ធនាគារជាតិនៃកម្ពុជា (NBC)និងការិយាល័យស្រាវជ្រាវម៉ាក្រូសេដ្ឋកិច្ចអាស៊ានព្យាករណ៍កំណោះតសេដ្ឋកិច្ចកម្ពុជាខុសគ្នា
21-September-2026 / សេដ្ឋកិច្ច
ភ្នំពេញ៖ធនាគារជាតិនៃកម្ពុជា (NBC) បានចេញផ្សាយទស្សនវិស័យសេដ្ឋកិច្ចចុងក្រោយរបស់ខ្លួនកាលពីថ្ងៃទី២៦កក្កដា ដោយព្យាករកំណើនសេដ្ឋកិច្ចកម្ពុជានឹងសម្រេចបាន ៣,៩ភាគរយ ក្នុងឆ្នាំ២០២៦។ការព្យាករណ៍នេះខុសគ្នានិងការព្យាករណ៍របស់ការិយាល័យស្រាវជ្រាវម៉ាក្រូសេដ្ឋកិច្ចអាស៊ានបូកបី (ASEAN+3 Macroeconomic Research Office – AMRO) បានរក្សាការព្យាករកំណើនសេដ្ឋកិច្ចរបស់កម្ពុជាសម្រាប់ឆ្នាំ២០២៦ នៅត្រឹម ៤,២ភាគរយ។
មន្ត្រីធនាគារជាតិបានបញ្ជាក់ថា ការពង្រីកសេដ្ឋកិច្ចដែលត្រូវបានរំពឹងទុកនេះ បង្ហាញពីភាពធន់ជាមូលដ្ឋានរបស់កម្ពុជា លើផ្នែកម៉ាក្រូសេដ្ឋកិច្ច។ទោះបីជាកម្ពុជាកំពុងប្រឈមនឹងបញ្ហាក្នុងស្រុក និងភាពប្រែប្រួលនៃទីផ្សារសកលក៏ដោយ។
យោងតាម NBC សេដ្ឋកិច្ចកម្ពុជាត្រូវបានប៉ាន់ប្រមាណថាបានកើនឡើង ៣,៥ភាគរយ ក្នុងឆមាសទី១ ឆ្នាំ២០២៦ ដោយរងឥទ្ធិពលពីបញ្ហាប្រឈមសេដ្ឋកិច្ចសកល និងកត្តាក្នុងស្រុកមួយចំនួន។
ទោះជាយ៉ាងណា ធនាគារជាតិនៃកម្ពុជារំពឹងថា កំណើនសេដ្ឋកិច្ចនឹងកើនឡើងដល់ ៤,៣ភាគរយ ក្នុងឆមាសទី២ នៃឆ្នាំនេះ ដោយសារការកើនឡើងនៃការនាំចេញផលិតផលកាត់ដេរ ផលិតផលឧស្សាហកម្មមិនមែនកាត់ដេរ និងផលិតផលកសិកម្ម ព្រមទាំងលំហូរវិនិយោគផ្ទាល់ពីបរទេស ដែលបន្តកើនឡើង។
លោកស្រី ជា សិរី ទេសាភិបាលធនាគារជាតិនៃកម្ពុជា បានមានប្រសាសន៍ក្នុងសន្និបាតបូកសរុបលទ្ធផលការងារឆមាសទី១ និងកំណត់ទិសដៅឆមាសទី២ ឆ្នាំ២០២៦ កាលពីម្សិលមិញថា « កម្ពុជាត្រូវបានរំពឹងថានឹងសម្រេចបានកំណើនសេដ្ឋកិច្ចក្នុងចន្លោះពី ៣ភាគរយ ទៅ ៤ភាគរយ បង្ហាញពីភាពធន់របស់សេដ្ឋកិច្ចកម្ពុជាក្នុងការប្រឈមនឹងវិបត្តិផ្សេងៗ»។
ការព្យាករចុងក្រោយរបស់ NBC បានធ្វើឡើងបន្ទាប់ពីមូលនិធិរូបិយវត្ថុអន្តរជាតិ (IMF) បានកែសម្រួលការព្យាករកំណើនសេដ្ឋកិច្ចកម្ពុជាសម្រាប់ឆ្នាំ២០២៦ មកនៅ ៣,០ភាគរយ បន្ទាប់ពីការពិគ្រោះយោបល់តាមមាត្រា៤ (Article IV Consultation)។
ស្ថាប័នអន្តរជាតិផ្សេងទៀត រួមមាន ធនាគារអភិវឌ្ឍន៍អាស៊ី (ADB) និងការិយាល័យស្រាវជ្រាវម៉ាក្រូសេដ្ឋកិច្ចអាស៊ានបូកបី (AMRO) នៅតែរក្សាការព្យាករកំណើនសេដ្ឋកិច្ចរបស់ខ្លួននៅប្រមាណ ៤,២ភាគរយ។
ការិយាល័យស្រាវជ្រាវម៉ាក្រូសេដ្ឋកិច្ចអាស៊ានបូកបី (ASEAN+3 Macroeconomic Research Office – AMRO) បានរក្សាការព្យាករកំណើនសេដ្ឋកិច្ចរបស់កម្ពុជាសម្រាប់ឆ្នាំ២០២៦ នៅត្រឹម ៤,២ភាគរយ ស្របតាមការព្យាកររបស់ក្រសួងសេដ្ឋកិច្ច និងហិរញ្ញវត្ថុ ខណៈដែលបានដំឡើងការព្យាករអតិផរណា ដោយសារការកើនឡើងនៃថ្លៃថាមពល និងថ្លៃដើមផលិតកម្ម។
យោងតាមបច្ចុប្បន្នភាពប្រចាំត្រីមាស ខែកក្កដា ឆ្នាំ២០២៦ នៃទស្សនវិស័យសេដ្ឋកិច្ចតំបន់អាស៊ានបូកបី (ASEAN+3 Regional Economic Outlook – AREO) ដែលបានចេញផ្សាយកាលពីម្សិលមិញ AMRO បានព្យាករថា តំបន់អាស៊ានបូកបីនឹងមានកំណើនសេដ្ឋកិច្ច ៤,១ភាគរយ ក្នុងឆ្នាំ២០២៦ មុននឹងថយចុះបន្តិចមកនៅ ៤,០ភាគរយ ក្នុងឆ្នាំ២០២៧ ដោយមានការគាំទ្រពីតម្រូវការក្នុងស្រុកដ៏រឹងមាំ និងតួនាទីស្នូលរបស់តំបន់ក្នុងខ្សែច្រវាក់ផ្គត់ផ្គង់សកលសម្រាប់បច្ចេកវិទ្យាបញ្ញាសិប្បនិម្មិត (AI)។
សម្រាប់កម្ពុជា AMRO បានរក្សាការព្យាករកំណើនផលិតផលក្នុងស្រុកសរុប (GDP) នៅត្រឹម ៤,២ភាគរយ សម្រាប់ឆ្នាំ២០២៦ និង ៤,៩ភាគរយ សម្រាប់ឆ្នាំ២០២៧។ ការព្យាករទាំងនេះមិនមានការផ្លាស់ប្តូរពីបច្ចុប្បន្នភាពបណ្តោះអាសន្នខែមិថុនា ឆ្នាំ២០២៦ នោះទេ ប៉ុន្តែបង្ហាញពីការថយចុះ បើប្រៀបធៀបនឹងកំណើនប្រមាណ ៥,៣ភាគរយ ដែលសម្រេចបានក្នុងឆ្នាំ២០២៥។
ការព្យាករចុងក្រោយនេះបង្ហាញថា កម្ពុជាមានកំណើនប្រហាក់ប្រហែលនឹងតំបន់អាស៊ានទាំងមូល ដែលត្រូវបានរំពឹងថានឹងមានកំណើន ៤,៨ភាគរយ ទាំងក្នុងឆ្នាំ២០២៦ និង២០២៧។ នេះបង្ហាញថា កម្ពុជានៅតែស្ថិតលើគន្លងកំណើនស្ថិរភាព ទោះបីជាបរិយាកាសសេដ្ឋកិច្ចសកលកាន់តែមានភាពមិនច្បាស់លាស់ក៏ដោយ។
អតិផរណាទូទៅត្រូវបានព្យាករថានឹងឡើងដល់ ៥,១ភាគរយ ក្នុងឆ្នាំ២០២៦ ពីការព្យាករចាស់ ៤,៥ភាគរយ នៅក្នុងបច្ចុប្បន្នភាពខែមិថុនា ខណៈការព្យាករសម្រាប់ឆ្នាំ២០២៧ ក៏ត្រូវបានដំឡើងពី ២,៤ភាគរយ មក ២,៨ភាគរយផងដែរ។
លោក Dong He ប្រធានសេដ្ឋវិទូរបស់ AMRO បានមានប្រសាសន៍ថា «តំបន់អាស៊ានបូកបីនៅតែបង្ហាញភាពធន់ ដោយមានការគាំទ្រពីតម្រូវការក្នុងស្រុកដ៏រឹងមាំ និងតួនាទីស្នូលរបស់ខ្លួនក្នុងខ្សែច្រវាក់ផ្គត់ផ្គង់សកលសម្រាប់បច្ចេកវិទ្យា AI។ ផលប៉ះពាល់ពីជម្លោះនៅមជ្ឈិមបូព៌ាក៏មានកម្រិតតិចជាងការរំពឹងទុកដំបូងដែរ ប៉ុន្តែការកើនឡើងនៃថ្លៃថាមពល និងថ្លៃដើមផលិតកម្មនៅតែបង្កហានិភ័យដល់អតិផរណា និងសកម្មភាពឧស្សាហកម្ម»។
យោងតាមរបាយការណ៍ ការកើនឡើងនៃថ្លៃដើមពាក់ព័ន្ធនឹងថាមពល ជាពិសេសថ្លៃអគ្គិសនី និងការដឹកជញ្ជូន គឺជាកត្តាចម្បងដែលជំរុញឱ្យអតិផរណាទូទៅក្នុងតំបន់កើនឡើង ចាប់តាំងពីជម្លោះនៅមជ្ឈិមបូព៌ាបានកាន់តែតានតឹងនៅចុងខែកុម្ភៈ។ របាយការណ៍ក៏បានចង្អុលបង្ហាញពីសម្ពាធថ្មីលើតម្លៃស្បៀង ដែលបណ្តាលមកពីការកើនឡើងនៃថ្លៃជីកសិកម្ម និងស្ថានភាពអាកាសធាតុមិនអំណោយផល។
កម្ពុជាត្រូវបានបញ្ចូលក្នុងតម្លៃមធ្យមនៃប្រេងឥន្ធនៈរបស់តំបន់ ដោយតម្លៃសាំង និងប្រេងម៉ាស៊ូតរបស់កម្ពុជា ត្រូវបានរាប់បញ្ចូលក្នុងការគណនារបស់ AMRO សម្រាប់តំបន់អាស៊ានបូកបី រួមជាមួយប្រទេសសមាជិកដទៃទៀត។
ទោះបីជាថ្លៃដើមផលិតកម្មកើនឡើងក៏ដោយ សកម្មភាពផលិតកម្មនៅទូទាំងតំបន់នៅតែបន្តពង្រីក ខណៈវិស័យទេសចរណ៍នៅតែបន្តគាំទ្រដល់កំណើនសេដ្ឋកិច្ច។ ទោះជាយ៉ាងណា AMRO បានកត់សម្គាល់ថា សូចនាករសេដ្ឋកិច្ចដែលធ្វើបច្ចុប្បន្នភាពញឹកញាប់ របស់កម្ពុជា រួមទាំងទិន្នន័យលម្អិតអំពីការនាំចេញ និងការចូលរួមចំណែករបស់ GDP នៅមានកម្រិត ដោយសារការខ្វះខាតទិន្នន័យ។
របាយការណ៍បានឱ្យដឹងថា នៅក្រោមសេណារីយ៉ូអវិជ្ជមាន ប្រសិនបើការរំខានដល់ការដឹកជញ្ជូនតាមច្រកសមុទ្រ Hormuz អូសបន្លាយ កំណើនសេដ្ឋកិច្ចរបស់តំបន់អាស៊ានបូកបីអាចធ្លាក់ចុះមកត្រឹម ២,៨ភាគរយ ខណៈអតិផរណាក្នុងតំបន់អាចកើនឡើងដល់ ៤,៦ភាគរយ នៅឆ្នាំ២០២៧។
AMRO បានបញ្ជាក់ថា ការព្យាករចុងក្រោយរបស់ខ្លួន ផ្អែកលើព័ត៌មានដែលមានរហូតដល់ថ្ងៃទី២២ និង២៣ ខែកក្កដា ដោយសង្កត់ធ្ងន់ថា ភាពមិនច្បាស់លាស់នៅតែមានកម្រិតខ្ពស់ ហើយលទ្ធផលសេដ្ឋកិច្ចនាពេលខាងមុខ នឹងពឹងផ្អែកជាចម្បងលើការវិវឌ្ឍនៃទីផ្សារថាមពលសកល តម្រូវការបច្ចេកវិទ្យា និងគោលនយោបាយពាណិជ្ជកម្មអន្តរជាតិ។
ការព្យាករចុងក្រោយនេះ ស្របទៅនឹងការវាយតម្លៃរបស់រាជរដ្ឋាភិបាលកម្ពុជា។ ក្នុងជំនួបជាមួយលោក Kenichiro Kashiwase ប្រធានបេសកកម្មរបស់មូលនិធិរូបិយវត្ថុអន្តរជាតិ (IMF) ប្រចាំកម្ពុជា កាលពីដើមខែកក្កដា លោក អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានបង្ហាញទំនុកចិត្តថា សេដ្ឋកិច្ចកម្ពុជានឹងសម្រេចបានកំណើន ៤,២ភាគរយ នៅឆ្នាំ២០២៦។
លោក អូន ព័ន្ធមុនីរ័ត្ន បានលើកឡើងថា ឧស្សាហកម្មដែលផ្អែកលើការនាំចេញ ជាពិសេសវិស័យផលិតកម្មមិនមែនកាត់ដេរ បានបង្ហាញលទ្ធផលល្អជាងការរំពឹងទុក ទោះបីជាប្រឈមនឹងភាពមិនច្បាស់លាស់ពីខាងក្រៅក៏ដោយ ដែលជួយពង្រឹងមូលដ្ឋានសម្រាប់ការពង្រីកកំណើនសេដ្ឋកិច្ច។លោកក៏បានបញ្ជាក់ផងដែរថា រាជរដ្ឋាភិបាលបានអនុម័តកញ្ចប់អន្តរាគមន៍ដ៏ទូលំទូលាយមួយដែលមានទឹកប្រាក់ ១,២៤ពាន់លានដុល្លារ ដើម្បីពង្រឹងភាពធន់នៃសេដ្ឋកិច្ចកម្ពុជា។
