ជនជាតិកាមេរ៉ូនម្នាក់ធ្លាប់ជាប់គុកតែដោះលែងទុកឲ្យប្រព្រឹត្ត ករណីជម្រឹតទាប្រាកស្ត្រីឡាវ២០ម៉ឺនដុល្លារទៀត!
21-September-2026 / សន្តិសុខសង្គម
ភ្នំពេញ៖ ជនជាតិកាមេរ៉ូនម្នាក់មានឈ្មោអាស្ស៊ូជចហ្គ្រីបុត( ASHU GEORGE EBOT) ដែលមានប្រវត្តិធ្លាប់ជាប់គុកហើយត្រូវបានដោះលែងតែមិនត្រូវបានដេញចេញពីស្រកខ្មែរទេ ឡូវត្រូវបាននគរបាលនាយកដ្ឋានទេសចរក្រសួង ចាប់ខ្លួនក្រោយជំរិតទារប្រាក់ពីស្ត្រីជនជាតិឡាវម្នាក់ជិត២០ម៉ឺនដុល្លារ តែបក្ខពួកគេមួយចំនួនទៀត បាននិងកំពុងរត់គេចខ្លួននៅឡើយ។
ប្រភពពីនាយកដ្ឋាននគរបាលទេសចរណ៍ បានឲ្យដឹងនៅថ្ងៃទី៣ ខែមេសា ឆ្នាំ២០២៥ ថា ករណីបទឆបោក និងចាប់បង្ខាំង (ជំរិតទារប្រាក់) បានកើតហេតុនៅថ្ងៃទី២៦ ខែមីនា ឆ្នាំ២០២៥ នៅសង្កាត់ផ្សារថ្មី៣ ខណ្ឌដូនពេញ រាជធានីភ្នំពេញ ក្នុងសណ្ឋាគារ Poulo Wai Hotel & Apartment ដែលមានជនរងគ្រោះឈ្មោះនូតាវង់ឃួន( NOUTTHAVONG KHOUN) ភេទស្រី អាយុ៣៧ឆ្នាំ ជនជាតិឡាវ។ ដោយឡែកជនល្មើសដែលត្រូវកម្លាំងនគរបាលចាប់ខ្លួនមានឈ្មោះអាស្ស៊ូជចអ៊ីបុត( ASHU GEORGE EBOT) ជនជាតិកាមេរ៉ូន (CAMEROON)។
របាយការណ៍របស់នាយកដ្ឋាននគរបាលទេសចរណ៍ បានឲ្យដឹងថា កាលពីថ្ងៃទី២៤ ខែមីនា ឆ្នាំ២០២៥ ស្ត្រីជនជាតិឡាវរូបនេះ បានប្រគល់លុយសុទ្ធចំនួន ១០០,០០០ ដុល្លារ ឱ្យទៅបុរសជនជាតិស្បែកខ្មៅម្នាក់ ដែលស្ត្រីរងគ្រោះ អះអាងថា ជាសង្សាររបស់ខ្លួន និងបក្ខពួក ដើម្បីយកទៅទិញឡានចំនួន២គ្រឿង នៅសណ្ឋាគារ POULO WAI HOTEL & APARTMENT សង្កាត់ផ្សារថ្មី៣ ខណ្ឌដូនពេញ។ តែក្រោយពីបានប្រគល់ប្រាក់ ហើយ ស្ត្រីរងគ្រោះព្យាយាមទំនាក់ទំនងទៅបុរសដែលជាសង្សាររបស់ខ្លួនទៀត ប៉ុន្តែមិនអាចទាក់ទងបាននោះទេ។
ក្រោយមកក៏មានបុរសម្នាក់ឈ្មោះ MIMBANG ROMEO AYUK ភេទប្រុស អាយុ៣៧ឆ្នាំ ជនជាតិកាមេរ៉ូន (CAMEROON) បានទាក់ទងមកស្ត្រីរងគ្រោះ ដោយប្រាប់ថា បុរសជាសង្សាររបស់ខ្លួនត្រូវបានប៉ូលីសចាប់ខ្លួន និងបានប្រាប់ឱ្យស្ត្រីរងគ្រោះរកលុយមកលោះចំនួន៧០,០០០ដុល្លារ ដើម្បីមកលោះបុរសជាសង្សាររបស់ខ្លួនពីកន្លែងប៉ូលីស។ស្ត្រីរងគ្រោះបានឆ្លើយតបថា គ្មានប្រាក់ចំនួន៧០,០០០ដុល្លារ ទេ ស្រាប់តែជនសង្ស័យឈ្មោះ MIMBANG ROMEO AYUK បានឱ្យស្ត្រីរងគ្រោះយកប្រាក់ចំនួន៥០,០០០ដុល្លារ ដោយបានផ្ញើរូបភាពសង្សារជាប់ខ្នោះ តាមបណ្តាញទំនាក់ទំនងសង្គម (Telegram)។ តែតាមពិតក្រុមជនល្មើសទាំងនេះ(រួមជាមួយសង្សរ)បានប្រឌិតរឿងទាំងអស់ថា សង្សាររបស់នាងត្រូវចាប់ខ្លួន ដោយធ្វើជាដាក់ខ្នោះសង្សាររបស់នាង ដើម្បីភូតកុហកនាងប៉ុណ្ណោះ។
បន្ទាប់មកជនសង្ស័យម្នាក់ឈ្មោះមិនបាងរ៉ូមេអូអាយុគ( MIMBANG ROMEO AYUK )បានឱ្យស្ត្រីរងគ្រោះជនជាំតិឡាវណាត់ជួប ដើម្បីប្រគល់ប្រាក់ដោយឱ្យជនសង្ស័យឈ្មោះ ASHU GEORGE EBOT មកទទួលប្រាក់ជំនួសមុខឱ្យឈ្មោះ MIMBANG ROMEO AYUK នៅហាងភោជនីយដ្ឋានតន្ត្រីភ្នំមាស៩៩ ផ្លូវលេខ៤៣០ កែង៥០២ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។ពេលប្រគល់ប្រាក់ ក៏ត្រូវបានកម្លាំងនគរបាលចាប់ខ្លួនបានតែម្តង ក្រោមការបញ្ជារបស់នាយឧត្តមសេនីយ៍ ស ថេត អគ្គស្នងការនគរបាលជាតិ និងក្រោមការសម្របសម្រួលពីលោក ច្រឹង ខ្មៅ ព្រះរាជអាជ្ញាអមសាលាដំបូងរាជធានីភ្នំពេញ។
សូមបញ្ជាក់ថា ឧក្រិដ្ឋជនរូបនេះ កាលពីថ្ងៃទី៣០ ខែវិច្ឆិកា ឆ្នាំ២០២០ ធ្លាប់ត្រូវបានកងរាជអាវុធហត្ថលើផ្ទៃប្រទេស ឃាត់ខ្លួនម្តងហើយ បន្ទាប់ពីបានទទួលបណ្តឹងពីជនរងគ្រោះពីបទ «ឆបោក និងលួចមានស្ថានទម្ងន់ទោស និងកំហែងយកមានស្ថានទម្ងន់ទោស» នៅក្នុងខណ្ឌជ្រោយចង្វារ នៅក្នុងទំហំទឹកប្រាក់ប្រមាណ៣៥ម៉ឺនដុល្លារ តែជនរងគ្រោះបានផ្ញើឲ្យពួកគេជិត៣០ម៉ឺនដុល្លារ។ពេលដែលត្រូវបានចាប់ខ្លួនពីកម្លាំងអាវុធហត្ថលើផ្ទៃប្រទេសនោះ នៅថ្ងៃទី១៦ ខែធ្នូ ឆ្នាំ២០២០ ពោលមានរយៈពេល១៦ថ្ងៃ ទើបត្រូវបានលោក កេត សុជាតិ ចៅក្រមស៊ើបសួរសាលាដំបូងរាជធានីភ្នំពេញ ចេញដីកាឃុំខ្លួន ជាបណ្តោះអាសន្នដាក់ពន្ធនាគារ ក្រោមបទចោទប្រកាន់ពីបទ «កំហែងយកមានស្ថានទម្ងន់ទោស (ប្រើប្រាស់អាវុធ) និងឆបោក» ប្រព្រឹត្តនៅរាជធានីភ្នំពេញ កាលពីចុងខែវិច្ឆិកា ដល់ដើមខែធ្នូ ឆ្នាំ២០២០ តាមបញ្ញត្តិមាត្រា ៣៦៣, មាត្រា ៣៦៦, មាត្រា ៣៧៧ និងមាត្រា ៣៧៨ នៃក្រមព្រហ្មទណ្ឌព្រះរាជាណាចក្រកម្ពុជា។
យោងតាមមាត្រា ៣៦៦ នៃក្រមព្រហ្មទណ្ឌ បានចែងថាបទល្មើស «ស្ថានទម្ងន់ទោសដោយសារការប្រើប្រាស់អាវុធ អំពើកំហែងយក» ត្រូវផ្តន្ទាទោសដាក់ពន្ធនាគារពី ៧ ឆ្នាំ ទៅ ១៥ ឆ្នាំ កាលបើបទល្មើសនេះប្រព្រឹត្តដោយ មានការប្រើប្រាស់អាវុធ ឬ ដោយការគំរាមកំហែង និងអាវុធ។ ដោយឡែកមាត្រា ៣៧៨ នៃអំពើឆបោក ត្រូវផ្តន្ទាទោសដាក់ពន្ធនាគារពី ៦ ខែ ទៅ ៣ (បី) ឆ្នាំ និង ពិន័យជាប្រាក់ពី ១.០០០.០០០ (មួយលាន) រៀល ទៅ ៦.០០០.០០០ (ប្រាំមួយលាន) រៀល។តែក្រោយការជាប់ឃុំនៅក្នុងពន្ធនាគារបានចំនួន១ឆ្នាំ ៦ខែ ក៏ត្រូវបានលោក សាយ ណូរ៉ា ព្រះរាជអាជ្ញារងអមសាលាដំបូងរាជធានីភ្នំពេញ ចេញដីកាបង្គាប់ឲ្យដោះលែងវិញនៅថ្ងៃទី១៦ ខែមិថុនា ឆ្នាំ២០២២ដោយមិនបានកាត់ទោសដាក់គុគ?។គេមិនដឹងតើការដោះលែងសំអាងលើមូលហេតុអ្វីហើយហេតុអ្វីជនល្មើសមិនត្រូវបានកាត់ទោសនិងបណ្តេញចេញពីស្រុកខ្មែរនោះទេ?។ក្រសួងយុត្តិធម៍គួស្រាវជ្រាវបកស្រាយករណីយ៍នេះផងទាន៕
