វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 2475 នាក់
ម្សិលមិញ 3717 នាក់
សរុប 14150808 នាក់
ភ្នំពេញ៖សម្តេចធិបតី ហ៊ុន ម៉ាណែត បានថ្លែងថា “ខ្ញ៉ំមិនសូវចេះមាត់ទេ តែដៃខ្ញ៉ំចេះស៊ីញ៉េ “។ សម្តេចធិបតី ហ៊ុន ម៉ាណែត ថ្លែងបែបនេះបន្ទាប់ពីសម្តេចធិបតីបានចេញបញ្ជាឱ្យគ្រប់គ្រង និងការពារឱ្យបានបឹងទន្លេសាប មិនឱ្យអ្នកណាទន្ទ្រានខុសច្បាប់ធ្វើជាផលប្រយោជន៍ផ្ទាល់ខ្លួនឡើយ ។
ក្នុងឱកាស អញ្ជើញជាអធិបតីភាពក្នុងពិធីបិទសន្និបាតបូកសរុបការងារកសិកម្ម រុក្ខា ប្រមាញ់ និងនេសាទទូទាំងប្រទេសប្រចាំឆ្នាំ២០២៣ និងទិសដៅអនុវត្តឆ្នាំ២០២៤ នារសៀលថ្ងៃទី៣០ ខែមករា ឆ្នាំ២០២៤នេះសម្តេចធិបតី ហ៊ុន ម៉ាណែត បានថ្លែងឱ្យអភិបាលខេត្តទាំង៦ជ៉ំវិញបឹងទន្លេសាបធានាឱ្យបាន នូវការការពារ ចូលរួមទប់ស្កាត់ចូលរួមការពារឱ្យបានដីអភិរក្សបឹងទន្លេសាបតំបន់៣។សម្តេចធិបតី ហ៊ុន ម៉ាណែត បានបញ្ជាក់ថា “ខ្ញ៉ំមិនចង់ប្រើអំណាចចុងប៊ិចទេ តែសូមឱ្យអាជ្ញាធរពាក់ព័ន្ធចូលរួមស្រាវជ្រាវ វែកមុខអ្នកទន្ទ្រានបឹងទន្លេសាប” ។ សម្ដេចធិបតី គូសបញ្ជាក់ថា បើកម្ពុជាមិនការពារបឹងទន្លេសាបទេ កម្ពុជា នឹងបាត់បង់ចំណាត់ថ្នាក់បឹងទឹកសាបដែលធំជាងគេលើពិភពលោក ហើយអាចនឹងក្លាយជាបឹងទឹកសាបដែលតូចជាងគេលើពិភពលោកវិញ។សម្តេចធិបតី ហ៊ុន ម៉ាណែត បញ្ជាឱ្យចុះបញ្ជីដីធ្លីជាប្រព័ន្ធនៅជុំវិញតំបន់បឹង ទន្លេសាបជូនប្រជាពលរដ្ឋនៅទីនោះ ឱ្យបានលឿន ច្បាស់លាស់ និងឱ្យចប់សព្វគ្រប់។
ក្រៅពីការព្រមានប្រើចុងប៊ិចដោះស្រាយបញ្ហាស្ពឹកស្រពន់របស់មន្ត្រី សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍ជាអាទិ ៖ណែនាំ ក្រសួងពាក់ព័ន្ធដែលកំពុងតាមដានត្រូវ វាយតម្លៃយ៉ាងយកចិត្តទុកដាក់ ចំពោះបញ្ហាគ្រោះរាំងស្ងួត កង្វះខាតទឹកប្រើប្រាស់ធ្វើស្រែចម្ការរបស់ប្រជាពលរដ្ឋនៅតាមបណ្ដាខេត្ត និងធ្វើការ ជួយសង្គ្រោះ បន្ទាន់លើបញ្ហានេះ។សម្ដេចធិបតី បានគូសបញ្ជាក់ថា រដ្ឋាភិបាលបន្តមិនយកពន្ធដីកសិកម្ម ដីស្រែជាលក្ខណៈគ្រួសារ ការនាំចូលសម្ភារៈកសិកម្ម កសិផលផលិតកម្ម កសិផលកសិកម្ម។សម្ដេចធិបតី ហ៊ុន ម៉ាណែត បញ្ជាក់ថា គោលការណ៍អនុគ្រោះពន្ធ ដែលរាជរដ្ឋាភិបាលអាណត្តិទី៧ បន្តកិច្ចការមួយចំនួន និងកិច្ចការមួយចំនួនទៀតដាក់បន្ថែម៖ ១. រដ្ឋាភិបាលបន្តមិនយកពន្ធដីកសិកម្ម ដីស្រែជាលក្ខណៈគ្រួសារ ការនាំចូលសម្ភារកសិកម្ម កសិកផលផលិតកម្ម កសិផលកសិកម្ម។ ២. ការលើកលែងអាករតម្លៃបន្ថែមលើមុខទំនិញដែលជាអាហារជាមូលដ្ឋានសម្រាប់ប្រជាពលរដ្ឋរហូតដល់ឆ្នាំ២០២៨។ ៣. លើកទឹកចិត្តផ្នែកពន្ធដារ ២ឆ្នាំបន្តទៀត រហូតដល់ចុងឆ្នាំ២០២៥ ចំពោះសហគ្រាសដែលផលិត ផ្គត់ផ្គង់ក្នុងស្រុកនូវទំនិញ ឬសេវាកម្ម ដែលធ្វើការដាំដុះ ផលិត ឬនាំចេញនូវផលិតផល ១៤មុខ មានស្រូវ អង្ករ ពោត សណ្ដែក ម្រេច ដំឡូងមី គ្រាប់ស្វាយចាន់ទី ជ័រ កៅស៊ូ មៀនប៉ៃលិន ស្វាយ ចេក ការចិញ្ចឹមសត្វ វារីវប្បកម្ម និងផលិតផលដូងប្រេងក្នុងស្រុកជាវត្ថុធាតុដើម សម្រាប់ផលិតចំណីសត្វ។
សម្ដេចធិបតី បាន ណែនាំទៅ អគ្គនាយកដ្ឋានពន្ធដារ ត្រូវរៀបចំបញ្ជីទាក់ទង កសិផល អាហារទំនិញ ដែលជាអាហារមូលដ្ឋានសម្រាប់ការរស់នៅប្រចាំថ្ងៃរបស់ប្រជាពលរដ្ឋដល់ ឆ្នាំ២០២៨។ នេះសំដៅថា មិនត្រឹមតែគិតគូរកសិករទេ គឺដល់អ្នកប្រើប្រាស់តែម្ដង ព្រោះផលិតផលកសិកម្ម គឺជាការចាំបាច់ ក្នុងការទ្រទ្រង់ជីវិត។សម្ដេចធិបតី ថ្លែងបញ្ជាក់ថា ដោយសារតម្លៃស្រូវបានថ្លៃ ជាហេតុនាំឱ្យប្រជាកសិករ សម្រុកធ្វើស្រូវប្រាំងលើសផែនការ នឹងធ្វើឱ្យខ្វះខាតទឹកស្រោចស្រព។ សម្ដេចធិបតី បានថ្លែងអំណរគុណដល់អាជ្ញាធរដែលបានខ្នះខ្នែងជួយអន្តរាគមន៍សង្គ្រោះស្រូវប្រាំងរបស់ប្រជាកសិករនៅតាមបណ្តាខេត្តបានទាន់ពេលវេលា។
សម្ដេចធិបតី ថ្លែងថា ក្រោយពេលផ្អាកការនាំចូលសាច់បង្កកមួយរយៈពេលខ្លី សម្ដេច ដាក់ក្ដីសង្ឃឹមថា នឹងអាចជួយសម្រាលបន្ទុកដល់កសិករកម្ពុជាដែលចិញ្ចឹមជ្រូក តាមរយៈការបញ្ជារទិញសាច់ក្នុងស្រុក។លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបាន ថ្លែងអំណរគុណចំពោះសម្ដេច មហាបវរធិបតី ហ៊ុន ម៉ាណែត នាយករដ្ឋមន្ត្រី ដែលបានសម្រេចឱ្យផ្អាកជាបណ្ណោះអាសន្ន ក្នុងរយៈ ពេល ៦ ខែ ចំពោះការនាំចូលគ្រឿងក្នុងសត្វពីប្រទេសដទៃមកកម្ពុជា។
សម្ដេចធិបតី ថ្លែងថា ការបើកច្រកថ្មី ការបើកទីផ្សារថ្មីនៅប្រទេស នានាបន្ថែមជាការល្អ ប៉ុន្តែសំខាន់ត្រូវថែរក្សាទីផ្សារចាស់ឱ្យបានល្អ និងរឹងមាំ។ទាក់ទងបញ្ហានេះសម្ដេចធិបតី ថ្លែងថា បើកម្ពុជាអាចផលិត ហើយវេចខ្ចប់នាំចេញបានដោយខ្លួនឯង កម្ពុជានឹងអាចបានផលច្រើនចំណេញច្រើនជាងនាំចេញផលិតផលឆៅចេញ។សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍ថា រដ្ឋាភិបាលនៅតែបន្តផ្ដល់អាទិភាពខ្ពស់ដល់ការអភិវឌ្ឍវិស័យកសិកម្ម តាមរយៈការដាក់ចេញនូវយុទ្ធសាស្ត្របញ្ចកោណដំណាក់កាលទី១ កម្មវិធីនយោបាយអាទិភាពទី៥ ទី៦ ក្នុងការជំរុញប៉ូលសេដ្ឋកិច្ចទី៤ ដោយផ្សារភ្ជាប់ជាមួយកិច្ចសហប្រតិបត្តិការត្បូងពេជ្រ ដោយរួមមានទាំងការអនុគ្រោះពន្ធ ផងដែរ។