រដ្ឋការចូបៃដឹនបញ្ជូនជំនួយប្រមុខការទូតអឺរ៉ុបធើ្វទស្សនកិច្ចទៅអ៊ុយក្រែន ដើម្បីបញ្ជាក់ពីជំហរគាំទ្រឥតងាករេ ក្រោយជ័យជម្នះរបស់លោកដូណាល់ត្រាំ
21-September-2026 / ព័ត៌មានអន្តរជាតិ
អាមេរិក៖ក្នុងបទសម្ភាសដែលចេញផ្សាយដោយទូរទស្សន៍ CBS កាលពីថ្ងៃអាទិត្យទី១០ខែវិច្ឆិកាឆ្នាំ២០២៤ ទីប្រឹក្សាសន្តិសុខជាតិអាមេរិកលោកចេកស៊ូលីវ៉ាន( Jake Sullivan) បញ្ជាក់ថា សេតវិមាននឹងបញ្ចេញកញ្ចប់ជំនួយនៅសល់ប្រមាណ៦ពាន់លានដុល្លារទៀតឲ្យទៅអ៊ុយក្រែន មុនពេលប្រធានាធិបតីជាប់ឆ្នោតលោក ដូណាល់ ត្រាំ ឡើងកាន់តំណែងជាផ្លូវការក្នុងខែមករាឆ្នាំ២០២៥។
លោកស៊ូលីវ៉ាន( Sullivan)ថា «គោលដៅសំខាន់មួយក្នុងចំណោមគោលដៅសំខាន់ៗរបស់រដ្ឋបាលបៃដិន នារយៈពេលប៉ុន្មានខែចុងក្រោយនៃអាណត្តិរបស់គាត់ គឺត្រូវធ្វើឲ្យអ៊ុយក្រែនឈរជើងក្នុងទីតាំងដ៏រឹងមាំបំផុតលើសមរភូមិ ដើម្បីធានាថា ពួកគេជាភាគីមិនអាចខ្វះបាន នៅពេលចូលមកកាន់តុចរចា»។ចាប់តាំងពីរុស្ស៊ីបើកប្រតិបត្តិការសឹកពេញទំហឹងលើអ៊ុយក្រែនក្នុងខែកុម្ភៈឆ្នាំ២០២២មក សហរដ្ឋអាមេរិក បានជួយផ្នែកយោធាអស់ទឹកប្រាក់១៧៤ពាន់លានដុល្លារហើយ ប៉ុន្តែជំនួយនេះ ត្រូវក្រុមអ្នកសាធារណរដ្ឋរិះគន់យ៉ាងខ្លាំង ដោយមានអ្នកខ្លះចោទថា រដ្ឋាភិបាលលោក ចូបៃដិន ហាក់ដូចជាយកលុយវាល់លានទៅបោះចោលនៅអ៊ុយក្រែន អ៊ីចឹង។លោក Sullivan ក៏បាននិយាយដែរថា ប្រធានាធិបតីសហរដ្ឋអាមេរិកលោក ចូ បៃដិន នឹងពិភាក្សាអំពីអាទិភាពគោលនយោបាយក្នុងស្រុកនិងបរទេស ជាមួយប្រធានាធិបតីជាប់ឆ្នោត ដូណាល់ ត្រាំ ពេលអ្នកទាំងពីរជួបគ្នានៅថ្ងៃពុធ ហើយក្នុងឱកាសនោះ លោក បៃដិន នឹងផ្តាំផ្ញើឲ្យលោកត្រាំ កុំបោះបង់អ៊ុយក្រែនចោលឲ្យសោះ។
លោក Sullivan,ថា «ប្រធានាធិបតីបៃដិន នឹងមានឱកាសក្នុងរយៈពេល៧០ថ្ងៃខាងមុខដើម្បីជំរុញទៅសភា និងផ្តាំផ្ញើទៅកាន់រដ្ឋបាលអាណត្តិថ្មីថា សហរដ្ឋអាមេរិកមិនត្រូវទុកអ៊ុយក្រែនចោលឡើយ ការដើរចេញពីអ៊ុយក្រែនមានន័យថា នឹងមានអស្ថិរភាពកាន់តែច្រើននៅក្នុងទ្វីបអឺរ៉ុប”។ក្រៅពីរដ្ឋកាអាមេរិកចាស់នៅថ្ងៃសៅរ៍ ទី៩ ខែវិច្ឆិកាកន្លងទៅ ប្រមុខការបរទេសអឺរ៉ុប លោកចូសែបបូរ៉ែល( Josep Borrell )បានអញ្ជើញទៅដល់ទីក្រុងគៀវរបស់អ៊ុយក្រែន ក្នុងបេសកកម្មដើម្បីបញ្ជាក់ឡើងវិញអំពីជំហរគាំទ្រដោយឥតងាករេរបស់អឺរ៉ុប ចំពោះអ៊ុយក្រែនផងដែរ។
គួរជម្រាបថា នេះគឺជាដំណើរទស្សនកិច្ចលើកដំបូងរបស់មន្រ្តីជាន់ខ្ពស់អឺរ៉ុបទៅកាន់ប្រទេសអ៊ុយក្រែន គិតចាប់តាំងពីការឈ្នះឆ្នោតរបស់លោកដូណាល់ត្រាំ និងបានកើតឡើងនៅចំពេលខួប ១,០០០ថ្ងៃនៃបញ្ហាសង្គ្រាមនៅអ៊ុយក្រែន។លោកបូរ៉ែល( Borrell )បានបញ្ជាក់ឱ្យដឹងថា គិតចាប់តាំងពីមានវិបត្តិសង្គ្រាមនៅអ៊ុយក្រែនមក សហភាពអឺរ៉ុប បានផ្តល់ជំនួយផ្នែកយោធានិងការគាំទ្រផ្នែកហិរញ្ញវត្ថុផ្សេងៗសរុបចំនួន ១៣១ពាន់លានដុល្លារអាម៉េរិកទៅឱ្យអ៊ុយក្រែន និងបានជួយបណ្តុះបណ្តាលទាហានអ៊ុយក្រែនសរុបប្រមាណជាង ៦ម៉ឺននាក់ ស្របពេលអឺរ៉ុប មានគោលដៅចង់បង្កើនការផ្តល់ជំនួយទៅឱ្យអ៊ុយក្រែន រួមទាំងបន្ថែមការបណ្តុះបណ្តាលជំនាញយោធាដល់ទាហានអ៊ុយក្រែនឱ្យបានសរុបចំនួន ៧៥ម៉ឺននាក់នៅត្រឹមដំណាច់រដូវរងារខាងមុខ។
ថ្លែងនៅក្នុងសន្និសីទសារព័ត៌មានរួមគ្នាជាមួយរដ្ឋមន្ត្រីការបរទេសអ៊ុយក្រែនក្នុងរដ្ឋធានីគៀវ លោក Borrell បានបន្តសង្កត់ធ្ងន់ថា "ការគាំទ្ររបស់អឺរ៉ុបចំពោះអ៊ុយក្រែននឹងនៅតែបន្តទៅមុខដោយមិនងាករេ” ពីព្រោះការចូលរួមគាំទ្ររបស់អឺរ៉ុប គឺជាមធ្យោបាយតែមួយគត់សម្រាប់ជួយឱ្យអ៊ុយក្រែនធើ្វការប្រយុទ្ធតទល់នឹងសកម្មភាពឈ្លានពានរបស់រុស្ស៊ី ដើម្បីធានាការពារដែនអធិបតេយ្យភាពរបស់ខ្លួន ក៏ដូចការធានាដល់ស្ថិរភាពតំបន់អឺរ៉ុបទាំងមូលទៅថ្ងៃអនាគត។
សូមបញ្ជាក់ថាអនាគតរដ្ឋបាលដឹកនាំលោក ដូណាល់ ត្រាំ នឹងបញ្ចប់សង្គ្រាម និងពុំមែនទាមទារយកដែនដីដែលបាត់បង់ទៅហើយនោះ មកឲ្យអ៊ុយក្រែនវិញឡើយ។ នេះបើតាមលោក Bryan Lanza ជាទីប្រឹក្សាដ៏យូរឆ្នាំម្នាក់របស់លោក ត្រាំ ដែលបានផ្តល់សម្ភាសន៍ទៅកាន់ទូរទស្សន៍BBC ដោយបញ្ជាក់ទៀតថា កិច្ចការជាអាទិភាព គឺរំលត់ភ្លើងចម្បាំង និងបញ្ឈប់ការកាប់សម្លាប់បង្ហូរឈាមតទៅទៀត។
តាមប្រភពដដែល, រដ្ឋបាលអាមេរិកថ្មីក្រោមការដឹកនាំរបស់លោក ត្រាំ នឹងស្នើ «ទស្សនវិស័យសន្តិភាព» ទៅឲ្យ ប្រធានាធិបតីអ៊ុយក្រែន ហើយប្រសិនបើលោក វ៉ូឡូឌីមៀរ ហ្សេឡេនស្គី ចូលតុចចារ និងបែរនិយាយថា សន្តិភាពអាចសម្រេចទៅបាន ទាល់តែបានដីគ្រីមេមកវិញ នោះបានសេចក្តីថា លោក ហ្សេឡេនស្គី មិនមែនជាមនុស្សប្រាកដនិយម ច្បាស់លាស់ទេ។ ការពិត, ទឹកដីគ្រីមេ បាត់ទៅហើយ។ ប្រសិនបើចង់ច្បាំងទាមទារដីគ្រីមេនេះមកវិញ និងចង់ឲ្យទ័ពអាមេរិកទៅជួយច្បាំងយកដីនោះមកឲ្យ សូមលោក ហ្សេឡេនស្គី ធ្វើខ្លួនឯងចុះ។ នេះបើយោងតាមប្រសាសន៍របស់លោក Bryan Lanza ទីប្រឹក្សាចាស់ឆ្នាំរបស់លោក ត្រាំ។ ទីប្រឹក្សារូបនេះ ពន្យល់ទៀតថា អ្វីដែលអាមេរិកនឹងត្រូវបញ្ជាក់ទៅអ៊ុយក្រែន គឺជា ទស្សនវិស័យចំពោះសន្តិភាព១ដ៏ប្រាកដប្រាជា។ នេះពុំមែនជា ភាពស្រមើលស្រមៃដើម្បីជ័យជម្នះទេ តែជាចក្ខុវិស័យដើម្បីសន្តិភាព។ ចំណុចនេះ គេត្រូវទទួលស្គាល់ការពិត និងជជែកគ្នាដោយស្មោះត្រង់។
គួររំឭកថា ទឹកដីគ្រីមេ ត្រូវរុស្ស៊ីរបស់បុរសខ្លាំង វ្ល៉ាឌីមៀរ ពូទីន លេបត្របាក់យកមកដាក់ក្នុងដែនឧបសម្ព័ន្ធផែនទីរុស្ស៊ី តាំងពីឆ្នាំ២០១៤។ ៨ឆ្នាំក្រោយមក រុស្ស៊ីក៏បញ្ឆេះភ្លើងសង្គ្រាមឈ្លានពានដីអ៊ុយក្រែនថែមទៀត។ ក្នុងភ្នក់ភ្លើងចម្បាំងជាង២ឆ្នាំមកនេះ អ៊ុយក្រែនបានស្នើសុំ សហរដ្ឋអាមេរិកនិងសម្ព័ន្ធមិត្តលោកខាងលិច អនុញ្ញាតឲ្យខ្លួនប្រើអាវុធធន់ធ្ងន់បាញ់រយៈចម្ងាយឆ្ងាយ ហើយនិងសុំបន្ថែមជំនួយសព្វាវុធឲ្យច្រើន។ ជាផ្លូវការ អ៊ុយក្រែន មិនដែលសុំឲ្យកងទ័ពអាមេរិក ឲ្យជួយច្បាំងនៅសមរភូមិ ជំនួសនោះទេ។
ក្នុងឱកាសយុទ្ធនាការបោះឆ្នោតនាពេលកន្លងទៅ លោក ដូណាល់ ត្រាំ បានប្រកាសក្តែងៗថា បើលោកឈ្នះឆ្នោតធ្វើជាប្រធានាធិបតី លោកនឹងពន្លត់ភ្លើងសង្គ្រាមអ៊ុយក្រែន ត្រឹមតែក្នុងពេល១ថ្ងៃ។ ក៏ប៉ុន្តែ ប្រធានាធិបតីជាប់ឆ្នោតរូបនេះ នៅមិនទាន់បានពន្យល់លម្អិត ថាត្រូវធ្វើដូចម្តេចសោះឡើយ៕ប្រភព៖ Reuters
