វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 3429 នាក់
ម្សិលមិញ 5544 នាក់
សរុប 13944526 នាក់
ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងលោក ចូហ្សេ ម៉ានូអែល រ៉ាមូស អរតា ប្រធានាធិបតីទីម័រខាងកើត បានអញ្ជើញជាអធិបតីដ៏ខ្ពង់ខ្ពស់ក្នុងពិធីចុះហត្ថលេខា នាល្ងាចថ្ងៃទី២០ ខែតុលា ឆ្នាំ២០២២នេះ នៅវិមានសន្តិភាព។
ឯកសារទ្វេភាគីទីមួយ ត្រូវបានចុះហត្ថលេខាដោយលោកស្រីបណ្ឌិត រដ្ឋមន្ត្រីការបរទេស និងសហប្រតិបត្តិការ នៃសាធារណរដ្ឋប្រជាធិបតេយ្យទីម័រខាងកើត និងលោក ប៉ាន សូរសក្ដិ រដ្ឋមន្ត្រីក្រសួងពាណិជ្ជកម្ម នៃព្រះរាជាណាចក្រកម្ពុជា ចុះហត្ថលេខាលើអនុស្សរណៈនៃការយោគយល់គ្នា ស្តីពីការធ្វើពាណិជ្ជកម្មអង្កររវាងរដ្ឋាភិបាល នៃសាធារណរដ្ឋប្រជាធិបតេយ្យទីម័រខាងកើត និងរាជរដ្ឋាភិបាល និងព្រះរាជាណាចក្រកម្ពុជា ។
ឯកសារទីពីរ ចុះហត្ថលេខាដោយលោកស្រីបណ្ឌិតរដ្ឋមន្ត្រីការបរទេស និងសហប្រតិបត្តិការ នៃសាធារណរដ្ឋប្រជាធិបតេយ្យទីម័រខាងកើត និងលោកបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុក រដ្ឋលេខាធិការដ្ឋានអាកាសចរស៊ីវិល នៃព្រះរាជាណាចក្រកម្ពុជា ចុះហត្ថលេខាលើកិច្ចព្រមព្រៀង ស្ដីពីសេវាកម្មដឹកជញ្ជូនផ្លូវអាកាសរវាងរដ្ឋាភិបាល នៃសាធារណរដ្ឋប្រជាធិបតេយ្យទីម័រខាងកើត និងរាជរដ្ឋាភិបាលព្រះរាជាណាចក្រកម្ពុជា។
មុនមានការចុះហត្ថលេខាសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា តាមរយៈ លោកបណ្ឌិត ចូហ្សេ ម៉ានូអែល រ៉ាមូស អរតា (Jose Ramos-Horta) ប្រធានាធិបតីទីម័រឡេស្ត (ទីម័រខាងកើត) បានជំរុញឱ្យវិនិយោគិនទីម័រ មកវិនិយោគលើវិស័យកែច្នៃស្រូវអង្ករនៅកម្ពុជា ហើយនាំចេញអង្ករពីទៅកាន់ប្រទេសទីម័រឱ្យបានកាន់តែច្រើន។
លោក ចូហ្សេ ម៉ានូអែល រ៉ាមូស អរតា វ័យ ៧២ឆ្នាំ បានដឹកនាំគណៈប្រតិភូអញ្ជើញដល់ប្រទេសកម្ពុជាកាលពីថ្ងៃទី១៩ ខែតុលា ឆ្នាំ២០២២ ដើម្បីបំពេញទស្សនកិច្ចផ្លូវរដ្ឋរយៈពេល៣ថ្ងៃ ចាប់ពីថ្ងៃទី ១៩ ដល់ថ្ងៃទី២១ ខែតុលា ឆ្នាំ២០២២។ លោកបានជួបពិភាក្សាការងារជាមួយ សម្តេចតេជោ ហ៊ុន សែន នៅវិមានសន្តិភាព នៅរសៀល ថ្ងៃទី២០ ខែតុលា ឆ្នាំ២០២២នេះ។លោក អ៊ាង សុផល្លែត ជំនួយការផ្ទាល់របស់ សម្តេចតេជោ ហ៊ុន សែន បានបញ្ជាក់ថា នៅក្នុងជំនួបនេះ លោកប្រធានាធិបតី បានថ្លែងអំណរគុណសម្តេចតេជោ ក៏ដូចជារាជរដ្ឋាភិបាលកម្ពុជា ដែលបានគាំទ្រទីម័រខាងកើត ជាពិសេសទៅលើវិស័យអភិវឌ្ឍ កសាងជាតិ ស្ថិរភាពសង្គម ។
លោក អ៊ាង សុផល្លែត បានបញ្ជាក់ថា «ក្នុងន័យនេះឯកឧត្តមក៏បានបញ្ជាក់ជូនសម្តេចតេជោនូវបំណងចង់ពង្រីកពង្រឹង ចំណងមិត្តភាព ពង្រឹងកិច្ចសហប្រតិបត្តិការរវាងប្រទេសទាំងពីរឱ្យកាន់តែខ្លាំងឡើង តាមរយៈឱ្យមានការហោះហើរត្រង់រវាងប្រទេសទាំងពីរ ក៏ដូចជាវិស័យពាណិជ្ជកម្មរវាងប្រទេសទាំងពីរផងដែរ»។សម្តេចតេជោ បានសម្តែងស្វាគមន៍ចំពោះការហោះហើរត្រង់រវាងទីម័រខាងកើត និងព្រះរាជាណាចក្រកម្ពុជា ដោយសម្តេចបានចាត់ទុកថា ការហោះហើរត្រង់នេះ នឹងចូលរួមចំណែកពង្រីកពាណិជ្ជកម្មរវាងប្រទេសទាំងពីរ។
លោក អ៊ាង សុផល្លែត បានបញ្ជាក់ថា៖ «ពាក់ព័ន្ធនឹងពាណិជ្ជកម្មដែល ឯកឧត្តម ចូហ្សេ ម៉ានូអែល រ៉ាមូស ចង់ពង្រីករវាងប្រទេសទាំងពីរនេះ ជាពិសេសលើវិស័យកសិកម្មនោះ សម្តេចតេជោ បានមានប្រសាសន៍ថា គប្បីណាមានអ្នកវិនិយោគទីម័រខាងកើត មកវិនិយោគនៅកម្ពុជាយើង លើម៉ាស៊ីនកិនស្រូវ លើម៉ាស៊ីនសម្ងួត ក៏ដូចជាទិញស្រូវអង្ករពីកម្ពុជាយើងដើម្បីធ្វើការទិញកិនហើយនាំចេញទៅប្រទេសទីម័រខាងកើតតែម្តង»។
សម្តេចបានបញ្ជាក់ប្រាប់លោកប្រធានាធិបតីថា កម្ពុជាបានអនុញ្ញាតឱ្យបរទេសវិនិយោគ១០០ភាគរយ ហើយនេះជាកត្តាសំខាន់សម្រាប់អ្នកវិនិយោគរបស់ទីម័រខាងកើតមកកាន់កម្ពុជា។ សម្តេចបានលើកទឹកចិត្តឱ្យជំរុញ អនុវត្តលើរាល់អនុស្សារណៈទាំងឡាយណា ដែលប្រមុខរដ្ឋាភិបាលទាំងពីរ បានចុះហត្ថលេខាហើយ ហើយក៏បានស្នើសុំឱ្យមានការពិនិត្យជំរុញ កិច្ចសហប្រតិបត្តិការលើវិស័យអប់រំ ក៏ដូចជាវិស័យសន្តិសុខផងដែរ៕