កម្ពុជា និងវៀតណាម ចុះកិច្ចព្រមព្រៀងសម្របសម្រួលជំរុញពាណិជ្ជកម្មទ្វេភាគីរ សម្រាប់ឆ្នាំ២០២៥-២០២៦
11-February-2026 / សេដ្ឋកិច្ច
វៀតណាម៖ កិច្ចសម្របសម្រួលជំរុញពាណិជ្ជកម្មទ្វេភាគីរវាងប្រទេសទាំងពីរកម្ពុជាវឿតណាមសម្រាប់ឆ្នាំ២០២៥-២០២៦ ត្រូវបានចុះហត្ថលេខា នារសៀលថ្ងៃចន្ទ ទី២៨ ខែមេសា ឆ្នាំ២០២៥ នៅរដ្ឋធានីហាណូយ សាធារណរដ្ឋសង្គមនិយមវៀតណាម។
កិច្ចព្រមព្រៀងនេះ ត្រូវបានចុះហត្ថលេខារវាងលោកស្រី ចម និម្មល រដ្ឋមន្ត្រីក្រសួងពាណិជ្ជកម្ម នៃព្រះរាជាណាចក្រកម្ពុជា និងលោក ង្វៀន ហុងឌៀន (Nguyen Hong Dien) រដ្ឋមន្ត្រីក្រសួងឧស្សាហកម្ម និងពាណិជ្ជកម្ម នៃសាធារណរដ្ឋសង្គមនិយមវៀតណាម ។
ភាគីទាំងពីរបានពិភាក្សា និងផ្លាស់ប្តូរយោបល់លើយន្តការនានាដើម្បីជំរុញកិច្ចសហប្រតិបត្តិការទ្វេភាគី ជាពិសេសលើវិស័យសេដ្ឋកិច្ច ពាណិជ្ជកម្ម និងវិនិយោគ ឱ្យកាន់តែស៊ីជម្រៅ និងប្រសើរទ្បើងបន្ថែមទៀត ផ្អែកលើកិច្ចសហប្រតិបត្តិការល្អ និងការផ្តល់ផលប្រយោជន៍ឱ្យគ្នាទៅវិញទៅមក សំដៅជំរុញកំណើនពាណិជ្ជកម្ម និងសេដ្ឋកិច្ចរវាងប្រទេសទាំងពីរ។
ភាគីទាំងពីរ បានឯកភាពគ្នាអនុវត្តយន្តការដែលមានស្រាប់ទាំងក្នុងក្របខ័ណ្ឌទ្វេភាគី អាស៊ាន និងពហុភាគី ឱ្យកាន់តែមានប្រសិទ្ធិភាពនិងពេញលេញ ជាពិសេសការធ្វើសមារហណកម្មសេដ្ឋកិច្ចតំបន់តាមរយៈកិច្ចព្រមព្រៀងពាណិជ្ជកម្មសេរីអាស៊ាន អាស៊ានបូក១ អាសិប និងកិច្ចសហប្រតិបត្តិការក្រោមអង្គការពាណិជ្ជកម្មពិភពលោក។
សូមរំលឹកថា នាយករដ្ឋមន្ត្រីនៃប្រទេសកម្ពុជា សម្តេចធិបតី ហ៊ុន ម៉ាណែត និង លោក ផាម មិញជីញ នាយករដ្ឋមន្ត្រីវៀតណាម នៅក្នុងជំនួបទ្វេភាគីកាលពីថ្ងៃទី ១១ ខែធ្នូ ឆ្នាំ២០២៣ នៅទីក្រុងហាណូយ ប្រទេសវៀតណាម បានប្តេជ្ញាចិត្តយ៉ាងមុតមាំថា នឹងជំរុញធ្វើយ៉ាងណាបង្កើនទំហំពាណិជ្ជកម្មទ្វេភាគីរវាងប្រទេសទាំងពីរឲ្យកើនដល់ ២០ពាន់លានដុល្លារអាម៉េរិក នៅរយៈពេលប៉ុន្មានឆ្នាំខាងមុខនេះ។
អគ្គនាយកដ្ឋានគយ និងរដ្ឋាករកម្ពុជាបានឱ្យដឹងថា ក្នុងឆ្នាំ ២០២៤ ទំហំពាណិជ្ជកម្មទ្វេភាគីរវាងកម្ពុជា និងវៀតណាម សម្រេចបានប្រមាណ ៧,៧ពាន់លានដុល្លារអាម៉េរិក។ ក្នុងនោះការនាំចេញរបស់កម្ពុជាទៅកាន់វៀតណាម មានតម្លៃទឹកប្រាក់ចំនួន ៣,៦១ពាន់លានដុល្លារអាម៉េរិក ខណៈការនាំចូលរបស់កម្ពុជាពីវៀតណាម មានទឹកប្រាក់ចំនួន ៤,១៦ពាន់លានដុល្លារអាម៉េរិកដែលបង្ហាញពីឱនភាពសម្រាប់ជញ្ជីងពាណិជ្ជកម្មរវាងកម្ពុជាជាមួយវៀតណាមនៅឡើយ។
ដោយឡែកនៅក្នុងដំណើរទស្សនកិច្ចទៅកាន់ប្រទេសថៃពីថ្ងៃទី២២ ដល់ ២៥ ខែមេសា ឆ្នាំ២០២៥ លោករាជ រ៉ា ប្រតិភូរដ្ឋាភិបាលកម្ពុជា និងជារដ្ឋលេខាធិការក្រសួងពាណិជ្ជកម្មបានជួបពិភាក្សាការងារជាមួយសហព័ន្ធឧស្សាហកម្មថៃ និងបានចុះអនុស្សាសារណៈយោគយល់ស្តីពីការទិញដំឡូងមី និងពោតក្រហមពីកម្ពុជា។ ការណ៍នេះនឹងបើកផ្លូវឲ្យមានការបង្កើនការផ្គត់ផ្គង់កសិផលកម្ពុជាទៅរោងចក្រកែច្នៃនៅប្រទេសថៃផងដែរ។ នេះបើតាមទីភ្នាក់ងារសារព័ត៌មានកម្ពុជា AKP។
លោកប៉ែន សុវិជាតិអ្នកនាំពាក្យក្រសួងពាណិជ្ជកម្មបាន បញ្ជាក់បន្ថែមថា ការចុះអនុស្សារណៈយោគយល់គ្នាថ្មីៗនេះនឹងជួយកសិករខ្មែរដើម្បីលក់កសិផលរបស់ខ្លួនក្នុងតម្លៃមួយដែលមានស្ថិរភាព។ លោកថា អនុស្សារណៈយោគយល់គ្នានេះក៏ជាការបង្ហាញនូវការប្តេជ្ញាចិត្តខ្ពស់មួយរបស់ភាគីថៃនៅក្នុងការទិញទំនិញដំឡូងមីពីកម្ពុជា។ចំណែក លោកអិល ឈិញ ប្រធានសមាគមកសិករដំឡូងមីកម្ពុជាយល់ឃើញថា ការចុះកិច្ចព្រមព្រៀងរវាងកម្ពុជា និងថៃពេលនេះជាយន្តការមួយដែលបញ្ជាក់ថា ថៃ និងកម្ពុជាបន្តផ្លាស់ប្តូរផលិតផលកសិកម្មរវាងគ្នា និងថា តម្លៃឡើង ឬចុះសម្រាប់កសិករ គឺអាស្រ័យលើតម្រូវការជាក់ស្តែង។
