ដីសាធារណ:១កន្លែងតម្លៃរាប់លានដុល្លារ ត្រូវបានមន្ត្រីជំនាញពាក់ព័ន្ធនិងអាជ្ញាធរដែនដីឃុបឃិតគ្នាជាលក្ខណ: ប្រព័ន្ធ ចេញប្លង់កម្មសិទ្ធិអោយទៅឈ្មោះ ញិល បញ្ញា ???
15-March-2026 / ព័ត៌មានជាតិ
ភ្នំពេញ៖ ថ្មីៗនេះការិយាល័យនិពន្ធនាយក សារព័ត៌មាន និង គេហទំព័រ មាតុភូមិ បានទទួលព័ត៌មានច្បាស់ការណ៍មួយ ដែលទម្លាយចេញពីពលរដ្ឋម្នាក់ ដែលដឹងរឿងច្បាស់ បានបង្ហើបប្រាប់ ថា ដីសាធារណៈរបស់រដ្ឋមួយកន្លែង ស្ថិតនៅផ្លូវលេខ ៦០៨ កែងផ្លូវលេខ ២៨៥ ស្ថិតនៅភូមិ ១២ សង្កាត់បឹង កក់១ ខណ្ឌទួលគោក ទំហំជាង៥០០ម៉ែត្រការ៉េ តម្លៃទីផ្សារប្រមាណជាង១លានដុល្លារអាមេរិក ត្រូវបានលោក ញិល បញ្ញា ជាមន្ត្រីជាប់កិច្ចសន្យានៅសាលាខណ្ឌទួលគោក និង ត្រូវជាកូនប្រុសលោក ញិល លាង សមាជិកក្រុមប្រឹក្សាខណ្ឌ ទួលគោក អាចធ្វើប័ណ្ណកម្មសិទ្ធិកាន់កាប់បាន តាំងពីឆ្នាំ ២០១៧ ដោយស្ងប់ស្ងាត់ជាទីបំផុត ។
ប្រភពព័ត៌មាន ដដែលបន្តថា កាលពីពេលកន្លងទៅ ដីទាំងអស់ជាទ្រព្យសម្បត្តិសាធារណៈរបស់រដ្ឋ ។ ប៉ុន្តែក្រោយមក បានធ្វើជាកម្មសិទ្ធិឯកជនជាបន្តបន្ទាប់ ដែលនៅសល់ដីមួយកន្លែងខាងលើនេះ ទើបត្រូវបានដាក់ជាទ្រព្យសម្បត្តិរបស់ខណ្ឌទួលគោកសម្រាប់ ប្រើប្រាស់ជាសាធារណៈ ។
ប៉ុន្តែក្រោយមក ដីមួយកន្លែងនេះ ត្រូវបានលោក សារិន វណ្ណា ប្រធានមន្ទីររៀបចំ ដែនដី នគរូប នីយកម្ម និង សំណង់ កាលពីថ្ងៃទី២៤ ខែមេសា ឆ្នាំ២០១៧ កន្លងទៅ បានចេញប័ណ្ណកម្មសិទ្ធិទៅអោយឈ្មោះ ញិល បញ្ញា ដែលគេស្គាល់ថា ជាមន្ត្រីជាប់កិច្ចសន្យានៅសាលាខណ្ឌទួលគោក ។ ប្រភពព័ត៌មាន អះអាងថា តាមពិតឈ្មោះ ញិល បញ្ញា ត្រឹមជាមន្ត្រីជាប់កិច្ចសន្យានៅសាលាខណ្ឌទួល គោក ពុំមានលទ្ធភាពទិញដីតម្លៃមហាសាលនេះ បានទេ គឺ មានមន្ត្រីធំម្នាក់នៅពីក្រោយខ្នង ក្នុងគោលបំណង រំលោភយកដីសាធារណៈ ដើម្បីជាផលប្រយោជន៍ផ្ទាល់ខ្លួន ។
កន្លង មក ដីមួយកន្លែងនេះ ធ្លាប់ត្រូវបានសាងសង់សំណង់ពីលើ តែក្រោយពីមានប្រតិកម្មជាបន្តបន្ទាប់ ក៏បានផ្អាកទៅវិញ តែស្ថិតក្រោមការគ្រប់គ្រងរបស់ឯកជនដដែល ។ ប្រភពព័ត៌មាន សង្កត់ធ្ងន់ថា “ យូរបន្តិចទៀត គេនឹងលក់ដីនេះ យកលុយចែកគ្នាមិនខាន បើថ្នាក់លើមិនស្រាវជ្រាវរកការពិតទេនោះ ” ។
អ្នកប្រាប់រឿង គ្រាន់តែចង់អោយព័ត៌មាននេះ បានដឹងដល់ថ្នាក់ដឹកនាំខាងលើ ដើម្បីជ្រាបនិងទប់ស្កាត់ ព្រមទាំងវែកមុខ មន្ត្រីខិលខូច ដែលលួចដីសាធារណៈរបស់រដ្ឋ មកធ្វើជាកម្ម សិទ្ធិ ឯកជន ។
បច្ចុប្បន្ន នេះ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា កំពុងមានវិធានការក្តៅលើបញ្ហាទាំងអស់នេះ ហើយបានប្រើអភិក្រមទី៥ “ វះកាត់ ” មន្ត្រីខិលខូច មន្ត្រីពុករលួយ ជាបន្តបន្ទាប់ ។ មហាជន សង្ឃឹមថា មន្ត្រីខិលខូច និង មន្ត្រីពុករលួយ នឹងត្រូវកំចាត់ចេញអស់ពីសង្គមខ្មែរ ។ ជុំវិញបញ្ហានេះ ការិយាល័យយើងពុំអាចស្វែងរក ការបំភ្លឺពីលោក ញិល បញ្ញា ដើម្បីបញ្ជាក់ពីករណីនេះបានទេ ព្រោះពុំមានលេខទូរស័ព្ទទាក់ទង ។ សង្ឃឹមថា ករណីនេះ លោក ឃួង ស្រេង អភិបាលរាជធានីភ្នំពេញ និង លោក ជា សុផារ៉ា រដ្ឋមន្ត្រីក្រសួងរៀបច ដែនដី នគរូបណីយកម្ម និង សំណង់ នឹងបើកការស៊ើបអង្កេតជាមិនខាន ៕ ដោយ : សុផល Tel : 086 911 920 / 012 953 824
