អាជ្ញាធរស្រុកុំមេសាងជួសជុលផ្លូវមួយខ្សែប្រវែង៧គីឡូម៉ែត្រប្រជាពលរដ្ឋសាទរ
19-November-2024 / សេដ្ឋកិច្ច
ព្រៃវែង៖ផ្លូវលំ១ខ្សែ មានចម្ងាយប្រហែល ៧ គីឡូម៉ែត្រ ឆ្លងកាត់ចំនួន៣ ឃុំច្រេស ឃុំព្រៃរំដេង និងឃុំអង្គរស ស្ថិតក្នុងស្រុកមេសាង ខេត្តព្រៃវែង ត្រូវបានថ្នាក់ដឹកនាំអាជ្ញាធរដែនដីស្រុកមេសាង ធ្វើការចាក់ដីលុបជង្ហុកក្រហេងក្រហូង គៀរកិន បង្ហាប់ដើម្បីសម្រួលដល់ការធ្វើដំណើររបស់បងប្អូនប្រជា ពលរដ្ឋក្នុងមូលដ្ឋានក្នុងរដូវវស្សារឆ្នាំនេះ.។
នៅរសៀលថ្ងៃទី ០៨ ខែកក្កដាឆ្នាំ ២០២៤ ក្រុមរថយន្តដឹកដី និងគ្រឿងចក្រ មាន រ៉ូឡូកិនបង្ហាប់ និងត្រាក់ទ័រឈូសដី របស់ក្រុមហ៊ុនទ្រី ហេន បានធ្វើការដឹកជញ្ជូនដី និងឈូសគៀរកិន បង្ហាប់នៅតាមជង្ហុកក្រហេង ក្រហូង លើផ្លូវលំ១ខ្សែ ចាប់ពី ផ្សារច្រេស( ចាន់ស្នារ) រហូត ដល់ព្រំប្រទល់ឃុំអង្គរស ។ លោក ឌុច ឈាវ មេភូមិព្រៃចេក ឃុំព្រៃរំដេងថា : ផ្លូវ១ខ្សែលំនេះឆ្លងកាត់ឃុំច្រេស និងឃុំព្រៃរំដេងនិង ឃុំអង្គរស មានប្រវែង ជាង ៦០០០ ម៉ែត្រ ស្ថិតក្រោមការកសាង ជួសជុលថែទាំរបស់មន្ទីរអភិវឌ្ឍន៍ជនបទខេត្តព្រៃវែង ។ ដោយមើលឃើញ ពីការលំបាកក្នុងការធ្វើចរាចរណ៍ដឹកជញ្ជូនកសិផលផ្សេងៗ ក៏ដូចជាការធ្វើដំណើររបស់បងប្អូនប្រជា ពលរដ្ឋ និងសិស្សានុសិស្សទៅសាលារៀន ជារៀងរាល់ថ្ងៃក្នុងរដូវវស្សាឆ្នាំនេះ ព្រោះស្ថានភាពផ្លូវទទួលរងការខូចខាតធ្ងន់ធ្ងរ មានជង្ហុក ក្រហេងក្រហូងជ្រៅៗ ជាអន្លើៗតាមដងផ្លូវ ទើបរូប លោក( ឌុច ឈាវ )ក្នុងនាមជា អាជ្ញាធរដែនដីមូលដ្ឋានបានគោរពស្នើសុំទៅតាមឋានានុក្រមតាមរយ:ថ្នាក់ដឹកនាំឃុំព្រៃរំដេងទៅថ្នាក់ដឹកនាំស្រុកមេសាង ដើម្បីទទួលបានថវិកាយកមកចំណាយលើ ការដឹកដីចាក់លុប និងកិនបង្ហាប់តាមជង្ហុក ក្រហេង ក្រហូងលើផ្លូវនេះ ។
លោក ឌុច ឈាវ មេភូមិ ព្រៃចេកបានបញ្ជាក់ថា : តាមលោកដឹងថវិកាដែលចំណាយលើការដឹកជញ្ជូនដី ចាក់លុបកិនបង្ហាប់ពង្រាបតាមក្រហេង ក្រហូងជង្ហុកលើដងផ្លូវលំនេះមានចំនួន៩០លានរៀល គឺជាថវិការបស់ស្រុកមេសាង ។ លោកបញ្ជាក់ថា : ដំបូងលោកស្នើសុំ បានតែចំនួន៥០លានរៀលទេ ប៉ុន្តែក្រោយពេលអាជ្ញាធរស្រុកមេសាងពិនិត្យឃើញថាផ្លូវនេះឆ្លងកាត់៣ឃុំ ហើយទទួលរងការខូចខាតដូចគ្នាក៏សម្រេចបន្ថែម៤០លានរៀលទៀត ដូច្នេះសរុបទៅថវិកាទាំងអស់មានចំនួន៩០លានរៀល ។ លោក កែវ ពិសី អភិបាល នៃគណ:អភិបាល ស្រុកមេសាង បានបញ្ជាក់ប្រាប់ និពន្ធនាយកគេហទំព័រ មាតុភូមិ នៅរសៀលថ្ងៃទី ០៨ កក្កដា ឆ្នាំ ២០២៤ តាមទូរស័ព្ទថា : ផ្លូវលំ ១ខ្សែនេះពីផ្សារច័ន្ទស្នារ ( ច្រេស) រហូតដល់ព្រំ ប្រទល់ឃុំអង្គរស មានប្រវែង ៧ គីឡូម៉ត្រ ឆ្លងកាត់ ៣ ឃុំ មានឃុំច្រេស ឃុំព្រៃរំដេង និង ឃុំអង្គរស ស្ថិតក្នុងស្រុកមេសាង ខេត្តព្រៃវែង មានការ ខូចខាតធ្ងន់ធ្ងរ ជង្ហុក ក្រហេង ក្រហូងជ្រៅជាច្រើនកន្លែង ដោយ មើលឃើញការលំបាកក្នុងការធ្វើ ដំណើររបស់បងប្អូនប្រជាពលរដ្ឋ ក្នុងនាមរូបលោក ( កែវ ពិសី ) ជាថ្នាក់ដឹកនាំស្រុកមេសាង ដែល ទទួលបានការគោរពស្នើសុំពីមេភូមិ មេឃុំ តាមសំណូមពររបស់ប្រជាពលរដ្ឋក្នុងមូលដ្ឋាន លោកក៏បានសម្រេចចិត្តយក ថវិកាសាលាស្រុកមេសាងចំណាយលើការជួសជុលថែទាំផ្លូវនេះជាបណ្តោះអាសន្ន មិនមែនជាការថែទាំឬជួសជុលប្រចាំឆ្នាំទេ នេះគឺជាការជួសជុលបឋមតែប៉ុណ្ណោះ ព្រោះផ្លួវលំ១ខ្សែនេះ ម្ចាស់គម្រោងគឺមន្ទីរអភិវឌ្ឍន៍ជនបទខេត្តព្រៃវែង ។
លោកអភិបាល ស្រុក មេសាង បានបញ្ជាក់ថា : ថវិកាដែលត្រូវចំណាយលើការជួសជុលជាបឋមនេះ មានចំនួន ៩០លានរៀល ហើយក្រុមហ៊ុន ទ្រី ហេន ជាអ្នកទទួលម៉ៅការ ដឹកដី ចាក់លុបកិនគៀរបង្ហាប់ពង្រាបដី រហូតរួចរាល់ ។ បាន ឃើញរថយន្តនិងគ្រឿងចក្រដឹកដីកិនបង្ហាបលុបជង្ហុកក្រហេងក្រហូងលើដងផ្លូវបែបនេះ ប្រជាពលរដ្ឋរស់នៅក្នុងភូមិ-ឃុំ ខាងលើមានការសប្បាយរីករាយត្រេកអរខ្លាំងដោយបានផ្លូវល្អងាយស្រួលធ្វើដំណើរ ក្នុងរដូវវស្សាឆ្នាំនេះ ។ ប៉ុន្តែទោះជាយ៉ាងណាពួកគាត់ក៏នៅតែទទូចសំណូមពរសុំដល់ថ្នាក់ដឹកនាំខេត្តព្រៃវែង ជាពិសេសប្រមុខដឹកនាំប្រទេស សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និង ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រី ក្រសួងមហាផ្ទៃ មេត្តាចុះពិនិត្យមើលដោយផ្ទាល់និងជួយកសាងស្ថាបនាផ្លូវលំ១ខ្សែនេះអោយក្លាយជាផ្លូវចាក់កៅស៊ូ សំរាប់ប្រជាពលរដ្ឋប្រើប្រាស់ផងទាន ! ៕ ដោយ: ស៊ុន សុផល Tel: 012 953 824 / 016 953 222
