សម្តេចតេជោបង្ហើបពីទំនាក់ទំនងពិសេសជាមួយប្រធានាធិបតីបារាំងដែលចង់ឲ្យសម្តេចកាន់អំណាច៣ទៅ៤ឆ្នាំទៀត!
ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានទម្លាយថា ប្រធានាធិបតីបារាំង អេមម៉ាញូអ៊ែល ម៉ាក្រុង (Emmanuel Macron) ធ្លាប់បានស្នើឱ្យសម្ដេចតេជោបន្តកាន់តំណែងជានាយករដ្ឋមន្ត្រី ឱ្យបាន៣ទៅ៤ឆ្នាំទៀត ដើម្បីជ្រោមជ្រែងទំនាក់ទំនងរវាងកម្ពុជា និងបារាំងឱ្យបានតែមានវឌ្ឍនភាព។សម្ដេចតេជោបានថ្លែងយ៉ាងដូច្នេះថា «ប្រធានាធិបតីបារាំងបាននិយាយមួយបែបទៀតថា ឯកឧត្តមនៅមានកម្លាំង (ហៅសំដៅមកសម្តេចតេជោ) គួរតែនៅ៣-៤ឆ្នាំទៀតទៅ ក្នុងគោលដៅធ្វើជាដៃគូ។ ហ្នឹងគឺជាការនិយាយចេញពីមាត់គាត់»។
នាឱកាសប្រគល់វិញ្ញាបនបត្រ និងសញ្ញាបត្រដល់សិស្ស និងនិស្សិតសាកលវិទ្យាល័យធនធានមនុស្ស នាព្រឹកថ្ងៃទី២០ ខែកុម្ភៈ ឆ្នាំ២០២៣ សម្ដេចតេជោ ហ៊ុន សែន ក៏បានបញ្ជាក់ថា ជំនួបពិភាក្សាការងាររវាងសម្ដេច និងលោក ម៉ាក្រុង នាពេលនោះ គឺជាការស្នើសុំមុនពីសំណាក់ភាគីបារាំង ហើយលោកប្រធានាធិបតី ម៉ាក្រុង ក៏ថែមទាំងរៀបចំពិធីលៀងសាយភោជន៍ជូនសម្ដេច និងជូនសម្ដេចដើរទស្សនកិច្ចនៅក្នុងវិមានអេលីសេ (Élysée Palace) ដែលជាអគាររបស់ប្រធានាធិបតីទៀតផងដែរ។
ការបកស្រាយរបស់ សម្តេចតេជោ ហ៊ុន សែន បានធ្វើឡើងបន្ទាប់ពី លោក ស៊ន តារា និងក្រុមប្រឆាំងមួយចំនួន បានវាយប្រហារចំពោះគម្រោងជំនួបរវាង សម្តេចតេជោ និង ប្រធានាធិបតីបារាំង នៅអំឡុងកិច្ចប្រជុំ G20 នៅប្រទេសឥណ្ឌូនេស៊ី និងកិច្ចប្រជុំ APEC នៅក្រុងបាងកកប្រទេសថៃ នាពេលកន្លងទៅ ដែលខកខានដោយសារតែសម្តេចត្រូវបានធ្វើតេស្តឃើញមេរោគកូវីដ១៩។សម្តេចតេជោ ហ៊ុន សែន ស្នើសុំការយោគយល់ពីប្រធានាធិបតីបារាំង ចំពោះការទម្លាយនូវទំនាក់ទំនងរវាងសម្តេច និងលោកប្រធានាធិបតី។ សម្តេចក៏បានស្នើឱ្យអគ្គរដ្ឋទូតបារាំងប្រចាំនៅកម្ពុជា បញ្ជូនសារនេះទៅកាន់លោក ម៉ាក្រុង ផងដែរ។
សម្តេចតេជោ បានបញ្ជាក់ដូច្នេះថា៖ «ខ្ញុំជាមួយនឹងប្រធានាធិបតីបារាំង មានលេខទូរស័ព្ទឆ្លងឆ្លើយជាមួយគ្នា តាម៣ប្រព័ន្ធដែលគាត់ប្រាប់ WhatsApp, Telegram និង Signal។ បងប្អូនខ្មែរដែលមានសញ្ជាតិបារាំង ឬក៏អ្នកដែលកំពុងស្នាក់នៅប្រទេសបារាំងស្តាប់ឱ្យបាន ទំនាក់ទំនងផ្លូវរដ្ឋ យើងមានកិច្ចសហប្រតិបត្តិការទាំងទ្វេភាគី ប៉ុន្តែអ្វីដែលសំខាន់ យើងបានធ្វើការទាក់ទងគ្នាពាក់ព័ន្ធនឹងសន្តិសុខតំបន់ និងអន្តរជាតិ ដែលខ្ញុំមិនអាចនិយាយបានទេ រឿងនេះជារឿងអាថ៌កំបាំង»។
សម្តេចបានបន្តថា៖ «ប្រធានាធិបតីបារាំងបានឱ្យលេខទូរស័ព្ទមកខ្ញុំ អញ្ចឹងយើងបានសន្យាជាមួយគ្នាឈប់ប្រើត្រកូល មានន័យថា ខ្ញុំហៅ "អេម៉ាញូអែល ឯគាត់ហៅខ្ញុំសែនតែម្តង" យើងមានទំនាក់ទំនងជាមួយគ្នា អ្នកយល់ទេ អ្នកគិតថាខ្ញុំទៅសុំជួបបារាំងប្រើតួនាទីប្រធានអាស៊ាន ប្រទេសលើលោកនេះបើគេមិនជួប គឺមិនជួបហើយកុំឆ្ងល់ពេក បើអ្នកមិនដែលធ្វើនាយករដ្ឋមន្ត្រី មិនដែលធ្វើប្រមុខរដ្ឋ មិនដែលធ្វើការទូត អ្នកគួរតែដឹងច្បាស់។«ខ្ញុំទៅហួសពីហ្នឹង ឈានដល់ទំនាក់ទំនងរវាងបុគ្គល និងបុគ្គល ដែលមានភាពជាបងប្អូន ម៉ាក្រុង ហៅខ្ញុំ "បង"»។ នេះបើតាមការបញ្ជាក់របស់សម្តេចតេជោ។
សម្តេចបានរំលឹកថា មុន១ថ្ងៃ នៃការចេញទៅកាន់កោះបាលី ដើម្បីចូលរួមកិច្ចប្រជុំ G20 ប្រធានាធិបតីបារាំងក៏បានស្នើសុំសម្តេចម្តងទៀត ដើម្បីជួបទទួលទានបាយជាមួយគ្នា ដោយក្នុងនោះមានប្រធានាធិបតីមកពីប្រទេសមួយចំនួនប៉ុន្តែដោយសារតែសម្តេចជាប់ភារកិច្ចទទួលព្រះចៅស៊ូតង់ និងអមព្រះមហាក្សត្រ ដើម្បីជប់លៀងជូនព្រះចៅស៊ូតង់ ហើយដោយសារយន្តហោះសម្តេចទៅយឺត និងធ្វើតេស្តឃើញកូវីដ១៩ ទើបមិនអាចជួបជាមួយ លោក ម៉ាក្រុង ពេលនោះ ហើយសម្តេចក៏សុំទោសប្រធានាធិបតីបារាំងផងដែរ។
សម្តេចបានបញ្ជាក់ថា ដោយខកខានជំនួបនៅបាលី និងបាងកក ជាថ្មីម្តងទៀត លោក ម៉ាក្រុង បានអញ្ជើញសម្តេចទៅជួបនៅព្រុចសែល ហើយប៉ុន្មានថ្ងៃក្រោយមកក៏បានអញ្ជើញសម្តេចទៅជួបនៅទីក្រុងបារីសវិញ ដោយនឹងមានសន្ទនានៅវិមានប្រធានាធិបតីអេលីហ្សេ និងចូលរួមវេទិកាសាមគ្គីភាពជាមួយប្រជាជនអ៊ុយក្រែន ដែលរៀបចំដោយប្រធានាធិបតីបារាំងផងដែរ។សម្តេចតេជោ ហ៊ុន សែន បានកោតសរសើរចំពោះ លោកប្រធានាធិបតី ម៉ាក្រុង ដែលមានឥរិយាបទគួរឱ្យគោរព។ សម្តេចក៏បានរំលឹកអំពីការវាយសារឆ្លងឆ្លើយជាមួយ លោក ម៉ាក្រុង កាលពីថ្ងៃទី២៧ ខែធ្នូ ឆ្នាំ២០២២ កន្លងទៅ ដែលសម្តេចបានជូនពរ លោក ម៉ាក្រុង ជាភាសាបារាំង ហើយលោកក៏បានឆ្លើយជាភាសាខ្មែរត្រឡប់មកវិញ។ សម្តេចតេជោ ហ៊ុន សែន បានបញ្ជាក់បន្ថែមថា កន្លងមកសម្តេចមិនដែលបានប្រើប្រាស់ទំនាក់ទំនងភាពជាបងប្អូនជាមួយ លោក ម៉ាក្រុង ដើម្បីបង្អួតនរណានោះទេ.។
សម្តេចតេជោបានថ្លែងឲ្យដឹងទៀតថា អេលីហ្សេ ជំនាន់ ហ្សាស៊ីរ៉ាក់ ខ្ញុំទៅអេលីហ្សេ ៣ ដង ,ជំនាន់ សាកូហ្សី ខ្ញុំទៅអេលីហ្សេ ១ ដង ទស្សនកិច្ចផ្លូវការ,ជំនាន់ ហូល្លង់ ខ្ញុំទៅអេលី ហ្សេ ១ដងនិងជំនាន់ អេមម៉ាញូអ៊ែល ម៉ាក្រុង ខ្ញុំទៅម្តងហើយពេលនេះជាលើកដំបូងដែលមានពិធីជប់លៀងនៅវិមានអេលីហ្សេរបស់ប្រធានាធិបតីបារាំងជូនចំពោះសម្តេច ហើយក៏បានស្គាល់បន្ទប់មួយចំនួននៅក្នុងអេលីហ្សេ ។សម្តេចតេជោបន្តថា៖ខ្ញុំមិនមានទំនាក់ទំនងជាមួយប្រធានាធិបតីជ្សេងទេលើកលែងតែប្រធានាធិបតីឡាវទេដែលពីមុនជានាយករដ្ឋមន្ត្រីឡាវដែលខ្ញុំបានបង្កើតWhatsApp បង្កើតឡាញ ភ្ជាប់ទំនាក់ទំនងជាមួយគ្នា ឥឡូវនាយករដ្ឋមន្ត្រី និង ប្រធានាធិបតីឡាវ សុទ្ធតែអាចទំនាក់ទំនងគ្នាផ្ទាល់បាន ហើ យក្រៅពីនោះអត់ទេ ។ មានតែប្រធា នាធិបតីបារាំងទេខ្ញុំបង្ហាញនូវការគោរពរបស់ខ្ញុំចំពោះតួនាទីផ្ទាល់របស់ប្រធានាធិបតីបារាំងដែលបានធ្វើកិច្ចការដ៏ល្អទាក់ទងបញ្ហាអន្តរជាតិខ្ញុំគោរពហើយគាត់ក៏គោរព ចំពោះតួនាទីរបស់កម្ពុជា ។ ឥឡូវមានតែភាគីបារាំងទេដែលអាច ចេញមកបញ្ជាក់រឿងនេះបានប៉ុន្តែជួនការភាគីបារាំងគេគិត ថាវាមិនចាំបាច់ឆ្លើយជាមួយក្រុមជនពាល ។
