ក្រុមហ៊ុនចិន១ចិន នឹងប្រមូលទិញដំឡូងមីស្ងួតពីកម្ពុជា ១០ម៉ឺនតោន ក្នុងឆ្នាំ២០២៥
21-September-2026 / សេដ្ឋកិច្ច
ព្រះសីហនុ៖ ប្រជាកសិករដែលប្រកបរបរដាំដំឡូងមី ដែលលក់មិនចេញបានតម្លៃថោកនឹងមានសង្ឃឹម ដោយសារមានក្រុមហ៊ុនចិន បាននិងកំពុងប្រមូលទិញដំឡូងមីស្ងួតនៅតាមបណ្ដាខេត្តនានា ក្នុងប្រទេសកម្ពុជា មានដូចជា ខេត្តព្រះវិហារ ខេត្តសៀមរាប ខេត្តពោធិ៍សាត់ ខេត្តកំពង់ធំ និងបណ្ដាខេត្តមួយចំនួនទៀត។
លោកស៊ូប៊ិន( XU BIN )នាយកក្រុមហ៊ុននាំដំឡូងមីស្ងួត ចេញទៅប្រទេសចិនបានប្រាប់កាសែតថា ថ្ងៃនេះ(ទី២៣កុម្ភៈ)ដំឡូងមីស្ងួតចំនួន ១ម៉ឺនតោន និងធ្វើការនាំចេញ ហើយក្រុមហ៊ុននឹងបន្តទិញដំឡូងពីប្រជាកសិករក្នុងឆ្នាំ២០២៥ ឱ្យបានចំនួន ១០ម៉ឺនតោន បន្ថែមទៀត។ លោកនឹងបណ្ដាក់ទុនក្នុងការទិញដំឡូងមីស្ងួតពីកសិករ ដែលកន្លងមកពួកគាត់ដាំបានតែរកទីផ្សារមិនបាន ដែលធ្វើឲ្យពួកគាត់ជួបបញ្ហាប្រឈមក្នុងការលក់ចេញ។ ចំពោះការប្រមូលទិញដំឡូងនាពេលនេះគឺ តម្លៃសមស្របទៅនឹងការប្រកួតប្រជែងទីផ្សារនៅតាមបណ្ដាប្រទេសជិតខាង ហើយនៅថ្ងៃខាងមុខលោកគ្រោងបង្កើតរោងចក្រដ៏ធំមួយសម្រាប់ការច្នៃដំឡូងមីស្ងួតនៅក្នុងប្រទេសកម្ពុជាផងដែរ។
សម្រាប់ប្រទេសចិន ទីផ្សារដំឡូងមីមានតម្រូវការច្រើនសន្ធឹកសន្ធាប់រាប់រយលានតោន ហើយក្រុមហ៊ុនរបស់លោកធ្លាប់ដំណើរការនាំចេញដំឡូងនៅក្នុងអំឡុងឆ្នាំ២០១៥ ដល់ឆ្នាំ២០១៨ តែដោយសារជំងឺ covid រីករាលដាល បានធ្វើឲ្យមានការផ្អាកក្នុងការនាំចេញ តែនៅក្នុងឆ្នាំ ២០២៥ ក្រុមហ៊ុនរបស់លោកនឹងចាប់ផ្ដើមប្រមូលទិញដំឡូងមីស្ងួតឡើងវិញ។ សូមបញ្ជាក់ថានេះជាលើកទី១ដែលមានក្រុមហ៊ុនចិនប្រកាសពីការប្រមូលទិញដំឡូងមីស្ងួតពីស្រុកខ្មែររហូតដល់១០ម៉ឺនតោនក្នុង១ឆ្នាំ។ដែលកន្លងមកបើតាមប្រធានសមាគមដំឡូងមីកម្ពុជាបានឲ្យដឹងថាចិនប្រមូលទិញត្រឹមខ្ទង់ពា់ន់តោនប៉ុណ្ណោះ។
លើវិស័យកសិកម្មនេះដែររដ្ឋាភិបាលចិនបានផ្តល់លទ្ធភាពឱ្យកម្ពុជា នូវបរិមាណកូតាមួយចំនួនក្នុងការនាំចេញអង្ករ ដោយបច្ចុប្បន្ននេះឈានដល់ កម្រិតប្រមាណ៥០ម៉ឺនតោនហើយក្នុងមួយឆ្នាំ។តែលទ្ធផលមិនបានដូចការសន្យារបស់ចិនទេ។ជាក់ស្តែងក្នុងប៉ុន្មានខែកន្លងមកនេះចុនឆ្នាំ២០២៤និងដើមឆ្នាំ២០២៥នេះប្រជាកសិករមានការរអ៊ូរទាំអំពីបញ្ហាស្រូវចុះថោកដោយសារប្រទេសៃនិងវៀតណាមបន្ថយការប្រមូលទិញ។ទោះបីជាយ៉ាងណាប្រទេសកម្ពុជាគឺជាទីផ្សារដ៏ធំរបស់ប្រទេសចិនទៅវិញទេតើ។កម្ពុជាមានឱនភាពពាណិជ្ជកម្មដ៏សម្បើមជាមួយប្រទេសចិន។ជាក់ស្តែងបើតាមរបាយការណ៍ ក្នុងរយៈពេល៦ខែឆ្នាំ២០២៤(ចាប់ពីខែមករា-មិថុនា) កម្ពុជាបាននាំចេញទៅចិនក្នុងទឹកប្រាក់ចំនួន ៨១៤,៨២៩ ពាន់ដុល្លារប៉ុណ្ណោះ។បើគិតទៅមាន កើនឡើង ១៤.២% ។
តែកម្ពុជានាំចូលមកវិញក្នុងទឹកប្រាក់ចំនួន ៦.៤ ពាន់លានដុល្លារ កើនឡើង ១៩.៤%។ប្រទេសចិនស្ថិតនៅលំដាប់ទី១ជាដៃគូពាណិជ្ជកម្មរបស់កម្ពុជាដែលធ្វើការនាំចេញ នាំចូលទំនិញច្រើនជាងគេ ហើយប្រទេសជាដៃគូពាណិជ្ជកម្មកំពូលៗរបស់កម្ពុជាបន្ទាប់ពីចិនមានដូចជា អាម៉េរិក វៀតណាម ថៃ និងជប៉ុន។ល។ទាក់ទងទីផ្សារនេះដែរលោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មកម្ពុជា មានប្រសាសន៍ថា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) និងកិច្ចព្រមព្រៀងពាណិជ្ជកម្មសេរីកម្ពុជា-ចិន (CCFTA) គឺជាកត្តាជំរុញសម្រាប់កំណើនពាណិជ្ជកម្មនេះ។
ក្រោមកិច្ចព្រមព្រៀងពាណិជ្ជកម្មសេរីទាំងពីរ ផលិតផលរបស់កម្ពុជា ជាពិសេសកសិផលដែលមានគុណភាពខ្ពស់ដូចជា អង្ករ ចេកលឿង ស្វាយ ដំឡូងមី និងម្រេច ត្រូវបាននាំចេញទៅកាន់ប្រទេសចិនជាមួយនឹងការអនុគ្រោះពន្ធ។ នេះបើតាមការបញ្ចាក់របស់លោក ប៉ែន សុវិជាតិ ទៅកាន់សារព័ត៌មាន Xinhua។សូមបញ្ជាក់ថានៅក្នុងខែកក្កដាឆ្នាំ២០២៤ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងថ្មីចំនួន៤១គម្រោង និងគម្រោងពង្រីកផលិតកម្មចំនួន៣គម្រោង ដែលមានទុនវិនិយោគសរុបប្រមាណជាង៣៩៦លានដុល្លារអាមេរិក អាចបង្កើតការងារបានប្រមាណ២៥ពាន់កន្លែង ជូនប្រជាជនកម្ពុជា។ ក្នុងនោះការវិនិយោគមកពីប្រទេសចិនស្ថិតនៅលំដាប់លេខរៀងទី១ដោយបានរួមចំណែក ៦៨,០៦% នៃទុនវិនិយោគសរុប ខណៈពេលដែលការវិនិយោគក្នុងស្រុកគ្រប ដណ្ដប់ ១៤,២៤% នៃទុនវិនិយោគសរុប។
