មេគយធំប្រាប់ថាមានរថយន្ត២៦០០គ្រឿងហើយមកបង់ពន្ធនិងអាករនាំចូលហើយខែមករានឹងចាត់ការត្រួតពិនិត្យ!
26-March-2024 / សេដ្ឋកិច្ច
ភ្នំពេញ ៖ គិតតាំងពីថ្ងៃទី៩ ខែកញ្ញា ឆ្នាំ២០២១ ជាថ្ងៃដែលអគ្គនាយដ្ឋានគយ ជូនដំណឹងឲ្យរថយន្តគ្មានពន្ធ ចូលមកបង់ពន្ធ រហូតដល់ថ្ងៃទី១៤ ខែធ្នូ ឆ្នាំ២០២១ម្សិលមិញ មានម្ចាស់រថយន្តទាំងចង្កូតឆ្វេង និងស្តាំ ដែលគ្មានពន្ធ និងអាករនាំចូល ចំនួន២,៦០០គ្រឿងហើយ ដែលបានចូលខ្លួនទៅបង់ពន្ធ និងប្រាក់កក់ ស្មើនឹងថវិកាជាង២៧លានដុល្លារអាមេរិក។
នេះបើតាមលោក គុណ ញឹម ប្រតិភូរាជរដ្ឋាភិបាល ទទួលបន្ទុកប្រធានអគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានថ្លែងនៅក្នុងសន្និសីទសារព័ត៌មាន ស្តីពីវឌ្ឍនភាពនៃការអនុវត្តការប្រមូលពន្ធ លើយានយន្តគ្មានពន្ធ និងអាករនាំចូល ដែលមានស្រាប់ក្នុងប្រទេស នារសៀលនេះ តាមប្រព័ន្ធអនឡាញនារសៀលថ្ងៃទី១៥ ខែធ្នូ ឆ្នាំ២០២១នេះ។
ប្រធានអគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានបន្ថែមថា "ក្នុងចំណោមនោះ មានរថយន្តចង្កូតឆ្វេងចំនួន១,៣៥៩គ្រឿង ស្មើនឹងទឹកប្រាក់១៧,៦លានដុល្លារ។ ដោយឡែក ចំពោះរថយន្តចង្កូតស្តាំ ដែលបានយកប្រាក់ទៅកក់ បន្ទាប់មកយករថយន្តទៅកែចង្កូត មានចំនួន១,៥០០គ្រឿង ស្មើនឹងទឹកប្រាក់១០,៨លានដុល្លារ"។លោក បានវាយតម្លៃថា ស្ថានភាពនៃការចូលទៅបង់ពន្ធ របស់ម្ចាស់រថយន្តគ្មានពន្ធ មានភាពល្អប្រសើរ ក្នុងរយៈពេលចុងក្រោយនេះ ជាពិសេសរថយន្តចង្កូតឆ្វេង ហើយម្យ៉ាងការអនុគ្រោះពន្ធ១០ភាគរយ ក៏ជិតនឹងចប់ផងដែរ។
លោក គុណ ញឹម លើកឡើងថា តាមការប៉ាន់ស្មានមានជិត១ម៉ឺនគ្រឿង ដែលគ្មានពន្ធនិងអាករនាំចូល នៅក្នុងប្រទេស ហើយតាមការប៉ានស្មាន អាចប្រមូលបានប្រាក់ពន្ធ បានប្រមាណ៧០ទៅ៨០លានដុល្លារ។ជាថ្មីម្តងទៀត លោក គុណ ញឹម បានអំពាវនាវដល់ម្ចាស់រថយន្តចង្កូតឆ្វេង ដែលជ្រកក្រោមផ្លាកលេខផ្សេងៗគ្មានពន្ធ បំពេញកាតព្វកិច្ចពន្ធ ឲ្យបានត្រឹមថ្ងៃទី៣១ ខែធ្នូ ឆ្នាំ២០២១ ដើម្បីទទួលបានការអនុគ្រោះបន្ធូរបន្ថយពន្ធ និងអាករចំនួន១០ភាគរយ។ ចំណែករថយន្តចង្កូតស្តាំ ត្រូវមកប្រកាសបង់ពន្ធ និងកែចង្កូតពីស្តាំមកឆ្វេង ឲ្យបានរួចរាល់ត្រឹមថ្ងៃទី៣០ ខែមិថុនា ឆ្នាំ២០២២។
លោក គុណ ញឹម បញ្ជាក់យ៉ាងដូច្នេះថា «ចាប់ពីខែមករា ឆ្នាំ២០២២ទៅ យើងនឹងចាប់ចុះបង្ក្រាប ដែលជាឧបករណ៍មួយ ជំរុញដែលអ្នកមិនទាន់បានស្ម័គ្រចិត្ត ចូលមកបង់ពន្ធ។ ការបង្ក្រាបនេះ គឺបង្ក្រាបទាំងនៅរាជធានីភ្នំពេញ និងនៅតាមខេត្តមួយចំនួន»។អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានលើកឡើងថា ការបង្ក្រាបទាំងនៅរាធានីភ្នំពេញ និងនៅតាមខេត្តមួយចំនួននេះ គឺជាវិធានការមួយ ដើម្បីពញ្ញាក់ស្មារតីបន្ថែមទៀត ដល់អ្នកដែលមានកាតព្វកិច្ច ដែលត្រូវចូលមកបង់ពន្ធ។
លោក គុណ ញឹម បន្ដថា នៅពេលបង្ក្រាបបាន នឹងរងនូវពន្ធអាករ និងការផាកពិន័យ ប៉ុន្ដែបើស្ម័គ្រចិត្តចូលមកបង់ពន្ធ ចាប់ពីថ្ងៃទី០១ ខែមករា រហូតដល់ថ្ងៃទី៣០ ខែមិថុនា ឆ្នាំ២០២២ គឺផ្អាកពិន័យត្រឹមពន្ធអាករតែប៉ុណ្ណោះ។លោក គុណ ញឹម បានលើកឡើងថា ការពន្យាពេលរយៈពេល៣ខែ ឬ៤ខែមកនេះ គឺជារយៈពេលមួយ ទុកឲ្យអ្នកដែលមានស្មារតី ក្នុងការបំពេញកាតព្វកិច្ចពន្ធ ស្របតាមច្បាប់របស់ប្រទេស ចូលខ្លួនមកដោយស្រួល ដោយមិនមានការបង្ខិតបង្ខំនោះទេ។លោកបានសង្កត់ធ្ងន់ថា ចាប់ពីថ្ងៃទី១ ខែមករា ឆ្នាំ២០២២ អគ្គនាយកដ្ឋានគយ និងរដ្ឋាករ នឹងចាប់ផ្តើមបង្ក្រាបរថយន្តគ្មានពន្ធ និងអាករនាំចូលឡើងវិញ យ៉ាងតឹងរឹង ជាពិសេសរថយន្តចង្កូតស្តាំ ដែលជារថយន្តខុសច្បាប់។ ប្រសិនបើចាប់បានរថយន្តចង្កូតស្តាំ ជម្រើសមានតែ២ប៉ុណ្ណោះ បើមិនបំបែកជាគ្រឿងបន្លាស់នោះទេ គឺត្រូវកម្ចេចចោលតែម្តង.។
សម្រាប់ការប្រមូលពន្ធរយៈពេល១១ខែ ឆ្នាំ២០២១នេះ អគ្គនាយកដ្ឋានគយ និងរដ្ឋាករកម្ពុជា ប្រមូលចំណូលសម្រាប់ថវិកាជាតិបានចំនួន ២០៦៥លានដុល្លារ។ ទោះជាយ៉ាងណាលោកអគ្គនាយកគយ និងរដ្ឋាករកម្ពុជា ទទួលស្គាល់ថា ច្បាប់ហិរញ្ញវត្ថុសម្រាប់ការគ្រប់គ្រងឆ្នាំ២០២១នេះ អគ្គនាយកដ្ឋានគយ និងរដ្ឋាករកម្ពុជា ត្រូវប្រមូលចំណូលឲ្យបានចំនួន ២ ៣៦៣លានដុល្លារ។ ប៉ុន្តែការប្រមូលចំណូលនេះ អាចមិនសម្រាប់តាមផែនការ។លោកគុណញឹមរំពឹងថា នៅឆ្នាំ២០២១នេះ អគ្គនាយកដ្ឋានគយ និងរដ្ឋាករ អាចប្រមូលចំណូលបាន ៩៧ភាគរយនៃផែនការ ដែលស្មើនឹងទឹកប្រាក់ ២ ៣០០លានដុល្លារ។
