សមត្ថកិច្ចឡោមព័ទ្ធ និងឆ្មក់ចូលទីតាំងមួយកន្លែង ឃាត់ខ្លួនជនបរទេសជាង ១០០០នាក់បន្ទាប់ពីអគ្គស្នងការបដិសេធថាគ្មាន!?
06-August-2026 / សន្តិសុខសង្គម
កំពង់ស្ពឺ៖ នៅរសៀលថ្ងៃទី២៤ ខែតុលា ឆ្នាំ២០២៤ កម្លាំងនគរបាលជំនាញ នៃក្រសួងមហាផ្ទៃ ដឹកនាំដោយ លោកឧត្តមសេនីយ៍ ឌី វិទ្យា អគ្គស្នងការរងនគរបាលជាតិ បានឡោមព័ទ្ធ និងឆ្មក់ចូលទីតាំងមួយកន្លែង ឃាត់ខ្លួនជនបរទេសបានជាង ១០០០នាក់ នៅខេត្តកំពង់ស្ពឺ ។ ទីតាំងដែលសមត្ថកិច្ចក្រសួងឆ្មក់បង្ក្រាបនេះ មានកម្លាំងប្រតិបត្តិការឡោមព័ទ្ធប្រមាណជិត ២០០នាក់ ស្ថិតនៅតាមបណ្តោយផ្លូវជាតិលេខ៣ ត្រង់គីឡូម៉ែត្រលេខ៣២ ក្នុងភូមិដើមអង្គ្រង ឃុំអង្គពពេល ស្រុកគងពិសី ខេត្ដកំពង់ស្ពឺ។
ការចុះបង្ក្រាបដឹកនាំកម្លាំងដោយលោកឧត្តមសេនីយ៍ឯកឌីវិជ្ជាអគ្គស្នងការរងនគរបាលជាតិធ្វើឡើងបន្ទាប់ពីឧត្តមសេនីយ៍ ស ថេត អគ្គស្នងការនគរបាលជាតិបដិសេធការផ្សាយពត៍មានរបស់ទូរសទស្សន៍កូរ៉េខាងត្បូងKBSផ្សាយថាមានជនជាតិកូរ៉េត្រវបានចាប់ជម្រឹតនៅស្រុកខ្មែរ ។តើភស្តុតាងនៃការបង្ក្រាបនេះមាននយ័ធ្វើឲ្យសម្តីលោកសថេតអគ្គស្នងការនគរបាលជាតិគ្មានតម្លៃ?ឬក៏ជាកង្វះនៃការត្រួតពិនិត្យរបស់សមត្តកិច្ច?។បើតាមសេចក្ដីរាយការណ៍ ជំហានដំបូងនៃប្រតិបត្តិការលើទីតាំងដែលទូរទស្សន៍ផ្សាយនេះ កម្លាំងសមត្ថកិច្ចជំនាញបានឃាត់ខ្លួនជនបរទេសចម្រុះជាតិសាសន៍ ដែលភាគច្រើនជាជនជាតិចិន និងកូរ៉េ សរុបប្រមាណជាង១,០០០នាក់។ បច្ចុប្បន្នកម្លាំងជំនាញកំពុងបន្ដតាមនីតិវិធី។
ស្នងការដ្ឋាននគរបាលខេត្តកំពង់ស្ពឺ និងកម្លាំងសមត្ថកិច្ចពាក់ព័ន្ធបានឆ្លើយថា ករណីនេះមិនទាន់អាចធ្វើការអត្ថាធិប្បាយបាននៅឡើយទេ ដោយសមត្ថកិច្ចកំពុងធ្វើការ។ប្រភពពីប្រជាពលរដ្ឋ បានឱ្យដឹងថា ទីតាំងល្បែងខុសច្បាប់នេះគឺ ជ្រកក្នុងរូបភាពជារោងចក្រដំណាប់ស្វាយ បើកលេងល្បែងយូរឆ្នាំមកហើយ ក្រោមការយាមកាមយ៉ាងតឹងរឹងពីក្រុមសន្តិសុខ។ ទីតាំងនេះ មិនអនុញ្ញាតឱ្យនរណាម្នាក់ទៅឈប់ ឬចតរថយន្តក្បែរនោះឡើយ ប្រសិនជាមានការឈប់ ឬចតគឺមានសន្តិសុខមកដេញចេញភ្លាមៗ។ កុំថាឡើយប្រជាពលរដ្ឋ សូម្បីសមត្ថកិច្ចមូលដ្ឋានក៏មិនអាចទៅក្បែរនោះបានដែរ។
សូមបញ្ជាក់ថាទូរទស្សន៍រដ្ឋកូរ៉េខាងត្បូង KBS កាលពីថ្ងៃទី២៣ តុលា បានបង្ហាញវីដេអូស្តីពីសកម្មភាពទារុណកម្មជាច្រើន ដែលទូរទស្សន៍ KBS អះអាងថា បានកើតមានឡើង ក្នុងប្រទេសកម្ពុជា។ ទូរទស្សន៍ KBS ផ្សាយថា ក្រុមការងាររបស់ទូរទស្សន៍បានចុះផ្ទាល់ ទៅតាមទីតាំងដែលជនរងគ្រោះជនជាតិកូរ៉េខាងត្បូងម្នាក់បានប្រាប់ និងបានរកឃើញសកម្មភាពចាប់បង្ខាំងមនុស្ស ការធ្វើទារុណកម្ម និងការងារខុសច្បាប់ជាច្រើនកន្លែងនៅកម្ពុជា។
ក្រោយពីមានការផ្សព្វផ្សាយរបស់ទូរទស្សន៍រដ្ឋកូរ៉េ KBS ភ្លាមៗ អគ្គស្នងការនគរបាលជាតិចេញផ្សាយព័ត៌មាននៅលើគេហទំព័ររបស់ខ្លួនថា អាជ្ញាធរបានចុះស្រាវជ្រាវ និងរកឃើញថា ជនជាតិកូរ៉េខាងត្បូងដែលទូរទស្សន៍ KBS បានសម្ភាសន៍ ធ្លាប់ត្រូវបានអាជ្ញាធរកម្ពុជាជួយបញ្ជូនទៅកូរ៉េខាងត្បូងវិញ កាលពីខែសីហាកន្លងទៅ។ បើតាមអគ្គស្នងការនគរបាលជាតិ កាលពីថ្ងៃទី០៥ ខែសីហា ឆ្នាំ២០២៤ មានជនជាតិកូរ៉េខាងត្បូងម្នាក់បានទាក់ទងមកប្រព័ន្ធទូរស័ព្ទទាន់ហេតុការណ៍ និងបានអះអាងថា មិនអាចទាក់ទងប្ដីរបស់ខ្លួនដែលធ្វើការនៅអគារអាយខន ក្នុងខណ្ឌសែនសុខ បានឡើយ។
អ្នកនាំពាក្យរបស់អគ្គស្នងការនគរបាលជាតិបញ្ជាក់ថា សមត្ថកិច្ចបានរកឃើញ និងប្រគល់ជនជាតិកូរ៉េរូបនោះ ទៅអគ្គនាយកដ្ឋានអន្ដោប្រវេសន៍។
នៅក្នុងពេលសួរនាំ ជនជាតិកូរ៉េខាងលើបានអះអាងថា ខ្លួនមិនត្រូវបានចាប់ជំរិត ឬបង្ខាំងឲ្យធ្វើការដោយខុសច្បាប់អ្វីឡើយ?។ ក្រោយបញ្ចប់ការសួរនាំ តាមនីតិវិធី នៅថ្ងៃទី០៨ ខែសីហា ឆ្នាំ២០២៤ ស្នងការដ្ឋាននគរបាលរាជធានីភ្នំពេញ បានបញ្ជូនជនជាតិកូរ៉េខាងលើទៅកាន់អគ្គនាយកដ្ឋានអន្ដោប្រវេសន៍នៅថ្ងៃទី២៨ ខែសីហា មុននឹងបញ្ជូនទៅកាន់ប្រទេសដើមវិញរួចរាល់។ នៅក្នុងន័យនេះ អ្នកនាំពាក្យនៃអគ្គស្នងការដ្ឋាននគរបាលជាតិ បានសង្កត់ធ្ងន់ថា ការផ្សព្វផ្សាយព័ត៌មានរបស់ទូរទស្សន៍កូរ៉េ មិនមែនជាការពិតនោះឡើយ។ អគ្គស្នងការដ្ឋាននគរបាលជាតិបដិសេធយ៉ាងដាច់អហង្ការ និងអំពាវនាវឲ្យស្ថានីយ៍ទូរទស្សន៍កូរ៉េខាងលើធ្វើការកែសម្រួលការផ្សាយព័ត៌មានរបស់ខ្លួនឡើងវិញ។
នៅមុនការចុះផ្សាយរបស់ទូរទស្សន៍កូរ៉េខាងត្បូង ប្រព័ន្ធផ្សព្វផ្សាយជប៉ុន Nikkei Asia កាលពីខែកញ្ញា ឆ្នាំ២០២៣ធ្លាប់ បានស្រង់សម្តីអ្នកជំនាញទេសចរណ៍ក្នុងតំបន់ថា អ្នកដំណើរជាច្រើនបានលុបចោលផែនការទៅទស្សនាប្រទេសក្នុងតំបន់អាស៊ីអាគ្នេយ៍ បន្ទាប់ពីការព្រមានពីប៉ូលិស និងមន្ត្រីផ្សេងទៀតអំពីការចាប់ជំរិត តាមរយៈការបោកបញ្ឆោត តាមប្រព័ន្ធអនឡាញ ឬហៅថា Scam។ កាលពីខែសីហា ឆ្នាំ២០២៣ រឿងចិនមួយដែលមានចំណងជើងថា «No More Bets» បានបង្ហាញតួអង្គពាក់អាវយឺតដែលមានអក្សរខ្មែរ ប៉ុន្តែមិនបានបញ្ជាក់ពីឈ្មោះប្រទេសណាមួយថា ជាកន្លែងមានក្រុមជួញដូរ ចាប់បង្ខំមនុស្សឱ្យធ្វើការបោកបញ្ឆោតតាមប្រព័ន្ធអនឡាញ។លោកទូច សុឃៈបានប្រាប់ឱ្យដឹងថា ក្រសួងមហាផ្ទៃតែងយកចិត្តទុកដាក់ខ្ពស់ចំពោះការបង្ក្រាបបទល្មើស និងឧក្រិដ្ឋកម្មទាំងក្នុងក្របខណ្ឌប្រទេស និងអន្តរជាតិ។
នេះមានន័យថា ក្រសួងមហាផ្ទៃពុំដែលព្រងើយកន្តើយនឹងករណីទាំងនេះឡើយ និងថា ក្រសួងត្រៀមធ្វើសេចក្តីថ្លែងស្តីពីលទ្ធផលបង្ក្រាបបទល្មើសក៏ដូចជាការងារគ្រប់គ្រងសន្តិសុខ សុវត្ថិភាពសង្គមដែលផ្ទុយពីការដាក់ចំណាត់របស់ក្រុមបរទេស។ ទោះយ៉ាងណា អ្នកនាំពាក្យរងក្រសួងមហាផ្ទៃរូបនេះនៅមិនទាន់ដឹងច្បាស់ថា ហេតុអ្វីបានជាអន្តរជាតិដាក់កម្ពុជាជាប់លេខ១ជាប្រទេសមានឧក្រិដ្ឋកម្មខ្ពស់ជាងគេនោះទេ។
លោកទូច សុឃៈអ្នកនាំពាក្យរងក្រសួងមហាផ្ទៃ ចាត់ទុកការចេញផ្សាយរបាយការណ៍បែបនេះថាមានលក្ខណៈទុច្ចរិត និងមិនចង់ឱ្យកម្ពុជារីកចម្រើន ពិសេសមានចេតនាចង់ឱ្យសាធារណជនគិតអវិជ្ជមានចំពោះកម្ពុជា។ ប្រតិកម្មរបស់អ្នកនាំពាក្យរងក្រសួងមហាផ្ទៃធ្វើឡើង បន្ទាប់ពីមានគេហទំព័របរទេសមួយឈ្មោះ Numbeo បានចេញផ្សាយសន្ទស្សន៍ឧក្រិដ្ឋកម្មតាមបណ្តាប្រទេសទាំងអស់នៅលើពិភពលោក។
នៅក្នុងរបាយការណ៍ Numbeo បានចាត់ដាក់ចំណាត់ថ្នាក់កម្ពុជាជាប្រទេសជាប់លេខ ១ ក្នុងតំបន់អាស៊ានដែលមានកម្រិតឧក្រិដ្ឋកម្មខ្ពស់ជាងគេរហូតដល់ ៥២.៣ពិន្ទុគិតត្រឹមពាក់កណ្តាលឆ្នាំ២០២៤ នេះ។ តាមរបាយការណ៍ដដែល ប្រទេសភូមាឈរនៅលេខរៀងទី២ ជាមួយនឹងពិន្ទុសរុប ៥០.៩ និងលេខ៣ គឺប្រទេសម៉ាឡេស៊ីដែលមានពិន្ទុសរុប ៤៩.៤ ខណៈសិង្ហបុរីត្រូវបាន Numbeo ចាត់ទុកជាប្រទេសដែលមានកម្រិតឧក្រិដ្ឋកម្មទាបជាងគេក្នុងតំបន់អាស៊ានដោយមានពិន្ទុសរុប២៣។
របាយការណ៍ពីខាងសន្ទស្សន៍ឧក្រិដ្ឋកម្មរៀបចំជាសកល Global Organized Crime Index ក្នុងឆ្នាំ២០២៣ កន្លងមកបានឲ្យដឹងថា កម្ពុជាត្រូវបានវាយតម្លៃជាប្រទេសដែលមានករណីឧក្រិដ្ឋខ្ពស់ជាងគេលំដាប់ទី២ បន្ទាប់ពីប្រទេសភូមា។ នេះបើនិយាយក្នុងក្របខណ្ឌតំបន់អាស៊ាន ហើយបើនិយាយក្នុងកម្រិតជាសកលវិញ កម្ពុជាស្ថិតចំណាត់ថ្នាក់ទី២០ ក្នុងចំណោមប្រទេសសរុបចំនួន១៩៣នៅលើពិភពលោក។
ឯរបាយការណ៍របស់អង្គការសហប្រជាជាតិទទួលបន្ទុកសិទ្ធិមនុស្ស (UNHCHR) ចេញផ្សាយ កាលពីចុងខែសីហា ឆ្នាំ ២០២៣ បង្ហាញថា នៅក្នុងប្រទេសកម្ពុជា មនុស្សប្រមាណ ១០ ម៉ឺននាក់ ដែលជាជនបរទេសត្រូវបានចាប់បង្ខំឱ្យធ្វើការងារឆបោកតាមប្រព័ន្ធអនឡាញ នៅក្នុងប្រទេសកម្ពុជា។ ករណីឆបោកតាមប្រព័ន្ធអនឡាញនេះបានកើតឡើង នៅក្នុងប្រទេសចំនួន៥ ក្នុងតំបន់អាស៊ីអាគ្នេយ៍រួមមានកម្ពុជា ថៃ ឡាវ ភូមា និងហ្វីលីពីន។
