ប្រវត្តិនៃការប្រារព្ធនូវពិធីបុណ្យចូលឆ្នាំថ្មីប្រពៃណីចិនដែលវៀតណាមនិងខ្មែរភាគច្រើននិយមធ្វើឡើងជារៀងរាល់ឆ្នាំ
06-August-2026 / ទេសចរណ៏និងវប្បធម៌
ភ្នំពេញ៖ក្នុងចំណោមពីធីបុណ្យជាច្រើនដែលប្រជាជនខ្មែរយើងតែងតែប្រារព្ធ និងតែងធ្វើការរំឭកពីប្រវត្តិនៃពិធីបុណ្យនោះ ក្នុងនោះក៏មាននូវពិធីបុណ្យចូលឆ្នាំថ្មីប្រពៃណីចិនផងដែរ។ពិធីបុណ្យចូលឆ្នាំថ្មីប្រពៃណីចិន គឺជាពិធីបុណ្យដ៏សំខាន់មួយរបស់បងប្អូនជនជាតិចិន ឬប្រជាជនខ្មែរយើងដែលភាគជាប់សែស្រឡាយចិន មិនជាប់ក៏ដោផយតែងតែធ្វើការប្រារព្ធជារៀងរាល់ឆ្នាំមិនដែលអាក់ខានម្ដងណាឡើយ។ តើមូលហេតុអ្វីទើបបានជាកើតមាននូវពិធីបុណ្យចូលឆ្នាំថ្មីប្រពៃណីចិននេះឡើងមក? តើពិធីបុណ្យនេះមានប្រវត្តិបែបណាខ្លះ?៖
សម្រាប់ឆ្នាំ ២០២៥ នេះ ថ្ងៃសែនចូលឆ្នាំចិន គឺចំថ្ងៃ អង្គារ ១៥ រោច ខែ បុស្ស ឆ្នាំ រោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី ២៨ ខែ មករា ឆ្នាំ ២០២៥។ ពិធីចូលឆ្នាំថ្មីប្រពៃណីចិន២០២៥ គឺមានរយៈពេលបីថ្ងៃ ពោលគឺថ្ងៃទី ២៩, ៣០, និង ៣១ ខែ មករា ឆ្នាំ ២០២៥។ពិធីបុណ្យនេះធ្វើឡើង ដើម្បីសម្តែងការគោរពដល់ទេវតា និងជីដូនជីតាសាច់សារលោហិត។ម្យ៉ាងទៀតគេអាចហៅបុណ្យចូលឆ្នាំនេះថា ជាពិធីបុណ្យនិទាឃរដូវ ឬបុណ្យនៃរដូវផ្ការីក «Spring Festival» ក៏បានដែរ។ដែលតែងតែប្រារព្ធធ្វើឡើងនៅពេលផ្លាស់ប្តូរពីប្រតិទិនចាស់ចូលប្រតិទិនថ្មីរបស់ប្រទេសចិន។ ពិធីបុណ្យចូលឆ្នាំចិននេះ គឺមានអាយុកាលរាប់សតវត្សរ៍មកហើយ ព្រមទាំងមានសារៈសំខាន់យ៉ាងខ្លាំងផងដែរចំពោះជនជាតិចិន។
វាត្រូវបានប្រារព្ធឡើងនៅក្នុងបណ្តាប្រទេសនិងដែនដីមួយចំនួន ដែលសម្បូរជនជាតិចិនរស់នៅ ក្នុងនោះមានដូចជា ចិនដីគោក ហុងកុង ម៉ាកាវ តៃវ៉ាន់ សិង្ហបុរី ថៃ កម្ពុជា ឥណ្ឌូនេស៊ី ហ្វីលីពីន ក៏ដូចជានៅ China Towns ដែលស្ថិតនៅក្នុងបណ្តាប្រទេសមួយចំនួនផ្សេងៗទៀតនៅលើពិភពលោកផងដែរ។ពិធីបុណ្យនេះ ត្រូវបានគេចាត់ទុកជាបុណ្យឈប់សម្រាកដ៏សំខាន់មួយសម្រាប់ជនជាតិចិន ព្រមទាំងបានជះឥទ្ធិពលមួយផ្នែកទៅលើវប្បធម៌នៃបណ្តាប្រទេសជិតខាងទៀតផង។សម្រាប់ជនជាតិចិន បុណ្យចូលឆ្នាំជាឱកាសពិសេស សម្រាប់ក្រុមគ្រួសារក្នុងការជួបជុំដើម្បីបរិភោគអាហាររួមគ្នាជាពិសេស គឺអាហារពេលល្ងាច។
វាក៏ជាឱកាសសម្រាប់ជនជាតិចិនផងដែរ ក្នុងការបោសសម្អាតគេហដ្ឋានជាថ្មីដើម្បីបណ្តេញរឿងមិនល្អនិងវិញ្ញាណអាក្រក់ ហើយទទួលយកសំណាងល្អនៅឆ្នាំថ្មី។បើក្រឡេកទៅមើលនៅតាមបង្អួច និងទ្វាវិញ ជនជាតិចិនតែងតែតុបតែងលំអជាមួយនឹងក្រដាសឬកំណាព្យពីរប្រយោគ ដែលមានពណ៌ក្រហមតំណាងឲ្យ «សំណាងល្អ សុភមង្គល ទ្រព្យសម្បត្តិ និងអាយុយ៉ឺនយូរ»។ក្រៅពីការសែនព្រេន នៅមានសកម្មភាពផ្សេងៗទៀត ដែលប្រជាជនចិននិយមធ្វើនៅថ្ងៃចូលឆ្នាំដែលមានដូចជា ការដុតផាវ ការចែកអាំងប៉ាវ ឬចំណីអាហារដល់គ្នាទៅវិញទៅមក។
បើយោងទៅតាមរយៈការលើកឡើងរបស់បងប្អូនជនជាតិចិនបានបញ្ជាក់ថា «ប្រសិនបើមនុស្សចំណាយ ឬចែករំលែកដល់អ្នកដទៃកាន់តែច្រើននៅក្នុងឱកាសបុណ្យចូលឆ្នាំនឹងនាំឲ្យលាភហូរចូលគ្រួសាររបស់ពួកគេកាន់តែច្រើនដូចគ្នា»។រឿងនិទាន និងរឿងព្រេងខ្លះទៀតបានឲ្យដឹងថា ការចាប់ផ្ដើមនៃពិធីបុណ្យចូលឆ្នាំចិននេះ បានចាប់ផ្ដើមឡើងជាមួយនឹងការវាយប្រយុទ្ធប្រឆាំងជាមួយសត្វក្នុងទេវកថា ដែលមានឈ្មោះថា «នៀន» មានន័យថា ឆ្នាំជាភាសាចិន។ នៅថ្ងៃទីមួយក្នុងឆ្នាំថ្មី «នៀន» បានមកខាំស៊ីពួកបសុសត្វសូម្បីតែអ្នកភូមិក៏ដោយជាពិសេសគឺពួកក្មេងៗ។
ដើម្បីការពារខ្លួន ពួកអ្នកភូមិបានដាក់ចំណីអាហារនៅមុខផ្ទះរបស់ពួកគេជារៀងរាល់ដើមឆ្នាំ។គេមានជំនឿថាបន្ទាប់ពី «នៀន» បានស៊ីចំណីអាហារដែលពួកគេដាក់ឲ្យរួចហើយ វានឹងមិនធ្វើបាបខាំស៊ីប្រជាជនទៀតនោះទេ។គ្រាមួយអ្នកភូមិបានឃើញ «នៀន» មានភាពភ័យខ្លាចជាមួយនឹងក្មេងៗ ដែលស្លៀកពាក់ពណ៌ក្រហម។រួចហើយ អ្នកភូមិក៏នាំគ្នាយល់ថា «នៀន» ខ្លាចពណ៌ក្រហមហេតុនេះហើយនៅពេលដែលឆ្នាំថ្មីមកដល់ អ្នកភូមិនាំគ្នាបំពាក់គោមពណ៌ក្រហមនិងបិទក្រដាសពណ៌ក្រហមនៅតាមទ្វារនិងបង្អួចផ្ទះរៀងៗខ្លួន។អ្នកភូមិក៏បានប្រើផាវដើម្បីបណ្ដេញ «នៀន» ឲ្យទៅឆ្ងាយផងដែរ។ បន្ទាប់ពីពេលនោះមក «នៀន» ពុំបានមកក្នុងភូមិម្ដងទៀតឡើយ។ ប៉ុន្តែនៅស្រុកខ្មែរហាមមិនឲ្យដុតផាវក្នុងពិធីចូលឆ្នាំចិនទេ។នៅចុងក្រោយ ហុងជុនឡាវស៊ូ ជាព្រះសង្ឃសាសនាតាវបុរាណម្នាក់ បានចាប់សត្វ «នៀន» នោះ។ សត្វ «នៀន» ក៏ខ្លាចទៅជាយានជំនិះរបស់ព្រះសង្ឃហុងជុនឡាវស៊ូទៅ។
ដោយឡែកបុណ្យចូលឆ្នាំថ្មីនៅប្រទេសវៀតណាមវិញគឺពេលវេលាដូចគ្នានឹងបុណ្យចូលឆ្នាំថ្មីនៅតៃវ៉ាន់និងចិនដែរ ប៉ុន្តែមានភាពខុសគ្នាជាច្រើននៅក្នុងទំនៀមទម្លាប់ប្រពៃណី ។ ក្នុងចំណោមនោះ មានភាពល្បីល្បាញបំផុតគឺប្រពៃណីទទួលទាននំអន្សមក្នុងឱកាសចូលឆ្នាំនៅប្រទេសវៀតណាម ។ តាមពិតទៅ ទំនៀមទម្លាប់នៃការញ៉ាំ នំអន្សមក្នុងថ្ងៃចូលឆ្នាំវៀតណាម ក៏អាចឃើញនៅក្វាងស៊ី ស៊ីឈួន និងកន្លែងផ្សេងទៀត នៅក្នុងប្រទេសចិន ហើយរូបរាងនំអន្សមនៅវៀតណាមគឺខុសគ្នា មានរូបរាងបីជ្រុងដែលយើងធ្លាប់ស្គាល់។
នំអន្សមមានរាងផ្សេងគ្នា នៅក្នុងផ្នែកនំផ្សេងៗនៃប្រទេសវៀតណាម ភាគច្រើនជារាងបួនជ្រុង ឬរាងមូល ហើយការវេចនំអន្សមខាងក្នុងមានអង្ករដំណើប សណ្តែកបាយ សាច់ជ្រូកបីជាន់ និងគ្រឿងផ្សំផ្សេងៗទៀត។ក្រៅពីការហូបរបបអាហារខុសប្លែកមានភាពផ្សេងៗគ្នា ផ្កាដែលដាក់តាំងក្នុងពិធីបុណ្យក៏មានភាពខុសគ្នាផងដែរ។ផ្កាអ័រគីដេ ផ្កាស្វាយប្រាក់ជាដើម ត្រូវបានគេដាក់តាំងបង្ហាញជាទូទៅក្នុងពិធីចូលឆ្នាំចិន ចំណែកឯនៅប្រទេសវៀតណាមវិញ ផ្កាផ្លែប៉េស ផ្កាម៉ាន់ជូរីជាការតុបតែង ផ្កា Peach ត្រូវបានគេជឿថានាំសំណាង ផ្កា apricot គឺជានិមិត្តរូបនៃទ្រព្យសម្បត្តិ។ក្នុងឱកាសចូលឆ្នាំចិននៅតៃវ៉ាន់ ការបាញ់កាំជ្រួចគឺមិនអាចជៀសបាន ក្នុងការប្រារព្ធនៅប្រទេសវៀតណាមបែបនេះជាការខុសច្បាប់ ហើយជំនួសដោយកាំជ្រួចដែលរៀបចំដោយរដ្ឋាភិបាល។ ការមើលកាំជ្រួចក៏ជាសកម្មភាពសំខាន់មួយសម្រាប់ប្រជាជនវៀតណាម ក្នុងការជួបជុំគ្នាក្នុងពិធីបុណ្យរដូវចូលឆ្នាំ!
