សមាជិកសភារុស្ស៉ី ថា រដ្ឋបាលលោក បៃដិន កំពុងបង្កើនហានិភ័យសង្គ្រាមលោកលើកទី៣ តាមរយៈការបើកដៃឱ្យអ៊ុយក្រែន ប្រើមីស៉ីលវាយប្រហារជ្រៅចូលដីរុស្ស៉ី
21-September-2026 / ព័ត៌មានជាតិ
អ៊ុយក្រែន៖ នៅទីបំផុតរដ្ឋបាលលោក ចូល បៃដិន បានបើកដៃឲ្យអ៊ុយក្រែន ប្រើមីស៊ីលរយៈចម្ងាយឆ្ងាយរបស់អាមេរិកបាញ់ចូលជ្រៅក្នុងប្រទេសរុស្ស៊ីហើយ។ នេះបើតាមការចុះផ្សាយរបស់សារពត៍មានរុស្ស៊ី( RT )នៅថ្ងៃចន្ទទី១៨ខែវិច្ឆិកាឆ្នាំ២០២៤។មន្ត្រីអាមេរិកដែលសុំមិនបញ្ចេញឈ្មោះបានប្រាប់កាសែត New York Times និង Washington Post ថា ការយល់ព្រមរបស់លោក បៃដិន ឲ្យអ៊ុយក្រែនប្រើប្រាស់មីស៊ីល ATACMS គឺដើម្បីឆ្លើយតបទៅនឹងរុស្ស៊ី ដែលក៏សម្រេចចិត្តឲ្យកងទ័ពកូរ៉េខាងជើង មកជួយខ្លួនក្នុងសង្គ្រាមនេះដែរ។
លោក Serhiy Kuzan ប្រធានមជ្ឈមណ្ឌលសន្តិសុខនិងកិច្ចសហប្រតិបត្តិការអ៊ុយក្រែន មានមូលដ្ឋាននៅទីក្រុង កៀវ បានប្រាប់ BBC ថា «ការសម្រេចចិត្តរបស់លោក ចូ បៃដិន គឺសំខាន់ណាស់សម្រាប់ប្រទេសនេះ។ នេះមិនមែនជាអ្វីដែលនឹងផ្លាស់ប្តូរផ្លូវសង្គ្រាម ទេ ប៉ុន្តែខ្ញុំគិតថា វានឹងធ្វើឲ្យកងកម្លាំងរបស់យើងមានសមភាពជាងមុន»។ដូចគ្នាដែរប្រទេសបារាំង និងចក្រភពអង់គ្លេស ក៏បានអនុញ្ញាតឲ្យអ៊ុយក្រែនធ្វើការវាយប្រហារចូលជ្រៅក្នុងទឹកដីរុស្ស៊ី ដោយប្រើប្រាស់មីស៊ីលរយៈចម្ងាយឆ្ងាយ SCALP និង Storm Shadow របស់ពួកគេ។ នេះបើយោងតាមការចុះផ្សាយរបស់កាសែតបារាំង Le Figaro កាលពីថ្ងៃទី១៧ខែវិច្ឆិកាឆ្នាំ២០២៤។កងកម្លាំងអ៊ុយក្រែន នឹងអាចប្រើប្រាស់មីស៊ីលរយៈចម្ងាយឆ្ងាយចំនួន៣ប្រភេទវាយប្រហាររុស្ស៊ី ដែលមានដូចជា ATACMS, SCALP និង Storm Shadow។
សូមបញ្ជាក់ថា មីស៊ីល ATACMS ដែលមានរយៈចម្ងាយ៣០០គីឡូម៉ែត្រ នឹងអនុញ្ញាតឲ្យអ៊ុយក្រែនវាយលុកចូលជ្រៅទៅក្នុងទឹកដីរុស្ស៊ី ដោយអាចរំខានដល់ខ្សែសង្វាក់ផ្គត់ផ្គង់ និងការប្រមូលផ្តុំកងទ័ព។ មីស៊ីលនេះ ពិបាកស្ទាក់ចាប់ណាស់ ដោយសារល្បឿនដ៏លឿនរបស់វា។ទន្ទឹមគ្នានេះដែរ សមាជិកសភារុស្ស៉ីមួយរូប បាននិយាយថា រដ្ឋបាលប្រធានាធិបតីអាមេរិក លោក ចូ បៃដិន ហាក់កំពុងបង្កើន ហានិភ័យសង្គ្រាមលោកលើកទី៣ ប្រសិនបើពិតជាបានសម្រេចចិត្ត អនុញ្ញាតឱ្យអ៊ុយក្រែនប្រើប្រាស់អាវុធអាមេរិក វាយប្រហារជ្រៅចូលក្នុងទឹកដីរុស្ស៉ីមែននោះ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃចន្ទ ទី១៨ ខែវិច្ឆិកា ឆ្នាំ២០២៤។
អ្នកស្រី Maria Butina បានលើកឡើងថាដូច្នេះថា «រដ្ឋបាលលោក បៃដិន កំពុងតែព្យាយាមបង្កើនកម្តៅ នៃស្ថានការណ៍ឱ្យដល់កម្រិតអតិបរមា ស្របពេលដែលខ្លួនបន្តមានអំណាចក្នុងដៃនៅឡើយ។ ខ្ញុំសង្ឃឹមថា លោក ដូណាល់ ត្រាំ នឹងអាចជម្នះការសម្រេចចិត្តនេះវិញ ប្រសិនបើការអនុញ្ញាត ពិតជាត្រូវបានធ្វើឡើងមែន ព្រោះថា វាកំពុងបង្កើនហានិភ័យជាខ្លាំង នៃការផ្ទុះឡើងនូវសង្គ្រាមលោកលើកទី៣ ដែលមិនមែនជារឿងល្អសម្រាប់ភាគីណាមួយឡើយ»។
គួរបញ្ជាក់ថា កាលពីខែកញ្ញា ប្រធានាធិបតីរុស្ស៉ី លោក វ្ល៉ាឌីមៀ ពូទីន ធ្លាប់បាននិយាយថា ការអនុញ្ញាតពីសំណាក់លោកខាងលិច ឱ្យអ៊ុយក្រែនប្រើប្រាស់អាវុធរបស់ពួកគេ វាយប្រហារជ្រៅចូលមកក្នុងទឹកដីប្រទេសរុស្ស៉ី គឺនឹងស្មើមានន័យថា ជាការចូលរួមដោយផ្ទាល់របស់ប្រទេសអង្គការ NATO សហរដ្ឋអាមេរិក ក៏ដូចជាអឺរ៉ុប នៅក្នុងសង្គ្រាមអ៊ុយក្រែន ជាក់ជាមិនខាន។ ចំណែក កាលពីចុងខែតុលា លោក ពូទីន បាននិយាយថា ក្រសួងការពារជាតិរុស្ស៉ី កំពុងពិចារណាលើមធ្យោបាយផ្សេងៗគ្នា ដើម្បីឆ្លើយតបប្រសិនបើអាមេរិកនិងសម្ព័ន្ធមិត្ត NATO សម្រេចចិត្តជួយអ៊ុយក្រែន វាយប្រហារចូលជ្រៅក្នុងដីរុស្ស៉ី ដោយប្រើសព្វាវុធលោកខាងលិច។ទាក់ទងនិងសង្គ្រាមនេះដែរ លោកអធិការបតីអាឡឺម៉ង់ លោកអូឡាហ្វ ស្កូល បានថ្លែងអះអាងថា លោកពុទីនហាក់មិនបានផ្លាស់ប្តូរទស្សនៈរបស់ខ្លួនពាក់ព័ន្ធនឹងបញ្ហាសង្គ្រាមជាមួយប្រទេសអ៊ុយក្រែននោះឡើយ។ ការថ្លែងបែបនេះគឺបន្ទាប់ពីលោកអូឡាហ្វ ស្កូល បានជួបសន្ទនាតាមរយៈទូរសព្ទរយៈពេលប្រហែល ១ម៉ោងជាមួយប្រធានាធិបតីរុស្ស៊ី លោកវ្លាឌីមៀរ ពុទីនកាលពីពេលថ្មីៗនេះរួចមក
ថ្លែងចេញពីអាកាសយានដ្ឋានអន្តរជាតិទីក្រុងប៊ែកឡាំង អំឡុងដំណើរចាកចេញទៅចូលរួមកិច្ចប្រជុំកំពូល G២០ នៅឯទឹកដីប្រទេសប្រេស៊ីលកាលពីថ្ងៃអាទិត្យ លោកស្កូល បានបន្តថ្លែងការពារការសម្រេចចិត្តរបស់លោក ក្នុងការហៅទូរសព្ទទៅកាន់លោកពុទីន បើទោះបីជាមានការរិះគន់ថា សកម្មភាពនេះអាចធើ្វឱ្យរុស្ស៊ីមើលឃើញពីសញ្ញាទន់ខ្សោយរបស់សម្ព័ន្ធមិត្តអឺរ៉ុបលើបញ្ហាសង្គ្រាមនៅអ៊ុយក្រែន ស្របពេលសហរដ្ឋអាម៉េរិកកំពុងតែផ្លាស់ប្តូរមេដឹកនាំ។
ត្រង់ចំណុចនេះ លោកស្កូល និយាយថា គោលបំណងរបស់លោក គឺដើម្បីជម្រះមន្ទិលសង្ស័យទៅកាន់លោកពុទីន ជុំវិញការភ័ន្តច្រឡំថា អឺរ៉ុបអាចនឹងបន្ថយជំហរគាំទ្រចំពោះអ៊ុយក្រែន ដោយសារតែការវិលត្រឡប់របស់លោកដូណាល់ត្រាំជាប្រធានាធិបតីរបស់សហរដ្ឋអាម៉េរិក ខណៈអតីតមេដឹកនាំអាម៉េរិករូបនេះ តែងប្រកាសជំហរជារឿយៗ ថានឹងកាត់បន្ថយការចូលរួមពាក់ព័ន្ធរបស់អាម៉េរិកនៅក្នុងវិបត្តិនយោបាយក្រៅប្រទេស ដែលបានរំលេចចេញតាមរយៈពាក្យស្លោក “ធើ្វឱ្យសហរដ្ឋអាម៉េរិកអាស្ចារ្យម្តងទៀត“ (Make American Great Again) របស់លោក។
គួរជម្រាបថា នៅក្នុងកិច្ចសន្ទនាតាមទូរសព្ទជាមួយលោកពុទីន លោកអូឡាហ្វ ស្កូល បានជំរុញឱ្យរុស្ស៊ីធើ្វកាចរចាជាមួយអ៊ុយក្រែនក្នុងគោលបំណងដើម្បីសម្រេចបាននូវ "សន្តិភាពដ៏ត្រឹមត្រូវ និងយូរអង្វែង" បន្ថែមពីនេះ លោកក៏បានទាមទារឱ្យរុស្ស៊ីធើ្វការដកទ័ពចេញពីទឹកដីភាគខាងកើតរបស់អ៊ុយក្រែន និងបានបញ្ជាក់ជាថ្មីទៅកាន់រុស្ស៊ី អំពីជំហរគាំទ្រយ៉ាងមុតមាំរបស់អាឡឺម៉ង់ចំពោះអ៊ុយក្រែន ។
លើសពីនេះទៅទៀត លោកស្កូល ក៏បានថ្កោលទោសរុស្ស៊ី ចំពោះការបើកដៃឱ្យមានការដាក់ពង្រាយទាហានកូរ៉េខាងជើងរាប់ពាន់នាក់នៅក្នុងទឹកដីរបស់ខ្លួន ដើម្បីត្រៀមចូលរួមប្រយុទ្ធនៅក្នុងសមរភូមិប្រឆាំងនឹងអ៊ុយក្រែន ខណៈលោកបានព្រមានថា យុទ្ធសាស្ត្រនេះនឹងធើ្វឱ្យស្ថានការណ៍សង្គ្រាម។
សម្រាបមេដឹកនាំកូរ៉េខាងជើង លោក គីម ជុងអ៊ុនវិញ បាននិយាយថា សហរដ្ឋអាមេរិក និងលោកខាងលិច កំពុងប្រើយោធាអ៊ុយក្រែនធ្វើជាទ័ពជំនួស ឱ្យទៅប្រយុទ្ធជាមួយរុស្ស៉ី និងបង្កឱ្យមានហានិភ័យនៃជម្លោះជាសកល។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃចន្ទ ទី១៨ ខែវិច្ឆិកា ឆ្នាំ ២០២៤។តាមប្រព័ន្ធផ្សព្វផ្សាយរដ្ឋកូរ៉េខាងជើង KCNA លោក Kim បញ្ជាក់ថា «សហរដ្ឋអាមេរិក និងលោកខាងលិច កំពុងប្រើប្រាស់ជម្លោះនៅអ៊ុយក្រែន ដើម្បីពង្រីកវិសាលភាព នៃអន្តរាគមន៍យោធារបស់ពួកគេជាសកល»។ លោកបន្ថែមថា «ពួកគេក៏កំពុងព្យាយាម បង្កើនបទពិសោធន៍ប្រយុទ្ធ ដោយអ៊ុយក្រែនត្រូវបានប្រើប្រាស់ ជាទ័ពជំនួសដើម្បីប្រឆាំងនឹងរុស្ស៉ី»។
ទីក្រុងសេអ៊ូលប្រទេសកូរ៉េ និងទីក្រុងវ៉ាស៉ីនតោន អាមេរិកបានចោទប្រកាន់កូរ៉េខាងជើង ថាបញ្ជូនទាហានប្រហែល ១០,០០០នាក់ ទៅជួយរុស្ស៉ីប្រយុទ្ធជាមួយអ៊ុយក្រែន(រំលោភបំរាមអង្គការសហប្រជាជាតិ)។ អ្នកជំនាញនិយាយថា លោក គីម ទទួលបានមកវិញ នូវជំនួយបច្ចេកវិទ្យារបស់ទីក្រុងមូស្គូ បូករួមទាំងបទពិសោធន៍កងទ័ព ក្នុងសមរភូមិប្រយុទ្ធ។ ប៉ុន្តែទីក្រុងព្យុងយ៉ាង បានច្រានចោលការចោទប្រកាន់នេះ៕
