រដ្ឋលេខាធិការក្រសួងយុត្តិធំឌឺការឲ្យចំណាត់ថ្នាក់ប្រព័ន្ធយុត្តិធម៌នៅកម្ពុជា
11-February-2026 / ព័ត៌មានជាតិ
ភ្នំពេញ៖រដ្ឋលេខាធិការ និងជាអ្នកនាំពាក្យក្រសួងយុត្តិធម៌ លោក សេង ឌីណា ហាក់ហួសចិត្តនឹងរបាយការណ៍របស់អង្គការ World Justice Project ដែលបានចាត់ចំណាត់ថ្នាក់ប្រព័ន្ធយុត្តិធម៌កម្ពុជានៅលេខរៀងទី ១៤១ ក្នុងចំណោមប្រព័ន្ធយុត្តិធម៌ប្រទេសចំនួន១៤២ លើពិភពលោក។
កាលពីយប់ថ្ងៃសៅរ៍ លោក សេង ឌីណាតាមរយៈហ្វេសប៊ុក បានលើកឡើងថា របាយការណ៍របស់ World Justice Project ឲ្យចំណាត់ថ្នាក់ប្រព័ន្ធយុត្តិធម៌កម្ពុជាលេខ១៤១ ក៏ប៉ុន្តែ សូមមើលប្រទេសមួយចំនួន ដែលរបាយការណ៍នេះឲ្យចំណាត់ថ្នាក់នៅលើកម្ពុជា ដើម្បីពិចារណាទាំងអស់គ្នាថា តើសមហេតុសមផល ឬទេ?
លោក សេង ឌីណាដែលជាអតីតនិពន្ធនាយកវិទ្យុបារាំងអន្តរជាតិនិយាយឌឺថា ប្រទេសអាហ្វហ្កានីស្ថាន គ្រប់គ្រងដោយពួកតាលីបង់ ដែលត្រូវបានគេចាត់ទុកជាក្រុមភេរវជន បែរជាជាប់ចំណាត់ថ្នាក់លេខ ១៤០ ខណៈប្រទេសហៃទី គ្មានប្រធានាធិបតី គ្មានសភា គ្មានការបោះឆ្នោត ៨ឆ្នាំមកហើយ ហើយបច្ចុប្បន្នកំពុងស្ថិតក្នុងភាពវឹកវរនយោបាយ និងសង្គម ហើយប្រទេសត្រូវគ្រប់គ្រងដោយក្រុមឧក្រិដ្ឋជន បែរជាជាប់ចំណាត់ថ្នាក់លេខ១៣៩។ មួយទៀត ប្រទេសអ៊ុយក្រែន គឺកំពុងស្ថិតក្នុងសង្គ្រាម ហើយប្រព័ន្ធតុលាការស្ទើរតែលែងដំណើរការទាំងស្រុងទៅហើយ តែបែរជាជាប់លេខ៨៨ទៅវិញ។
ត្រង់ចំណុចនេះ អ្នកនាំពាក្យក្រសួងយុត្តិធម៌ បានគូសបញ្ជាក់ថា ៖«មើលចំណុចទាំងនេះហើយ យើងអាចកំណត់បានថា ការវាយតម្លៃប្រព័ន្ធយុត្តិធម៌នៅក្នុងរបាយការណ៍នេះមិនគួរឲ្យជឿទុកចិត្តបាននោះទេ!»។
អង្គការ World Justice Report ដែលមានទីតាំងនៅសហរដ្ឋអាមេរិក បានចេញរបាយការណ៍ស្តីពីប្រព័ន្ធយុត្តិធម៌ និងនីតីរដ្ឋ ឆ្នាំ២០២៤ ដោយវាយតម្លៃទៅលើប្រទេសចំនួន១៤២នៅទូទាំងពិភពលោក។ អង្គការនេះ បានចាត់ចំណាត់ថ្នាក់ប្រព័ន្ធយុត្តិធម៌ និងនីតិរដ្ឋកម្ពុជាលេខ១៤១ ពោល គឺនៅលើតែប្រទេសវេណេស៊ុយអេឡាតែមួយប៉ុណ្ណោះដែលនៅចំណាត់ថ្នាក់លេខ១៤២។ ចំណែក ប្រទេសដែលមានចំណាត់ថ្នាក់លេខ១លើប្រព័ន្ធយុត្តិធម៌ និងនីតិរដ្ឋ គឺប្រទេសដាណឺម៉ាក។របាយការណ៍របស់គម្រោងយុត្តិធម៌ពិភពលោក (WJP) បានផ្អែកលើ មូលហេតុដែលយុត្តិធម៌នៅកម្ពុជាធ្លាក់ចុះបន្ថែមទៀតនៅឆ្នាំនេះ គឺមកពីរដ្ឋាភិបាលនៅតែប្រើឥទ្ធិពលទៅលើប្រព័ន្ធតុលាការ ជាពិសេសរឿងក្តីធំៗទាក់ទងនឹងនយោបាយ។
ក្រសួងយុត្តិធម៌កម្ពុជា តាមរយៈអ្នកនាំពាក្យ មិនអាចទទួលបានយកទេនូវរបាយការណ៍នេះ ព្រោះវាមានលក្ខណៈលម្អៀង។ លម្អៀង នៅត្រង់ថា វាខុសពីការពិតជាក់ស្តែងនៅក្នុងប្រទេសកម្ពុជា ដែលការអនុវត្តច្បាប់របស់កម្ពុជានាពេលកន្លងមក ក៏ដូចជានៅពេលនេះ គឺតែទៅលើអ្នកដែលប្រព្រឹត្តបទល្មើសតែប៉ុណ្ណោះ។ បន្ថែមលើនេះ ក្រសួងយុត្តិធម៌ កំពុងតែដុតដៃដុតជើងដោះស្រាយរឿងក្តីនៅតាមតុលាការ និងកំពុងដំណើរការយុទ្ធនាការត្រួតពិនិត្យ និងដោះស្រាយភាពមិនប្រក្រតីនៅតាមតុលាការថែមទៀតផង។
សូមរំលឹកថា នៅមុនរបាយការណ៍ របស់ អង្គការ គម្រោងយុត្តិធម៌ពិភពលោកនេះដែរក៏មនា របាយការណ៍សម្រាប់ឆ្នាំ២០២៤ របស់អង្គការ Freedom House ដែលជាអង្គការឃ្លាំមើលការអនុវត្តសិទ្ធិមនុស្សជុំវិញពិភពលោក បានចាត់ចំណាត់ថ្នាក់កម្ពុជាថាជាប្រទេសមិនសេរីផងដែរ។ មិនសេរី គឺដោយសារតែរដ្ឋាភិបាលកម្ពុជា ស្ថិតក្នុងការគ្រប់គ្រងដោយគណបក្សតែមួយ និងថា រដ្ឋាភិបាលបានរារាំងសកម្មភាពក្រុមអ្នកជំទាស់សំខាន់ៗ រំលោភសិទ្ធិមនុស្សធ្ងន់ធ្ងរ រួមទាំងបំបិទសំឡេងសារព័ត៌មានឯករាជ្យដែលនៅសល់តិចតួចក្នុងប្រទេស៕
