ខ្មែរនៅកូរ៉េនិងអូស្ត្រាលីចេញធ្វើបាតុកម្មប្រឆាំងគម្រោងអភិវឌ្ឍន័ត្រីកោណកម្ពុជាវៀតណាមឡាវនៅភ្នំពេញយោធាចេញការគាំទ្ររាជរដ្ឋាភិបាល
21-September-2026 / ព័ត៌មានជាតិ
កូរ៉េ៖មានការធ្វើបាតុកម្មប្រឆាំងគម្រោងអភិវឌ្ឍន៍តំបន់ត្រីកោណCLVរបស់ពលរដ្ឋខ្មែររស់នៅប្រទេសកូរ៉េ ជប៉ុន និងអូស្ត្រាលីបានចាប់ផ្តើមឡើងនៅព្រឹកថ្ងៃ១១ សីហានេះ។ នៅកូរ៉េខាងត្បូង មានពលរដ្ឋខ្មែរប្រមាណ២ម៉ឺននាក់បានចេញមកធ្វើបាតុកម្មនៅកណ្តាលទីក្រុងសេអ៊ូល ដើម្បីទាមទារឱ្យរដ្ឋាភិបាលកម្ពុជាដកខ្លួនចេញពីគម្រោងតំបន់ត្រីកោណអភិវឌ្ឍន៍កម្ពុជា ឡាវ វៀតណាម។នេះបើតាមគណៈកម្មការរៀបចំមហាបាតុកម្មឱ្យកាសែតដឹង។
ក្រុមបាតុករជាពលរដ្ឋខ្មែររស់នៅប្រទេសកូរ៉េក៏ស្នើឱ្យតុលាការខ្មែរដោះលែងសកម្មជនការពារបរិស្ថាននៃចលនាមាតាធម្មជាតិ និងក្រុមសកម្មជនកិច្ចព្រមព្រៀងសន្តិភាពទីក្រុងប៉ារីសឱ្យមានសេរីភាពឡើងវិញផងដែរ។តំណាងបាតុករក៏ដើរដាក់ញត្តិទៅស្ថានទូតខ្មែរប្រចាំនៅប្រទេសកូរ៉េខាងត្បូង និងបណ្តាស្ថានទូតបរទេសដែលជាម្ចាស់ហត្ថលេខីកិច្ចព្រមព្រៀងសន្តិភាពទីក្រុងបារីស ផងដែរ ដើម្បីជំរុញឲ្យកម្ពុជាដកខ្លួនពីគម្រោងCLVនោះ។
បាតុកម្មរបៀបនេះក៏មាននៅប្រទេសអូស្ត្រាលីផងដែរដែលមានពលរដ្ឋខ្មែររស់នៅក្នុងទីក្រុងម៊ែលបនប្រមាណ៥០០នាក់ចេញមកតវ៉ា និងទាមទារឱ្យរដ្ឋាភិបាលលុបចោលគម្រោងតំបន់ត្រីកោណអភិវឌ្ឍន៍CLVនេះ និងបានអំពាវនាវឱ្យបញ្ឈប់ការគំរាមកំហែងមកលើសិទ្ធិសេរីភាពរបស់ពលរដ្ឋ សកម្មជនការពារបរិស្ថាន សកម្មជនការពារសង្គម និងសកម្មជននយោបាយបក្សប្រឆាំង។ក្រៅពីបាតុកម្មនៅកូរ៉េខាងត្បូងនិងអូស្ត្រាលី ពលរដ្ឋខ្មែរនៅប្រទេសជប៉ុនឯណោះក៏បានហែរក្បួនបាតុកម្មនៅកណ្តាលទីក្រុងតូក្យូ នាថ្ងៃទី១១ ខែសីហា ឆ្នាំ២០២៤នេះដែរ។
មុនផ្ទុះការតវ៉ាព្រមៗគ្នាប្រឆាំងគម្រោងតំបន់ត្រីកោណអភិវឌ្ឍន៍CLVពីសំណាក់ពលរដ្ឋខ្មែររស់នៅក្រៅប្រទេសបែបនេះ តុលាការខ្មែរបានចោទប្រកាន់ លោក ស្រ៊ុន ស្រ៊ន សកម្មជនកិច្ចព្រមព្រៀងសន្តិភាពទីក្រុងប៉ារីសពីបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម ក្រោយលោកធ្វើបទអត្ថាធិប្បាយអំពីកិច្ចសហប្រតិបត្តិការតំបន់ត្រីកោណអភិវឌ្ឍន៍កាលពីថ្ងៃទី២៣ ខែកក្កដា។
ទាក់ទងនឹងការធ្វើបាតុកម្មរបស់ពលរដ្ឋខ្មែររស់នៅក្រៅប្រទេសនាពេលនេះ លោក ប៉ែន បូណា អ្នកនាំពាក្យរាជរដ្ឋាភិបាលបានថ្លែងមកវិទ្យុបារាំងអន្តរជាតិRFIថា នេះជាសិទ្ធិរបស់ពលរដ្ឋខ្មែរ។ ប៉ុន្តែលោក ប៉ែន បូណា ដាស់តឿនឱ្យយុវជនខ្មែរប្រយ័ត្នចាញ់បោកក្រុមមួយដែលលោកហៅថា «ជ្រុលនិយមដែលមានបំណងចង់ដុតបំផ្លាញ់ប្រទេសជាតិ និងរុញប្រទេសឱ្យធ្លាក់ទៅក្នុងភាពវឹកវរ និងសង្គ្រាមស៊ីវិលឡើងវិញ»។
ទាក់ទងបញ្ហាបដិវត្តន៍ពណ៍វិញអ្នកនាំពាក្យរាជរដ្ឋាភិបាល លោក ប៉ែន បូណា បានលើកហេតុផល៥ចំណុច ដែលធ្វើឱ្យកម្ពុជាមិនអាចមានចលនាបដិវត្តន៍ពណ៌ផ្តួលរំលំរាជរដ្ឋាភិបាល ដូចប្រទេសបង់ក្លាដេសតាមការបំផុសរបស់ក្រុមមួយចំនួនបានឡើយ( ព្រោះ)ការប៉ុនប៉ងផ្តួលរំលំរដ្ឋាភិបាដោយធ្វើបដិវត្តន៍ពណ៌ គឺជាអំពើប្រឆាំងនឹងការបោះឆ្នោតតាមបែបប្រជាធិបតេយ្យ។ នេះបើតាមការឱ្យដឹងពីតេឡេក្រាមរបស់លោក ប៉ែន បូណា នៅព្រឹកថ្ងៃទី១១ ខែសីហា ឆ្នាំ២០២៤។
លោក ប៉ែន បូណា បញ្ជាក់បែបនេះ ដោយលើកយកហេតុផល៥ចំណុច មកអះអាង។ ទី១ រាជរដ្ឋាភិបាលដឹកនាំដោយគណបក្សប្រជាជនកម្ពុជាកើតចេញពីការបោះឆ្នោត ស្របច្បាប់ដោយប្រជាពលរដ្ឋខ្មែរ។ ដូច្នេះ ការប៉ុនប៉ងផ្តួលរំលំរាជរដ្ឋាភិបាលស្របច្បាប់ដោយប្រើមធ្យោបាយហិង្សា មិនប្រជាធិបតេយ្យគឺជាអំពើល្មើសច្បាប់។ នេះសបញ្ជាក់ថា ក្រុមជ្រុលនិយមមួយក្តាប់តូចនេះតែងប្រព្រឹត្តខុសច្បាប់ជារៀងរហូតមក ហើយទោសដែលពួកគេមានជាប់ខ្លួនគឺជាឧទាហរណ៍ស្រាប់។ ទី២ ប្រទេសកម្ពុជាមានសន្តិភាពពេញលេញចាប់ពីឆ្នាំ ១៩៩៨ មកក្រោមនយោបាយឈ្នះៗរបស់សម្តេចតេជោ ហ៊ុន សែន។ សន្តិភាពមានតម្លៃខ្ពស់ណាស់មិនអាចកាត់ថ្លៃបានពីព្រោះវាបានអនុញ្ញាតឱ្យប្រទេសជាតិស្គាល់ការអភិវឌ្ឍមិនធ្លាប់មានពីមុន និងបានផ្តល់ក្តីសុខនិងអត្ថប្រយោជន៍ដល់ប្រជាពលរដ្ឋខ្មែរគ្រប់គ្នា។ ដូច្នេះ ការប៉ុនប៉ងអូសទាញប្រទេសឱ្យធ្លាក់ក្នុងសភាពវឹកវរ ហិង្សា បង្ហូរឈាម ដែលបើកផ្លូវឱ្យសង្គ្រាមស៊ីវិលកើតឡើងសារជាថ្មីគឺជាអំពើប្រឆាំងសន្តិភាពដែលអាជ្ញាធររាជរដ្ឋាភិបាលមិនអនុញ្ញាតជាដាច់ខាត។
ក្រៅពីអ្នកនាំពាក្យរាជរដ្ឋាភិបាលក៏មានកម្លាំងប្រដាប់អាវុធច្រើនអង្គភាពពចេញសេចក្តីថ្លែងការណ៍ការពាររាជរដ្ឋាភិបាលប្រឆាំងផែនការធ្វើបដិវត្តន៍ពណ៍ផងដែរ។ជាក់ស្តែងសេចក្តីថ្លែងការណ៍អគ្គបញ្ជាការកងយោធពលខេមរភូមិន្ទ ចុះថ្ងៃទី ១១ខែសីហា ឆ្នាំ២០២៤ បានបញ្ជាក់ជំហរថា កងយោធពលខេមរភូមិន្ទ ប្ដេជ្ញាការពារឱ្យខាងតែបាននូវសន្តិភាព ស្ថិរភាពជាតិ និង សណ្ដាប់ធ្នាប់សាធារណៈ ទោះស្ថិតក្នុងតម្លៃណាក៏ដោយ។ ការញុះញង់ប៉ុនប៉ងបង្កចលាចលផ្ដួលរំលំ រាជរដ្ឋាភិបាលស្របច្បាប់ ដោយប្រើមធ្យោបាយហិង្សា មិនប្រជាធិបតេយ្យ គឺជាអំពើល្មើសច្បាប់។
សេចក្តីថ្លែងការណ៍ព្រមានថា៖«កងយោធពលខេមរភូមិន្ទ នឹងបង្ក្រាបនិងកម្ទេចរាល់ឧបាយកលញុះញង់ក្នុងចេតនា បំផ្លាញជាតិ បំផ្លាញសន្តិភាព ក្នុងគោលបំណងផ្ដួលរំលំរាជរដ្ឋាភិបាលស្របច្បាប់ ទោះក្នុងរូបភាពណាក្ដី»។តាមរយៈសេចក្តីថ្លែងការណ៍នេះ អគ្គមេបញ្ជាការនៃកងយោធពលខេមរភូមិន្ទ បញ្ជាឱ្យមេបញ្ជាការកងទ័ពជើងគោក កងទ័ព ជើងទឹក កងទ័ពជើងអាកាស កងរាជអាវុធហត្ថលើផ្ទៃប្រទេស បញ្ជាការដ្ឋានអង្គរក្ស មេបញ្ជាការ ទ័ពជំនាញ និងប្រធានស្ថាប័នទាំងអស់នៃកងយោធពលខេមរភូមិន្ទ ត្រូវគ្រប់គ្រងកម្លាំងឱ្យបានហ្មត់ចត់ ពង្រឹងវិន័យផ្ទៃក្នុង និងកម្ចាត់ឱ្យបានទាន់ពេលវេលានូវកម្លាំងអមិត្តទាំងឡាយ។
