លោក ម៉ិច ដារ៉ាអ្នកកាសែត ត្រូវបានដោះលែងឱ្យនៅក្រៅឃុំ បន្ទាប់សុំទោសនិងមានទូតបារាំង និងអាមេរិកបង្ហាញក្តីបារម្ភខ្លាំងចំពោះការចាប់ខ្លួន
21-September-2026 / ព័ត៌មានជាតិ
ភ្នំពេញ៖ លោក ម៉ិច ដារ៉ា ជាអ្នកសារព័ត៌មានឯករាជ្យ ត្រូវបានដោះលែងឲ្យនៅក្រៅឃុំបន្ទាប់ពីទទួលស្គាល់កំហុស និងប្រកាសសុំទោសជាសាធារណៈតាមរយៈវីដេអូ និងជាលិខិត ចំពោះសម្តេច ហ៊ុន សែន ប្រធានព្រឹទ្ធសភា និងសម្តេច ហ៊ុន ម៉ាណែត នាយករដ្ឋមន្ត្រី កាលពីយប់ថ្ងៃទី២៣ ខែតុលា។ ការដោះលែងធ្វើឡើងនៅវេលាម៉ោង១២ ថ្ងៃត្រង់ ថ្ងៃតី២៤ ខែតុលា ឆ្នាំ២០២៤ ត្រូវបានតុលាដោះលែងឱ្យនៅក្រៅឃុំ បន្ទាប់ពីជាប់ពន្ធនាគារជិត១ខែ។តាមរយៈវីដេអូសុំទោស លោក ដារ៉ា ក្រៅពីទទួលស្គាល់កំហុស លោកបានសន្យាឈប់ផ្សព្វផ្សាយព័ត៌មានមិនពិត ដែលប៉ះពាល់ដល់កេរ្តិ៍៍ឈ្មោះកម្ពុជាផងដែរ។
លោក ដារ៉ា ត្រូវបានសមត្ថកិច្ចឃាត់ខ្លួន កាលពីថ្ងៃទី៣០ ខែកញ្ញា ពាក់ព័ន្ធនឹងការបង្ហោះព័ត៌មានមិនពិតនៅលើបណ្តាញហ្វេសប៊ុក។ ក្រោយការសាកសួរនៅរសៀលថ្ងៃទី១ ខែតុលា តុលាការសម្រេចចោទប្រកាន់ ពីបទ«ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» និងបញ្ជូនទៅឃុំខ្លួនបណ្ដោះអាសន្ននៅពន្ធនាគារខេត្តកណ្ដាល។ទាកទងនិងការាប់ឃុំខ្លួនលោកម៉ិចដារាដែលជាអ្នកសារពត៍មានជួយសង្គមច្រើនតាមរយៈអត្ថបទរបស់ខ្លួនរហូតទទួលបានមេដាយពីអាមេរិកស្ថានទូតបារាំងប្រចាំទីក្រុងភ្នំពេញ និងក្រសួងការបរទេសអាមេរិក ព្រមទាំងសហគមន៍អន្តរជាតិនៅតែបន្តសម្តែងប្រតិកម្មចំពោះការចាប់ខ្លួនអ្នកសារព័ត៌មានសេរីលោក ម៉ិច ដារ៉ា។ ពួកគេយល់ថា ការចាប់ខ្លួនអ្នកសារព័ត៌មានក្នុងប្រទេសប្រជាធិបតេយ្យបានជះឥទ្ធិពលអាក្រក់ដល់សិទ្ធិសេរីភាពក្នុងការបញ្ចេញមតិ និងសេរីភាពសារព័ត៌មាននៅកម្ពុជា។
ស្ថានទូតបារាំងប្រចាំកម្ពុជា ចំណាត់ការផ្លូវច្បាប់ទៅលើអ្នកសារព័ត៌មាន ម៉ិច ដារ៉ា បានបង្កជាក្តីបារម្ភ ព្រោះថា សារព័ត៌មានដើរតួនាទីយ៉ាងសំខាន់ក្នុងតម្លាភាព និងការទទួលខុសត្រូវរបស់ស្ថាប័នានាក្នុងនាមកម្ពុជាជាប្រទេសប្រជាធិបតេយ្យ។ ក្នុងន័យនេះ ស្ថានទូតបារាំងបានទទូចឲ្យអាជ្ញាធរកម្ពុជាធានាឲ្យបាននូវសេរីភាពបញ្ចេញមតិរបស់ប្រជាពលរដ្ឋ និងអ្នកសារព័ត៌មានដោយពិនិត្យក្រមព្រហ្មទណ្ឌរបស់ខ្លួនឡើងវិញ។ ជំហររបស់ស្ថានទូតបារាំង គឺគាំទ្រចំពោះអ្នកសារព័ត៌មាន និងប្រព័ន្ធផ្សព្វផ្សាយឯករាជ្យដែលធ្វើការលើសេរីភាពបញ្ចេញមតិ និងសេរីភាពសារព័ត៌មាន។
ក្តីកង្វល់របស់ស្ថានទូតបារាំងចំពោះសំណុំរឿងអ្នកសារព័ត៌មាន ម៉ិច ដារ៉ាត្រូវបានលើកឡើងដោយផ្ទាល់នៅក្នុងជំនួបរវាងឯកអគ្គរដ្ឋទូតបារាំង លោក ហ្សាក់ ប៉ឺឡេ និងលោក ស សុខា រដ្ឋមន្ត្រីក្រសួងមហាផ្ទៃកាលពីថ្ងៃចន្ទ ទី០៧តុលា។ អ្នកនាំពាក្យរងក្រសួងមហាផ្ទៃ លោកទូច សុឃៈបានប្រាប់វិទ្យុបារាំងអន្តរជាតិ RFI នៅថ្ងៃព្រហស្បតិ៍ ទី១០ តុលានេះថា ក្នុងនាមជារដ្ឋមន្ត្រីក្រសួងមហាផ្ទៃ លោក ស សុខា តម្កល់ច្បាប់ជាធំ និងអនុវត្តទៅតាមផ្លូវច្បាប់តែប៉ុណ្ណោះ។ ក្នុងន័យនេះ បើបុគ្គលណាមួយប្រព្រឹត្តបទល្មើស នោះសមត្ថកិច្ចនឹងអនុវត្តទៅតាមច្បាប់ព្រហ្មទណ្ឌកម្ពុជា។
ក្រៅពីប្រតិកម្មរបស់ស្ថានទូតបារាំង ក្រសួងការបរទេសអាមេរិក តាមរយៈអ្នកនាំពាក្យលោក Matthew Miller ក៏បានបង្ហាញក្តីកង្វល់ជាពន់ពេកចំពោះការចាប់ខ្លួនលោក ម៉ិច ដារ៉ាដែរ។ ឆ្លើយតបនឹងសំណួររបស់អ្នកកាសែតនៅថ្ងៃ០៩ តុលា លោក Matthew Miller ថាអាមេរិកពិតជាបារម្ភខ្លាំងចំពោះការចាប់ខ្លួនលោក ម៉ិច ដារ៉ាដែលជាអ្នកកាសែតអន្តរជាតិដ៏គួរឲ្យគោរព។ តាមលោក Matthew Miller អាមេរិកបានលើករឿងនេះដោយផ្ទាល់ជាមួយរដ្ឋាភិបាលកម្ពុជាដោយលើកទឹកចិត្តឱ្យមានការបញ្ចេញមតិដោយចម្រុះ និងជំរុញឱ្យមានសារព័ត៌មានឯករាជ្យ។
អ្នកសារព័ត៌មានឯករាជ្យ លោក ម៉ិច ដារ៉ា ត្រូវបានមេធាវីការពារក្តីបញ្ជាក់នៅថ្ងៃទី១៥ ខែតុលានេះថា កូនក្តីរបស់ខ្លួនកំពុងមានជំងឺថប់អារម្មណ៍ដោយសារមិនបានទទួលដំណេកគ្រប់គ្រាន់ និងថា លោក ម៉ិច ដារ៉ា ក៏កំពុងបារម្ភពីម្តាយដែលមានវ័យចំណាស់ដែរ។ តាមមេធាវីការពារក្តីរូបនេះដដែល លោក ម៉ិច ដារ៉ា បានស្នើសុំនៅក្រៅឃុំបណ្តោះអាសន្ន ខណៈអ្នករួមអាជីពស្នើឲ្យដោះលែង លោក ម៉ិច ដារ៉ា។ នៅក្នុងកិច្ចសម្ភាសជាមួយវិទ្យុបារាំងអន្តរជាតិនាថ្ងៃទី១៥ តុលានេះ លោក ណុប វី នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា(ខាមបូចារ) ស្នើឲ្យអ្នកសម្រេចចិត្តលើករណីនេះមានការថ្លឹងថ្លែងរវាងកំហុសរបស់លោក ម៉ិច ដារ៉ា និងស្នាដៃរបស់លោកដែលបានចូលរួមដោះស្រាយបញ្ហាសង្គមតាមរយៈអត្ថបទស៊ើបអង្កេតពាក់ព័ន្ធនឹងការជួញដូរមនុស្សនៅកម្ពុជា។
គួរបញ្ជាក់ថាកាលពីឆ្នាំ ២០២៣ លោក ម៉ិច ដារ៉ាទទួលបានពានរង្វាន់អ្នកកាសែតឆ្នើម «Hero Awards» ពីសំណាក់លោក អង់តូនី ប្ល៊ីងកិន ប្រមុខការទូតសហរដ្ឋអាមេរិក។ ជាពានរង្វាន់សម្រាប់ការសរសេរអត្ថបទដ៏ល្បីល្បាញរបស់លោកពាក់ព័ន្ធនឹងការស៊ើបអង្កេតអំពីជួញដូរមនុស្ស និងការឆរបោកតាមប្រព័ន្ធអនឡាញនៅស្រុកខ្មែរ ពិសេសទាក់ទងនឹងជនជាតិចិននៅកំពង់សោម។
