កម្ពុជា កំណត់គោលដៅប្រើប្រាស់រថយន្តអគ្គិសនីឲ្យបាន ៤០% និងទោចក្រយានយន្តអគ្គិសនី ៧០% នៅត្រឹមឆ្នាំ ២០៥០ក្នុងពេលលោកខាងលិចដាក់ទណ្ឌកម្មចិន
17-December-2025 / សេដ្ឋកិច្ច
ភ្នំពេញ៖ រដ្ឋមន្ត្រីក្រសួងសាធារណការ និងដឹកជញ្ជូន បានអះអាងថា ក្រសួង បាន និងកំពុងកំណត់ទិដៅសម្រេចឲ្យបាននូវការប្រើប្រាស់រថយន្តអគ្គិសនីក្នុងអត្រា ៤០% និងទោចក្រយានយន្តអគ្គិសនីក្នុងអត្រា ៧០% នៅត្រឹមឆ្នាំ ២០៥០ ដោយស្របតាមយុទ្ធសាស្ត្រអភិវឌ្ឍន៍រយៈពេលវែងប្រកបដោយអព្យាក្រឹត្យកាបូនរបស់រាជរដ្ឋាភិបាល ខណៈការជំរុញការប្រើប្រាស់យានយន្តអគ្គិសនី គឺជាការចូលរួមចំណែកយ៉ាងសំខាន់ ក្នុងការកាត់បន្ថយផលប៉ះពាល់ ដែលបង្កឡើងដោយការបំភាយឧស្ម័នកាបូនឌីអុកស៊ីត (CO2) ចេញពីយានយន្តប្រភេទប្រេងឥន្ធនៈ ។
ក្នុងពិធីបើកសិក្ខាសាលាផ្សព្វផ្សាយគោលនយោបាយជាតិ ស្តីពីការអភិវឌ្ឍវិស័យយានយន្តអគ្គិសនី ២០២៤-២០៣០ នៅថ្ងៃទី១៨ ខែកញ្ញា ឆ្នាំ២០២៤ នាទីស្តីការក្រសួងសាធារណការ និង ដឹកជញ្ជូន។លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូនឲ្យដឹងថា៖ ក្នុងចំណោមយានយន្តសរុបជាង ៧,៥លានគ្រឿង មានទោចក្រយានយន្តប្រមាណ ៨៥% រថយន្តប្រើប្រាស់ប្រេងឥន្ធនៈធុនស្រាល ដែលជាប្រភេទរថយន្តទេសចរណ៍មានប្រមាណ ១០% និងរថយន្តប្រើប្រាស់ប្រើប្រាស់ឥន្ធនៈធុនធ្ងន់ ដែលជាប្រភេទរថយន្តដឹកទំនិញនិងគ្រឿងចក្រមានប្រមាណ ៥%។
លោករដ្ឋមន្ត្រី បានបញ្ជាក់ពីមូហេតុជម្រុញប្រើឡានអគ្គិសនីថា ការបង្កើនការប្រើប្រាស់យានយន្តអគ្គិសនី នឹងកាត់បន្ថយការបញ្ចេញឧស្ម័នពុលក្នុងសកលលោកប្រមាណពាក់កណ្តាលនៅឆ្នាំ២០៥០ ធៀបនឹងបច្ចុប្បន្ន និងកាត់បន្ថយការស្លាប់មុនអាយុពីប្រមាណ ៥,៤លាននាក់ នៅឆ្នាំ ២០២០ មកត្រឹមប្រមាណ ២,៨លាននាក់ នៅឆ្នាំ ២០៥០។យោងតាមទិន្នន័យរបស់ក្រសួងសាធារណការ និងដឹកជញ្ជូន បានឲ្យដឹងថា គិតត្រឹមខែសីហា ឆ្នាំ២០២៤ យានយន្តដែលបានចុះបញ្ជីមានចំនួនសរុបចំនួន ៧,៥៤លានគ្រឿង ក្នុងនោះទោចក្រយានយន្ត និងត្រីចក្រយានយន្តមានចំនួន ៦,៤០លានគ្រឿង, រថយន្តធុនស្រាល មានចំនួនជាង ៨៣ម៉ឺនគ្រឿង និងរថយន្តធុនធ្ងន់ មានចំនួនជិត ៣០ម៉ឺនគ្រឿង។
ក្នុងនោះផងដែរ មានយានយន្តអគ្គិសនីសរុប ៣.៦៧៦គ្រឿង ហើយក្នុងនោះរថយន្តមានចំនួន ២.១០៩គ្រឿង ត្រីចក្រយានយន្ត ចំនួន ៤៤៥គ្រឿង និងទោចក្រយានយន្តចំនួន ១.១២២គ្រឿង។ ចំណែកទីតាំងបញ្ចូលថាមពលអគ្គិសនីនៅទូទាំងប្រទេសមានចំនួន ២១កន្លែង ដែលមានទូរបញ្ចូលថាមពលយានយន្តអគ្គិសនីលឿនខ្លាំងសរុបចំនួន ២៧ទូរ។គេមិនទាន់ដឹងថាតើរថយន្តអគ្គិសនីដែលរដ្ឋមន្ត្រីក្រសួងសាធារណៈការលើកទឹកចិត្តឲ្យប្រើប្រាស់វាជាររថុយបន្តមកពីប្រទេសណាខ្លះនោះទេ?។
ទាក់ទិនឡានអគ្គិសនីនេះដែរនៅហភាពអឺរ៉ុបវិញគេ បានសម្រេច ដាក់ពន្ធគយបន្ថែមទៀតលើរថយន្តអគ្គិសនីផលិតនៅស្រុកចិនដែលត្រូវនាំចូលទៅលក់នៅអឺរ៉ុប។ ទម្ងន់ពន្ធគយ ដែលអនុម័តពីថ្ងៃសុក្រម្សិលមិញនេះ ចាប់ឡើងពី១០% ទៅ៣៥% ថែមលើពន្ធដែលមានស្រាប់ពីមុន។ ក្នុងចំណោមរដ្ឋសមាជិកសហភាពអឺរ៉ុបទាំង២៧ប្រទេស មានរដ្ឋមួយចំនួននាំអាទិ៍ដោយអាល្លឺម៉ង់ បានបដិសេធជំទាស់ មិនចង់ឲ្យដាក់ពន្ធលើឡានអគ្គិសនីចិនយ៉ាងច្រើនខ្លាំងពេកទេ ពីព្រោះមិនចង់ឃើញ សហភាពអឺរ៉ុបប្រកាសសង្គ្រាមពាណិជ្ជកម្មជាមួយចិន ដូចលំអានជម្លោះរបស់សហរដ្ឋអាមេរិក។ ប្រតិកម្មភ្លាមៗ រដ្ឋមន្ត្រីក្រសួងពាណិជ្ជកម្មរបស់ចិន បានរិះគន់ថ្កោលទោស និងបដិសេធយ៉ាងដាច់អហង្ការចំពោះវិធានការរបស់សហភាពអឺរ៉ុប ព្រមទាំងប្រកាសសងសឹកទៀតផង។
គោលបំណងចម្បងនៃចំណាត់ការនេះ ត្រូវសហភាពអឺរ៉ុបពន្យល់ថា ដើម្បីការពារផលប្រយោជន៍ក្រុមហ៊ុនផលិតរថយន្តរបស់អឺរ៉ុប ហើយនិងការពារការងាររបស់បុគ្គលិកនិយោជិត ប្រមាណជា ១៤ លានការងារ ដែលរងគ្រោះព្រោះតែការប្រកួតប្រជែងមិនស្មោះត្រង់របស់ចិន។ ការប្រកួតប្រជែងមិនស្មោះត្រង់ ទីនេះ សំដៅទៅលើ ការឧបត្ថម្ពធនពីសំណាក់រដ្ឋអំណាចក្រុងប៉េកាំង ចំពោះក្រុមហ៊ុនផលិតរថយន្តអគ្គិសនីរបស់ចិន ដែលអាចឲ្យក្រុមហ៊ុនទាំងនោះ អាចផលិតបានយ៉ាងលឿនរហ័សពេក ហើយដែលជាហេតុបង្កឲ្យប៉ះពាល់ដល់ទីផ្សារឡានអគ្គិសនីអឺរ៉ុបនិងនៅលើពិភពលោក។
អាល្លឺម៉ង់ នាំអាទិ៍ដឹកមុខប្រទេស ហុងគ្រី ស្លូវ៉ាគី ស្លូវេនី ម៉ាល់ត៍ មានជំហរបដិសេធ មិនចង់ឲ្យដាក់ពន្ធខ្លាំងលើចិនពេកទេ។ រដ្ឋមន្ត្រីក្រសួងហិរញ្ញវត្ថុអាល្លឺម៉ង់ លោក Christian Linder ព្រមានក្រឿនរំឭកថា សហភាពអឺរ៉ុបមិនត្រូវប្រកាសសង្គ្រាមពាណិជ្ជកម្មជាមួយនឹងចិននោះឡើយ។ ផ្ទុយទៅវិញ ប្រទេសផ្សេងទៀតយល់ព្រមឯកភាពឲ្យដាក់ពន្ធធ្ងន់លើចិន មានបែបយ៉ាង បារាំង អ៊ីតាលី និងប៉ូឡូញ ជាដើម។ តែក៏មានរដ្ឋសមាជិកខ្លះ អនុប្បវេទ។ ទោះម្តេចក្តី ក្នុងសេចក្តីប្រកាសព័ត៌មាន នៅថ្ងៃសុក្រ ទី៤តុលា ពីក្រុងព្រុចសែល, សហភាពអឺរ៉ុបអបអរសាទរ ដោយគូសបញ្ជាក់ថាបានទទួលសំឡេងភាគច្រើនគ្រប់គ្រាន់ពីរដ្ឋសមាជិក ដើម្បីសម្រេចដាក់ពន្ធលើរថយន្តអគ្គិសនីរបស់ចិន។
អ្នកតំណាងក្រុមហ៊ុនឡានចិន ម៉ាកឈីលី (Geely) បានបង្ហាញក្តីសោកស្តាយខកចិត្តខ្លាំងចំពោះការសម្រេចចិត្តរបស់សហភាពអឺរ៉ុប និងព្រមានថា ការធ្វើដូច្នេះប្រឈមមុខនឹងហានិភ័យធ្ងន់ធ្ងរដល់ទំនាក់ទំនងសេដ្ឋកិច្ចរវាងសហភាពអឺរ៉ុប និងចិន។ ស្រដៀងគ្នាដែរ សមាគមសភាពាណិជ្ជកម្មអឺរ៉ុប-ចិន ក៏ទទូចឲ្យសហភាពអឺរ៉ុបពិចារណាឡើងវិញ និងពន្យារពេលអនុវត្តវិធានាការពន្ធគយដ៏ធ្ងន់យ៉ាងដូច្នេះ។ក្នុងសំណុំរឿងដាក់ពន្ធគយលើរថយន្តអគ្គិសនីចិន, សហរដ្ឋអាមេរិក ក្រោមរដ្ឋបាលលោកប្រធានាធិបតី ចូ បៃដិន បានដាក់ពន្ធ១០០% កាលពីខែមេសាកន្លងទៅ ដែលពីមុខ ត្រឹមតែ២៥%ប៉ុណ្ណោះ៕
