ខួប១៥ឆ្នាំធនាគារវៀតណាម( BIDC )នៅកម្ពុជា បានទាក់ទាញវិនិយោគមកកម្ពុជា ឯនៅវៀតណាមបំពាក់មេដាយ
21-September-2026 / សេដ្ឋកិច្ច
ភ្នំពេញ៖ សម្តេចកិត្តិសង្គហបណ្ឌិត ម៉ែន សំអន សមាជិកឧត្តមប្រឹក្សាព្រះមហាក្សត្រ មានប្រសាសន៍ថា ក្នុងរយៈពេល ១៥ឆ្នាំ នៃប្រតិបត្តិការ BIDC បានធ្វើសមាហរណកម្ម និងកសាងកេរិ៍ឈ្មោះដ៏រឹងមាំនៅក្នុងទីផ្សារកម្ពុជា អនុវត្តការងារអាជីវកម្មរបស់ខ្លួន ប្រកបដោយស្ថិរភាព បង្កើនចំណែកទីផ្សារ និងបានរួមចំណែកជាវិជ្ជមានសម្រាប់ការអភិវឌ្ឍន៍សេដ្ឋកិច្ចកម្ពុជា។
សម្តេចកិត្តិសង្គហបណ្ឌិត ម៉ែន សំអន សមាជិកឧត្តមប្រឹក្សាផ្ទាល់ព្រះមហាក្សត្រ ដែលជាប្រធានសមាគមកម្ពុជាវៀតណាមផងដែរបានចូលរួមជាអធិតីជាមួយអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជាក្នុងពិធីអបអរសារទរខួប១៥ឆ្នាំ នៃការបង្កើតធនាគារវិនិយោគ និងអភិវឌ្ឍន៍កម្ពុជា (BIDC)ដែលជាធនាគារមកពីប្រទេសវៀតណាម នៅសណ្ឋាគារសូហ្វីតែលភ្នំពេញ នៅរសៀលថ្ងៃទី៦ ខែកញ្ញា ឆ្នាំ២០២៤ ។
សម្តេចកិត្តិសង្គហបណ្ឌិត បានកោតសសើរ និងអបអរសារទរដោយស្មោះ ចំពោះសមិទ្ធផលគួរជាទីមោទនៈ ដែលធនាគារវិនិយោគ និងអភិវឌ្ឍន៍កម្ពុជា សម្រេចបានក្នុងរយៈពេលកន្លងមកនេះ។ តាមរយៈការជួយជ្រោមជ្រែងចំពោះសកម្មភាព សន្តិសុខសង្គម មនុស្សធម៌ សុខាភិបាល ការអប់រំ និងបណ្តុះបណ្តាល ការលុបបំបាត់ភាពអត់ឃ្លាន និងការកាត់បន្ថយភាពក្រីក្រ ការអភិវឌ្ឍជនបទ ដូចជា ឧបត្ថម្ភសាងសង់សាលារៀន ឧបត្ថម្ភអាហារូបករណ៍ដល់និស្សិត ឧបត្ថម្ភដល់ប្រជាពលរដ្ឋដែលរងគ្រោះដោយគ្រោះធម្មជាតិ ឧបត្ថម្ភកាកបាទក្រហមកម្ពុជា ឧបត្ថម្ភដល់មន្ទីរពេទ្យ និងផ្តល់ថ្លៃពិនិត្យព្យាបាលដល់អ្នកជំងឺក្រីក្រ អ្នកជំងឺនៅតំបន់ដាច់ស្រយាល។
សម្តេចកិត្តិសង្គហបណ្ឌិត ក៏បានស្នើឲ្យ BIDC ក៏ដូចជា សាខាពាណិជ្ជកម្មរបស់ BIDV ផ្សេងទៀតគោរពនូវរាល់បទប្បញ្ញត្តិច្បាប់របស់កម្ពុជា ក្នុងការធ្វើប្រតិបត្តិការ ហើយសកម្ម និងជាគំរូក្នុងការអនុវត្តគោលនយោបាយ ទិសដៅ និងការណែនាំរបស់រាជរដ្ឋាភិបាល និងស្ថាប័នពាក់ព័ន្ធនៅកម្ពុជា។ សម្តេចកិត្តិសង្គហបណ្ឌិត ស្នើឱ្យ BIDV/BIDC បន្តរក្សាតួនាទីឈានមុខគេ ក្នុងចំណោមសហគ្រាសវៀតណាម ដែលកំពុងធ្វើសកម្មភាពអាជីវកម្មនៅកម្ពុជា បន្តលើកកម្ពស់ទំនាក់ទំនងសកម្មភាពសេដ្ឋកិច្ច ពាណិជ្ជកម្ម និងវិនិយោគរវាងប្រទេសទាំងពីរ។
បើតាមប្រភពពីកាសែតវៀតណាមបានឲ្យដឹងថាម៖កាលពីថ្ងៃទី ២៥ ខែមីនា នៅទីក្រុងហាណូយធនាគារជាតិវៀតណាម សហការជាមួយស្ថានទូតកម្ពុជា បានរៀបចំពិធីបំពាក់មេដាយសហមេត្រី ថ្នាក់អស្សឬទ្ធិ និងប័ណ្ណសរសើរពីរាជរដ្ឋាភិបាលកម្ពុជា និងធនាគារជាតិនៃកម្ពុជា ជូនដល់អតីតជំនាញការធនាគារវៀតណាម ដែលត្រូវបានចាត់បញ្ជូនទៅជួយធនាគារកម្ពុជាក្នុងកំឡុងពេលឆ្នាំ ១៩៧៩-១៩៨៩ (ដែលហៅកាត់ថាគណៈកម្មការ K)។លោក ចាយ ណាវុធ ឯកអគ្គរាជទូតវិសាមញ្ញនិងពេញសមត្ថភាពនៃព្រះរាជាណាចក្រកម្ពុជាប្រចាំវៀតណាម បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល និងប្រជាជនវៀតណាម ជាពិសេសអ្នកជំនាញការវៀតណាមដែលត្រូវបានចាត់បញ្ជូនទៅជួយប្រទេសកម្ពុជាក្នុងការតស៊ូ រំដោះប្រទេសជាតិ ក៏ដូចជាក្នុងការអភិវឌ្ឍប្រទេសក្រោយពីសង្គ្រាម។
លោក ចាយ ណាវុធ បានបំពាក់មេដាយសហមេត្រី ថ្នាក់អស្សឬទ្ធិ និងប័ណ្ណសរសើរពីរាជរដ្ឋាភិបាលកម្ពុជា និងធនាគារជាតិនៃកម្ពុជា ជូនដល់បុគ្គលិកចំនួន ៣៣ នាក់របស់ធនាគារវៀតណាម ដែលបានបំពេញភារកិច្ចប្រកបដោយជោគជ័យ រួមចំណែកយ៉ាងសំខាន់ក្នុងការកសាងប្រព័ន្ធធនាគារហិរញ្ញវត្ថុនៅកម្ពុជាក្នុងដំណាក់កាលឆ្នាំ ១៩៧៩ - ទសវត្សរ៍ឆ្នាំ១៩៨០។អគ្គទេសាភិបាលធនាគារជាតិ លោកស្រី Nguyen Thi Hongក្នុងឱកាសនោះដែរ បានសម្តែងនូវមោទនភាព និងការដឹងគុណយ៉ាងជ្រាលជ្រៅចំពោះការចូលរួមចំណែក និងការលះបង់របស់អតីតអ្នកជំនាញការដែលពុះពារជំនះរាល់ការលំបាកក្នុងបុព្វហេតុការពារ កសាង និងអភិវឌ្ឍន៍ប្រទេសកម្ពុជា រួមចំណែកពង្រឹង និងពង្រីកទំនាក់ទំនងសហប្រតិបត្តិការមិត្តភាពយ៉ាងជិតស្និទ្ធជាមួយមិត្តជិតខាងកម្ពុជា។ លោកស្រី Nguyen Thi Hong ក៏បានថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាល និងធនាគារជាតិនៃកម្ពុជា ដែលបានទទួលស្គាល់ និងបំពាក់មេដាយ ប្រគល់ប័ណ្ណសរសើរជូនអតីតអ្នកជំនាញការធនាគារវៀតណាមផងដែរ៕
