សម្តេចមហាបវរធិបតី ហ៊ុន ម៉ាណែតណែនាំឱ្យគ្រប់បណ្តាអាជ្ញាធររាជធានី-ខេត្ត ត្រូវរៀបចំសួនតេជោសន្តិភាព និងតំបន់ប្រវត្តិសាស្ត្រយោធោតេជោ
21-September-2026 / ផ្សេងៗ
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅព្រឹកថ្ងៃទី២០ ខែមិថុនា ឆ្នាំ២០២៤នេះ បានណែនាំឱ្យគ្រប់បណ្តាអាជ្ញាធររាជធានី-ខេត្ត ត្រូវរៀបចំសួនតេជោសន្តិភាព និងតំបន់ប្រវត្តិសាស្ត្រយោធោតេជោ នៅតាមទីតាំងដែលបានកំណត់ និងសិក្សាដោយសារក្រុមស្រាវជ្រាវប្រវត្តិសាស្ត្រយោធា។
ក្នុងឱកាសម្តេចធិបតី អញ្ជើញក្នុងពិធីរំលឹកខួបលើកទី៤៧ឆ្នាំ នៃដំណើរតស៊ូរបស់សម្តេចតេជោ ហ៊ុន សែន ដើម្បីឈានឆ្ពោះទៅការផ្ដួលរំលំ របបប្រល័យពូជសាសន៍ នៅតំបន់ប្រវត្តិសាស្ត្រយោធាតេជោកោះថ្មអ៉ិច១៦ ស្ថិតនៅភូមិកោះថ្ម ឃុំទន្លូង ស្រុកមេមត់ ខេត្តត្បូងឃ្មុំ។សម្តេចបានថ្លែងយ៉ាងដូច្នេះថា «ខ្ញុំសូមឱ្យគ្រប់បណ្តាខេត្តបន្តជំរុញការរៀបចំសួនតេជោសន្តិភាព ដែលបានកំណត់ដាក់ចេញនៅតាមបណ្តាខេត្តនីមួយៗ និងចូលរួមក្នុងការជំរុញការរៀបចំតំបន់ប្រវត្តិសាស្ត្រយោធាតេជោ នៅតាមទីតាំងដែលបានសិក្សា និងកំណត់ដោយក្រុមស្រាវជ្រាវប្រវត្តិសាស្ត្រយោធា»។សួនតេជោសន្តិភាព រៀបចំឡើងទៅតាមគំនិតផ្តួចផ្តើម និងដឹកនាំផ្ទាល់របស់សម្ដេចធិបតី ហ៊ុន ម៉ាណែត ដែលបានរៀបរាប់អំពីដំណើរការ នៃការអនុវត្តនយោបាយឈ្នះឈ្នះ តាំងបង្ហាញជាតឹកតាងភូមិសាស្ត្រមួយចំនួន ដែលមានលក្ខណៈស៊ីគ្នាតាមភាពជាក់ស្ដែងនៃប្រវត្តិកាលនៃ អនុវត្តនយោបាយឈ្នះឈ្នះ របស់សម្តេចតេជោ ហ៊ុន សែន។
រាជរដ្ឋាភិបាលបានកំណត់តំបន់ប្រវត្តិសាស្ត្រយោធា នៅតំបន់៨៧ ស្ថិតនៅយោធភូមិភាគទី៣ យោធភូមិភាគទី៤ យោធភូមិភាគទី៥ និងតំបន់ទេសចរណ៍ប្រវត្តិសាស្ត្រអន្លង់វែង ដែលតំបន់ទាំងនោះស្ថិតនៅក្នុងខេត្តចំនួន១២។ យោងតាមអនុក្រឹត្យរបស់រដ្ឋាភិបាល ស្តីពីការកំណត់តំបន់ប្រវត្តិសាស្ត្រយោធា តាមរយៈអនុក្រឹត្យលេខ ១៥៥ អនក្រ បក ចុះថ្ងៃទី១១ ខែកក្កដា ឆ្នាំ២០២៣។
ការបង្កើតតំបន់ប្រវត្តិសាស្ត្រដែលគេហៅថា «តំបន់មរតកប្រវត្តិសាស្ត្រតេជោ»នេះ ធ្វើឡើងក្នុងគោលបំណងធានាភាពពិតប្រាកដនៃសច្ចភាពប្រវត្តិសាស្ត្រសម្រាប់មនុស្សជំនាន់ក្រោយរៀនសូត្រ និងលើកកម្ពស់គុណតម្លៃនៃនយោបាយឈ្នះឈ្នះ ពីកម្រិតជាតិទៅអន្តរជាតិដែលក្លាយជាបេតិកភណ្ឌប្រវត្តិសាស្ត្រពិភពលោក។
សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានលើកឡើងថា ការប្រារព្ធខួបលើកទី៤៧ នៃដំណើរឆ្ពោះទៅរកការរំដោះជាតិ ចេញពីរបបប្រល័យពូជសាសន៍ដ៏ឃោរឃៅរបស់ ប៉ុល ពត បង្ហាញពីស្មារតីចងចាំជានិច្ច ដើម្បីរំលឹកដល់គំរូវីរភាពដ៏មោះមុត និងគុណបំណាច់ដ៏ធំធេងរបស់វីរយុទ្ធជន វីរយុទ្ធនារី កងកម្លាំងប្រដាប់អាវុធ និងប្រជាពលរដ្ឋទាំងអស់ ដែលបានពលិកម្មយ៉ាងអង់អាចក្លាហាន បូជាសាច់ស្រស់ ឈាមស្រស់ ដើម្បីបុព្វហេតុជាតិមាតុភូមិ។
ក្នុងពិធីដែលប្រព្រឹត្តទៅនៅតំបន់ប្រវត្តិសាស្ត្រយោធាតេជោកោះថ្មអ៉ិច១៦ ស្ថិតនៅភូមិកោះថ្ម ឃុំទន្លូង ស្រុកមេមត់ ខេត្តត្បូងឃ្មុំ សម្ដេចធិបតី ហ៊ុន ម៉ាណែត បានអះអាងថា ពលិកម្មប្រកបដោយស្មារតីស្នេហាជាតិរបស់ យុទ្ធជន-យុទ្ធនារី និងប្រជាពលរដ្ឋនៅគ្រប់ដំណាក់កាលនៃប្រវត្តិសាស្ត្រ បាននាំឲ្យកម្ពុជា អាចរំដោះមាតុភូមិដ៏កម្សត់ពីរបបប្រល័យពូជសាសន៍ដ៏សាហាវយង់ឃ្នងរបស់ប៉ុលពត និងនាំឱ្យកម្ពុជាកសាងបានសុខសន្តិភាព ស្ថិរភាពសង្គមជាតិ និងការអភិវឌ្ឍរហូតមកដល់សព្វថ្ងៃ។
សម្ដេចធិបតី ហ៊ុន ម៉ាណែត «ថ្ងៃនេះយើងប្រារព្ធខួបលើកទី៤៧ ក្នុងស្មារតីចងចាំជានិច្ចដើម្បីរំលឹកដល់គំរូវីរភាពដ៏មោះមុត និងគុណបំណាច់ដ៏ធំធេងរបស់វីរយុទ្ធជន វីរយុទ្ធនារី កងកម្លាំងប្រដាប់អាវុធ និងប្រជាពលរដ្ឋគ្រប់ស្រទាប់ ដែលបានពលិកម្មយ៉ាងអង់អាចក្លាហាន បូជាសាច់ស្រស់ ឈាមស្រស់ ដើម្បីបុព្វហេតុជាតិមាតុភូមិជាទីស្នេហានៃយើង»។បើតាមប្រសាសន៍របស់សម្ដេចធិបតី ហ៊ុន ម៉ាណែត, រាជរដ្ឋាភិបាលកម្ពុជាដឹងគុណជានិច្ច ចំពោះការលះបង់គ្រប់បែបយ៉ាងរបស់ជនរួមជាតិទាំងអស់ ដែលឆ្លុះបញ្ចាំងតាមរយៈការរៀបចំព្រឹត្តិការណ៍ទិវានៃការចងចាំនេះ ជារៀងរាល់ឆ្នាំ ដើម្បីអរគុណពុកម៉ែ បងប្អូន ក្មួយៗអ្នកភូមិកោះថ្ម ដែលតែងមានការជឿជាក់ចំពោះ សម្តេចតេជោ ហ៊ុន សែន តាំងពីដើមមក ចាប់តាំងពីឆ្នាំ១៩៧០ ដល់ឆ្នាំ១៩៧៥ ហើយនឹងដល់ឆ្នាំ១៩៧៧។
សម្ដេចធិបតី ប្រមុខនៃរាជរដ្ឋាភិបាលកម្ពុជា បានគូសបញ្ជាក់ថា ប្រជាពលរដ្ឋកម្ពុជា ក៏នៅចងចាំជានិច្ចនូវសច្ចភាពជាប្រវត្តិសាស្ត្រចំពោះកងទ័ពស្ម័គ្រចិត្ត និង ជំនាញការវៀតណាម ដែលបានបូជាសាច់ស្រស់ ឈាមស្រស់ ចូលរួមជួយកម្ពុជា នៅក្នុងបុព្វហេតុរំដោះជាតិ និង ប្រជាជន ចេញពីរបបប្រល័យពូជសាសន៍ប៉ុលពត។
សូមជម្រាបថា ថ្ងៃទី២០ ខែមិថុនា ឆ្នាំ២០២៤នេះ គឺជារយៈពេល៤៧ឆ្នាំហើយ ដែលសម្តេចតេជោ ហ៊ុន សែន និងយុទ្ធមិត្តរួមអាវុធដ៏ស្មោះស្ម័គ្រ៤រូបទៀត បានរួមគ្នាយកជីវិតធ្វើជាដើមទុនចេញទៅកាន់ប្រទេសវៀតណាម ស្វែងរកការគាំទ្រ ដើម្បីតស៊ូរំដោះជាតិ និងប្រជាជនកម្ពុជា ចេញពីរបបប្រល័យពូជសាសន៍ដ៏ឃោរឃៅរបស់ ប៉ុល ពត និងបក្ខពួក។
