ទេសរដ្ឋមន្ដ្រី ឱម យ៉ិនទៀង៖ ACU មានសិទ្ធិមិនឆ្លើយតបថា «គួរស៉ើបអង្កេត ឬមិនស៉ើបអង្កេតលើករណីណាមួយ»
08-July-2026 / ព័ត៌មានជាតិ
ភ្នំពេញ៖ លោកកិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្ដ្រីទទួលបន្ទុកបេសកកម្មពិសេស និងជាប្រធានអង្គភាពប្រឆាំងអំពើពុករលួយ (ACU) បានលើកឡើងថា អង្គភាពប្រឆាំងអំពើពុករលួយ មានសិទ្ធិមិនឆ្លើយតបចំពោះការចោទសួរថា «តើ ACU គួរស៉ើបអង្កេត ឬមិនស៉ើបអង្កេតលើករណីណាមួយ» ពិសេសនៅពេលមានផ្សាយតាមបណ្ដាញសង្គម ព្រោះការឆ្លើយតបបែបនេះ ធ្វើឲ្យប៉ះពាល់កិត្តិយសបុគ្គល និងការងារជំនាញ។
លោកកិត្តិនីតិកោសលបណ្ឌិត ឱម យ៉ិនទៀង lលើកបញ្ហានេះជាមួយអ្នកកាសែតនៅក្នុងឱកាសអញ្ជើញជាសហធិបតីជាមួយនាយឧត្តមសេនីយ៍ ស ថេត អគ្គស្នងការនគរបាលជាតិ ក្នុងពិធីផ្សព្វផ្សាយច្បាប់ស្ដីពីការប្រឆាំងអំពើពុករលួយ ដល់មន្ដ្រីនគរបាលជាតិ នៅព្រឹកថ្ងៃទី២៦ ខែធ្នូ ឆ្នាំ២០២៤ដែលមានសមាស ភាពចូលរួមចាប់ពីថ្នាក់ដឹកនាំអគ្គស្នងការដ្ឋាននគរបាលជាតិ ស្នងការដ្ឋាននគរបាលរាជធានី ខេត្ត រហូតដល់អធិការដ្ឋាននគរបាលក្រុង ស្រុក ខណ្ឌ ដែលមានចំនួនសរុបចំនួន៥៩៧រូប។ ទេសរដ្ឋមន្ដ្រី ឱម យ៉ិនទៀង បានអះអាងថា បើទោះបីអង្គភាពប្រឆាំងអំពើពុករលួយ កំពុងធ្វើការស៉ើបអង្កេតក៏ដោយ គឺមិនអាចបញ្ជាក់ប្រាប់បានឡើយ ព្រោះខុសគោលការណ៍ច្បាប់កំណត់។
លោកទេសរដ្ឋមន្ដ្រី ឱម យ៉ិនទៀង មានប្រសាសន៍ថាយើងខ្ញុំមិនអាចអត្ថាធិប្បាយបានទេ ទើបបីយើងកំពុងស៉ើបអង្កេតហើយក៏ដោយ ព្រោះខុសគោលការណ៍ច្បាប់»។ទេសរដ្ឋមន្ដ្រី ឱម យ៉ិនទៀង បានពន្យល់ទៀតថា សមិទ្ធផលសំខាន់របស់អង្គភាពប្រឆាំងអំពើពុករលួយ មិនជាការចាប់ឃាត់ខ្លួនអ្នកប្រព្រឹត្តបញ្ជូនទៅកាន់តុលាការតែមួយមុខនោះទេ ពោលសមិទ្ធធំៗរបស់អង្គភាពប្រឆាំងអំពើពុករលួយ មានបីសំខាន់ៗ រួមមាន៖ ទី១៖ ការផ្សព្វផ្សាយអប់រំ, ទី២៖ ការបង្ការ ទប់ស្កាត់ និងទី៣៖ ការបង្ក្រាប ហើយបញ្ជូនសំណុំរឿងទៅកាន់ស្ថាប័នតុលាការ ដើម្បីធ្វើឲ្យរៀងចាល។
លោកទេសរដ្ឋមន្ត្រីប្រធានអង្គភាពប្រឆាំងអំពើពុករលួយ ក៏បានផ្ដាំផ្ញើទៅកាន់មន្ដ្រីរាជការសាធារណៈទាំងអស់ ក្នុងនោះមានទាំងមន្ដ្រីនគរបាលជាតិផងដែរ ត្រូវតែគ្នាជាមួយរាជរដ្ឋាភិបាលកម្ពុជា ដើម្បីចូលរួមប្រយុទ្ធប្រឆាំងអំពើពុករលួយ។នាយឧត្តមសេនីយ៍ ស ថេត ក៏បានគូសបញ្ជាក់ដែរថា ការរៀបចំពិធីដ៏មានសារៈសំខាន់ថ្ងៃនេះ ជាសក្ខីភាពឆ្លុះបញ្ចាំងឲ្យឃើញថា អគ្គស្នងការដ្ឋាននគរបាលជាតិ បានយកចិត្តទុកដាក់ខ្ពស់ក្នុងការចូលរួមអនុវត្ត ចំណុចស្នូល និងមុំទី៣នៃយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល ដែលបានផ្ដោតសំខាន់លើការកែទម្រង់ និងការពង្រឹងអភិបាលកិច្ច ព្រមទាំងធ្វើទំនើបកម្ម រដ្ឋបាលសាធារណៈឲ្យមានសមត្ថភាពខ្ពស់ ខ្លាំង ឆ្លាតវៃ និងស្អាតស្អំ ដើម្បីបម្រើផល ប្រយោជន៍ជូនប្រទេសជាតិ និងប្រជាប្រជាពលរដ្ឋ។
សូមបញ្ជាក់ថាកាលពីថ្ងៃទី២២ ធ្នូ អតីតអ្នកឧកញ៉ាហេង សិទ្ធី ប្រធានក្រុមហ៊ុនម៉ារីថាមគ្រុបបានរាយការណ៍ និងប្តឹងឱ្យលោកទេសរដ្ឋមន្ត្រីឱម យ៉ិនទៀង ប្រធានអង្គភាពប្រឆាំងអំពើពុករលួយឲ្យបើកការស៊ើបអង្កេតជាបន្ទាន់លើលោកគួច ចំរើន អតីតអភិបាលខេត្តព្រះសីហនុ និងដែលបច្ចុប្បន្នជាអភិបាលខេត្តកណ្តាលពីបទប្រព្រឹត្តិអំពើពុករលួយក្នុងពេលបំពេញការងារ។ លោកហេង សិទ្ធីក៏បានទាមទារឱ្យអង្គភាពប្រឆាំងអំពើពុករលួយលាតត្រដាងទ្រព្យសម្បតិ្តទាំងអស់របស់លោកគួច ចំរើនជាសាធារណៈ។ តាមលោកហេង សិទ្ធី លោកគួច ចំរើនទទួលបានលុយដល់ទៅរាប់លានដុល្លារឯណោះពីការប្រព្រឹត្តិអំពើពុករលួយតាមរយៈចេញមុខការពារ។
ក្នុងសំណេរបង្ហោះក្នុងទំព័រហ្វេសប៊ុកជាភាសាខ្មែរ អង់គ្លេស និងចិន អតីតអ្នកឧកញ៉ាហេង សិទ្ធីបានចោទលោកគួច ចំរើនពីបទបានទទួលលុយក្រោមតុរាប់លានដុល្លារពីឧក្រិដ្ឋជនបោកប្រាស់តាមអ៊ីនធ័រនែត និងឧក្រិដ្ឋជនលាងលុយកខ្វក់ជាថ្នូរនឹងការការពារឧក្រិដ្ឋជនទាំងនោះពីសំណាញ់ច្បាប់ និងថា លុយពុករលួយរាប់លានដុល្លារនោះត្រូវបានឧក្រិដ្ឋជនបង់ឱ្យលោកគួច ចំរើនជាសាច់ប្រាក់សុទ្ធ និងជារូបិយប័ណ្ណឌីជីថល។ សម្រាប់លោកហេង សិទ្ធី អង្គភាពប្រឆាំងអំពើពុករលួយត្រូវចាត់វិធានការបន្ទាន់ កុំបង្អង់យូរ និងថា មានជនជាតិចិន ឬខ្មែរដែលរងគ្រោះក្នុងរឿងនេះសុខចិត្តចេញមុខធ្វើជាសាក្សីចំពោះទង្វើរបស់លោកគួច ចំរើន។
ការចោទប្រកាន់របស់លោកហេង សិទ្ធីទាំងនេះត្រូវបានលោកគួច ចំរើនច្រានចោលក្នុងថ្ងៃទី២២ ធ្នូដោយចាត់ទុកជាការនិយាយបំភ្លើសការពិត។ លោកគួច ចំរើនបញ្ជាក់ថា លោកគ្មានរូបិយប័ណ្ណឌីជីថល ឬលុយគ្រីបតូដូចការលើកឡើងរបស់អតីតអ្នកឧកញ៉ាហេង សិទ្ធីសោះឡើយ និងថា ប្រសិនបើមានអ្នកដឹងថាលុយគ្រីបតូរបស់លោកនៅកន្លែងណានោះ លោកនឹងចុះហត្ថលេខាឱ្យយកលុយគ្រីបតូទាំងនោះទៅចែកប្រជាជនក្រីក្រ សាងសង់មន្ទីរពេទ្យ និងសាលារៀនទាំងអស់ចុះ។
