អ្នកជិះប្រាប់ថាយន្តហោះសឹង្ហបុរីហោះសុខៗស្រាប់តែបាត់លំនឹងហើយស្រុតធ្លាក់ចុះក្រុមហ៊ុនសុំទោស
07-June-2025 / ព័ត៌មានអន្តរជាតិ
សិង្ហបុរី៖ យន្តហោះដឹកនាំអ្នកដំណើរមួយគ្រឿងរបស់ក្រុមហ៊ុនអាកាសចរណ៍សិង្ហបុរី បានជួបឧបទ្ទវហេតុបាត់បង់លំនឹងធ្ងន់ធ្ងរ អំឡុងកំពុងហោះហើរនៅលើមេឃកាលពីពេលថ្មីៗនេះដែលអ្នកជំនាញថាប ណ្តាលមកពីការប៉ះទង្គិចជាមួយចរន្តខ្យល់បក់បោកខ្លាំងរហូតធើ្វឱ្យយន្តហោះរងនូវកម្លាំងទំនាញខុសប្រក្រតី ជាហេតុបង្កឱ្យអ្នកដំណើរនៅខាងក្នុងត្រូវរងការប៉ះទង្គិចយ៉ាងធ្ងន់ធ្ងរ ។
ជុំវិញឧបទ្ទវហេតុដ៏កម្រនេះ ក្រុមហ៊ុនអាកាសចរណ៍របស់សិង្ហបុរី បានធើ្វការបញ្ជាក់ថា គឺជាឧបទ្ទវហេតុបាត់បង់លំនឹងធ្ងន់ធ្ងរដែលបានកើតឡើង បន្ទាប់ពីហោះហើរបានប្រមាណជា១០ម៉ោងនៅលើអាកាស កាលពីថ្ងៃអង្គារកន្លងទៅ និងបានបណ្តាលឱ្យអ្នកដំណើរម្នាក់ស្លាប់ និងជាង៧០នាក់ទៀតរងរបួស ខណៈគេសន្ឋិដ្ឋានថា អ្នកបាត់បង់ជីវិត បានបណ្តាលមកពីការគាំងបេះដូង ។
អ្នកដំណើរមួយរូបដែលជាអ្នកស្ថិតនៅក្នុងជើងហោះហើរលេខ SQ321 បានរៀបរាប់ឡើងវិញ អំពីហេតុការណ៍ដែលបានកើតឡើងថា អំឡុងកំពុងហោះហើរ យន្តហោះស្រាប់តែបាត់បង់លំនឹងភ្លាមៗ ដោយធ្លាក់ចុះទៅក្រោមអស់រយៈពេលជាច្រើននាទី ធើ្វឱ្យអ្នកដំណើររងការប៉ះទង្គិចជាមួយតួយន្តហោះ បណ្តាលឱ្យមានអ្នករងរបួសជាច្រើន។ បន្ថែមពីនេះ វាក៏បានបណ្តាលឱ្យអ្នកដំណើរមួយចំនួនមានអាការៈឈឺក្បាល វិលមុខ និងក្អួតចង្អោរធ្ងន់ធ្ងរថែមទៀតផង ។
ក្រុមហ៊ុននិយាយថា“សាំងហ្កាពួរអ៊ែរឡាញ ពិតជាស្តោកស្តាយខ្លាំងណាស់ដែលអ្នកដំណើរត្រូវជួបហេតុការណ៍ដ៏គួរតក់ស្លុតយ៉ាងដូច្នេះ និងសូមចូលរួមរំលែកទុក្ខយ៉ាងក្រៀមក្រំជាមួយគ្រួសារសព” នេះជាសារវីដេអូរបស់លោកGoh Choon Phong អគ្គនាយកក្រុមហ៊ុនអាកាសចរណ៍សិង្ហបុរី នៅថ្ងៃពុធទី២២ឧសភា។
បន្ទាប់ពីហោះហើរអស់១០ម៉ោង ចេញពីក្រុងឡុងដ៍ សំដៅសិង្ហបុរី យន្តហោះលេខSQ321 ផ្ទុកអ្នកដំណើរ២១១នាក់ និងអ្នកបំរើការ១៨នាក់ ស្រាប់តែជួបហេតុការណ៍រលាក់ខ្លាំងចម្លែក ម្តងឡើងចុះម្តងចុះ ជាច្រើនលើកច្រើនសា នៅលើអាកាសកម្ពស់១ម៉ឺន១ពាន់ម៉ែត្រពីដី ចំពីលើប្រទេសភូមា។ កម្លាំងក្រឡុកខ្លាំងពេក បានធ្វើឱ្យអ្នកដំណើរជាច្រើនខ្ទាតទៅបុកក្បាលនឹងពិដានយន្តហោះ ជាហេតុធ្វើឱ្យមានរបួសធ្ងន់ និងស្រាលជាច្រើនសិបនាក់។ ទូរអាហារ កាបូបវ៉ាលីឥវ៉ាន់ ប៊ើងរាយប៉ាយពេញផ្ទៃយន្តហោះ។ ម៉ាសអ៊ុកស៊ីហ្សែន បានបើកធ្លាក់ពីប្រអប់មកយ៉ាងរណេងរណោង។ ហេតុការណ៍បានជំរុញឱ្យយន្តហោះចុះចតជាបន្ទាន់នៅអាកាសយានដ្ឋាន ជិតបំផុតគឺសុវណ្ណភូមិក្រុងបាងកក។
បើតាមមន្ទីរពេទ្យថៃ អ្នកដំណើរជាតិអង់គ្លេសអាយុ៧៣ម្នាក់បានស្លាប់។ អ្នកដំណើរ៧១នាក់រងរបួស ក្នុងនោះ៦នាក់ជារបួសធ្ងន់ខ្លាំង និង២០នាក់កំពុងសង្គ្រោះបន្ទាន់។ ថ្ងៃនេះ អ្នកដំណើរ១៣១នាក់ និងអ្នកបំរើការយន្តហោះ១២នាក់ ប៉ុណ្ណោះបានបន្តដំណើរមកដល់សិង្ហបុរី។
សម្រាប់ពេលភ្លាមៗដូច្នេះគេនៅពុំទាន់អាចដឹងអំពីមូលហេតុពិតប្រាកដបានឡើយ។ ប៉ុន្តែយន្តហោះរលាក់ដូចធ្លាក់គ្រលុក ជាករណី ដែលមានកើតមានជាធម្មតាលើគន្លងផ្លូវ និងអាចបណ្តាលមកពីជាទូទៅអ្នកដំណើរធ្វេសប្រហែស ឱ្យតែភ្លើងខ្សែក្រវ៉ាត់រលត់ភ្លាម ពួកគេភាគច្រើនដោះខ្សែក្រវ៉ាត់ភ្លាម។ នេះបើតាមសម្គាល់របស់អ្នកជំនាញសុវត្ថិភាពអាកាសចរណ៍អាមេរិក Anthony Brickhouse។ តែក្នុងករណីជាក់ស្តែងនេះ គេដឹងថា នៅពេលដែលសញ្ញាប្រាប់ឱ្យពាក់ខ្សែក្រវ៉ាត់ឆេះភ្លាម យន្តហោះស្រាប់តែធ្លាក់ស្រឺតយ៉ាងទាន់ហន់តែម្តង។
សម្រាប់អ្នកវិទ្យាសាស្ត្រការប្រែប្រួលអាកាសធាតុអាចជាដើមហេតុនាំឱ្យមានគ្រលុកខ្លាំង និងកាន់តែច្រើន ហើយរ៉ាដាពិបាកចាប់សញ្ញា។ បើតាមការសិក្សា នៅឆ្នាំ២០២៣ រយៈពេលយន្តហោះជួបបញ្ហារលាក់កើនឡើង១៧%ពីឆ្នាំ១៩៧៩ដល់ឆ្នាំ២០២០ និងបញ្ហាក្រឡុកខ្លាំងធ្ងន់ធ្ងរ បែបកម្រនោះ កើនឡើងជាង៥០%។
