ក្រុមបាតុករនៅនេប៉ាល់និងយោធា កំពុងចរចាគ្នាដើម្បីសម្រេចថាតើ នរណានឹងឡើងជាមេដឹកនាំបណ្តោះអាសន្ន

ប្រទេសណេប៉ាល់៖ នាថ្ងៃព្រហស្បតិ៍ទី១១កញ្ញា ក្រុមបាតុករនៅប្រទេសនេប៉ាល់ នឹងបន្តពិភាក្សាជាមួយកងទ័ព ដើម្បីសម្រេចថា តើនរណានឹងក្លាយជាមេដឹកនាំបណ្តោះអាសន្នរបស់ប្រទេស បន្ទាប់ពីការផ្ទុះបាតុកម្មក្លាយជាកុប្បកម្មដែលបានសម្លាប់មនុស្សយ៉ាងហោច៣០នាក់ ហើយបង្ខំឱ្យនាយករដ្ឋមន្រ្តីចុះចេញពីអំណាច។ 

បើតាមការចេញផ្សាយដោយ ទីភ្នាក់ងារព័ត៌មាន Reuters បានឲ្យដឹងថានាពេលនេះ កងទ័ពនេប៉ាល់ កំពុងបន្តល្បាតតាមដងផ្លូវនៃរដ្ឋធានីកដ្ឋមណ្ឌូ ក្រោយការផ្ទុះបាតុកម្មដ៏អាក្រក់បំផុតមួយ ដែលបង្កឡើងដោយការសម្រេចចិត្តបិទបណ្តាញទំនាក់ទំនងសង្គម កាលពីចុងសប្តាហ៍មុន ដោយរដ្ឋាភិបាលនេប៉ាល់។ ក្រោយមក រដ្ឋាភិបាលក៏បានយល់ព្រមលុបបម្រាមនោះចោលវិញ ក្រោយមនុស្ស១៩នាក់បានស្លាប់ ក្នុងការប៉ះទង្គិចគ្នា កាលពីថ្ងៃចន្ទដើមសប្តាហ៍នេះ នៅពេលប៉ូលិសប្រើឧស្ម័នបង្ហូរទឹកភ្នែក និងគ្រាប់កាំភ្លើងកៅស៊ូ បាញ់បង្រ្កាបហ្វូងបាតុករ។

បើតាមក្រសួងសុខាភិបាលនេប៉ាល់ តួលេខចុងក្រោយនៃអ្នកស្លាប់ក្នុងបាតុកម្មនោះ បានកើនដល់៣០នាក់ និងរបួស១០៣៣នាក់។ អំឡុងបាតុកម្ម ក្រុមអ្នកតវ៉ាដែលសុទ្ធតែជាយុវជន បាននាំគ្នាដុតបំផ្លាញអគាររដ្ឋាភិបាល និងទ្រព្យសម្បត្តិផ្សេងៗរបស់មន្ត្រីរដ្ឋាភិបាលជាន់ខ្ពស់នៃរដ្ឋាភិបាលដែលក្នុងមានសេចក្តីរាយការណ៍ថាអគ្គីភ័យបានសម្លាប់ភរិយាអតីតនាយករដ្ឋមន្ត្រីណេប៉ាល់ា។ សកម្មភាពតវ៉ា បានថយចុះកម្តៅទៅវិញ បន្ទាប់ពីនាយករដ្ឋមន្រ្តី លោក KP Sharma Oli លាលែងពីតំណែង ក្នុងសប្តាហ៍នេះ។

ករណីយ៍នេះលោកខៀវកាញ៉ារិទ្ធសមាជិករដ្ឋសភាបានសសេរក្នុងហ្វេសប៊ុកថានៅក្នុងការបះបោររបស់យុវជននេប៉ាល់ប្រឆាំងនឹងការបិទប្រព័ន្ធផ្សព្វផ្សាយព័ត៌មានកន្លងមកនេះ បាតុករបានដុតវិមានតុលាការកំពូល វិមានរដ្ឋសភា វិមានគណបក្សកាន់អំណាច «បក្សសមាជនេប៉ាល់» ដុតផ្ទះនាយករដ្ឋមន្ត្រី និង ផ្ទះអតីតនាយករដ្ឋមន្ត្រី ៣ នាក់ទៀត ដុតគេហស្ថានរដ្ឋមន្ត្រីក្រសួងមហាផ្ទៃ ។ ហេតុអីបានជាការបះបោរមានភាពខ្លាំងក្លាបែបនេះ​ ? នៅនេប៉ាល់ ប្រព័ន្ធផ្សព្វផ្សាយសង្គមមានតួនាទីសំខាន់ក្នុងការគាំទ្រសេរីភាពនៃការ បញ្ចេញមតិ រិះគន់អំពើពុករលួយ រិះគន់ការសម្ញែងទ្រព្យរបស់កូនៗមន្រ្តី និង អ្នកនយោបាយ ។ មួយចំណែកទៀត ពលរដ្ឋនេប៉ាល់មួយចំនួនចេញទៅធ្វើការនៅក្រៅប្រទេសហើយបញ្ជូនលុយមកចិញ្ចឹមគ្រួសារនៅក្នុងស្រុក ។ បិទប្រព័ន្ធផ្សព្វផ្សាយសង្គម គឺ ដូចបិទទងសុកដែលភ្ជាប់អ្នកនៅក្រៅប្រទេសជាមួយអ្នកនៅក្នុងប្រទេសអញ្ចឹងដែរ ។

គួរបញ្ជាក់ថា បើតាមអ្នកនាំពាក្យយោធានេប៉ាល់ កិច្ចពិភាក្សាជាមួយក្រុមបាតុករស្តីពីមេដឹកនាំស្តីទីថ្មី នឹងបន្តនាពេលថ្ងៃព្រហស្បតិ៍នេះ ខណៈកងទ័ពកំពុងព្យាយាមស្តារស្ថានការណ៍ ឱ្យវិលត្រឡប់ទៅរកភាពប្រក្រតីវិញដោយសន្សឹមៗ។ ក្រុមបាតុករត្រូវគេរាយកាណ៍ថា មានបំណងចង់ឱ្យអតីតប្រធានតុលាការកំពូលនេប៉ាល់ លោកស្រី Sushila Karki ធ្វើជានាយករដ្ឋមន្រ្តីស្តីទី៕