សង្គ្រាមពាណិជ្ចកម្មរវាងអាមេរិកម៉ិចស៊ិកកាណាដាចាប់ផ្តើម!?
21-September-2026 / ព័ត៌មានអន្តរជាតិ
អាមេរិក៖ កាលពីថ្ងៃសៅរ៍ ទី១ ខែកុម្ភៈ ប្រធានាធិបតីអាមេរិក លោក ដូណាល់ ត្រាំ បានចេញបញ្ជាឱ្យយកពន្ធក្នុងអត្រា ២៥ភាគរយ លើទំនិញនាំចូលពីប្រទេសកាណាដា និងម៉ិកស៉ិក ព្រមទាំងក្នុងអត្រា១០ភាគរយ លើទំនិញនាំចូលពីប្រទេសចិន ដែលនឹងត្រូវអនុវត្តចាប់ពីថ្ងៃអង្គារសប្តាហ៍ក្រោយ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។
លោក ត្រាំ បានចុះហត្ថលេខាលើបទបញ្ជាប្រតិបត្តិចំនួន៣ ដាច់ដោយឡែកពីគ្នា ស្តីពីការយកពន្ធលើទំនិញរបស់ប្រទេសទាំងលើ ហើយបានប្តេជ្ញាថា នឹងរក្សាគោលការណ៍យកពន្ធនោះ រហូតទាល់តែអ្វីដែលលោកហៅថា ភាពអាសន្នថ្នាក់ជាតិ ជុំវិញបញ្ហាថ្នាំ fentanyl និងអន្តោប្រវេសន៍ខុសច្បាប់ មកកាន់សហរដ្ឋអាមេរិក ត្រូវបានបញ្ចប់។ប្រការដែលត្រូវចាប់អារម្មណ៍គឺក្រុមមន្ត្រីសេតវិមាន បាននិយាយថា នឹងពុំមានការលើកលែងក្នុងវិធានការយកពន្ធឡើយ ហើយប្រសិនបើកាណាដា ម៉ិកស៉ិក និងចិន ហ៊ានសងសឹកប្រឆាំងទំនិញរបស់អាមេរិកវិញនោះ លោក ត្រាំ ទំនងជានឹងដំឡើងពន្ធបន្ថែមទៀត។
គួរបញ្ជាក់ថា ចំណាត់ការខាងលើ គឺជាការធ្វើតាមពាក្យសន្យារបស់លោក ត្រាំ កាលពីអំឡុងពេលឃោសនាបោះឆ្នោតឆ្នាំ២០២៤ បើទោះបីជាក្រុមសេដ្ឋវិទូកំពូលៗ បានព្រមានថា ការធ្វើសង្គ្រាមពាណិជ្ជកម្មថ្មីមួយ ជាមួយបណ្តាដៃគូពាណិជ្ជកម្មធំៗរបស់អាមេរិក មុខជានឹងធ្វើឱ្យកំណើនសេដ្ឋកិច្ចរបស់សហរដ្ឋអាមេរិកផ្ទាល់ ក៏ដូចជាពិភពលោកទាំងមូល ទទួលរងផលប៉ះពាល់អវិជ្ជមាន ហើយបង្កើនតម្លៃទំនិញ សម្រាប់អ្នកប្រើប្រាស់និងក្រុមហ៊ុន ថែមទៀតក៏ដោយ។
ទោះបីយ៉ាងណាការសម្រេចចិត្តរបស់លោកត្រាំ ភ្លាមៗ ក្នុងការវាយលុកដៃគូពាណិជ្ជកម្មរបស់អាមេរិកជាមួយនឹងការដាក់កំហិតពន្ធគយ ដោយមិនទុកឱកាសសម្រាប់ការចរចារអាចនឹងក្លាយការចាប់ផ្តើមនៃសង្គ្រាមពាណិជ្ជកម្មដែលរំខានដល់សេដ្ឋកិច្ចពិភពលោក ។ លោកប្រធានាធិបតីអាមេរិករូបនេះ ក៏បាននិយាយផងដែរថា នាពេលអនាគតលោកគ្រោងនឹងដាក់ពន្ធលើសហភាពអឺរ៉ុប ដោយនិយាយថាប្លុកនេះធ្វើបាបសហរដ្ឋអាមេរិកខ្លាំងណាស់។
ជាក់ស្តែងនាយករដ្ឋមន្ត្រីនៃប្រទេសកាណាដា លោកចាស្ទីនទ្រូដូ (Justin Trudeau) និងប្រធានាធិបតីនៃប្រទេសម៉ិកស៉ិក លោកស្រីខ្លូឌៀស្សេនបោន( Claudia Sheinbaum )បាននាំគ្នាប្រកាសវិធានការសងសឹកវិញ ប្រឆាំងលើទំនិញរបស់សហរដ្ឋអាមេរិក បន្ទាប់ពីប្រធានាធិបតីអាមេរិក លោក ដូណាល់ ត្រាំ បានចេញបញ្ជាឱ្យយកពន្ធ២៥ភាគរយ ប្រឆាំងទំនិញរបស់ប្រទេសក្បែរខាងទាំងពីរ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃអាទិត្យ ទី១ ខែកុម្ភៈ ឆ្នាំ២០២៥។
លោក Trudeau បាននិយាយថា កាណាដាដែលជាប្រទេសឯករាជ្យមួយដែរនឹងសងសឹកវិញ តាមរយៈការយកពន្ធ២៥ភាគរយ លើទំនិញរបស់អាមេរិក មានចាប់តាំងពីភេសជ្ជៈ គ្រឿងស្រវឹង រហូតដល់សម្ភារ និងឧបករណ៍ផ្សេងៗ។ បើតាមលោក Trudeau ទំនិញអាមេរិកទាំងនោះ គិតជាទឹកប្រាក់ស្មើនឹង ១៥៥ពាន់លានដុល្លារកាណាដា ឬ១០៧ពាន់លានដុល្លារអាមេរិក។ ពន្ធលើទំនិញ ៣០ពាន់លានដុល្លារកាណាដា ក្នុងចំណោមនោះ នឹងត្រូវចាប់ផ្តើមអនុវត្ត នៅថ្ងៃអង្គារសប្តាហ៍ក្រោយតែម្តង ពោលគឺដូចគ្នានឹងថ្ងៃចាប់ផ្តើមអនុវត្តពន្ធរបស់លោក ត្រាំ រីឯពន្ធលើទំនិញ ដែលនៅសល់១២៥ពាន់លានដុល្លារកាណាដាទៀត នឹងត្រូវអនុវត្តតាមក្រោយ ក្នុងរយៈពេល២១ថ្ងៃ។
លោក Trudeau បានបន្តថា កាណាដាក៏កំពុងពិចារណា វិធានការដទៃទៀតក្រៅពីការយកពន្ធ ផងដែរ។ ចំណែក លោកស្រី Sheinbaum វិញ បាននិយាយថា លោកស្រីបានបញ្ជាឱ្យ រដ្ឋមន្ត្រីសេដ្ឋកិច្ចម៉ិកស៉ិក អនុវត្តវិធានការយកពន្ធ រួមទាំងវិធានការក្នុងទម្រង់ផ្សេងទៀត ដើម្បីការពារផលប្រយោជន៍របស់ប្រទេសលោកស្រី ឆ្លើយតបចំណាត់ការពន្ធរបស់លោក ត្រាំ។ លោកស្រី បានសង្កត់ធ្ងន់ថា ទោះជាយ៉ាងណា រដ្ឋាភិបាលលោកស្រី មិនមានបំណងស្វែងរកការប្រឈមមុខដាក់គ្នា ជាមួយអាមេរិកឡើយ ប៉ុន្តែចង់បានកិច្ចសហប្រតិបត្តិការ និងការសន្ទនា។
គួរបញ្ជាក់ថា សេចក្តីប្រកាសរបស់មេដឹកនាំកាណាដានិងម៉ិកស៉ិក ធ្វើឡើងត្រឹមតែប៉ុន្មានម៉ោងប៉ុណ្ណោះ កាលពីថ្ងៃសៅរ៍ ទី១ ខែកុម្ភៈ បន្ទាប់ពីលោក ត្រាំ បានចុះហត្ថលេខាលើ បទបញ្ជាប្រតិបត្តិ៣ដាច់ដោយឡែកពីគ្នា ស្តីពីការយកពន្ធ២៥ភាគរយ លើទំនិញនាំចូលពីប្រទេសកាណាដា និងប្រទេសម៉ិកស៉ិក ព្រមទាំង១០ភាគរយ លើទំនិញនាំចូលពីប្រទេសចិន ។
ចំណែកអ្នកនាំពាក្យស្ថានទូតចិនបាននិយាយថា ចិនប្រឆាំងយ៉ាងម៉ឺងម៉ាត់លើពន្ធគយ ហើយថាភាពខុសគ្នាឬការគិតផ្ទុយណាមួយ គួរតែកើតឡើងតាមរយៈការសន្ទនា។ អ្នកនាំពាក្យចិនរូបនេះបាននិយាយថា៖ «គ្មានអ្នកឈ្នះក្នុងសង្គ្រាមពាណិជ្ជកម្ម ឬសង្គ្រាមពន្ធគយ ដែលបម្រើផលប្រយោជន៍ទាំងសងខាងឬពិភពលោកនោះទេ»។ រំលឹកទៅកាលអំឡុងពេលនៃយុទ្ធនាការបោះឆ្នោត លោកត្រាំ បានគំរាមដាក់ពន្ធលើផលិតនៅប្រទេសចិនរហូតដល់៦០ភាគរយ ប៉ុន្តែបានបញ្ឈប់សកម្មភាពភ្លាមៗនៅថ្ងៃដំបូងរបស់លោកដែលត្រលប់មកសេតវិមានវិញ។
ការនាំចូលទំនិញរបស់សហរដ្ឋអាមេរិកពីប្រទេសចិនបានធ្លាក់ចុះចាប់តាំងពីឆ្នាំ ២០១៨ ដែលជាស្ថិតិមួយដែលអ្នកសេដ្ឋកិច្ចបានសន្មតថាជាផ្នែកនៃការកើនឡើងពន្ធជាបន្តបន្ទាប់ដែលលោកត្រាំ បានដាក់កំឡុងអាណត្តិដំបូងរបស់លោក។
ប្រទេសកាណាដា ម៉ិកស៊ិក និងចិន គឺជាដៃគូពាណិជ្ជកម្មដ៏ធំបំផុតទាំងបីរបស់អាមេរិកដែលមានចំនួន ៤០ភាគរយ នៃទំនិញដែលបាននាំចូលទៅកាន់សហរដ្ឋអាមេរិកកាលពីឆ្នាំមុន។ ភាគច្រើននៃការផ្គត់ផ្គង់ដល់សហរដ្ឋអាមេរិកមានដូចជា រថយន្ត ថ្នាំពេទ្យ ស្បែកជើង ឈើ គ្រឿងអេឡិចត្រូនិច ដែក និងផលិតផលជាច្រើនទៀត។ ជាមួយគ្នានេះទំនិញ និងសេវាកម្មច្រើនជាងមួយភាគបីត្រូវបាននាំចូល ឬទិញពីសហរដ្ឋអាមេរិក ដែលជួយដល់ការងារអាមេរិករាប់សិបលានកន្លែង៕
