សន្តិសុខប្រធានាធិបតី៖មូលហេតុមិនសហការចាប់ខ្លួនលោកយុន ព្រោះតែសុពលភាពនៃដីកាចាប់ខ្លួន ត្រូវ ការជជែកគ្នាសិន
25-April-2025 / ព័ត៌មានអន្តរជាតិ
កូរ៉េខាងត្បូង៖ ប្រធានសន្តិសុខរបស់លោកប្រធានាធិបតី យុន ស៊ុកយុល (Yoon Suk Yeol) កាលពីចុងសប្ដាហ៍កន្លងទៅ បាននិយាយថា លោកមិនអាចសហការជាមួយកិច្ចខិតខំប្រឹងប្រែងរបស់អាជ្ញាធរ ក្នុងការប៉ុនប៉ងចាប់ខ្លួនមេដឹកនាំរូបនេះបានឡើយ ។ហេតុផលនោះ គឺថា សកម្មភាពនេះ នឹងអាចរុញច្រានវិបត្តិនយោបាយ ឱ្យក្លាយទៅជាការប្រឈមមុខដាក់គ្នាកាន់តែខ្លាំងមួយកម្រិតទៀត ។
ដីកាសម្រាប់ចាប់ខ្លួនលោកយុន (Yoon) ដោយផ្អែកលើការចោទប្រកាន់ពីបទបះបោរនោះ បានផុតកំណត់នៅពាក់កណ្ដាលអធ្រាត្រថ្ងៃទី៦ ខែមករា ដោយប្រធានសន្តិសុខ លោក ផាក ចុងជុន (Park Chong-jun) បានលើកឡើងថា ដោយសារតែសុពលភាពនៃដីកាចាប់ខ្លួន កំពុងស្ថិតនៅក្រោមការជជែកវែកញែកផ្លូវច្បាប់ នោះហើយ គឺជាហេតុផលនៃកង្វះកិច្ចសហប្រតិបត្តិការចាប់ខ្លួននេះ ។
ការអត្ថាធិប្បាយរបស់ប្រធានសន្តិសុខ បានធ្វើឡើង បន្ទាប់ពីតុលាការក្រុងសេអ៊ូល បានច្រានចោលពាក្យបណ្តឹងរបស់មេធាវីលោកយុន (Yoon) ដែលអះអាងថាដីកាចាប់ខ្លួននេះ មិនត្រឹមត្រូវ និងខុសច្បាប់។ ខណៈនោះ អ្នកសារព័ត៌មាន បានព្យាយាមទូរសព្ទទាក់ទងទៅកាន់តុលាការ ដើម្បីសុំការអត្ថាធិប្បាយបន្ថែម ប៉ុន្តែមិនទាន់ទទួលបាននូវការឆ្លើយតបនោះទេ ។ក្រៅពីសន្តសុខមិនសហការកាលពីថ្ងៃអាទិត្យកន្លងទៅនេះ អ្នកគាំទ្រលោកយុន ប្រធានាធិបតីបញ្ឈរជើងរាប់ពាន់នាក់ បានមកជួបជុំគ្នានៅក្បែរវិមានប្រធានាធិបតីក្នុងទីក្រុងសេអ៊ូល ដើម្បីធ្វើការតវ៉ាប្រឆាំងនឹងការប៉ុនប៉ងចាប់ខ្លួនប្រមុខដឹកនាំដែលរងការចោទប្រកាន់ ផងដែរ។
ស្ថិតនៅលើដងផ្លូវ ក្នុងសង្កាត់ហានណាមដុង (Hannam-dong) ក្នុងទីក្រុងសេអ៊ូល មិនឆ្ងាយប៉ុន្មានពីវិមានប្រធានាធិបតីស្របពេលសីតុណ្ហភាពធ្លាក់ចុះក្រោម -៥អង្សា ជាមួយនឹងកំណកព្រិលទឹកកក ក្នុងកម្រាស់ជាង ៦ សង់ទីម៉ែត្រ អ្នកចូលរួមតវ៉ាភាគច្រើន បានឃ្លំខ្លួននៅក្នុងភួយ និងបន្តការតវ៉ាដោយបង្ហាញការគាំទ្ររបស់ពួកគេ ចំពោះលោកយុន ។
កាលពីរសៀលថ្ងៃសៅរ៍ ក្រុមបាតុករប្រឆាំងនឹងលោកយុន (Yoon) រាប់ពាន់នាក់ បានបង្ហាញវត្តមានតវ៉ា នៅពាសពេញផ្លូវ៨គន្លង ដែលបង្កឱ្យមានការរំខានយ៉ាងខ្លាំងដល់ចរាចរណ៍ទាំងសងខាងផ្លូវ ស្របពេលមន្ត្រីនគរបាល បានដាក់របាំងនៅខាងមុខក្រុមអ្នកប្រឆាំងលោកយុន ដើម្បីគ្រប់គ្រងស្ថានការណ៍។ ទន្ទឹមនឹងនោះ ក្រុមអ្នកគាំទ្រលោកយុន បានប្រមូលផ្ដុំគ្នានៅលើដងផ្លូវក្បែរៗនោះ ដើម្បីបង្ហាញពីប្រឆាំងរបស់ពួកគេ ចំពោះក្រុមប្រឆាំងនឹងលោកយុន ។
ក្នុងថ្ងៃតែមួយនោះ ក្រុមអ្នកស៊ើបអង្កេតកូរ៉េខាងត្បូង ជាថ្មីម្តងទៀត បានធ្វើការស្នើសុំទៅកាន់ប្រធានាធិបតីស្តីទីរបស់ប្រទេសនេះ ដើម្បីដាក់បញ្ជាឱ្យមន្ត្រីសន្តិសុខប្រធានាធិបតី គោរពតាមដីកាចាប់ខ្លួនចំពោះលោក យុន (Yoon) ដែលរងនូវការចោទប្រកាន់ពាក់ព័ន្ធនឹងការប្រកាសច្បាប់អាជ្ញាសឹក កាលពីខែមុន ។
ក្នុងពេលដំណាលគ្នានោះ ប្រធានសន្តិសុខរបស់លោកប្រធានាធិបតី យុន ស៊ុកយុល (Yoon Suk Yeol) កាលពីចុងសប្ដាហ៍កន្លងទៅ បាននិយាយថា លោកមិនអាចសហការជាមួយកិច្ចខិតខំប្រឹងប្រែងរបស់អាជ្ញាធរ ក្នុងការប៉ុនប៉ងចាប់ខ្លួនមេដឹកនាំរូបនេះបានឡើយ ។
ទាក់ទងនឹងរឿងនេះដែរលោក Han Duck-soo ប្រឈមការបោះឆ្នោតទម្លាក់ពីតួនាទីជាប្រមុខរដ្ឋស្តីទី ដោយសារតែលោករំលងការប្រកាសដាក់ឲ្យប្រើច្បាប់បង្កើត«ក្រុមស៊ើបអង្កេតពិសេស» ដែលស្នើបានឡើងដោយរដ្ឋសភាដែលគ្រប់ដណ្តប់ដោយគណបក្សប្រឆាំងយ៉ាងច្រើនលើសលប់កាលពីសប្តាហ៍មុនដើម្បីស៊ើបអង្កេតលើលោក Yoon Suk Yeol និងភរិយារបស់លោក។ក្រោយបរាជ័យក្នុងការបោះឆ្នោតទម្លាក់ ប្រធានាធិបតី Yoon Suk Yeol ពីអំណាចក្នុងជុំដំបូងកាលថ្ងៃទី៧ខែធ្នូ សភាជាតិកូរ៉េខាងត្បូងបានបោះឆ្នោតបង្កើតក្រុមស៊ើបអង្កេតពិសេសមួយដែលមានសិទ្ធិអំណាចពិនិត្យលើដំណើរការប្រកាសច្បាប់អាជ្ញាសឹកដែលប្រកាសយ៉ាងតក់ក្រហល់ដោយ ប្រធានាធិបតី Yoon Suk Yeol កាលថ្ងៃទី៣ខែធ្នូ។ទោះបីជាបែបណា ប្រធានាធិបតីស្តីទី លោក Han Duck-soo ដែលឡើងកាន់អំណាចបណ្តោះអាសន្នកាលថ្ងៃទី១៤ខែធ្នូ មិនបានគាំទ្រច្បាប់បង្កើតក្រុមស៊ើបអង្កេតពិសេសនោះទេ។
គណបក្សប្រជាធិបតេយ្យកូរ៉េខាងត្បូងដែលជាគណបក្សប្រឆាំងបាននិយាយនៅថ្ងៃអង្គារនេះថា ខ្លួននឹងជំរុញដំណើរការចោទប្រកាន់ព្យួរដំណែងប្រធានាធិបតីស្តីទី Han Duck-soo ដោយសារតែការបង្ហាញពីការបដិសេធចំពោះការទាមទាររបស់គណបក្សប្រឆាំងក្នុងប្រកាសឲ្យប្រើច្បាប់បង្កើតក្រុមស៊ើបអង្កេត ដែលសំដៅលើប្រធានាធិបតី Yoon Suk Yeol និងស្ត្រីទីមួយ ហើយអំពាវនាវឱ្យមានសភា«ការសម្របសម្រួល» លើបញ្ហាបច្ចុប្បន្ន។
គណបក្សប្រឆាំងដ៏សំខាន់បាននឹងកំពុងអំពាវនាវឱ្យមានច្បាប់ដែលនឹងអនុញ្ញាតឱ្យមានការស៊ើបអង្កេតពីក្រុមស៊ើបអង្កេតពិសេសលើការចោទប្រកាន់ពី«ការបះបោរ និងការចោទប្រកាន់អំពើពុករលួយ» ពាក់ព័ន្ធនឹងប្រធានាធិបតី Yoon Suk Yeol និងស្ត្រីទីមួយ Kim Keon-hee ក្នុងអំឡុងពេលកាន់អំណាចអស់រយៈពេលជាង២ឆ្នាំ។ លោក Yoon បានស្ថិតនៅក្រោមការស៊ើបអង្កេតព្រហ្មទណ្ឌចំពោះ «ការបះបោរ និងការរំលោភបំពានអំណាច» ទាក់ទងនឹងការបញ្ជារបស់គាត់ក្នុងអំឡុងពេលនៃការដាក់ច្បាប់អាជ្ញាសឹកថ្ងៃទីកាលថ្ងៃទី៣ខែធ្នូរបស់គាត់។
សេចក្តីរាយការណ៍របស់ Korea Herald បានឲ្យដឹងថា កិច្ចប្រជុំគណៈរដ្ឋមន្ត្រីរបស់ប្រធានាធិបតីស្តីទី Han Duck-soo នៅថ្ងៃអង្គារនេះបានរំលងការពិនិត្យឡើងវិញលើអត្ថបទច្បាប់នោះទាំងស្រុង ខណៈដែលប្រធានាធិបតីស្តីទីបានអំពាវនាវឱ្យមាន «វិធានការសម្របសម្រួល» ពីគណបក្សកាន់អំណាច និងគណបក្សប្រឆាំងជុំវិញបញ្ហានៃសេចក្តីព្រាងច្បាប់ និងការតែងតាំងចៅក្រមតុលាការធម្មនុញ្ញថ្មី។
លោកយុន (Yoon) ក្លាយជាប្រធានាធិបតីកូរ៉េខាងត្បូងដំបូងគេអំឡុងកំពុងកាន់អំណាច ដែលប្រឈមមុខនឹងដីកាចាប់ខ្លួន ក្រោមបទចោទប្រកាន់ពាក់ព័ន្ធនឹងការប៉ុនប៉ងដ៏អាក្រក់ក្នុងការដាក់ប្រទេសទៅក្នុងច្បាប់អាជ្ញាសឹក កាលពីថ្ងៃទី៣ ខែធ្នូ (ឆ្នាំ ២០២៤) រហូតបង្កឱ្យមានភាពវឹកវរផ្នែកនយោបាយ នៅក្នុងប្រទេសដែលមានសេដ្ឋកិច្ចធំបំផុតទី៤ ក្នុងតំបន់អាស៊ី និងជាសម្ព័ន្ធមិត្តដ៏ជិតស្និទ្ធរបស់សហរដ្ឋអាម៉េរិក ៕ប្រភព៖ Reuters
