ក្មេងប្រុសម្នាក់ ត្រូវបានជួញដូរដោយជនជាតិវៀតណាម ហើយឃុំឃាំងខុសច្បាប់ ក្នុងខណ្ឌ៧មករា
08-July-2026 / ព័ត៌មានជាតិ
ភ្នំពេញ៖ អង្គការមួយបានស្នើសុំទៅកាន់នាយកដ្ឋានប្រឆាំងការជួញដូរមនុស្ស និងការពារអនីតិជន នៃក្រសួងមហាផ្ទៃ ដើម្បីសុំការអន្តរាគមន៍សង្គ្រោះក្មេងប្រុសកម្ពុជាម្នាក់ ដែលត្រូវបានជួញដូរដោយខុសច្បាប់ទៅឲ្យ ជនជាតិវៀតណាម ។បន្ទាប់មកក្មេងនោះត្រូវបាននាំយកឆ្លងដែនទៅចិញ្ចឹមនៅឯខេត្តហាទៀង ប្រទេសវៀតណាម ហើយនៅពេលដែលក្មេងប្រុសនោះធំធាត់ ជនជាតិវៀតណាមខាងលើបានវាយធ្វើបាប និងកេងប្រវ័ញ្ចកម្លាំងពលកម្ម ពុំបានឲ្យចូលសិក្សារៀនសូត្រនោះឡើយ។
ក្រោយពីបានស្រាវជ្រាវដឹងពីការធ្វើបាបកុមារដែលត្រូវបានជួញដូរខាងលើ ហើយអង្គការមិនមែនរដ្ឋាភិបាលនោះក៏ធ្វើលិខិតស្នើសុំការអន្តរាគមន៍សង្គ្រោះជនរងគ្រោះទៅកាន់នាយកដ្ឋានប្រឆាំងការជួញដូរមនុស្ស និងការពារអនីតិជន ក្រសួងមហាផ្ទៃ កាលពីថ្ងៃទី១៥ ខែសីហា ឆ្នាំ២០២៣ កន្លងទៅ។ ក្រោយមក ដោយសារតែមានការភ័យខ្លាចមានទោស ជនជាតិវៀតណាមទាំងនោះ បាននាំយកកុមាររូបនោះមកកាន់ប្រទេសកម្ពុជាវិញ កាលពី៤ខែមុន។ ប៉ុន្តែជនសង្ស័យមិនបានប្រគល់ឲ្យអាជ្ញាធរវិញនោះទេ គឺបានបន្តគ្រប់គ្រងកុមារនោះដោយខ្លួនឯង និងដោយខុសច្បាប់ នៅសង្កាត់ផ្សារអូរឫស្សី១ ខណ្ឌ៧មករា រាជធានីភ្នំពេញ។
យោងតាមលិខិតស្នើសុំអន្តរាគមន៍សង្គ្រោះជនរងគ្រោះរបស់អង្គការខាងលើនោះ បានរៀបរាប់ពីដំណើររឿងថា អង្គការបានទទួលព័ត៌មានពីសាក្សីម្នាក់ពាក់ព័ន្ធនឹងការស្មុំកូនមិនពេញលេញ និងការនាំយកចេញមិនស្របច្បាប់ សម្រាប់នាំឆ្លងដែន ក្នុងគោលបំណងដើម្បីកេងប្រវ័ញ្ចពលកម្មកុមារា ឈ្មោះ ស.ន ល.ហ.ង កាលពី១០ឆ្នាំមុន ដែលប្រព្រឹត្តឡើងដោយជនសង្ស័យឈ្មោះ អ៉ឹង ឡេង ភេទស្រី អាយុ៤០ឆ្នាំ (ជនជាតិវៀតណាម) កាន់អត្តសញ្ញាណបណ្ណលេខ 010190035(01) ដោយកាលពីអំឡុងឆ្នាំ២០១២ សាក្សីរូបនោះ និងឈ្មោះ អ៉ឹង ឡេង បានស្គាល់គ្នាតាមរយៈមិត្តភក្តិរបស់ខ្លួន។
មានថ្ងៃមួយ ឈ្មោះ អ៉ឹង ឡេង បានទាក់ទងសាក្សីរូបនោះ ដើម្បីសាកសួរអំពីការស្មុំកូន ព្រោះឈ្មោះ អ៉ឹង ឡេង បានដឹងថា សាក្សីខាងលើធ្វើការនៅសាលាដំបូងរាជធានីភ្នំពេញ ដែលអាចដឹងអំពីនីតិវិធីខ្លះៗពាក់ព័ន្ធនឹងការសុំកូន យកទៅចិញ្ចឹម។
សាក្សីបានប្រាប់ទៅឈ្មោះ អ៊ឹង ឡេង ថា ត្រូវតែដាក់ពាក្យស្នើសុំទៅតុលាតាមនីតិវិធីច្បាប់ និងត្រូវមានសេចក្តីសម្រេចជាស្ថាពរពីតុលាការជាមុនសិន ទើបជាការស្មុំកូនពេញលេញត្រឹមត្រូវតាមច្បាប់ដែលបានកំណត់។ ប៉ុន្តែឈ្មោះ អ៊ឹង ឡេង មិនបានធ្វើតាមការណែនាំនោះទេ ផ្ទុយទៅវិញបានផ្តល់លុយចំនួនប្រហែលជាបីលាន( ៣,០០០,០០០)រៀល ទៅបានលាន( ៤,០០០,000)រៀល ឱ្យទៅម្តាយកុមារនោះ ដើម្បីជាការដោះដូរនឹងការយកកូននោះមកចិញ្ចឹម ដោយឈ្មោះ អ៊ឹង ឡេង នោះគិតថា ប្រសិនបើធ្វើតាមនីតិវិធីរស់តុលាការមានភាពស្មុគស្មាញ និងខាតពេលវេលា។
បន្ទាប់នៅក្នុងអំឡុងឆ្នាំ២០១៦ សាក្សីរូបនោះបានជួបកុមារាឈ្មោះ ស.ន ល.ហ.ង ចំនួន២លើកហើយ ហើយឈ្មោះ អ៊ឹង ឡេង បានប្រាប់សាក្សីរូបនោះថា នេះគឺជាកុមារដែលខ្លួនបានទិញពីគេមក។ នៅពេលនោះ សាក្សីខាងលើមានការភ្ញាក់ផ្អើលជាខ្លាំង ព្រោះមើលទៅកុមារនោះក៏បានចម្រើនធំធាត់ និងមិនមានការសុំស្របច្បាប់។ មួយរយៈពេលក្រោយមក សាក្សីដដែលបានមិនដឹងថាឈ្មោះ អ៊ឹង ឡេង បានបញ្ជូនកុមារនោះទៅឱ្យ ឪពុករបស់ខ្លួននៅប្រទេសវៀតណាម ដើម្បីជួយចិញ្ចឹមជំនួសឡើយ ហើយក៏មិនដែលបានសួរនាំអ្វីបន្តដែរ។
ស្រាប់តែមានថ្ងៃមួយក្នុងខែឧសភា ឆ្នាំ២០២៣ សាក្សីនោះបានឃើញតាមបណ្តាញសង្គមហ្វេសប៊ុក គណនីឈ្មោះ Meng Ung ដែលមិនគួរឱ្យជឿថា កុមារឈ្មោះ ស.ន ល.ហ.ង ត្រូវបានឪពុករបស់ឈ្មោះ អ៊ឹង ឡេង ដែលមានឈ្មោះ អ៊ឹង ម៉េង បានបង្ខំឱ្យកុមារានោះធ្វើការផ្ទះជាទម្ងន់ ក្នុងនោះមានជាអាទិ៍៖ ពុះឧស លើកថ្ម និងជញ្ជូនថ្ម ព្រមទាំងជញ្ជូនឧសដាក់ទៅតាមទីកន្លែងដែលគេបានកំណត់ និងមិនបានទៅសាលារៀន សិក្សាដូចកុមារគេផ្សេងៗនោះទេ។ មានវីដេអូរខ្លះទៀត គឺបង្ហាញអំពីសកម្មភាពវាយដំលើរូបរាងកាយកុមារឈ្មោះ ស.ន ល.ហ.ង នោះផងដែរ ប៉ុន្តែរូបភាពវីដេអូរទាំងអស់នោះ ត្រូវបានលុបពីក្នុងគណនីហ្វេសប៊ុករបស់ឪពុក ឈ្មោះ អ៊ឹង ឡេង អស់បាត់ទៅហើយ។
បន្ទាប់ពីសាក្សីបានឃើញវីដេអូទាំងអស់នោះហើយ ខ្លួនមានអារម្មណ៍ថា ហាក់បីដូចជាមានការអាណិតកុមារឈ្មោះ ស.ន ល.ហ.ង ជាខ្លាំង ដោយគេប្រើគាត់ដូចជាទាសករកុមារ ហើយគិតថាឈ្មោះ អ៉ឹង ឡេង បានទិញកុមារនោះមក គឺដើម្បីគ្រាន់តែកេងប្រវ័ញ្ចពលកម្មសុទ្ធសាធ និងដើម្បីគ្រាន់តែជួយធ្វើការងារជំនួសឪពុករបស់ខ្លួននៅវៀតណាមតែប៉ុណ្ណោះ ដោយពុំមានចេតនាល្អចំពោះការយកកុមារមកចិញ្ចឹមមើលថែដូចជាកូនរបស់ខ្លួនបង្កើតនោះទេ ហើយថែមទាំងមិនបានផ្តល់ការសិក្សាអប់រំរៀនសូត្រដល់កុមារនោះទៀតផង, នេះជាការរំលោភសិទ្ធិកុមារយ៉ាងធ្ងន់ធ្ងរ។
ក្រោយពីទទួលបានព័ត៌មាននោះហើយ ទើបអង្គការខាងលើ ធ្វើលិខិតស្នើសុំការអន្តរាគមន៍សង្គ្រោះជនរងគ្រោះ ទៅកាន់នាយកដ្ឋានប្រឆាំងការជួញដូរមនុស្ស និងការពារអនីតិជន ក្រសួងមហាផ្ទៃ ដើម្បី៖ ទី១-ស្នើសុំអន្តរាគមន៍ជួយសង្គ្រោះកុមាររងគ្រោះឈ្មោះ ស.ន ល.ហ.ង យកមកកម្ពុជាវិញ និងដើម្បីស្តារនីតិសម្បទាដល់កុមារឱ្យបានរៀនសូត្រដូចកុមារផ្សេងៗទៀត។ ទី២-ស្នើសុំឱ្យមានចំណាត់ការបានម៉ឺងម៉ាត់ចំពោះជនសង្ស័យ ដើម្បីឱ្យពួកគេទទួលខុសត្រូវព្រហ្មទណ្ឌចំពោះអំពើល្មើសរបស់ខ្លួនដែលបានប្រព្រឹត្ត៕
