ខ្មែរព្រួយករណីយ៍ថៃពន្លឿនច្បាប់ប្រែក្លាយកាស៊ីណូក្នុងប្រទេសឲ្យ ទៅជាអាជីកវម្មស្របច្បាប់
កម្ពុជា៖មន្ត្រី និងអ្នកជំនាញបានលើកឡើងថា ប្រសិនបើថៃមានច្បាប់អនុញ្ញាតឱ្យបើកកាស៊ីណូ ស្របច្បាប់នៅក្នុងប្រទេស នោះវានឹងអាចជះឥទ្ធិពលអវិជ្ជមាន ដល់អាជីវកម្មកាស៊ីណូនៅកម្ពុជា ជាពិសេសកាស៊ីណូ នៅតាមបណ្តោយព្រំដែនកម្ពុជា-ថៃ។
សូមបញ្ជាក់ថាប្រទេសថៃ បាននិងកំពុងពន្លឿនសិក្សាធ្វើសេចក្តីព្រាងច្បាប់ ដើម្បីអនុញ្ញាតឱ្យបង្កើតកាស៊ីណូស្របច្បាប់ នៅក្នុងកន្លែងកម្សាន្តធំៗ ក្នុងគោលបំណងទាក់ទាញភ្ញៀវទេសចរ ដែលមានការចំណាយខ្ពស់ ខណៈនាយករដ្ឋមន្ត្រីថៃ លោក សេដ្ឋា ថាវីស៊ីន បានបង្ហាញការគាំទ្រផែនការធ្វើឱ្យកាស៊ីណូ ក្លាយជាអាជីវកម្មស្របច្បាប់ ដើម្បីដាក់ឱ្យមកស្ថិតក្រោមការត្រួតពិនិត្យកាន់តែប្រសើរឡើង និងប្រមូលពន្ធឱ្យបានត្រឹមត្រូវ។ នេះបើយោងតាមកាសែតបាងកកប៉ុស្តិ៍។
បណ្ឌិត ហុង វណ្ណៈ អ្នកជំនាញសេដ្ឋកិច្ចនៃរាជ្យបណ្ឌិតសភាកម្ពុជា បានប្រាប់បណ្តាញព័ត៌មាន Fresh News ថា ប្រសិនបើថៃមានច្បាប់អនុញ្ញាតឱ្យបើកកាស៊ីណូ ស្របច្បាប់នៅប្រទេស នោះអាចជះនឹងជះផលប៉ះពាល់មួយចំនួន ដល់អាជីវកម្មកាស៊ីណូនៅកម្ពុជា ជាពិសេសកាស៊ីណូនៅតាមព្រំដែនកម្ពុជា-ថៃ។លោកលើកឡើងថា បើសិនជាមណ្ឌលកម្សាន្តកាស៊ីណូនោះនៅកៀកនឹងព្រំដែន នោះភ្ញៀវទេសចរដែលធ្លាប់តែមកលេងកាស៊ីណូនៅកម្ពុជា នឹងមិនឆ្លងដែនមកកម្ពុជាទៀតឡើយ ដោយគេមានជម្រើសកន្លែងថ្មី។ ប៉ុន្តែប្រសិនបើការបង្កើតកាស៊ីណូ មានតែនៅទីក្រុងបាកក ឬកន្លែងកម្សាន្តល្បី ដូចនៅប៉ាត់តាយ៉ា ដែលឆ្ងាយពីព្រំដែនកម្ពុជា នោះផលប៉ះនឹងមានតិចតួចប៉ុណ្ណោះ ដោយភ្ញៀវថៃដែលនៅជិតព្រំដែនកម្ពុជា នឹងនៅតែបន្តមកលេងនៅកម្ពុជា។លោកកត់សម្គាល់ថា ភ្ញៀវទេសចរដែលមកលេងកាស៊ីណូនៅកម្ពុជា មានមកពីប្រទេសហ្វីលីពិន ម៉ាឡេស៊ី ឥណ្ឌូនេស៊ី សិង្ហបុរី និងមួយចំនួនទៀតមកពីប្រទេសថៃ។ ប្រសិនបើមានកាស៊ីណូនៅក្នុងទីក្រុងធំៗរបស់ថៃ នឹងផ្តល់ជាជម្រើសមួយទៀតដល់ពួកគេ ហេតុដូច្នេះនឹងបណ្តាលឱ្យរងផលប៉ះពាល់អាជីវកម្មកាស៊ីណូនៅកម្ពុជា។
ឯ បណ្ឌិត ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក បានប្រាប់បណ្តាញព័ត៌មាន Fresh News ដែរថា ប្រសិនបើផែនការធ្វើច្បាប់អនុញ្ញាតឱ្យបើកដំណើរកាស៊ីណូនៅថៃស្របច្បាប់ និងបើកឱ្យពលរដ្ឋថៃអាចចូលលេងបានមែន នោះនឹងផ្តល់ផលប៉ះដល់អាជីវកម្មកាស៊ីណូ និងសេដ្ឋកិច្ចនៅតាមព្រំដែន ដូចជា នៅប៉ោយប៉ែត កោះកុងជាដើម។ លោកបារម្ភថា ជនជាតិចិនដែលធ្លាប់លេងកម្សាន្ត ក្នុងកាស៊ីណូនៅតាមតំបន់ទាំងនោះ ក៏អាចនឹងទៅលេងនៅប្រទេសថៃផងដែរ។បើតាមការប៉ាន់ស្មានរបស់ បណ្ឌិត ធួន ស៊ីណាន នៅក្នុងឆ្នាំ២០២៣ និងឆ្នាំ២០២៤នេះ ភ្ញៀវទេសចរដែលបានឆ្លងកាត់តាមព្រំដែន មកលេងកាស៊ីណូនៅកម្ពុជា មានប្រមាណ៤០% នៃភ្ញៀវទេសចរសរុប។
ដូចគ្នាដែរលោក រស់ ភារុណ អគ្គលេខាធិការគណៈកម្មការគ្រប់គ្រងល្បែងពាណិជ្ជកម្មកម្ពុជា ក៏ឃើញពីបញ្ហាប្រឈមសម្រាប់វិស័យកាស៉ីណូនៅកម្ពុជាផងដែរ នៅពេលដែលថៃ អនុញ្ញាតឱ្យមានកាស៉ីណូស្របច្បាប់ក្នុងប្រទេសនោះ។បើតាមលោក រស់ ភារុណ ក្នុងឆមាសទី១ ឆ្នាំ២០២៤នេះ ការប្រមូលចំណូលពីវិស័យកាស៊ីណូ នៅកម្ពុជា សម្រេចបាន ៥៦% នៃផែនការថវិកា ៤៣លានដុល្លារអាមេរិក ឬស្មើនឹងប្រមាណ ២៤លានដុល្លារអាមេរិក។
កាសែតបាងកកប៉ុស្តិ៍បានរាយការណ៍ថា សេចក្តីព្រាងច្បាប់ដែលអនុញ្ញាតឱ្យកាស៊ីណូ ដែលមានអាជ្ញាប័ណ្ណដំបូងរយៈពេល ៣០ឆ្នាំ ត្រូវបានក្រុមប្រឹក្សារដ្ឋ ដែលជាទីភ្នាក់ងារច្បាប់របស់រដ្ឋាភិបាលចេញផ្សាយ ដើម្បីទទួលមតិសាធារណៈរហូតដល់ថ្ងៃទី១៨ ខែសីហា។ ប្រតិបត្តិករកាស៊ីណូនឹងមានជម្រើសបន្តអាជ្ញាប័ណ្ណរយៈពេល ១០ ឆ្នាំទៀត ក្រោយអស់សុពលភាពរយៈពេលដំបូង ហើយកាស៊ីណូអាចប្រតិបត្តិការ នៅតាមទីតាំងកម្សាន្តកម្សាន្តធំៗ រួមជាមួយនឹងសណ្ឋាគារ មជ្ឈមណ្ឌលសន្និបាត និងសួនកម្សាន្តជាដើម។
ប្រទេសថៃក៏ដូចជាប្រទេសអាមីរ៉ាតអារ៉ាប់រួម និងជប៉ុន កំពុងប្រកួតប្រជែងដំណ្តើម ចំណែកទីផ្សារឧស្សាហកម្មកាស៊ីណូពិភពលោក ដែលក្រុមហ៊ុន IBIS World បានប៉ាន់ប្រមាណថា អាចរកចំណូលបាន ២៦៣ពាន់លានដុល្លារកាលពីឆ្នាំមុន។ប្រតិបត្តិករកាស៊ីណូ Galaxy Entertainment Group Ltd និងប្រតិបត្តិករ MGM Resorts International បាននិងកំពុងសិក្សាពីសក្តានុពលនៃការបើករមណីយដ្ឋានកាស៊ីណូ នៅក្នុងព្រះរាជាណាចក្រថៃ ដើម្បីបង្ការទៅនឹងការរំពឹងទុក ដែលមិនច្បាស់លាស់នៅក្នុងទីក្រុងម៉ាកាវ ប្រទេសចិន។ ក្រុមហ៊ុន Las Vegas Sands Corp បានឱ្យដឹងកាលពីខែមុនថា ខ្លួនចាប់អារម្មណ៍ក្នុងការពង្រីកអាជីវកម្មកាស៊ីណូទៅកាន់ប្រទេសថៃ ប្រសិនបើ «ច្បាប់អនុញ្ញាត» ។
នាយករដ្ឋមន្ត្រីថៃលោក សេដ្ឋា ថាវីស៊ីន ដែលកាន់អំណាចតិចជាងមួយឆ្នាំមុន បាននិងកំពុងជំរុញគោលនយោបាយ ទាក់ទាញការវិនិយោគពីបរទេស និងគាំទ្រផែនការធ្វើឱ្យកាស៊ីណូ ក្លាយជាអាជីវកម្មស្របច្បាប់ ដើម្បីដាក់ឱ្យមកស្ថិតក្រោមការត្រួតពិនិត្យកាន់តែប្រសើរឡើង ដើម្បីប្រមូលពន្ធឱ្យបានត្រឹមត្រូវ។សភាតំណាងរាស្ត្រដែលមានសមាជិកចំនួន ៥០០នាក់របស់ប្រទេសថៃ បានគាំទ្ររួចហើយ ចំពោះការសិក្សាមួយ ដែលធ្វើឡើងដោយសមាជិកសភាមួយក្រុម ដែលគាំទ្រឱ្យមានការបង្កើតកាស៊ីណូ ស្របច្បាប់នៅក្នុងកន្លែងកម្សាន្តធំៗ ដើម្បីទាក់ទាញភ្ញៀវទេសចរ ដែលមានការចំណាយខ្ពស់។ ការសិក្សាបានរកឃើញថា ប្រទេសថៃអាចបង្កើនចំណូលពីទេសចរណ៍បានប្រហែល ១២ពាន់លានបាតពីការធ្វើឱ្យកាស៊ីណូមានភាពស្របច្បាប់ និងពីការស្នាក់នៅក្នុងបរិវេណមណ្ឌលកម្សាន្តធំៗ។ នេះបើយោងតាមកាសែតបាងកកប៉ុស្តិ៍៕
