ប្រពលរដ្ឋក្រីក្រ២គ្រួសារយំអង្វរ សុំសម្តេចមហាបវរធិបតី ហ៊ុន ម៉ាណែត មេត្តាជួយអន្តរាគមន៍ដោះលែងប្តីរបស់ពួកគាត់ ដែលត្រូវសមត្ថកិច្ចចាប់យកទៅដាក់គុក ព្រោះកាប់កូន ឈើ០៣ដើមយកមកធ្វើសសរផ្ទះ
21-September-2026 / ព័ត៌មានជាតិ
ខេត្តឧត្តរមានជ័យ: ពិតជាគួរអោយអាណិតអាសូរ ជាពន់ ពេក នៅពេលលោក ទឺ ពិទូ អ្នកយកព័ត៌មានរបស់អង្គភាពសារព័ត៌មានគេហទំព័រ មាតុភូមិ www.meatophoum .com នៅព្រឹកថ្ងៃទី១០ ខែសីហា ឆ្នាំ ២០២៤ បានចុះទៅដល់លំនៅដ្ឋានផ្ទាល់ របស់ប្រជាពល រដ្ឋចំនួន០២គ្រួសារ រស់នៅភូមិថ្នល់បត់ សង្កាត់កូនក្រៀល ក្រុងសំរោង ខេត្តឧត្តរមានជ័យ ដែលបានទាក់ទង មកសុំអោយជួយចុះផ្សាយព័ត៌មាន ស្តីអំពីករណី មន្ត្រីបរិស្ថានចាប់ប្តីរបស់ពួកគាត់យកទៅដាក់គុក យ៉ាងអយុត្តិធម៌បំផុត ។
ប្រពន្ធជនរង គ្រោះទាំង២គ្រួសារ មានឈ្មោះ ទី១-អឹល លាក់ ភេទស្រី អាយុ ៣៨ឆ្នាំ ទី២-សៅ សាលួន ភេទ ស្រី អាយុ ៣៣ ឆ្នាំ ពួកគាត់ទាំងពីរនាក់ជាប្រជាពលរដ្ឋក្រីក្រតោកយ៉ាកបំផុត បើពិនិត្យមើលជាក់ស្តែងអំពីស្ថានភាព និងជីវភាព រស់នៅសព្វថ្ងៃ ផ្ទះរខេក រខាក អត់ជញ្ជាំងដំបូលបែកបាក់ធ្លុះធ្លាយ មានមុខរបរជាកសិករ ធ្វើស្រែចំការបន្តិចបន្តួច ។ពួកគាត់បានរៀបរាប់ព្រមទាំងលើកដៃសំពះស្រែកយំអង្វរក សុំដល់ថ្នាក់ដឹកនាំគ្រប់លំដាប់ថ្នាក់ ជាពិសេសសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា មេត្តាជួយអន្តរាគមន៍ដោះលែងប្តីរបស់ពួកគាត់ ដែល ត្រួវបានកម្លាំងសមត្ថកិច្ចចាប់យកទៅដាក់គុកជាច្រើនថ្ងៃកន្លងមកហើយ ។
ស្ត្រីទាំង ០២ នាក់ បានរៀបរាប់ប្រាប់ថា : ប្តីរបស់ពួកគាត់ ទី១- ឈ្មោះ ឃុន ភ័ក្ត្រ ភេទ ប្រុស អាយុ ៤០ ឆ្នាំ ។ ទី២- ឈ្មោះ ឃុន ធី ភេទ ប្រុស អាយុ ៣៨ ឆ្នាំ ( បង ប្អូនបង្កើត ) ប្តីរបស់ពួកគាត់ កាលពីថ្ងៃទី ០៥ ខែសីហា ឆ្នាំ ២០២៤ ត្រូវបានកម្លាំងសមត្ថកិច្ច នៃមន្ទីរបរស្ថានខេត្តឧត្តរ មានជ័យ ក្រោមបញ្ជារបស់លោក ផួង លីណា ប្រធានមន្ទីរបរិស្ថានខេត្តឧត្តរមានជ័យធ្វើការចាប់ឃាត់ខ្លួន និងបន្តនិតិវធីទៅតុលាការឃុំខ្លួន រហូតមកដល់ពេលនេះ ( ១០ សីហា ឆ្នាំ ២០២៤ ) នៅមិនទាន់ដោះលែងទេ ក្រោមបទចោទប្រកាន់ថា : ប្តីពួកគាត់ទាំងពីរនាក់ បាននាំគ្នាចូលព្រៃកាប់ឈើ ក្នុងដែនព្រៃសហគមន៍រតន:រុក្ខា ស្ថិតក្នុងភូមិសាស្ត្រ ក្រុងសំរោង ខេត្តឧត្តរមានជ័យ ដោយខុសច្បាប់ ។
លោក ផាន យុន មេភូមិ ថ្នល់បត់ បានបញ្ជាក់ប្រាប់ក្រុមការងារចុះយកព័ត៌មានរបស់អង្គភាព គេហទំព័រ មាតុភូមិ ថា : ប្រជាពលរដ្ឋទាំងពីរគ្រួសារនេះពិតជាក្រីក្រខ្វះខាតជីវភាពរស់នៅប្រចាំថ្ងៃ ខ្លាំង ណាស់ ពួកគាត់មិនមែនជាអ្នករកសុីជួញដូរឈើ ឬសុីឈ្នួលឡើងភ្នំកាប់ឈើអ្វីដែរ ពួកគាត់បានចូលព្រៃទៅកាប់កូនឈើចំនួន០៣ដើម យកមកទុកធ្វើសសរផ្ទះពិតប្រាកដមែន ដូច្នេះមិនគួរក្រុមអស់លោកបរិស្ថានចាប់ពួកគាត់ យកទៅដាក់គុកបែបនេះទេ គួរតែធ្វើការអប់រំណែនាំ និងអោយធ្វើកិច្ចសន្យាបញ្ឈប់ការកាប់ឈើតទៅទៀតបានហើយ ព្រោះបើសិនជា យកពួកគាត់ទាំងពីរនាក់ទៅដាក់គុកយ៉ាងអយុត្តិធម៌បែបនេះ គឺជាការកាត់ទោសសត្វសេក ស្មើនឹងការកាត់ទោសសត្វខ្លា ព្រោះពួកគាត់ជាប្រជាជនក្រីក្រ ល្ងិតល្ងង់មិនយល់ដឹងពីច្បាប់ទម្លាប់អ្វីប៉ុន្មានទេ ទើបមិនដឹងថា:តំបន់ដែលពួកគាត់ចូលទៅកាប់កូនឈើជាតំបន់ព្រៃអភិរក្សរបស់សហគមន៍រតន:រុក្ខា ក្រោមការគ្រប់គ្រងរបស់មន្ទីរបរិស្ថានខេត្តឧត្តរ មានជ័យ ។
តាមរយ: សារព័ត៌មាន មាតុភូមិ ប្រជាពលរដ្ឋក្រីក្រទាំងពីរគ្រួសារ បានលើកដៃសំពះ និងយំអង្វរក សុំក្តីមេត្តាពីថ្នាក់ដឹកនាំអាជ្ញាធរដែនដី សមត្ថកិច្ចពាក់ព័ន្ធគ្រប់លំដាប់តាំងពីមូលដ្ឋានរស់នៅផ្ទាល់រហូតដល់ថ្នាក់ខេត្ត ដែល មានឯកឧត្តម មាន ចាន់យ៉ាដា អភិបាលឧត្តរមានជ័យ និងជា ពិសេសគោរពស្នើសុំដល់សម្តេច មហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា មេត្តាជួយអន្តរាគមន៍ដោះលែងគ្រួសាររបស់ពួកគាត់អោយមានសេរីភាព បានវិលត្រឡប់មកជួបជុំប្រពន្ធកូនវិញផងទាន !!! ព្រោះពួកគាត់ក្រីក្រ ខ្លាំងបំផុតមើលតាម Videos និងការបញ្ជាក់ពីលោកមេភូមិ ជាក់ស្តែងចុះ ៕ រាយការណ៍ ព័ត៌មាន ដោយ: ទឺ ពិទូ
