុជា-វៀតណាម) ដែលដំបូងឡើយ ទីតាំងនេះ ជាច្រករបៀងដែលប្រជាជនរស់នៅទាំងសងខាងតែងតែដោះដូរទំនិញ និងកសិផលទៅវិញទៅមក។ក្នុងអំឡុងឆ្នាំ២០១០ រាជរដ្ឋាភិបាលកម្ពុជា បានបង្កើតជាច្រកទ្វារតំបន់ព្រំដែនម៉ឺនជ័យ នៅថ្ងៃទី៣០ ខែមេសា ឆ្នាំ២០១៤ រាជរដ្ឋាភិបាលកម្ពុជា បានសម្រេចដំឡើងកម្រិតច្រកទ្វារតំបន់ ព្រំដែនម៉ឺនជ័យ ទៅជា «ច្រកទ្វារព្រំដែនអន្តរជាតិម៉ឹនជ័យ» តាមលិខិតលេខ ៦៣៥ ស.ជ.ណ របស់ទីស្តីការគណៈរដ្ឋមន្ត្រី។
ជាមួយគ្នានោះដែរសម្តេចតេជោ ហ៊ុន សែន ប្រធានព្រឹទ្ធសភានៃកម្ពុជា ក៏បានណែនាំឱ្យអាជ្ញាធរខេត្តព្រៃវែង ត្រូវខិតខំយកចិត្តទុកដាក់លើការងារទាក់ទាញវិនិយោគិន ដើម្បីឱ្យមកបណ្តាក់ទុននៅតំបន់ម៉ឺនជ័យ ។សម្តេចតេជោ ថា «គោលដៅថ្ងៃក្រោយ សូមឱ្យខេត្តយកចិត្តទុកដាក់ទៅលើការទាក់ទាញវិនិយោគ មកកាន់តំបន់នេះ [ម៉ឺនជ័យ] ថ្ងៃក្រោយអាចក្លាយទៅជាតំបន់ឧស្សាហកម្ម ក៏អាចថាបាន ព្រោះវាបម្រើឱ្យការដឹកជញ្ជូនជិត ហើយតំបន់កែច្នៃ។ ទាញខាងវៀតណាមគាត់មកដាក់រោងចក្រ កែច្នៃនៅខាងកម្ពុជា ដែលកម្ពុជាមានផលិតផលជាវត្ថុធាតុដើម ដែលនេះជាលទ្ធភាពនៃការពង្រីកធ្វើពាណិជ្ជកម្ម តែអាចតភ្ជាប់ការផលិតសម្រាប់ការនាំចេញ ឬការផ្គត់ផ្គង់ក្នុងស្រុក»។
សម្តេចតេជោ ហ៊ុន សែន បញ្ជាក់ថា ការបើកព្រំដែនមិនគ្រាន់ ជាការបើកឱ្យមានការចេញចូលឆ្លងកាត់ប៉ុណ្ណោះទេ ប៉ុន្តែត្រូវជំរុញឱ្យមានសកម្មភាពវិនិយោគ និងពាណិជ្ជកម្ម ហើយទំហំពាណិជ្ជកម្មរវាងកម្ពុជា-វៀតណាម កាន់តែរីកធំឡើងជាបន្តបន្ទាប់ ក្នុងនោះការនាំចេញរបស់កម្ពុជាទៅវៀតណាម កាន់តែរីកធំជាងមុន។បន្ថែមពីនេះ សម្តេចបានណែនាំដល់មន្ត្រីប្រចាំការច្រកទ្វារព្រំដែនកម្ពុជា-វៀតណាម ត្រូវខិតខំកសាងទំនាក់ទំនងល្អជាមួយប្រទេសជិតខាង ដូចពាក្យថា «មានអ្នកជិតខាងល្អដូចមានមាស មានអ្នកជិតខាងអាក្រក់ដូចមានមីន»៕ 
