ចិនកាន់សញ្ជាតិខ្មែរពីរនាក់ដែលតុលារការសឹង្ហបុរីកាត់ទោសជាប់គុករឿងលាងលុយត្រុវបានបញ្ជូនមកស្រុកខ្មែរវិញហើយ!
21-September-2026 / ព័ត៌មានជាតិ
ភ្នំពេញ៖ សារព័ត៌មានសិង្ហបុរី The Straits Times បានផ្សាយឲ្យដឹងថា បុរសពីរនាក់ឈ្មោះស៊ូវ៉េនគៀង( Su Wenqiang) និងវ៉ាងបាវសឺន( Wang Baosen) ដែលកាន់កាន់លិខិតឆ្លងដែនកម្ពុជា ត្រូវបានតុលាការកាត់ទោសក្នុងសំណុំរឿងលាងលុយកខ្វក់ដ៏ធំបំផុតរបស់ប្រទេសសិង្ហបុរី ហើយត្រូវបាននិរទេសមកកម្ពុជាកាលពីថ្ងៃទី ៦ ខែឧសភាកន្លងទៅ។
អ្នកទាំងពីរមានអាយុ ៣២ ឆ្នាំដូចគ្នា ជាក្រុមតែមួយក្នុងចំណោមក្រុមជនបរទេសចំនួន ១០ នាក់ដែលត្រូវបានចាប់ខ្លួនក្នុងខែសីហា ឆ្នាំ ២០២៣ ពាក់ព័ន្ធនឹងការស៊ើបអង្កេតការលាងលុយកខ្វក់ជាសាច់ប្រាក់ និងទ្រព្យសម្បត្តិជាង ៣ ពាន់លានដុល្លារ។កាសែតសិង្ហបុរី ឲ្យដឹងថា លោកវ៉េនកៀង( Wenqiang) បានទទួលការកាត់ទោសឱ្យជាប់ពន្ធនាគាររយៈពេល ១៣ ខែនៅថ្ងៃទី ២ ខែមេសា ចំពោះការចោទប្រកាន់ពីបទលាងលុយកខ្វក់ដោយទទួលស្គាល់ថាមានសាច់ប្រាក់ជាង ៦០ ម៉ឺនដុល្លារពីការលេងល្បែងអនឡាញខុសច្បាប់ និងប្រើប្រាស់ប្រាក់ចំនួន ៥០ម៉ឺនដុល្លារដើម្បីទិញរថយន្ត។
លោក Baosen ដែលមិនត្រឹមតែកាន់លិខិតឆ្លងដែនកម្ពុជាប៉ុណ្ណោះទេ ថែមទាំងកាន់លិខិតឆ្លងដែនជនជាតិចិន និងវ៉ានូអាទូ បានទទួលការកាត់ទោសដូចគ្នាកាលពីថ្ងៃទី ១៦ ខែមេសា សម្រាប់ការចោទប្រកាន់ស្រដៀងគ្នា រួមទាំងការកុហកអំពីប្រភពនៃមូលនិធិ និងស្ថានភាពការងាររបស់លោកនៅក្នុងប្រទេសសិង្ហបុរី។
លោក ទូច សុឃៈ (សុខៈ) អ្នកនាំពាក្យរងនៃក្រសួងមហាផ្ទៃ បានថ្លែងថា ជាគោលការណ៍ច្បាប់ មិនថា បុគ្គលនោះមានសញ្ជាតិអ្វី សញ្ជាតិដើមក្ដី ឬសញ្ជាតិតូបនីយកម្មក្ដី ការណាប្រព្រឹត្ដិបទល្មើស ដែលមានចែងព្រហ្មទណ្ឌនៅក្នុងប្រទេសសាម៉ីក្ដី ឬនៅបរទេសក្ដី គឺត្រូវទទួលខុសត្រូវចំពោះបទល្មើសរបស់ប្រទេសនោះ ដែលបានបញ្ញត្ដិនៅក្នុងច្បាប់របស់ខ្លួន។
លោកបានប្រាប់ភ្នំពេញប៉ុស្ដិ៍ថា៖ «ពួកគេត្រូវទទួលទោសដូចគ្នាទៅតាមសេចក្ដីសម្រេចរបស់តុលាការ។ យើងមិនមានការការពារហួសហេតុណាមួយឱ្យវាខុសទៅនឹងច្បាប់ជាតិ និងច្បាប់អន្ដរជាតិនោះឡើយ។ យើងជាប្រទេសមួយកំពុងតែដំណើរការនីតិរដ្ឋ។ ដូច្នេះ យើងត្រូវតែចូលរួមគោរពនូវច្បាប់ក្នុងស្រុក និងច្បាប់បណ្ដាប្រទេសជាមិត្ដដទៃទៀត»។
លោក ពេជ្រ ពិសី មកពីអង្គការតម្លាភាពកម្ពុជា សម្តែងការព្រួយបារម្ភថា ករណីលាងលុយកខ្វក់នៅប្រទេសសិង្ហបុរី ពាក់ព័ន្ធនឹងពលរដ្ឋកម្ពុជា អាចជះឥទ្ធិពលអវិជ្ជមានដល់កេរ្តិ៍ឈ្មោះនៅលើឆាកអន្តរជាតិរបស់កម្ពុជា និងដំណើរការផ្តល់សញ្ជាតិ។លោកបានប្រាប់ភ្នំពេញប៉ុស្តិ៍កាលពីខែសីហា ឆ្នាំ ២០២៣ នៅពេលដែលជនសង្ស័យត្រូវបានចាប់ខ្លួនថា កម្ពុជាត្រូវប្រកាន់ខ្ជាប់ផ្នែកច្បាប់ តម្លាភាព និងសុចរិតភាពក្នុងដំណើរការផ្ដល់សញ្ជាតិ ដើម្បីទប់ស្កាត់ការរំលោភបំពានពីសំណាក់ឧក្រិដ្ឋជនបរទេស។លោក ពិសី បានឱ្យដឹងថា៖ «មេរៀនមួយដែលអាចរៀនបានពីករណីនេះ គឺយើងត្រូវគោរពច្បាប់នៅពេលចេញសញ្ជាតិឲ្យបរទេសប្រកបដោយតម្លាភាព និងសុចរិតភាព»។
ពាក់ព័ន្ធការប្រព្រឹត្ដិបទល្មើសរបស់ប្រជាពលរដ្ឋខ្មែរដើមកំណើតបរទេសនេះ លោក សុខៈ បានលើកឡើងថា គ្រប់ជនទាំងអស់ដែលត្រូវបានផ្ដល់សញ្ជាតិត្រូវគោរពតាមល័ក្ខខណ្ឌដែលមានចែងនៅក្នុងច្បាប់ស្ដីពីសញ្ជាតិ ហើយស្ថាប័នជាអ្នកមានសិទ្ធិរៀបចំនីតិវិធីក្នុងការស្នើសុំសញ្ជាតិរហូតដល់ព្រះមហាក្សត្រនេះ បានបំពេញ និងអនុវត្ដទៅតាមច្បាប់ដែលបានកំណត់ទាំងអស់។
លោកបន្ថែមថា៖ «យើងមិនអាចនិយាយបានថា ផ្ដល់សញ្ជាតិទៅឱ្យបុគ្គល ក វាមិនវិនិច្ឆ័យទៅបុគ្គលនោះជាមនុស្សល្អ មិនប្រព្រឹត្ដិអ្វីដែលខុសឆ្គងទាំងក្នុងស្រុក និងក្រៅស្រុកនោះទេ ពីព្រោះវាជាការប្រែប្រួលរបស់មនុស្សទៅតាមស្ថានភាព ទៅតាមស្ថានការណ៍»។
លោកបានបញ្ជាក់ថា៖ «វាមិនមែនតែបុគ្គលទទួលសញ្ញាតិតូបនីយកម្មពីរដ្ឋណាមួយនោះទេ ដែលក្រោយមកទៅប្រព្រឹត្ដិបទល្មើស សូម្បីតែប្រជាពលរដ្ឋដែលមានសញ្ជាតិដើមពីកំណើតរបស់ខ្លួនក៏នៅតែមានប្រព្រឹត្ដិបទល្មើស។ ខ្ញុំចង់បញ្ជាក់ថា មុននឹងឱ្យសញ្ជាតិទៅជនបរទេសណាមួយ ត្រូវតែធ្វើឱ្យប្រាកដថា បុគ្គលនោះនឹងមិនប្រព្រឹត្ដិបទល្មើសទេ»។ លោក សុខៈ បានឱ្យដឹងថា ចំពោះលទ្ធភាពដកសញ្ជាតិ ឬមិនដកសញ្ជាតិ វាទាមទារឱ្យមានការពិនិត្យត្រឹមត្រូវ និងច្បាស់លាស់ ដែលមានទឡ្ហីករណ៍ និងត្រូវសិក្សាឱ្យស៊ីជម្រៅទៅលើទិដ្ឋភាពច្បាប់ដែលពាក់ព័ន្ធ និងធរមាន។
លោក Baosen ត្រូវបានគេរកឃើញថាបានបញ្ជូនកិច្ចព្រមព្រៀងប្រាក់កម្ចីក្លែងក្លាយទៅក្រុមហ៊ុន HSBC Holdings plc ក្នុងតម្លៃ ៦០ម៉ឺនដុល្លារ ហើយទឹកប្រាក់គ្មានប្រភពច្បាស់លាស់ ជាង ១.៤លានដុល្លារ ត្រូវបានប្រើសម្រាប់ការទិញខុនដូប្រណីតនៅ Orchard ក្នុងខែមីនា ឆ្នាំ ២០២២។យោងតាមច្បាប់ប្រទេសសិង្ហបុរី ទាំងលោក Su Wenqiang និងលោក Wang Baosen នឹងមិនអនុញ្ញាតឱ្យត្រឡប់ទៅសិង្ហបុរីវិញទេ៕
