ដីព្រៃនៅលើភ្នំដងរែក ជាច្រើនហិកតា អតីតជាជម្រកកងទ័ព ត្រូវបានគេរៀបចំឯកសារអោយក្លាយទៅជាដីមានប្លង់កម្មសិទ្ធិស្របច្បាប់របស់បុគ្គលមានលុយមានអំណាចមួយចំនួនយ៉ាងរំភើយ ?!
21-September-2026 / ព័ត៌មានជាតិ
ខេត្តឧត្ដរមានជ័យ៖ ថ្មីៗកន្លងមកនេះ ប្រជាពលរដ្ឋរស់នៅស្រុកអងន្លង់វែង បានផ្តល់ព័ត៌មាននិងឯកសារពាក់ព័ន្ធរឿងដីធ្លីនៅតំបន់ព្រៃឈើលើភ្នំដងរែកជាច្រើនហិចតា ជាប់ព្រំដែនកម្ពុជា-ថៃ ស្ថិតនៅចំណុចអូរថ្ម ភូមិជាំ ឃុំត្រពាំងប្រិយ៍ ស្រុកអន្លង់វែងខេត្ត ឧត្ដរមានជ័យ មានចំងាយប្រហែលជា៣គីឡូម៉ែត្រពីច្រកជាំស្រងាំមក ឥលូវកុំពុងតែប្រែក្លាយទៅជាដី ដែលមានប្លង់រឹងកម្មសិទ្ធិស្របច្បាប់របស់បុគ្គលមានលុយ មានអំណាចមួយចំនួនអស់ ហើយ ។
ប្រភពបានបន្តថា:បច្ចុប្បន្ននេះ មានគ្រឿងចក្ររាប់សិបគ្រឿងកុំពុងធ្វើសកម្មភាព ឈូសឆាយដីព្រៃឈើ ដឹកអាចម៌ដី កាយថ្មភ្នំ និងបុកគ្រឹះសាង សង់សំណង់អាគារយ៉ាងខ្ពស់ៗគគ្រឹកគគ្រេង ដោយគ្មានអាជ្ញាធរដែនដី និងសមត្ថកិច្ចមូលដ្ឋានណាម្នាក់ មកហាមឃាត់ទេ ។ ប្រភពបានបន្តថា: ដីនៅចំណុចខាងលើនេះ គឺជាដីព្រៃឈើរបស់រដ្ឋ អតីតជាជម្រកសម្រាប់កងទ័ពចូលលាក់ខ្លួន ចល័ត ធ្វើសកម្មភាពប្រយុទ្ធនៅពេលមានស្ថានការណ៍ តឹងតែងកើតឡើង រវាងយោធាខ្មែរ-ថៃនៅតាមខ្សែបន្ទាត់ព្រំដែន ។ ឥលូវបានប្រែក្លាយទៅជាដីមានប្លង់កម្មសិទ្ធិរបស់បុគ្គលមានអំណាច មានលុយមួយ ចំនួនស្ទើរអស់ទៅហើយ ។
ប្រជាពលរដ្ឋរស់នៅក្បែរតំបន់នោះជាច្រើនឆ្នាំ បានប្រាប់ថា : អគារកំពុងសាងសង់នេះ គឺជា អគារបស់ជនជាតិចិន ហើយកន្លងមក មានមេទាហ៊ានម្នាក់ឈ្មោះ ម៉ៅ បានដើរទិញដីឡូតិ៍ ក្នុងមួយឡូតិ៍តំលៃ ចាប់ពី ១០០០$ ទៅ១៥០០$ រីឯចំណែកដីព្រៃឈើជាប់គ្នានេះ គឺជាដីរបស់មេៗទាហ៊ានដែលបានលក់ឲ្យ ។ ពលរដ្ឋបានបន្តថាពួកគាត់រស់នៅក្បែនោះពុំទាន់មានប្លង់ដីស្របច្បាប់នៅឡើយទេ ? ហេតុអ្វីបានជាដីដែលកំពុងសាងសង់អគារនេះបែរជាមានប្លង់រឹងអស់ហើយទៅវិញ ? ។ មន្ត្រីរាជការនៅសាលាស្រុកអន្លង់វែងថ្នាក់ទៀបម្នាក់ (សុំមិនបញ្ចេញឈ្មោះ ) បានលួចបង្ហើបប្រាប់ថា : ការសាងសង់សំណង់អគារនេះ គឺជាគំរោងមានអាជ្ញាប័ន មានប្លង់កម្មសិទ្ធិ មានលិខិតអនុញ្ញាត និងឯក សារពាក់ព័ន្ធផ្សេងៗ ធ្លាក់មកពីលើមេឃមក គ្មានពីណាហ៊ានប៉ះពាល់នោះទេ ជារបស់ព្រះឥន្ទមើលឯកសារបាន តែគ្មានសិទ្ធសួរនាំនោះឡើយ ។
ប្រភពបានបន្តថា : កន្លងមកកាលពីមានព្រឹត្តិការណ៍ជម្លោះ រវាងយោធាខ្មែរ-ថៃតាមព្រំដែន ដីព្រៃឈើនៅលើភ្នំដងរែក ក្បែរច្រកអន្តរជាតិជាំជាកន្លែងសម្រាប់ឈរជើង និងចល័តកងទ័ព ចូលសមរភូមិប្រយុទ្ធ ។ ប៉ុន្តក្រោយពីស្ងាត់ព្រឹត្តិការណ៍រឿងប្រាសាទព្រះវិហារមក ហើយបានដកកងទ័ពចេញវិញ ពេល នោះហាងឆេងដី ក៏បានហក់ឡើងថ្លៃខ្ពស់កប់ពពក បណ្តាល អោយដីព្រៃឈើទាំងនោះ ត្រូវបានគេកាប់រានទន្ទ្រានវាតទីយកធ្វើជាដីកម្មសិទ្ធិយ៉ាងអនាធិប តេយ្យ ប្រែក្លាយទៅជាដីវាល លែងមានព្រៃឈើ មកដល់សព្វថ្ងៃនេះក្លាយជាដីពុះឡូតិ៍ អស់ហើយ ព្រោះនៅជាប់ច្រកអន្តរជាតិជាំស្រងាំ ក្នុងទឹកដីស្រុកអន្លង់វែង ខេត្តឧត្ដរ មាន ជ័យ មានជនជាតិចិនរាប់សិបនាក់បានសម្រុកមកជួលផ្ទះស្នាក់នៅ ដើម្បីលេងល្បែងអនឡាញក្នុងកាសុីណូ ។
ជាក់ស្តែងគេសង្កេត ឃើញមានគ្រឿងចក្រជាច្រើនគ្រឿងរបស់បុគ្គលមាន អំណាច មានលុយមួយចំនួនបាននឹងកំពុងសម្រុកកាយដឹកដីភ្នំ យកមកលក់ឲ្យតាមដីឡូតិ៍ ដោយមិនខ្វល់អំពីការហិនហោចរលាយសម្បត្តិធម្មជាតិអ្វីទេ ។ ម្ចាស់ផ្ទះនីមួយៗដែលបានដាក់ជួលផ្ទះពេលនេះកុំពុងត្រូវប៉ាន់ខ្លាំងណាស់ ហើយបានសម្រុកសាងសង់បន្ទប់បន្តែម ជាបន្ត បន្ទាប់ដើម្បីជួលឲ្យជនជាតិចិនស្នាក់នៅ ។ ខ្លះទៀតរកផ្ទះជួលមិនបាននៅលើភ្នំ បានមកជួលនៅខាងក្រោមជើងភ្នំ ជាផ្ទះរបស់មន្ត្រីដែលមានអំណាចនៅក្នុងទីរួមស្រុកអន្លង់ ដើម្បីស្នាក់នៅលេងអនឡាញ ក្នុងកាសុីណូព្រោះជាជម្រក ដ៏សុខសាន្តសម្រាប់ពួកគេ ។
បើផ្អែកតាម ប្រភពព័ត៌មាន និងឯកសារពាក់ព័ន្ធផ្សេងៗ ជាពិសេសលិខិត អនុញ្ញាតសាងសង់ របស់ក្រសួងរៀបចំដែនដី នគរូបនីយកម្មនិងសំណង់ លេខ: ៤០៤ ដនដ/អសណចុះថ្ងៃទី១៩ ខែធ្នូ ឆ្នាំ ២០២៤ចុះហត្ថលេខាជំនួសរដ្ឋមន្ត្រី ដោយលោក ទេព ធន រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ព្រមទាំងឃ្លីប Videos ស្តីពីសកម្មភាពគ្រឿងចក្រ ជា ច្រើនគ្រឿងឈូសឆាយដីព្រៃ បុកគ្រឹះសាងសង់អាគាររាប់សិបជាន់នៅលើខ្នងភ្នំដងរែកនេះ គឺ ពិតជាមានការរៀបចំ មានលក្ខណ:ជាប្រព័ន្ធយ៉ាងល្អិត ល្អន់ម៉ត់ចត់ខ្លាំងណាស់ ទើបអាចដំណើរការបានដោយរលូនបែបនេះ គ្មានថ្នាក់ដឹកនាំខេត្តឧត្តរមានជ័យណាម្នាក់ហ៊ានក្អក រារាំង ឬបញ្ឈប់សកម្មភាព បានទេ ។ នេះជាព័ត៌មានបឋម វគ្គក្រោយ សារព័ត៌មានគេហទំព័រ មាតុភូមិ www.meatophoum.com នឹងផ្សាយបន្តភាគ លំអិតសេចរឿង ព្រមទាំងបញ្ចេញឯកសារពាក់ព័ន្ធទាំងអស់អោយសាធារណជនបានឃើញ ថា:តើមានមន្ត្រីថ្នាក់ដឹកនាំស្ថាប័នណាខ្លះ ថ្នាក់ដឹកនាំខេត្តឧត្តរមានជ័យណាខ្លះពាក់ព័ន្ធលើការចុះហត្ថលេខាផ្តល់សិទ្ធិ អនុញ្ញាតអោយគេសាងសង់សំណង់អាគារលើដីភ្នំដងរែកយ៉ាងគគ្រឹកគគ្រេងបែបនេះ ? ៕ ការិយាល័យ និពន្ធ ទំនាក់ទំនងតាម Tel: 012 953 824 / 088 55 34 100 / 016 953 222
រាយការព័ត៌មាន ដោយលោក ទឺ ពិទូ
