រឿងកាំបូឌៀដែលីចង់ឲ្យលោកគុណញឹមចូលនិវត្តន៍នៅឆ្នាំ២០២៥ត្រូវវាយបកផ្ទួន!ៗ
26-December-2024 / ព័ត៌មានជាតិ
ភ្នំពេញ៖ក្នុងពិធីជួបសំណេះសំណាល និងពិសាអាហារសាមគ្គីជាមួយអ្នកកាសែតនារសៀលថ្ងៃទី៣ឧសភាសម្តេចធិបតី ហ៊ុន ម៉ាណែតនាយករដ្ឋមន្ត្រី នៃកម្ពុជា បានថ្លែងថា ការផ្សាយរបស់សារព័ត៌មាន cambodia daily គឺមានចេតនាចង់ឲ្យឯកឧត្តម គុណ ញឹម អគ្គនាយកអគ្គនាយកដ្ឋានគយ និងរដ្ឋាករកម្ពុជា ចូលនិវត្តន៍ឆ្នាំ២០២៥។ សម្តេចធិបតី ហ៊ុន ម៉ាណែត បានបញ្ជាក់ថា "សារព័ត៌មាន cambodia daily បានឃើញឯកសារយើងបង្ហាញហើយ ចាំមើលថា តើសារព័ត៌មាននេះមានវិជ្ជាជីវៈក្នុងការផ្សាយកែកំហុសរបស់ខ្លួនដែរឬទេ ? "។
ការថ្លែងរបស់សម្តេចធិបតី ហ៊ុន ម៉ាណែត គឺបន្ទាប់ពីមានការផ្សាយព័ត៌មានខុសការពិតពីសារព័ត៌មាន cambodia daily ថា ឯកឧត្តម គុណ ញឹម អគ្គនាយកអគ្គនាយកដ្ឋានគយ និងរដ្ឋាករកម្ពុជា បានយកលុយទៅសូកប៉ាន់ភរិយាសម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា ដើម្បីពន្យាពេលចូលនិវត្តន៍រហូតដល់ឆ្នាំ២០២៨។សម្តេចធិបតី ហ៊ុន ម៉ាណែត បានបញ្ជាក់ថា ឯកឧត្តម គុណ ញឹម ត្រូវបន្តដល់ឆ្នាំ២០២៨ ដោយសារតែឯកឧត្តមត្រូវបន្តដឹកនាំការងារគយ ដូចជាការកែទម្រង់ផ្សេងៗ ដើម្បីព្រឹងស្ថាប័នគយ។សម្តេចធិបតី ហ៊ុន ម៉ាណែត បានថ្លែងអរគុណចំពោះប្រជាពលរដ្ឋដែលបានចេញការពារខ្ញ៉ំ និងគ្រួសារ ។
សូមជំរាបថា ចំពោះរឿងនេះត្រូវបានសម្តេចតេជោ ហ៊ុន សែន បានបង្ហោះលើបណ្តាញសង្គមផ្លូវការផងដែរថា "បើចេះឲ្យគេកោតបើឆោតឲ្យគេអាណិត។ហេតុតែប្រឆាំងគ្រប់រឿងបានថ្មីៗនេះកាសែតប្រឆាំងដែលអះអាងថាមាន មន្ត្រីគយនិយាយថាលោកគុណ ញឹម យកលុយមកសូកប្រពន្ធហ៊ុន ម៉ាណែតដើម្បីបានពន្យាអាយុចូលនិវត្តន៍ ដល់ឆ្នាំ២០២៨"។សម្តេចតេជោ ហ៊ុន សែន ប្រធានព្រឹទ្ធសភាកម្ពុជា បានចាត់ទុកការផ្សាយរបស់ខេមបូឌាដេលី ដែលបានផ្សាយបំភ្លៃថា លោក គុណ ញឹម យកលុយទៅសូកលោកជំទាវបណ្ឌិត ពេជ ចន្ទមុន្នី ដើម្បីរក្សាតំណែងដល់ឆ្នាំ២០២៨ គឺជារឿង «ឆោតល្ងង់»។ ឆោតល្ងង់ព្រោះថា ការសម្រេចពន្យារពេលចូលនិវត្តន៍ លោក គុណ ញឹម បានធ្វើឡើងតាំងពីពេលសម្តេចតេជោ នៅកាន់តំណែងមកម្ល៉េះ ដូច្នេះគ្មានអ្វីជាក់ពាក់ព័ន្ធសម្តេចធិបតី ហ៊ុន ម៉ាណែត និងលោកជំទាវបណ្ឌិតនោះឡើយ។
ប្រតិកម្មទៅនឹងការផ្សាយនេះ សម្តេចតេជោ ហ៊ុន សែន បានបញ្ជាក់ថា មុនដំបូងសម្តេចសម្រេចឱ្យលោក គុណ ញឹម ចូលនិវត្តន៍ត្រឹមឆ្នាំ២០២៥ តែក្រោយមកតាមសំណើ របស់ឧបនាយករដ្ឋមន្ត្រី អូន ពន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងពិនិត្យលើភាពចាំបាច់នៃកំណែទម្រង់គយ និងគុណសម្បត្តិរបស់លោក គុណ ញឹម ផងនោះ សម្តេចសម្រេចឱ្យលោក គុណ ញឹម ចូលនិវត្តន៍នៅឆ្នាំ២០២៨។សម្តេចបន្ថែមថា សម្តេចក៏បានសម្រេចឱ្យអគ្គនាយករងពីររូបទៀត បានចូលនិវត្តន៍នៅឆ្នាំ២០២៨ផងដែរ ដើម្បីក្លាយជាក្រុមដឹកនាំបន្តកំណែទម្រង់គយប្រកបដោយជោគជ័យ។សម្តេចតេជោ បានណែនាំឱ្យពិនិត្យលើកាលបរិច្ឆេទ ក្នុងលិខិតបន្ថែមដើម្បីមើលឱ្យឈប់ល្ងង់។ សម្តេចបន្តថា សូមពាក់វ៉ែនតាមើលផងប្រសិនភ្នែកមិនល្អ ជៀសវាងមើលច្រឡំថ្ងៃខែឆ្នាំ។
ករណីយ៍មេគយធំគុណញឹមនេះដែរ អ្នកនាំពាក្យរបស់នាយករដ្ឋមន្ត្រី នៅថ្ងៃទី០២ ខែឧសភា ឆ្នាំ២០២៤នេះ បានចេញសេចក្តីប្រកាសបដិសេដ ចំពោះការផ្សព្វផ្សាយព័ត៌មានប្រឌិតខុសពីការពិតទាំងស្រុងរបស់ ឌី ខេមបូឌា ដេលី ខ្មែរ (The Cambodia Daily Khmer) បានផ្សព្វផ្សាយនូវព័ត៌មាន ប្រឌិតខុសពីការពិតទាំងស្រុង ដោយបានចោទប្រកាន់ថា «ឯកឧត្តម គុណ ញឹម អគ្គនាយក នៃអគ្គនាយកដ្ឋានគយ និងរដ្ឋាករ បានសូកប៉ាន់ លោកជំទាវបណ្ឌិត ពេជ ចន្ទមុនី ភរិយារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដើម្បីពន្យារពេលចូលនិវត្តន៍រហូតដល់ទៅឆ្នាំ២០២៨» ។
ក្រុមអ្នកនាំពាក្យរបស់នាយករដ្ឋមន្ត្រី បានបញ្ជាក់ជូនសាធារណជន ទាំងអស់ដូចខាងក្រោម៖១៖ ក្រុមអ្នកនាំពាក្យរបស់នាយករដ្ឋមន្ត្រី សូមច្រានចោល និងបដិសេដាច់អហង្ការចំពោះព័ត៌មានប្រឌិតដែលបាន ផ្សព្វផ្សាយដោយសារព័ត៌មាន ទីនី ខេមបូឌា ដេលី ខ្មែរ (The Cambodia Daily Khmer) ក្នុងចេតនាទុច្ចរិត ដែលធ្វើឱ្យ សាធារណៈជន មានការភាន់ច្រឡំ និងនាំឱ្យប៉ះពាល់យ៉ាងធ្ងន់ធ្ងរដល់កិត្តិយស សេចក្តីថ្លៃថ្នូរ និងភាពស្អាតស្អំរបស់ លោក ជំទាវបណ្ឌិត ពេជ ចន្ទមុនី ភរិយារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃ ព្រះរាជាណាចក្រកម្ពុជា។
២៖ ក្រុមអ្នកនាំពាក្យរបស់នាយករដ្ឋមន្ត្រី សូមបញ្ជាក់យ៉ាងម៉ឺងម៉ាត់ជូនសាធារណជនជ្រាបថា លោកជំទាវ បណ្ឌិត ពេជ ចន្ទមុនី ពុំបានទទួលសំណូកសូកប៉ាន់ដូចការផ្សព្វផ្សាយចោទប្រកាន់ខុសពីការពិតរបស់សារព័ត៌មាន ឌឹ ខេមបូឌា ដេលី ខ្មែរ (The Cambodia Daily Khmer)នោះទេ។ លោកជំទាវបណ្ឌិត មិនដែលប្រើប្រាស់តួនាទីព្រះគមជា ជាភរិយារបស់ សម្តេចធិបតី ដើម្បីចាត់ចែងការងាររបស់រាជរដ្ឋាភិបាលនោះឡើយ។ ផ្ទុយទៅវិញ លោកជំទាវបណ្ឌិត តែងតែប្រកាន់ខ្ជាប់នូវការបំពេញតួនាទីយ៉ាងល្អប្រសើរ និងឥរិយាបទប្រកបដោយសេចក្តីថ្លៃថ្នូរ ក្នុងនាមជាឧត្តមភរិយារបស់ សម្តេចមហាបវរធិបតីនាយករដ្ឋមន្ត្រី នៃព្រះរាជាណាចក្រកម្ពុជា និងតែងតែធ្វើសកម្មភាពមនុស្សធ៌មជាច្រើន ដើម្បីសង្គមជាតិ និងប្រជាជន។
៣៖ ក្រុមអ្នកនាំពាក្យរបស់នាយករដ្ឋមន្ត្រី សូមថ្កោលទោសយ៉ាងខ្លាំងចំពោះអ្នកសារព័ត៌មាន និងអង្គភាពសារព័ត៌មាន ឌី ខេមបូឌា ដេលី ខ្មែរ (The Cambodia Daily Khmer) ដែលបានផ្សព្វផ្សាយព័ត៌មានប្រឌិតខុសពីការពិតទាំងស្រុងដូច បានលើកឡើងខាងលើ។ នេះមិនមែនជាលើកទី១ទេ ដែលសារព័ត៌មានមួយនេះផ្សព្វផ្សាយព័ត៌មានមិនពិតក្នុងចេតនាទុច្ចរិត ញុះញង់ បំភ្លៃការពិត ក្នុងគោលបំណងមូលបង្កាច់រាជរដ្ឋាភិបាល និងថ្នាក់ដឹកនាំរាជរដ្ឋាភិបាល និងក្រុមគ្រួសារ ដើម្បីបម្រើ បៀបវារៈនយោបាយរបស់ខ្លួន។ ក្រុមអ្នកនាំពាក្យរបស់នាយករដ្ឋមន្ត្រី ស្នើឱ្យអ្នកសារព័ត៌មាន និងអង្គភាពសារព័ត៌មាននេះ បញ្ឈប់ជាបន្ទាន់នូវអំពើថោកទាបបែបនេះបន្តទៀត និងងាកមកប្រកាន់ខ្ជាប់នូវក្រមសីលធម៌វិជ្ជាជីវៈសារព័ត៌មានឱ្យបាន ត្រឹមត្រូវ។
ក្នុងនាមជាប្រមុខរាជរដ្ឋាភិបាលរដ្ឋាភិបាល នីតិកាលទី៧ សម្តេចធិបតី មានសិទ្ធិគ្រប់គ្រាន់ក្នុងការ តែងតាំងផ្លាស់ប្តូរអគ្គនាយក អគ្គនាយកដ្ឋានគយ និងរដ្ឋាករកម្ពុជាគ្រប់ពេលវេលា។ ប៉ុន្តែដោយផ្អែកលើគុណសម្បត្តិរបស់ លោក គុណ ញឹម ដែលជាមន្ត្រីមានបទពិសោធន៍ មានឆន្ទៈនិងមានការខិតខំប្រឹងប្រែង ក្នុងការបំពេញភារកិច្ចជូនប្រទេសជាតិ សម្តេចធិបតី នឹងបន្តគោលការណ៍អនុញ្ញាតជូន លោក គុណ ញឹម ក្នុងការពន្យារការចូលនិវត្តន៍រហូតដល់ឆ្នាំ ២០២៨ បើគ្មានការចាំបាច់ណាមួយក្នុងការកែសម្រួល។សូមបញ្ជាក់ថាតាមច្បាប់សហលក្ខន្តិកៈមន្ត្រីរាជការស៊ីវិលមន្ត្រីរាជរដ្ឋាភិបាលតម្រូវឲ្យចូលនីវត្តន៍នៅអាយុ៦០ឆ្នាំ។ការដាក់ឲ្យចូលនិវត្តន៍នេះគឺធ្វើតាមឋានានុក្រមនៃឋានន្តរសក្តិមន្ត្រីរាជាការដោយព្រះរាជក្រិត្យអនុក្រិត្យ។បើតាមរាជរដ្ឋាភិបាលការទុកលោកគុណញឹមនិងអគ្គនាយករងគយពីរនាក់ទៀតមិនឲ្យចូលនិវត្តន៍គឺដើម្បីកែទម្រង់ស្ថាបន័គយ៕
.jpg&h=97&w=146)
