វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 141 នាក់
ម្សិលមិញ 3717 នាក់
សរុប 14148474 នាក់
ភ្នំពេញ៖លោកបណ្ឌឹត ហ៊ុន ម៉ាណែត កូនប្រុសច្បងលោកនាយករដ្ឋមន្ត្រី ហ៊ុន សែន ត្រូវបានបំពាក់ឋានន្តរស័ក្តិជានាយឧត្តមសេនីយ៍ផ្កាយមាស៤ ដោយលោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិនាព្រឹកថ្ងៃទី២០មេសានៅទីស្តីការក្រសួងការពារជាតិដោយមន្ត្រីយោធាជាន់ខ្ពស់ថ្នាក់នាយឧត្តមសេនីយ៍ ឧត្តមសេនីយ៍ និងមន្ត្រីនយោបាយក្រសួងការពារជាច្រើនចូលរូបអបអរផងដែរ។លោកបណ្ឌឹត ហ៊ុន ម៉ាណែត ត្រូវបានព្រះមហាក្សត្រចេញព្រះរាជក្រឹត្យតម្លើងឋានន្តរស័ក្តិនាយឧត្តមសេនីយ៍កាលពីថ្ងៃទី១៧ ខែមីនា កន្លងទៅ ។
សំណេរលើហ្វេសប៊ុករលោក ហ៊ុន ម៉ាណែត ដែលជាអគ្គមេបញ្ជាការរង និងជាមេបញ្ជាការកងទ័ពជើងគោកនៃកងយោធពលខេមរភូមិន្ទ បានសម្តែងនូវការរីករាយ និងថ្លែងអំណរព្រះគុណដល់ព្រះមហាក្សត្រ ព្រះបាទសម្តេចព្រះបរមនាថ នរោត្តម សីហមុនី ដែលទ្រង់សព្វព្រះរាជហឬទ័យ ប្រោសព្រះរាជទានដំឡើងឋានន្តរស័ក្តិ នាយឧត្តមសេនីយ៍ ដល់លោក។ លោកនាយឧត្តមសេនីយ៍ ហ៊ុន ម៉ាណែត ក៏បានថ្លែងអំណរគុណដល់ឪពុករបស់លោក គឺសម្តេចនាយករដ្ឋមន្ត្រី ហ៊ុន សែន លោក ទៀ បាញ់ រដ្ឋមន្ត្រីការពារជាតិ និងលោក វង្ស ពិសេន អគ្គមេបញ្ជាការកងទ័ព ដែលបានផ្តល់ការទុកចិត្ត និងគាំទ្រដល់រូបលោក ដើម្បីបំពេញភារកិច្ចបម្រើជាតិ និងប្រជាជន។នាយឧត្តមសេនីយ៍ ហ៊ុន ម៉ាណែត បានសរសេរនៅលើបណ្តាញតេឡេក្រាមថាៈ “ខ្ញុំសូមឆ្លៀតឱកាសនេះ ដើម្បីធ្វើការថ្លែងអំណរគុណដោយស្មោះ ចំពោះលោក តា លោកយាយ លោកអ៊ុំពូមីងបងប្អូន និងក្មួយៗទាំងអស់ ដែលបានផ្ញើសារ អបអរសាទរចំពោះរូបខ្ញុំ ក្នុងឱកាសនៃការបំពាក់ឋានន្តរស័ក្តិ ជានាយឧត្តម សេនីយ៍ នាថ្ងៃនេះ”។
នាយឧត្តមសេនីយ៍ ហ៊ុន ម៉ាណែត បានបន្តថាៈ “ចំពោះអស់លោកដែលពូកែ ខាងឆ្ងល់ អំពីច្បាប់ និងទម្លាប់របស់កងទ័ព ក្នុងការតែងតាំងផ្លាស់ប្តូរមុខងារ ឬតម្លើងឋានន្តរស័ក្តិយោធិន និងចំពោះអ្នកដែលទើស ចំពោះការតម្លើងឋានន្តរ ស័ក្តិ សម្រាប់រូបខ្ញុំ គឺសូមបន្តឆ្ងល់ និងបន្តទើសតាមការគួររបស់អស់លោកចុះ បើអស់លោកមានពេលវេលាច្រើន និងអត់មានកិច្ចការអ្វីផ្សេងសម្រាប់ធ្វើ។ ខ្ញុំអត់មានពេលវេលា ដើម្បីធ្វើការពន្យល់ ឬឆ្លើយតបជាមួយអស់លោកទេ។ ព្រោះពេលវេលារបស់ខ្ញុំត្រូវចំណាយទៅលើកិច្ចការអ្វីដែលមានប្រយោជន៍។ ជាក់ស្តែង ពេលនេះ ខ្ញុំកំពុងធ្វើដំណើររាប់រយគីឡូម៉ែត្រ ដើម្បីបន្តចុះជួប និងធ្វើការងារ ជាមួយបណ្តាអង្គភាពកងទ័ព ដែលឈរជើង នៅតាមបណ្តោយ ព្រំដែន ដើម្បីត្រៀមការពារបូរណភាពទឹកដីរបស់យើង។ កិច្ចការងារនេះ វាមានអត្ថប្រយោជន៍ ចំពោះជាតិមាតុភូមិ ជាងចំណាយពេលឆ្លើយតបនឹងការ ឆ្ងល់ ឬទើសរបស់អស់លោក។ ខ្ញុំនិយាយតាមត្រង់ទេណា សូមកុំខឹង”។