យោធាអ៊ីស្រាអែល ថា មេដឹកនាំក្រុមហេសបូឡា ត្រូវបានសម្លាប់ ក្នុងការវាយប្រហារតាមផ្លូវអាកាស លើរដ្ឋធានីរបស់លីបង់ តែមិនច្បាស់!?
19-April-2025 / ព័ត៌មានអន្តរជាតិ
ប្រទេសលីបង់៖ យោធាអ៊ីស្រាអែលបានប្រកាសថា មេដឹកនាំក្រុមហេសបូឡា លោក Hassan Nasrallah ត្រូវបានសម្លាប់ ក្នុងការវាយប្រហារតាមផ្លូវអាកាស លើរដ្ឋធានីបេរូតរបស់ប្រទេសលីបង់។ ទីភ្នាក់ងារព័ត៌មាន AFP នាថ្ងៃសៅរ៍ ទី២៨ ខែកញ្ញា ឆ្នាំ២០២៤បានឲ្យដឹងថា៖អ្នកនាំពាក្យយោធាអ៉ីស្រាអែល លោក Nadav Shoshani បានប្រកាសនៅលើប្រព័ន្ធ X យ៉ាងដូច្នេះថា «Hassan Nasrallah បានបាត់បង់ជីវិតហើយ»។ ឯអ្នកនាំពាក្យយោធាអ៊ីស្រាអែលម្នាក់ទៀត គឺលោក David Avraham ក៏បានបញ្ជាក់ប្រាប់ AFP ផងដែរថា មេដឹកនាំហេសបូឡារូបនោះ ត្រូវបាន «កម្ចាត់» ក្រោយការវាយប្រហារតាមផ្លូវអាកាស លើទីក្រុងបេរូត កាលពីថ្ងៃសុក្រទី២៦កញ្ញាសប្តាហ៍នេះ។
ប្រភពជិតស្និទ្ធជាមួយក្រុមហេសបូឡា បានឱ្យដឹងនាថ្ងៃសៅរ៍នេះថា លោក Hassan Nasrallah គឺពុំអាចទាក់ទងបាន តាំងតែពីយប់ថ្ងៃសុក្រ ប៉ុន្តែមិនបានបញ្ជាក់ថា Nasrallah ត្រូវបានសម្លាប់ ក្នុងការវាយប្រហាររបស់អ៊ីស្រាអែល ឬយ៉ាងណាទេ។ដោយទ្បែកបើតាម ទីភ្នាក់ងារសារព័ត៌មាន Tasnim របស់អ៊ីរ៉ង់ក៏បានរាយការណ៍ថា លោក Nasrallah មេដឹកនាំហេស បូទ្បាមានសុវត្ថិភាព ពុំមានរងគ្រោះថ្នាក់នោះទេ។ ទីភ្នាក់ងារនេះបានបង្ហាញថា អគារចំនួនប្រាំមួយត្រូវបានបំផ្លាញក្នុងការវាយប្រហាររបស់អ៊ីស្រាអែល។ សារព័ត៌មានលីបង់ Al Manar វិញបានរាយការណ៍ថា ការវាយប្រហារនៅជាយក្រុងបានបណ្តាលឲ្យមនុស្សយ៉ាងហោចណាស់ ៦នាក់ស្លាប់ និង ៧៦នាក់រងរបួស ប៉ុន្តែមិនបាននិយាយពីលោក Nasrallah ទេ។
យោធាអ៊ីស្រាអែលបានវាយប្រហារតំបន់ជាយក្រុងភាគខាងត្បូងនៃទីក្រុង Beirut បួនដងក្នុងមួយសប្តាហ៍កន្លងមក ដោយបានសម្លាប់មេបញ្ជាការកំពូលរបស់ Hezbollah យ៉ាងហោចណាស់បីនាក់គឺ Ibrahim Aqil, Ahmed Wahbi និង Ibrahim Qubaisi ។ ការវាយប្រហារទាំងនេះគឺជាផ្នែកមួយនៃយុទ្ធនាការទម្លាក់គ្រាប់បែកឆ្លាតដែលអាចទម្លាយេហូតជាង៤០ម៉ែត្រចូលក្នុងដីរបស់អ៊ីស្រាអែលដែលមានគោលដៅលើក្រុមហេសបូឡា និងវាយប្រហារទីតាំងផ្សេងៗក្នុងប្រទេសលីបង់។ យោងតាមក្រសួងសុខភាពរបស់ប្រទេសលីបង់ យ៉ាងហោចណាស់មនុស្ស ១,៣០០ នាក់ត្រូវបានសម្លាប់នៅក្នុងការវាយប្រហាររបស់អ៊ីស្រាអែល។
ទាក់ទងការវាយប្រហារនេះដែរកាលពីថ្ងៃសុក្រសប្តាហ៍នេះ ទីប្រឹក្សាជាន់ខ្ពស់មួយរូប របស់មេដឹកនាំកំពូលនៃប្រទេសអ៊ីរ៉ង់ បានចេញមុខព្រមានថា អ៊ីស្រាអែលកំពុងតែឈានជើងឆ្លង ខ្សែបន្ទាត់ក្រហមរបស់ទីក្រុងតេហរ៉ង់ ហើយស្ថានការណ៍កំពុងវិវត្តទៅរកសភាពធ្ងន់ធ្ងរជាខ្លាំង បន្ទាប់ពីអ៊ីស្រាអែលបានវាយប្រហារតាមផ្លូវអាកាស លើទីបញ្ជាការកណ្តាល របស់ក្រុមហេសបូឡា (Hezbollah) នៅភាគខាងត្បូងរដ្ឋធានី Beirut របស់ប្រទេសលីបង់។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃសៅរ៍ ទី២៨ ខែកញ្ញា ឆ្នាំ២០២៤។
មន្ត្រីជាន់ខ្ពស់អ៊ីស្រាអែលម្នាក់ បានប្រាប់ក្រុមអ្នកសារព័ត៌មានថា មេដឹកនាំកំពូលរបស់ Hezbollah គឺលោក Sayyed Hassan Nasrallah ត្រូវបានកំណត់គោលដៅ ក្នុងការវាយប្រហារលើទីក្រុង Beirut កាលពីថ្ងៃសុក្រ។ ទីប្រឹក្សាមេដឹកនាំកំពូលអ៉ីរ៉ង់ បានលើកឡើងថា ការធ្វើឃាតនឹងមិនអាចដោះស្រាយ បញ្ហារបស់អ៊ីស្រាអែលបានឡើយ ប្រសិនបើមេដឹកនាំចលនាតស៊ូត្រូវបានសម្លាប់ នោះអ្នកផ្សេងទៀតនឹងឡើងជំនួសកន្លែងពួកគេ។
កាលពីដើមខែសីហា មេដឹកនាំនយោបាយរបស់ក្រុមហាម៉ាសប៉ាឡេស្ទីន ដែលស្ថិតក្នុងសង្គ្រាមជាមួយអ៊ីស្រាអែល នៅតំបន់ហ្កាហ្សា ត្រូវបានគេធ្វើឃាតនៅទីក្រុងតេហេរ៉ង់ ខណៈអ៉ីរ៉ង់និងហាម៉ាស បានទម្លាក់កំហុសទៅលើអ៉ីស្រាអែល។ ភ្លាមៗ ក្រុមហាម៉ាស ក៏បានតែងតាំងលោក Yahya Sinwar ជាមេដឹកនាំនយោបាយថ្មីរបស់ខ្លួន។បើតាមប្រភពពីមន្ត្រីសន្តិសុខជាន់ខ្ពស់អ៊ីរ៉ង់ ទីក្រុងតេហេរ៉ង់ កំពុងផ្ទៀងផ្ទាត់ស្ថានភាពរបស់លោក Nasrallah ក្រោយការវាយប្រហាររបស់អ៊ីស្រាអែល ខណៈប្រភពមួយទៀត ដែលជិតស្និទ្ធនឹង Hezbollah បានអះអាងប្រាប់ Reuters ថា លោក Nasrallah នៅមានជីវិត។ យ៉ាងណាមិញ ក្រុម Hezbollah ផ្ទាល់ មិនទាន់ចេញសេចក្តីថ្លែងការណ៍ផ្លូវការណាមួយ នៅឡើយទេ។
គួរបញ្ជាក់ថា ប្រមាណជា១សប្តាហ៍ចុងក្រោយនេះ បើតាមអាជ្ញាធរសុខាភិបាលលីបង់ មនុស្សលើស៧០០នាក់ បានបាត់បង់ជីវិត ដោយសារការវាយប្រហារតាមផ្លូវអាកាសរបស់អ៊ីស្រាអែល។ ការកើនឡើងខ្លាំងនៃភាពតានតឹង បានបង្កើនក្តីបារម្ភថា ជម្លោះដែលមានរយៈពេលជិត១ឆ្នាំ រវាងអ៊ីស្រាអែលនិងហេសបូឡា បូករួមជាមួយសង្គ្រាមរបស់អ៊ីស្រាអែល ប្រឆាំងក្រុមហាម៉ាស នៅហ្កាហ្សា អាចនឹងផ្ទុះរាលដាលទៅជាសង្គ្រាមទ្រង់ទ្រាយធំ នៅតំបន់មជ្ឈិមបូព៌ាទាំងមូល ដ្បិតហេសបូឡានិងហាម៉ាស មានអ៉ីរ៉ង់ជាខ្នងបង្អែក ខណៈអ៉ីស្រាអែល មានសហរដ្ឋអាមេរិក ជាសម្ព័ន្ធមិត្តដ៏រឹងមាំបំផុត។
