សហជីពCATU និងសម្ពន័សហជីពដ៏ធំបំផុតរបស់ឧស្សាហកម្មកាត់ដេរឈ្មោះ Clean Clothes Campaignការពារសង់ត្រាល់
07-November-2024 / ព័ត៌មានជាតិ
ភ្នំពេញ៖សហព័ន្ធសហជីពកម្ពុជាហៅ (CATU) បានបញ្ជាក់ពីជំហរគាំទ្ររបាយការណ៍របស់អង្គការសង់ត្រាល់ និងអះអាងបន្ថែមថា ករណីរំលោភសិទ្ធិសហជីពនៅកម្ពុជាមានចំនួនច្រើនជាងការចុះផ្សាយរបស់អង្គការសង់ត្រាល់ទៅទៀត។ សហព័ន្ធសហជីពកម្ពុជាក៏បានច្រានចោលនូវខ្លឹមសារនៃសេចក្តីថ្លែងការណ៍របស់សមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC) ដែលបានលើកឡើងថា សហព័ន្ធសហជីពកម្ពុជា និងសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាបានបដិសេធចំពោះរបាយការណ៍របស់សង់ត្រាល់។
ក្នុងសេចក្តីថ្លែងការណ៍ចុះថ្ងៃទី២៦ ខែមិថុនា សហព័ន្ធសហជីពកម្ពុជា (CATU) បានបញ្ជាក់ថា ខ្លួននៅតែគាំទ្ររបាយការណ៍របស់អង្គការសង់ត្រាល់ និងថា ករណីរំលោភសិទ្ធិសហជីពនៅកម្ពុជាដែលសង់ត្រាល់បានលើកឡើងនៅមានលក្ខណៈតិចតួចនៅឡើយ បើធៀបនឹងស្ថានភាពរំលោភសេរីភាពសហជីពដែលកំពុងកើតមាននាពេលបច្ចុប្បន្ន។ តិចតួចដោយសហព័ន្ធសហជីពកម្ពុជាផ្អែកលើទិដ្ឋភាពជាក់ស្តែងមួយចំនួនដូចជា អាជ្ញាធរបន្តប្រើប្រព័ន្ធតុលាការគំរាមកំហែងលើសហជីព ការបញ្ឈប់ថ្នាក់ដឹកនាំសហជីព រួមនឹងបញ្ហានៃការចុះបញ្ជីសហជីពជាដើម។
ចំពោះការលើកឡើងថាសហព័ន្ធសហជីពកម្ពុជា (CATU) និងសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (CCAWDO) បានបដិសេធមិនគាំទ្ររបាយការណ៍របស់សង់ត្រាល់ត្រូវបានសហព័ន្ធសហជីពបំភ្លឺក្នុងសេចក្តីថ្លែងការណ៍របស់ខ្លួនថា សមាគម TACTAF អាចនឹងមានការភ័ន្តច្រឡំ ឬសន្មតដោយខ្លួនឯង។ ការចេញមកបដិសេធរបស់ CATU ពេលនេះធ្វើឡើង បន្ទាប់ពីសមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TACTAF) បានចេញផ្សាយរបាយការណ៍មួយក្នុងថ្ងៃទី២៤ មិថុនាដើម្បីតបនឹងរបាយការណ៍របស់អង្គការសង់ត្រាល់ដែលលាតត្រដាងពីស្ថានភាពកាន់តែអាក្រក់ក្នុងវិស័យកាត់ដេរនៅកម្ពុជា។TACTAF ចាត់ទុករបាយការណ៍របស់សង់ត្រាល់ដែលសហការជាមួយ CATU និង CCAWDO ថាមានភាពលំអៀង និងផ្អែកតាមអារម្មណ៍។
សូមជម្រាបថា កាលពីថ្ងៃទី០៤ ខែមិថុនា ឆ្នាំ២០២៤ មជ្ឈមណ្ឌលសម្ព័ន្ធភាពការងារ និងសិទ្ធិមនុស្សសង់ត្រាល់បានចេញផ្សាយរបាយការណ៍ស្តីពីឧបសគ្គរារាំងភាពជាតំណាងសេរីភាពសហជីពនៅកម្ពុជា។ សង់ត្រាល់បានបញ្ជាក់នៅក្នុងរបាយការណ៍របស់ខ្លួនថា ការអនុវត្តសិទ្ធិសេរីភាពរបស់សហជីពឯករាជ្យកម្ពុជានៅតែទទួលរងការរារាំង តាមរយៈការគំរាមកំហែងគ្រប់រូបភាពដូចជា ការបំភិតបំភ័យដោយផ្ទាល់មាត់ ការគំរាមកំហែង ការបៀតបៀន និងការដាក់ក្នុងបញ្ជីខ្មៅដែលធ្វើឲ្យប៉ះពាល់ដល់ការបំពេញការងាររបស់ពួកគេ។
ក្រោយការចេញផ្សាយរបាយការណ៍មួយនេះរបស់សង់ត្រាល់ គេឃើញសហជីពដែលមានទំនោរគាំទ្ររដ្ឋាភិបាលចេញមុខប្រតិកម្មព្រោងព្រាតដោយបានចោទប្រកាន់អង្គការសង់ត្រាល់ថាមានចេតនាចង់បំផ្លាញសន្តិភាពនៅកម្ពុជា ពិសេសមានចរិតនយោបាយលាបពណ៍ ញុះញង់ និងបំបែកបំបាក់សាមគ្គីភាពសហជីព។ នៅថ្ងៃទី២៤ ខែមិថុនា សហភាពសហជីពកម្ពុជាពន្លឺកម្មករបាននាំគ្នាដាក់ញត្តិទាមទារឱ្យអាមេរិកផ្តាច់ជំនួយពីអង្គការសង់ត្រាល់។ ចំណែកសហព័ន្ធសហជីពដើម្បីកម្មករកម្ពុជាក៏បានចោទអង្គការសង់ត្រាល់ថាកំពុងមានចេតនាចង់បំបែកឆ្នាំងបាយរបស់កម្មករនិយោជិតក្នុងវិស័យកាត់ដេរកម្ពុជា។
លោក អ៊ុន ដារា ប្រធានសហភាពកម្ពុជាពន្លឺកម្មករ និយាយថា ក្នុងនាមជាសហជីព លោកមានការព្រួយបារម្ភចំពោះសកម្មភាពរបស់អង្គការសង់ត្រាល់ ដែលបានធ្វើសកម្មភាពផ្ទុយពីតួនាទីភារកិច្ចរបស់ខ្លួន។ លោកស្នើឱ្យស្ថាប័នពាក់ព័ន្ធទាំងអស់បើកការស៊ើបអង្កេតប្រភពហិរញ្ញវត្ថុរបស់អង្គការមួយនេះ ថាតើចាយវាយលើគម្រោងអ្វីខ្លះឱ្យប្រាកដ។លោកថ្លែងថា៖ «បើអង្គការហ្នឹងជាអង្គការវិជ្ជាជីវៈ សហជីព ឬសហព័ន្ធ អាហ្នឹងគេដើរធ្វើទៅលើកម្មករនិយោជិត ហើយអង្គការនេះផ្តោតទៅលើតែសិទ្ធិអីទេ ហេតុអីបានជាទៅរហូតលូកដៃ លូកជើង ទៅដល់កម្មករនិយោជិត ដូចខ្ញុំមើលឃើញក្នុងរបាយការណ៍និយាយទៅសម្ភាសន៍កម្មករនិយោជិត និយាយអំពីសហជីព ចឹងវាផ្ទុយពីតួនាទីរបស់ខ្លួន បានខ្ញុំចង់ឱ្យស៊ើបអង្គេតឱ្យច្បាស់ ថាតើអង្គការហ្នឹងបានប្រភពមកពីណា ហើយប្រភពហិរញ្ញវត្ថុនោះយកទៅចំណាយលើស្អីខ្លះ»។
បើតាមលោក អ៊ុន ដារា អង្គការសង់ត្រាល់ត្រូវតែបង្ហាញពីគោលដៅសកម្មភាពរបស់ខ្លួនឱ្យបានច្បាស់លាស់ និងបញ្ជាក់ពីការធ្វើការងាររបស់ខ្លួនក្នុងកម្រិតណាឱ្យបានប្រាកដផងដែរ ដើម្បីកុំឱ្យសហជីពនៅកម្ពុជាឆ្ងល់ មិនដឹងច្បាស់ថា អង្គការមួយនេះកំពុងតែធ្វើអ្វី។
ចំណែកលោក សំ សឿន ប្រធានសហភាពពលកម្មជាតិកម្ពុជា បានលើកឡើងថា អង្គការសង់ត្រាល់បានទទួលជំនួយពីបរទេស ប៉ុន្តែមិនបម្រើផលប្រយោជន៍ពិតប្រាកដរបស់កម្មករនិយោជិតទេ បែរជាលូកដៃ ជ្រៀតជ្រែក មកលើកិច្ចការងាររបស់សហជីព ធ្វើឱ្យមានការរំខានដល់កិច្ចការសហជីព ហើយធ្វើឱ្យមានការលាបពណ៌ ការញុះញង់ឱ្យមានការស្អប់ តាមយៈការប្រើពាក្យសហជីពនេះឯករាជ្យ សហជីពនោះមិនឯករាជ្យ។ ទង្វើនេះបង្ហាញថា អង្គការសង់ត្រាល់ តាំងខ្លួនធ្វើជាអ្នកបំបែកបំបាក់ យ៉ាងពិតប្រាកដចំពោះខ្មែរនិងខ្មែរ សហជីពនិងសហជីព កម្មករនិយោជិត និងកម្មករនិយោជិត១ក្រុមទៀត។
លោកថ្លែងថា៖ «យើងខ្ញុំជាសហជីពសុំសំណូមពរយ៉ាងទទួចដល់ស្ថាប័នពាក់ព័ន្ធទាំងអស់ មេត្តាពិនិត្យ និងចាត់វិធានការយ៉ាងម៉ឺងម៉ាត់ចំពោះអង្គការសង់ត្រាល់ ក្នុងករណីទទួលជំនួយពីបរទេស ដើម្បីមកប្រឆាំងប្រជាពលរដ្ឋកម្ពុជា ប្រឆាំងជាមួយនិងកម្មករនិយោជិតនៅកម្ពុជា ប្រឆាំងជាមួយនឹងការអភិវឌ្ឍ និងសេចក្តីថ្លៃថ្នូររបស់កម្ពុជា»។
លោកប្រធានសហភាពពលកម្មជាតិកម្ពុជា លើកឡើងថា អំពើជ្រៀតជ្រែករបស់អង្គការសង់ត្រាល់ ក្នុងការលូកលាន់កិច្ចការងារសហជីព គឺផ្ទុយពីវិជ្ជាជីវៈ ខុសពីជំនាញ និងផ្ទុយពីបេសកកម្ម ដែលអង្គការនេះបានធ្វើទាំងស្រុង ព្រោះសង់ត្រាល់ ជាអង្គការមួយដែលមិនពាក់ព័ន្ធក្នុងកិច្ចការសហជីពនោះទេ ហើយសង់ត្រាល់ក៏មិនមែនជាអ្នកជំនាញសហជីពដែរ។ ក្នុងន័យនេះ របាយការណ៍ទាំងឡាយរបស់សង់ត្រាល់ពាក់ព័ន្ធនឹងសិទ្ធិសេរីភាពសហជីពនោះ មិនឆ្លុះបញ្ជាំងពីស្ថានភាពជាក់ស្តែង នៃការអនុវត្តសិទ្ធិសេរីភាពសហជីពនៅកម្ពុជាទេ។
ទោះបីយ៉ាងណាសម្រាប់ការឆ្លើយឆ្លងគ្នាទាំងអស់ខាងលើបានជំរុញឲ្យសម្ព័ន្ធសហជីពដ៏ធំបំផុតរបស់ឧស្សាហកម្មកាត់ដេរឈ្មោះ Clean Clothes Campaign ចេញមុខការពាររបាយការណ៍ និងភាពស្អាតស្អំរបស់អង្គការសង់ត្រាល់។ អង្គការ Clean Clothes Campaign យល់ថា ការចេញមុខប្រតិកម្មរបស់សហជីពដែលមានទំនោរគាំទ្ររដ្ឋាភិបាលមានគោលដៅចង់កម្ទេចសហជីពឯករាជ្យនៅកម្ពុជា៕ដកស្រងពីវិទ្យុបារាំង
