វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 783 នាក់
ម្សិលមិញ 5168 នាក់
សរុប 16012917 នាក់
ដាណឺម៉ាក៖ កាលពីថ្ងៃចន្ទ ទី១៣ ខែមករា មេដឹកនាំតំបន់ស្វយ័ត Greenland លោកមូត អ៊ីហ្គេដ (Mute Egede) បានបង្ហាញជំហរត្រៀមសហការជាមួយសហរដ្ឋអាម៉េរិក លើវិស័យការពារជាតិនិងការរុករករ៉ែ ប៉ុន្តែត្រូវស្ថិតក្រោមលក្ខខណ្ឌជាតម្រូវការរបស់ពលរដ្ឋក្នុងតំបន់ ។ការឆ្លើយតបនេះបន្ទាប់ពីប្រធានាធិបតីទើបជាប់ឆ្នោតរបស់អាម៉េរិក លោកដូណាល់ត្រាំ កាលពីសប្តាហ៍មុនបានបង្ហាញចំណាប់អារម្មណ៍ចង់ដាក់បញ្ចូលតំបន់ Greenland ធើ្វជាទឹកដីរបស់សហរដ្ឋអាម៉េរិកតាមរយៈទិញឬប្រើកម្លាំង។
លោកដូណាល់ត្រាំ បានបង្ហាញផែនការចង់ទិញយកតំបន់ Greenland ដោយបានចាត់ទុកការគ្រប់គ្រងតំបន់ស្វយ័តមួយនេះថា ជារឿងដ៏សំខាន់សម្រាប់អនាគតសន្តិសុខជាតិរបស់អាម៉េរិក និងឱកាសសក្ដានុពលសេដ្ឋកិច្ច ដែលនឹងទទួលបានពីកំណប់ធនធានរ៉ែយ៉ាងច្រើនសន្ធឹកសន្ធាប់ ដើម្បីធានាការប្រកួតប្រជែងរបស់អាម៉េរិកជាមួយប្រទេសមហាអំណាចដទៃ។
ជុំវិញនឹងរឿងនេះ មេដឹកនាំតំបន់ Greenland លោកមូត អ៊ីហ្គេដ បាននិយាយថា រដ្ឋបាលរបស់លោក កំពុងរកមធ្យោបាយបង្កើតកិច្ចសហប្រតិបត្តិការជាមួយសហរដ្ឋអាម៉េរិក និងត្រៀមខ្លួនជាស្រេចក្នុងការចាប់ផ្តើមកិច្ចសន្ទនាជាមួយរដ្ឋាភិបាលថ្មីរបស់លោកដូណាល់ត្រាំ ដែលគ្រោងបង្កើតឡើងជាផ្លូវការនៅថ្ងៃទី ២០ ខែមករាខាងមុខ។ ទោះជាយ៉ាងណាក្តី លោកបានសង្កត់ធ្ងន់ថា រាល់លក្ខខណ្ឌកិច្ចសហប្រតិបត្តិការនានាជាមួយអាម៉េរិក នឹងធើ្វឡើងស្របទៅតាមការឯកភាពគ្នារបស់អាជ្ញាធរ Greenland ដើម្បីធានាដល់ការបម្រើផលប្រយោជន៍របស់ពលរដ្ឋជាម្ចាស់ស្រុក។
នៅពេលអ្នកកាសែតសួរនាំអំពីផែនការបង្កើនវត្តមានយោធាអាម៉េរិកនៅតំបន់ Greenland របស់លោកដូណាល់ត្រាំ លោកអ៊ីហ្គេដ បានបញ្ជាក់ថា "ឯករាជ្យភាពរបស់ Greenland គឺជាកម្មសិទ្ធិផ្ដាច់មុខរបស់ពលរដ្ឋ Greenland ដូច្នេះមានតែរដ្ឋបាល Greenland ប៉ុណ្ណោះ ដែលអាចធើ្វការសម្រេចចិត្តចំពោះការព្រមព្រៀងនានាជាមួយសហរដ្ឋអាម៉េរិក"។
ពាក់ព័ន្ធនឹងសារព្រមានរបស់លោកដូណាល់ត្រាំ ចំពោះលទ្ធភាពរបស់រដ្ឋាភិបាលអាម៉េរិក ក្នុងការប្រើប្រាស់វិធីសាស្ត្រយោធា និងការគាបសង្កត់ផ្នែកសេដ្ឋកិច្ច ដើម្បីដាក់សម្ពាធឱ្យរដ្ឋបាល Greenland បោះបង់ការគ្រប់គ្រងមកឱ្យសហរដ្ឋអាម៉េរិកនោះ ត្រូវលោកអ៊ីហ្គេដ និយាយថា អ្នកនយោបាយ Greenland ពិតជាមានការភ្ញាក់ផ្អើលខ្លាំង នៅពេលដែលបានលឺព័ត៌មានមួយនេះ ប៉ុន្តែនៅថ្ងៃចន្ទម្សិលមិញ អនាគតអនុប្រធានាធិបតីអាម៉េរិក លោកជេឌី វែនស៍ (JD Vance) បានបញ្ជាក់ថា អាម៉េរិកគ្មានចំណាប់អារម្មណ៍ប្រើប្រាស់ធម្យោបាយយោធានោះឡើយ ហើយអ្វីដែលលោកចង់ឃើញនោះ គឺការបង្កើនសហប្រតិបត្តិរវាងអាម៉េរិកនិង Greenland ៕ប្រភព៖ Reuters Connect