ចិននិងអាមេរិក អង្គុយចរចាគ្នានៅស្វិសរឿងបញ្ហាពាណិជ្ជកម្ម ក្រោយធ្វើសង្គ្រាមពន្ធយ៉ាងកក្រើក
21-May-2025 / ព័ត៌មានអន្តរជាតិ
ប្រទេសស្វីស៖ នាថ្ងៃសៅរ៍ ទី១០ ខែឧសភាចិននិងសហរដ្ឋអាមេរិក បានចាប់ផ្តើមហើយនូវជំនួបកម្រិតខ្ពស់ស្តីពីបញ្ហាសេដ្ឋកិច្ចនិងពាណិជ្ជកម្ម ក្នុងទីក្រុងហ្សឺណែវនៃប្រទេសស្វីស។ នេះបើតាមការចេញផ្សាយដោយ ទីភ្នាក់ងារព័ត៌មាន Xinhua។ជំនួបខាងលើរធ្វើឡើងវាងរដ្ឋមន្ត្រីហិរញ្ញវត្ថុអាមេរិក លោក Scott Bessent និងប្រធានតំណាងពាណិជ្ជកម្មអាមេរិក លោកចាមីសុនគ្រី (Jamieson Greer) ជាមួយគណៈប្រតិភូចិន ដឹកនាំដោយឧបនាយករដ្ឋមន្ត្រី លោក ហេលីហ្វេង(He Lifeng )គឺជាកិច្ចពិភាក្សាជាន់ខ្ពស់លើកដំបូងបង្អស់ រវាងកំពូលមហាអំណាចសេដ្ឋកិច្ចទាំងពីររបស់ពិភពលោក ចាប់តាំងពីសង្គ្រាមពាណិជ្ជកម្មបានផ្ទុះឡើង កាលពីខែមេសាកន្លងទៅ។ កិច្ចចរចាពាណិជ្ជកម្មចិន-អាមេរិកខាងលើ នឹងប្រព្រឹត្តទៅពេញមួយចុងសប្តាហ៍នេះ។
នៅថ្ងៃសុក្រ ទី៩ ឧសភា លោកដូណាល់ ត្រាំ បានបង្ហោះសារនៅលើបណ្តាញសង្គម Truth Social របស់លោក ដោយបានសើ្នឲ្យបន្ថយពន្ធលើទំនិញនាំចូលពីចិន មកត្រឹម ៨០%។ ម្ចាស់សេតវិមានរូបនេះបានលើកឡើងថា ការដាក់ពន្ធ ៨០% លើទំនិញចិនចូលទឹកដីអាមេរិក គឺល្មមសមរម្យ។ ក៏ប៉ុន្តែ លោកត្រាំបញ្ជាក់បន្ថែមថា វាអាស្រ័យលើ លោក ស្កុត បេសិន ជាអ្នកដឹកនាំចរចារឿងនេះ។ ឯរដ្ឋមន្ត្រីក្រសួងពាណិជ្ជកម្មអាមេរិក លោកហូវឹតលុតនិក( Howard Lutnick)វិញ បានប្រាប់ទូរទស្សន៍អាមេរិក Fox News កាលពីយប់ថ្ងៃសុក្រ ទីឧសភាថា លោកប្រធានាធិបតីអាមេរិកចង់ដោះស្រាយបញ្ហាជាមួយនឹងរដ្ឋាភិបាលចិន និង ចង់បន្ធូរបន្ថយស្ថានការណ៍តានតឹងនៃសង្គ្រាមពាណិជ្ជកម្មរវាងប្រទេសទាំងពីរ។ ថ្លែងនៅចំពោះមុខអ្នកសារព័ត៌មាន លោកស្រី Karoline Leavitt អ្នកនាំពាក្យសេតវិមានអាមេរិកវិញបានបញ្ជាក់ថា អាមេរិកនឹងមិនទម្លាក់អាត្រាពន្ធលើទំនិញចិនតែឯកតោភាគីទេ ប្រសិនបើចិនមិនព្រមទម្លាក់អាត្រាពន្ធលើទំនិញអាមេរិក។ អាមេរិកចង់ឃើញចិនធ្វើសម្បទានដូចគ្នា។
ដោយឡែក រដ្ឋាភិបាលក្រុងប៉េកាំងយល់ថាខ្លួនជាជនរងគ្រោះនៃភាពអយុត្តិធម៌ នៃសង្គ្រាមពាណិជ្ជកម្មនេះ។ ឧបនាយករដ្ឋមន្ត្រីចិន លោក ហេ លីហ្វេង បានគូសបញ្ជាក់ថា ការយល់ព្រមចរចាពាណិជ្ជកម្មជាមួយភាគីអាមេរិកនៅប្រទេសស្វ៊ីសលើកនេះ គឺដោយសារតាមសំណើរបស់រដ្ឋាភិបាលក្រុងវ៉ាស៊ីនតោន។ នៅថ្ងៃសុក្រ ម្សិលមិញ ចិនបានប្រកាសអំពីកំណើននៃការនាំចេញទំនិញរបស់ខ្លួន នៅខែមេសា កន្លងទៅ បានហក់ឡើងដល់ ៨,១% ពោលគឺកើនឡើង ៤ដងលើសការរំពឹងទុករបស់អ្នកវិភាគចិន។ ក៏ប៉ុន្តែការនាំចេញទំនិញទៅទឹកដីអាមេរិកបានធ្លាក់ចុះ ប្រមាណ១៨%។ ទោះជាយ៉ាងណាក្តី ទីក្រុងប៉េកាំងមិនអាចមានអាចបោះបង់ចោលទីផ្សារអាមេរិកទាំងស្រុងនោះទេ ដោយសារថាការនាំចេញផលិតផលចិនទៅអាមេរិក មានតម្លៃប្រមាណ ៤៤០ ពាន់លានដុល្លារ ក្នុងឆ្នាំ ២០២៤។
សម្រាប់ម្ចាស់ផ្ទះគឺរដ្ឋមន្ត្រីសេដ្ឋកិច្ចស្វីស លោក Guy Parmelin បានចាត់ទុកជំនួបពិភាក្សារវាងអាមេរិកនិងចិនលើកនេះ គឺជាភាពជោគជ័យមួយរួចទៅហើយ ដែលភាគីទាំងពីរយល់ព្រមជួបចរចាដោយផ្ទាល់។ លោករដ្ឋមន្ត្រីសេដ្ឋកិច្ចរូបនេះ សង្ឃឹមថានឹងអាចមានកិច្ចព្រៀមព្យួរពន្ធគយមួយភាគធំ ឬក៏ទាំងស្រុង រវាងប្រទេសទាំងពីរ នៅក្នុងឆ្នាំនេះ។អ្នកជំនាញអាមេរិកមកពីមជ្ឈមណ្ឌលសិក្សាយុទ្ធសាស្ត្រនិងអន្តរជាតិ បានប្រាប់ទីភ្នាក់ព័ត៌មានបារាំង AFP ថា លោកដូណាល់ ត្រាំ ចង់ជួបពិភាក្សាជាមួយលោក ស៊ី ជីនពីង ដើម្បីស្វែងរកដំណោះស្រាយ និង កិច្ចព្រមព្រៀង ក្នុងជម្លោះពាណិជ្ជកម្មរវាងប្រទេសទាំងពីរ។ ក៏ប៉ុន្តែត្រូវរងចាំលទ្ធផលនៃជំនួបចរចារវាងអ្នកតំណាងអាមេរិកនិងចិន នៅស្វ៊ីសលើកនេះសិន។
គួរបញ្ជាក់ថា ចាប់តាំងពីប្រធានាធិបតីអាមេរិក លោក ដូណាល់ បានត្រឡប់មកកាន់អំណាចសាជាថ្មី កាលពីដើមឆ្នាំ២០២៥នេះ សហរដ្ឋអាមេរិកបានដំឡើងពន្ធសរុប១៤៥ភាគរយ លើទំនិញនាំចូលពីប្រទេសចិន ខណៈបើបូករួមជាមួយពន្ធមានស្រាប់ពីមុនមក ទំនិញចិនមួយចំនួន ត្រូវប្រឈមការយកពន្ធរហូតដល់២៤៥ភាគរយ។ ជាការឆ្លើយតប ចិនបានដំឡើងពន្ធ ១២៥ភាគរយវិញ លើទំនិញរបស់អាមេរិក។ ពាក់ព័ន្ធនឹងកិច្ចចរចាខាងលើ ភាគីទាំងពីរកន្លងមកសុទ្ធតែបានអះអាងដូចគ្នាថា ភាគីម្ខាងទៀតគឺជាអ្នកទាក់ទងមកខ្លួនមុន ដើម្បីសុំចរចាគ្នា។ ជាលទ្ធផល ការដោះដូរពាណិជ្ជកម្មរវាងប្រទេសទាំងពីរ គឺជាប់គាំង ដើរទៅមុខលែងរួច ហើយទីផ្សារភាគហ៊ុនជួបភាពចលាចលនិងធ្លាក់ដាំក្បាលចុះ។
