នៅឆ្នាំ ២០២៤ កម្ពុជា អនុម័តលើគម្រោងវិនិយោគមានតម្លៃទុនសរុប ៦,៩ពាន់លានដុល្លារ ដែលអាចបង្កើតការងារបានជាង៣០កន្លែង
21-September-2026 / សេដ្ឋកិច្ច
ភ្នំពេញ៖ ក្នុងឆ្នាំ ២០២៤កន្លងទៅថ្មីៗនេះ ក្រុមប្រឹក្សាអភិវឌ្ឍន៍កម្ពុជាបានបំបែកកំណត់ត្រាប្រចាំឆ្នាំតាមរយៈការ អនុម័តគម្រោងវិនិយោគសរុបចំនួន ៤១៤គម្រោង ក្នុងនោះគម្រោងវិនិយោគថ្មីចំនួន ៣៨៧គម្រោង និងគម្រោងពង្រីកផលិតកម្មចំនួន ២៧គម្រោង ដែលមានទុនវិនិយោគសរុបប្រមាណ ៦,៩ពាន់លានដុល្លារ អាម៉េរិក ដែលអាចបង្កើតការងារបានប្រមាណជិត ៣២ម៉ឺនកន្លែង។
តាមសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា ដែលចេញផ្សាយនៅថ្ងៃទី ១៣ខែមករា ឆ្នាំ ២០២៥បានឲ្យដឹងថា៖ក្នុងចំណោមគម្រោងវិនិយោគទាំង ៤១៤គម្រោង ក្នុងនោះគម្រោងវិនិយោគដែលមានទីតាំងស្ថិតនៅក្រៅតំបន់សេដ្ឋកិច្ចពិសេសមានចំនួន ២៦៤គម្រោង និងគម្រោងវិនិយោគដែលមានទីតាំងស្ថិតនៅក្នុងតំបន់សេដ្ឋកិច្ចពិសេសមានចំនួន ១៥០គម្រោង។
ថ្លែងក្នុងពិធីបើកការដ្ឋានសាងសង់រោងចក្រផលិតសំបកកង់រថយន្តរបស់ក្រុមហ៊ុន វ៉ាន់លី ថាយអឺ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានលើកឡើងអំពីតួលេខនៃការកើនឡើងរបស់គម្រោងវិនិយោគ ដែលបង្ហាញឱ្យឃើញពីការជឿទុកចិត្តរបស់វិនិយោគិនមកលើរាជរដ្ឋាភិបាលកម្ពុជា ក្រោមការដឹកនាំរបស់សម្តេចធិបតីនាយករដ្ឋមន្ត្រី រួមជាមួយនឹងកត្តាសំខាន់ៗដូចជា៖ (១) កត្តាសុខសន្តិភាព ស្ថេរភាពនយោបាយ និងម៉ាក្រូសេដ្ឋកិច្ច (២) លក្ខខណ្ឌល្អប្រសើរនៃក្របខណ្ឌច្បាប់ និងលិខិតបទដ្ឋានគតិយុត្ត និង (៣) ការបើកចំហសេដ្ឋកិច្ច ទទួលការវិនិយោគស្ទើរលើគ្រប់វិស័យ ជាពិសេសភាពអំណោយផលនៃលក្ខខណ្ឌ និងការលើកទឹកចិត្តវិនិយោគ ដូចមានចែងក្នុងច្បាប់ស្ដីពីវិនិយោគ នៃព្រះរាជាណាចក្រកម្ពុជា។
លោកឧបនាយករដ្ឋមន្ត្រី ក៏បានលើកឡើងពីមូលហេតុដែលនាំឲ្យការដាក់ទុកវិនិយោគកើនឡើងផងដែរគឺការដាក់ឱ្យប្រើប្រាស់ជាសាធារណៈនូវប្រព័ន្ធគ្រប់គ្រងគម្រោងវិនិយោគកម្ពុជា (cdcIPM) ជាថ្នាលបច្ចេកវិទ្យាដែលអនុញ្ញាតឱ្យវិនិយោគិនអាចដាក់ពាក្យស្នើសុំចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់ តាមប្រព័ន្ធអនឡាញបានពីគ្រប់ទីកន្លែង ទាំងការដាក់ពាក្យ ការបង់កម្រៃសេវា និងការទទួលបាននូវវិញ្ញាបនបត្រចុះបញ្ជីគម្រោងជាទម្រង់ឌីជីថលផងដែរ និងឈានទៅដល់ការតភ្ជាប់ជាមួយក្រសួង-ស្ថាប័នពាក់ព័ន្ធនាពេលខាងមុខ និងបានលើកទឹកចិត្តវិនិយោគិនទាំងអស់ដែលមានបំណងស្នើសុំដាក់ពាក្យចុះបញ្ជីគម្រោងវិនិយោគថ្មី ឬគម្រោងពង្រីកគម្រោងវិនិយោគរបស់ខ្លួនដែលបានចុះបញ្ជីស្រាប់នៅ ក.អ.ក. ប្រើប្រាស់ប្រព័ន្ធនេះដើម្បីភាពងាយស្រួល ចំណេញពេលវេលា។
វិស័យឧស្សាហកម្មរបស់កម្ពុជា នៅតែបន្តពីភាពលេចធ្លោរបស់ខ្លួន ដែលជាកត្តាជំរុញសេដ្ឋកិច្ចដ៏សំខាន់នាពេលអនាគត ដោយទាក់ទាញបានគម្រោងវិនិយោគចំនួន ៣៩៤ គម្រោង ស្មើនឹងប្រមាណ ៩៥% នៃគម្រោងវិនិយោគសរុបនៅក្នុងប្រទេស។យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា បានឲ្យដឹងថា ទុនវិនិយោគសរុបក្នុងវិស័យឧស្សាហកម្មឈានដល់ប្រមាណ ៤,៨ពាន់លានដុល្លារអាម៉េរិក ដែលតំណាងឱ្យ ៦៩% នៃដើមទុនវិនិយោគសរុបសម្រាប់ឆ្នាំ ២០២៤។
ក្រៅពីការវិនិយោគលើវិស័យឧស្សាហកម្ម វិស័យផ្សេងទៀតដូចជា កសិកម្ម, ទេសចរណ៍ និងហេដ្ឋារចនាសម្ព័ន្ធ ក៏បានរួមចំណែកដល់កំណើនសេដ្ឋកិច្ចរបស់ប្រទេសផងដែរ ទោះបីជាមានកម្រិតទាបជាងបើធៀបនឹងវិស័យឧស្សាហកម្មក៏ដោយ។នៅឆ្នាំ ២០២៤ កម្ពុជាបានទាក់ទាញការវិនិយោគពីប្រទេស និងដែនដីចំនួន ២០ ដោយប្រទេសចិនរក្សាជំហររបស់ខ្លួនជាអ្នកវិនិយោគកំពូល។ ការវិនិយោគរបស់ចិនបានកើនឡើងដល់ ៣,៤៣ពាន់លានដុល្លារអាម៉េរិក ដែលស្ទើរគ្របដណ្តប់នៃ FDI សរុប។
ប្រទេសវៀតណាមជាប់ចំណាត់ថ្នាក់លេខ ២ ដែលមានទឹកប្រាក់ចំនួន ៥៦០លានដុល្លារអាម៉េរិក តាមពីក្រោយដោយប្រទេសសិង្ហបុរី ដែលមានទឹកប្រាក់ ២៦៤លានដុល្លារអាម៉េរិក ។ អ្នករួមចំណែកគួរឱ្យកត់សម្គាល់ផ្សេងទៀតរួមមានកោះកៃម៉ាន (Cayman) មានទឹកប្រាក់ ៤៩លានដុល្លារអាម៉េរិក, ម៉ាឡេស៊ី ៤៥លានដុល្លារអាម៉េរិក, ជប៉ុន ៤០លានដុល្លារអាម៉េរិក, សហរដ្ឋអាមេរិក ២៨លានដុល្លារអាម៉េរិក និងប្រទេសថៃ ២៧លានដុល្លារអាម៉េរិក។
ការវិនិយោគដែលនៅសេសសល់បានមកពីប្រទេសដូចជា កោះសាម័រ (Samoa), ឥណ្ឌា, កូរ៉េខាងត្បូង, កាណាដា, សីស្ហែល, ចក្រភពអង់គ្លេស, ហ្វីលីពីន, មីយ៉ាន់ម៉ា, អូស្ត្រាលី, សេណេហ្គាល់, រុស្ស៊ី និងហូឡង់។ប្រទេសចិនបានរួមចំណែកស្ទើរគ្របដណ្តប់នៃការវិនិយោគបរទេសទាំងអស់ នេះបង្ហាញពីទំនាក់ទំនងដ៏ល្អ និងយូរអង្វែងរវាងកម្ពុជា និងចិន។ ការវិនិយោគនេះគ្របដណ្តប់លើវិស័យផ្សេងៗ រួមទាំងឧស្សាហកម្ម, កសិកម្ម និងកសិ-ឧស្សាហកម្ម, ទេសចរណ៍, ហេដ្ឋារចនាសម្ព័ន្ធ និងផ្សេងៗ។
ការកើនឡើងយ៉ាងខ្លាំងនៃការវិនិយោគក្នុងវិស័យឧស្សាហ៍កម្ម ក៏ស្របនឹងចក្ខុវិស័យរបស់កម្ពុជាក្នុងការផ្លាស់ប្តូរពីសេដ្ឋកិច្ចកសិកម្មដ៏លើសលុប ទៅជាវិស័យចម្រុះ និងឧស្សាហូបនីយកម្ម។ ការបន្តផ្តោតទៅលើឧស្សាហូបនីយកម្ម អាចជំរុញជំហររបស់កម្ពុជា ក្នុងខ្សែសង្វាក់ផ្គត់ផ្គង់ក្នុងតំបន់ និងពិភពលោក ជាពិសេសឈានទៅសម្រេចចក្ខុវិស័យប្រែក្លាយប្រទេសកម្ពុជា ទៅជាប្រទេសមានចំណូលខ្ពស់នៅឆ្នាំ ២០៥០។ប្រទេសកម្ពុជាកាលពីថ្ងៃទី១៩ធ្នូឆ្នាំ២០២៤ត្រូវបានអង្គការសហប្រជាជាតិអនុមត័ទទយលស្គាលថាជាប្រទេសដែលចេញផុតពីប្រទេសក្រីក្រ។
ទាក់ទងបញ្ហានេះលោក ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល បានលើកឡើងប្រាប់កម្មវិធីកិច្ចពិភាក្សារបស់កាសែតថាថា ដំណើរឈានចេញពីក្រុមប្រទេសមានការអភិវឌ្ឍតិចតួចរបស់កម្ពុជា មិនមែនជាការខាតបង់ដូចការលើកឡើងរបស់ក្រុមប្រឆាំងមួយចំនួនតូចនោះឡើយ តែផ្ទុយទៅវិញគឺជាឱកាសសម្រាប់ប្រទេសកម្ពុជា និងប្រជាជនកម្ពុជា។
លោករដ្ឋមន្ត្រីបានបញ្ជាក់ថា ក្នុងនាជាខ្មែរយើងមិនចង់រស់នៅក្នុងភាពអាណិតអាសូរពីគេទៀតទេ ប្រមុខដឹកនាំរបស់យើងសម្ដេចមហាបវរធិបតី ហ៊ុន ម៉ាណែត បានបញ្ជាក់ថាបើទោះជាមានបញ្ហាប្រឈមបន្តិចបន្តួចក៏ពិតមែន ប៉ុន្តែតាមរយៈគោលនយោបាយ ក៏ដូចជាយុទ្ធសាស្ត្រដែលបានដាក់ចេញតាមរយៈរដ្ឋាភិបាលនីតិកាលទី៧នេះ នឹងធ្វើឱ្យប្រទេសកម្ពុជាក្លាយជារដ្ឋមួយរឹងប៉ឹងដោយខ្លួនឯងនាពេលអនាគត។ទោះបីយ៉ាងណាផលដែលបានពីការការដាក់ទុនវិនិយោកគខាងលើនេះមិនទានបានដល់ដៃប្រជាពលរដ្ឋក្នុងឆ្នាំ២០២៥ឬ២០២៦នោះទេព្រោះតុល្យភាពនៃជញ្ជីងពាណិជ្ជាកម្មកម្ពុជាជាមួយបរទេសនៅមានឱនភាពនៅឡើយ៕
