បិទការនាំចូលប្រេងពីប្រទេសថៃធ្វើឲ្យនាវាដឹកប្រេង របស់ក្រុមហ៊ុន PTT OR ចំណុះ ៤,៨លានលីត្រ ជាប់គាំងនៅកណ្ដាលសមុទ្រ
21-September-2026 / សេដ្ឋកិច្ច
ប្រទេសថៃ៖នាវាដឹកប្រេងចំណុះ ៤លាន៨សែនលីត្រ របស់ក្រុមហ៊ុន PTT OR ត្រូវបានកងទាហានជើងទឹករបស់ថៃ ប្រទះឃើញ ក្រោយពីនាវាដឹកប្រេងនេះ បានជាប់គាំងក្នុងសមុទ្រជិត កោះគុតមិនអាចដឹកប្រេងចូលទៅប្រទេសកម្ពុជាបាន ។
កាសែតថាឌឺណេស្សិន( The Nation) បានឱ្យដឹងថា កាលពីថ្ងៃអាទិត្យ ទី ២៩ ខែមិថុនា បញ្ជាការតំបន់១កងទ័ពជើងទឹករបស់ថៃ រួមជាមួយនឹងមន្ត្រីនៃភ្នាក់ងាររដ្ឋាភិបាលមួយចំនួន បានឡើងទៅលើនាវាដឹកប្រេងមួយឈ្មោះ Chetthabodi 6 ជារបស់ក្រុមហ៊ុន PTT OR ដែលបាន បោះយុទ្ធការ នៅជិតនឹង កោះគុត នៅក្នុងខេត្តត្រាតប្រទេសថៃ ។ប៉ុន្ដែ បន្ទាប់ពីការត្រួតពិនិត្យ នាវាប្រេងនេះ ពុំមានជាប់ករណីខុសច្បាប់ណាមួយឡើយ ដោយបញ្ជាក់ថា ប្រេងដែលបានដឹកនោះ គឺត្រូវបានបង់ពន្ធគយត្រឹមត្រូវ សម្រាប់ការនាំចេញ ហើយក្រុមហ៊ុននៅកម្ពុជា ក៏បានទូទាត់ថ្លៃប្រេងនោះរួចហើយដែរ ប៉ុន្ដែ ក្រោយពីមានការចេញបទបញ្ជាហាមឃាត់ដោយរាជរដ្ឋាភិបាលកម្ពុជា នាវាដឹកប្រេងនេះ មិនអាចដឹកជញ្ជូនប្រេងទៅឱ្យក្រុមហ៊ុននៅកម្ពុជាបានឡើយ។
តាមឯកសារដែលត្រូវបានបង្ហាញ និងផ្សាយដោយកាសែតថា The Nation ប្រេងប្រមាណ ៤លាន៨សែនលីត្រនេះ គឺជារបស់ក្រុមហ៊ុន PTT OR ដែលត្រូវដឹកទៅឱ្យក្រុមហ៊ុនកម្ពុជា Sokimex។ កិច្ចសន្យាបញ្ជាទិញ បានធ្វើឡើងបីខែមុន ហើយការទូទាត់ក៏ត្រូវបានធ្វើរួចរាល់នៅមុនពេលដឹកជញ្ជូន។បើតាមប្រភពព័ត៌មាន នាវាដឹកប្រេងនេះ ត្រូវបានក្រុមហ៊ុន Sokimex ប្រាប់ថា «មិនអាចទទួលយកប្រេងបាន» នៅថ្ងៃទី ២៦ ខែមិថុនា និងឱ្យបញ្ជូនប្រេងទាំងនោះ ត្រឡប់ទៅប្រទេសថៃវិញ។
នាវាដឹកប្រេងនេះ ក៏ត្រូវបានកងទ័ពជើងទឹកកម្ពុជា ស្នើសុំត្រួតពិនិត្យឯកសារ និងបានអនុញ្ញាតឱ្យវិលត្រឡប់ទៅកាន់ប្រទេសថៃវិញ ហើយក៏បានបោះយុទ្ធការនៅត្រង់ចំណុចជិតកោះគុត។ មន្ត្រីគយថៃ បានបញ្ជាក់ថា ឯកសារទាំងអស់របស់នាវាដឹកនប្រេងនេះ គឺមានសុពលភាព ហើយវា ក៏មិនបានពាក់ព័ន្ធនឹងការរត់ពន្ធ ឬសកម្មភាពខុសច្បាប់ណាមួយឡើយ។តាមប្រព័ន្ធផ្សព្វផ្សាយថៃ PBS ការបណ្តេញនាវាដឹកប្រេង Chetthanabodi 6 ចេញពីខេត្តព្រះសីហនុដោយកងទ័ពជើងទឹកកម្ពុជា ធ្វើឡើងក្រោមការចោទប្រកាន់ថា នាវានោះបានបំពានបម្រាមរដ្ឋាភិបាលកម្ពុជាលើការនាំចូលប្រេងពីប្រទេសថៃ និងបានចូលមកដែនទឹកកម្ពុជាដោយខុសច្បាប់។ ប្រព័ន្ធផ្សព្វផ្សាយថៃ PBSបានឲ្យដឹងទៀតថា វត្តមានរបស់កប៉ាល់ដឹកប្រេងនោះ ត្រូវបានរាយការណ៍ជាលើកដំបូងលើទំព័រហ្វេសប៊ុកថៃដ៏ពេញនិយម CSI LA ដែលបានប្រើគេហទំព័រតាមដានចរាចរណ៍ក្នុងដែនសមុទ្រមកបង្ហាញថា កប៉ាល់ដែលផ្ទុកប្រេងនោះបានចូលក្នុងដែនទឹកខេត្តព្រះសីហនុ កាលពីថ្ងៃទី ២៤ ខែមិថុនា ហើយបាននិងកំពុងរង់ចាំបង្ហូរប្រេងចេញ។ករណីយ៍បណ្តេញកប៉ាល់ប្រេងថៃចេញនេះលោក អ៊ឹង ឌីប៉ូឡា អ្នកនាំពាក្យក្រសួងរ៉ែ និងថាមពលកាសែតមិនទាន់អាចទាក់ទងបានទេនៅថ្ងៃអាទិត្យនេះ។
លោក កែវ រតនៈ បានថ្លែងកាលពីថ្ងៃសុក្រថា ចាប់តាំងពីសារាចរណែនាំរបស់រដ្ឋាភិបាលចូលជាធរមានមក ការនាំចូលប្រេងឥន្ធនៈ ឬឧស្ម័នពីថៃមិនត្រូវបានអនុញ្ញាតនោះទេ ទោះក្នុងកាលៈទេសៈណាក៏ដោយ។សូមបញ្ជាក់ថាកាលពីថ្ងៃទី២២ ខែមិថុនា ឆ្នាំ២០២៥ រាជរដ្ឋាភិបាលកម្ពុជាបានផ្អាកការនាំចូលប្រេងឥន្ធនៈនិងឧស្ម័នឥន្ធនៈគ្រប់ប្រភេទពីប្រទេសថៃ។ សម្តេចធិបតី ហ៊ុន ម៉ាណែត នាយករដ្ឋមន្ត្រី បានគូសបញ្ជាក់ថា បណ្ដាក្រុមហ៊ុនចែកចាយប្រេងឥន្ធនៈនៅកម្ពុជា មានលទ្ធភាពនាំចូលប្រេងឥន្ធនៈនិងឧស្ម័នឥន្ធនៈពីប្រភពផ្សេងគ្រប់គ្រាន់ ដើម្បីផ្គត់ផ្គង់តម្រូវការប្រើប្រាស់ក្នុងស្រុករបស់ប្រជាពលរដ្ឋយើង កុំថាឡើយត្រឹមមួយខែ ទោះជារៀងរហូតក៏មិនជាបញ្ហា។ឯកឧត្តម កែវ រតនៈ រដ្ឋមន្ត្រីក្រសួងរ៉ែនិងថាមពលបានថ្លែងនៅថ្ងៃទី២៧ ខែមិថុនា ឆ្នាំ២០២៥ ថាចាប់តាំងពីឱសានវាទរបស់រាជរដ្ឋាភិបាលចូលជាធរមានមក មិនមានការអនុញ្ញាតឱ្យនាំចូលប្រេងនិងឧស្ម័នឥន្ធនៈពីថៃមកកម្ពុជាដាច់ខាត ហើយកម្ពុជាមានសមត្ថភាពគ្រប់គ្រាន់ក្នុងការផ្គត់ផ្គង់ប្រេងនិងឧស្ម័នឥន្ធនៈសម្រាប់តម្រូវការខ្លួនពេញលេញ៕
